„Suku Yehovah èn Suku a Krakti fu En Tu”
„Suku Yehovah èn Suku a Krakti fu En Tu”
„Fu a sei fu Yehovah, den ai fu en e luku a heri grontapu lontu fu sori a tranga fu en fu a bun fu den sma di a heri ati fu den de na en.”—2 KRONIKI 16:9.
1. San na makti, èn fa furu sma gebroiki en?
MAKTI wani taki difrenti sani, soleki a man di wan sma man tiri trawan, a man di sma man basi trawan noso a abi di wan sma abi krakti tapu trawan; a man di wan sma man du wan sani noso sorgu taki a sani e feni presi fu di a man gebroiki krakti na skin fasi, noso krakti na yeye fasi noso krakti na moreel sei fu du san a abi na prakseri. Wi no kan taki bun sani fu a fasi fa libisma gebroiki a makti fu den. Di Lord Acton, wan historia skrifiman, ben taki fu a makti fu den politiek man, dan a ben taki: „Makti abi na krakti fu pori sani èn a abi di sma abi ala makti en wawan, e pori sani dorodoro.” A disiten historia abi bogobogo eksempre di e sori taki den wortu fu Lord Acton tru. Na ini a di fu twenti yarihondro, „a wan libisma tiri a tra libisma nanga ogri bakapisi gi en” leki noiti bifo (Preikiman 8:9). Bun furu leisi ogri-ati tiriman di kruka no ben gebroiki a makti fu den na wan bun fasi èn den kiri milyunmilyun sma. Te sma no e basi makti nanga yepi fu lobi, koni nanga retidu, dan disi na wan sani di kan du sma ogri.
2. Fruklari fa tra eigifasi fu Gado abi krakti tapu a fasi fa Yehovah e gebroiki a makti fu en.
2 Tra fasi leki furu libisma, Gado ala ten e gebroiki a makti fu en gi bun sani. „Fu a sei fu Yehovah, den ai fu en e luku a heri grontapu lontu fu sori a tranga fu en fu a bun fu den sma di a heri ati fu den de na en” (2 Kroniki 16:9). Yehovah e gebroiki a makti fu en tapu wan fasi di a e basi. Pasensi e hori Gado fu strafu den godelowsu sma, fu gi den na okasi fu abi berow. Lobi e pusu en fu meki a son skèin gi ala sortu sma — regtfardikiwan nanga onregtfardikiwan. Retidu sa pusu en te fu kaba fu gebroiki a makti fu en di no skotu, fu meki a wan di tyari dede kon, Satan Didibri, kon tron noti.—Mateus 5:44, 45; Hebrewsma 2:14; 2 Petrus 3:9.
3. Fu san ede na tumusi bigi makti fu Gado kan meki wi frutrow na ini en?
3 A kefalek bigi makti fu wi hemel Tata na wan sani di musu meki wi abi frutrow nanga bribi — na ini den pramisi èn na ini a kibri di a kan gi. Wan nyofi pikin sabi taki noti no kan miti en efu a de na mindri freimde sma èn te a e hori na anu fu en papa steifi, fu di a sabi taki en papa no sa meki no wan enkri ogri sani miti en. Na a srefi fasi, wi hemel Tata, a wan „di abi krakti pasa marki fu frulusu”, sa kibri wi fu ini wan sani di kan pasa nanga wi èn di kan gi wi mankeri ala ten, efu wi e waka nanga en (Yesaya 63:1; Mika 6:8). Èn leki wan bun Tata, Yehovah ala ten e du san a pramisi. A makti fu en di no skotu e gi wi a dyaranti taki a ’wortu fu en, fu tru, sa abi bun bakapisi na ini san en ben seni en go’.—Yesaya 55:11; Titus 1:2.
4, 5. (a) San ben de a bakapisi di Kownu Asa ben frutrow na ini Yehovah sondro fu tweifri? (b) San kan pasa efu wi e frutrow tapu lusu fu libisma gi den problema fu wi?
4 Fu san ede meki a de so prenspari taki wi abi a fasti bosroiti fu no frigiti a kibri di wi hemel Tata e gi? Bika a kan, taki den situwâsi e moro wi èn wi e frigiti pe wi kan feni trutru seiker fasi. Disi wi kan si na ini na eksempre fu Kownu Asa, wan man di furu tron ben frutrow na ini Yehovah. Na a ten fu a tiri fu Asa, wan legre fu wan milyun tranga man fu Etiopia ben kon feti nanga Yuda. Di Asa ben frustan taki a legre fu a feanti ben abi moro tyans fu wini a feti, dan a ben begi: „O Yehovah, efu yu musu yepi, dan a no abi trobi gi yu efu den furu noso no abi makti. Yepi wi, o Yehovah, wi Gado, bika na tapu yu wi e anga, èn na ini yu nen wi kon teige na ipi sma disi. O Yehovah, yu na wi Gado. No meki libisma di man dede tan tanapu teige yu” (2 Kroniki 14:11). Yehovah ben du san Asa ben aksi en èn a ben meki Asa wini krinkrin.
5 Ma baka furu yari fu getrow diniwroko, a frutrow di Asa ben e frutrow na ini a makti fu Yehovah fu frulusu sma, ben kon swaki. Fu puru a kefar fu den srudati fu a noordsei kownukondre Israèl, meki a ben go suku yepi na Siria (2 Kroniki 16:1-3). Awansi a tyuku di a ben gi Kownu Ben-Hadad fu Siria ben abi leki bakapisi taki den ben puru a kefar di Israèl ben de gi Yuda, toku a frubontu di Asa ben sroto nanga Siria ben sori taki a no ben abi frutrow na ini Yehovah. A profeiti Hanani ben aksi en langalanga: „Den Etiopiasma nanga den Libiasma srefi no ben de wan tumusi bigi srudati legre, te yu luku omeni wagi nanga asi-tyariman den abi; èn Yehovah no ben gi den na ini yu anu, fu di yu ben e frutrow na En tapu?” (2 Kroniki 16:7, 8) Ma toku Asa ben weigri fu teki a piri-ai disi (2 Kroniki 16:9-12). Te wi miti problema, dan no meki wi frutrow tapu lusu fu libisma. Na presi fu dati, meki wi sori taki wi e frutrow na ini Gado, bika a frutrow di wan sma e frutrow na ini a krakti fu libisma sa meki wi lasi-ati sondro misi.—Psalm 146:3-5.
Suku a Krakti Di Yehovah E Gi
6. Fu san ede wi musu „suku Yehovah èn a krakti fu en”?
6 Yehovah kan gi den futuboi fu en krakti èn a kan gi den kibri. Bijbel e gi wi a deki-ati fu „suku Yehovah èn suku a krakti fu en” (Psalm 105:4). Fu san ede? Bika te wi e du sani nanga a krakti fu Gado, dan wi sa gebroiki a makti fu wi fu a bun fu tra sma, na presi fu du trawan ogri. Na no wan presi wi kan feni wan moro bun eksempre fu disi leki di fu Yesus Krestes, di ben du furu wondru nanga „a krakti fu Yehovah” (Lukas 5:17). Yesus ben kan gi ensrefi dorodoro fu kon tron wan gudu sma, wan pôpi sma, noso srefi wan kownu di abi ala makti (Lukas 4:5-7). Na presi fu dati, a ben gebroiki a makti di Gado ben gi en, fu gi leri, fu yepi èn fu dresi sma (Markus 7:37; Yohanes 7:46). ¡Disi na wan moi eksempre gi wi trutru!
7. Sortu tumusi prenspari eigifasi wi e kweki te wi e du sani nanga a krakti fu Gado na presi fu du den nanga wi eigi krakti?
7 Moro fara, te wi e du sani nanga „a krakti di Gado e gi”, dan disi sa yepi wi fu tan sori sakafasi (1 Petrus 4:11). Sma di e suku makti gi densrefi e kon tron asranti sma. Wan eksempre fu disi na Kownu Esar-Hadon fu Asiria, di ben e skepi: „Mi abi makti, mi abi ala makti, mi na wan tranga wan, mi bigi srefisrefi, mi bigi kefalek.” Na a tra sei, Yehovah „ben teki den swaki sani fu grontapu, fu meki den tranga sani kisi syen”. Fu dati ede, efu wan tru Kresten e skepi, dan a e skepi na fesi Yehovah, fu di a sabi taki den sani di a du, a no du nanga en eigi krakti. ’Te unu e saka unsrefi na ondro a makti anu fu Gado’, dan Gado sa hei unu trutru.—1 Korentesma 1:26-31; 1 Petrus 5:6.
8. San wi musu du fosi fu kan kisi a krakti fu Gado?
8 Fa wi kan kisi krakti fu Gado? Na a fosi presi, wi musu aksi dati na ini begi. Yesus ben gi den disipel fu en a dyaranti taki en Tata ben sa gi santa yeye na den wan di e aksi en fu dati (Lukas 11:10-13). Luku fa disi ben gi den disipel fu Krestes krakti di den ben frukisi fu gi yesi na Gado, na presi fu gi yesi na den relisi fesiman di ben komanderi den fu no gi kotoigi fu Yesus moro. Di den ben begi fu kisi yepi fu Yehovah, dan A ben piki na opregti begi fu den, èn santa yeye ben gi den krakti fu go doro fu preiki a bun nyunsu sondro frede.—Tori fu den Apostel 4:19, 20, 29-31, 33.
9. Kari wan di fu tu sani di e gi yeye krakti, èn kari wan eksempre fu den Buku fu Bijbel fu sori taki a e yepi trutru.
9 Na a di fu tu presi, wi kan kisi krakti na yeye fasi fu Bijbel (Hebrewsma 4:12). A krakti fu a Wortu fu Gado ben de krin fu si na ini den dei fu Kownu Yosia. Ala di a kownu disi fu Yudea ben puru den heiden kruktu gado kaba fu a kondre, toku a feni di den ben feni a Wet fu Yehovah na ini a tempel sondro fu fruwakti dati ben pusu en fu wroko nanga moro faya na a programa disi fu krin sani. * Baka di Yosia srefi ben leisi a Wet gi a pipel, dan a heri nâsi ben sroto wan frubontu nanga Yehovah, èn den ben bigin nanga moro faya na a di fu tu programa teige na anbegi fu den kruktu gado. A moi bakapisi fu a kenki di Yosia ben tyari kon ben de taki „ala den dei fu en den no ben drai baka fu a waka na baka Yehovah”.—2 Kroniki 34:33.
10. San na wan di fu dri fasi fu kisi krakti fu Yehovah, èn fu san ede a fasi disi prenspari?
10 A di fu dri sani, na taki wi e kisi krakti fu Yehovah nanga yepi fu Kresten demakandra. Paulus ben gi Kresten a deki-ati fu abi a gwenti fu fisiti den konmakandra fu gi „deki-ati fu sori lobi èn du bun wroko” èn fu gi makandra deki-ati (Hebrewsma 10:24, 25). Di Petrus ben komoto na strafu-oso na wan wondru fasi, dan a ben wani de nanga den brada fu en èn fu dati ede a ben go langalanga na a oso fu a mama fu Yohanes Markus, pe „furu sma ben kon makandra èn ben e begi” (Tori fu den Apostel 12:12). A no de fu taki dati den alamala ben kan tan na oso èn begi drape. Ma den ben frukisi fu kon makandra fu begi èn fu gi makandra deki-ati na ini a muilek ten dati. Pikinmoro na a kaba fu a langa èn kefalek takru waka fu Paulus go na Rome, a ben miti wan tu brada na ini Puteoli èn baka dati a ben miti trawan di ben waka kon fu miti en. San a ben du? „Di Paulus ben si den [a lasti grupu], dan a ben taki Gado tangi èn a ben kisi deki-ati” (Tori fu den Apostel 28:13-15). A ben kisi krakti fu di a ben de baka nanga kompekresten. Wi tu e kisi krakti te wi abi demakandra nanga kompekresten. So langa wi fri èn wi kan abi demakandra nanga makandra, wi no musu pruberi fu waka wi wawan na tapu a smara pasi di e tyari wi go na a libi.—Odo 18:1; Mateus 7:14.
11. Kari wan tu situwâsi pe „a krakti di e pasa san de normaal” de spesrutu fanowdu.
11 Te wi abi a gwenti fu begi, fu studeri Gado Wortu èn fu abi demakandra nanga kompe-bribiman, dan wi e „tan kisi krakti na ini Masra èn na ini a makti fu en tranga” (Efeisesma 6:10). Sondro tweifri, wi alamala abi „krakti na ini Masra” fanowdu. Son wan e pina fu siki di e swaki wan sma, trawan e pina fu den takru bakapisi fu na owrudei fu den noso fu di den lasi a patna fu den di den ben abi den heri libi langa (Psalm 41:3). Trawan e frudrage a gens di wan patna di no de na bribi e gens den. Papa nanga mama, spesrutu den wan di no abi patna kan feni taki fu du wan heri dei wroko ala di den e kweki wan osofamiri, na wan frantwortu di e weri den srefisrefi. Yongu Kresten abi a krakti fanowdu fu kakafutu gi a druk fu den speri fu den èn fu weigri fu gebroiki drug èn fu du hurudu. No wan sma musu draidrai fu aksi Yehovah fu gi en „a krakti di e pasa san de normaal” so taki a kan kakafutu gi den sortu tyalensi disi.—2 Korentesma 4:7.
„A E Gi Den Wan Di Weri, Krakti”
12. Fa Yehovah e yepi wi na ini a Kresten diniwroko?
12 Moro fara, Yehovah e gi den dinari fu en krakti te den e du a diniwroko fu den. Wi e leisi na ini a profeititori fu Yesaya: „A e gi den wan di weri, krakti, èn a wan di no abi dinamik krakti a e gi krakti pasa marki. . . . Den wan di e howpu tapu Yehovah, o kisi krakti baka. Den sa opo go na loktu nanga den frei neleki di fu aka. Den sa lon èn den no sa kon swaki; den sa waka èn den no sa weri” (Yesaya 40:29-31). Na apostel Paulus srefi ben kisi krakti fu du a diniwroko fu en. A bakapisi ben de taki a diniwroko fu en ben du bun. A ben skrifi gi den Kresten na ini Tesalonika taki: „A bun nyunsu di wi e preiki, no ben kon na unu nanga wortu wawan, ma so srefi nanga krakti èn nanga santa yeye” (1 Tesalonikasma 1:5). A preikiwroko fu en èn a gi di a ben gi leri ben tyari bigi kenki kon na ini a libi fu den wan di ben arki en.
13. San ben gi Yeremia a krakti fu horidoro ala di a ben kisi gens?
13 Te wi abi fu du nanga wan yeye fu mi-no-ke fasi na ini a kontren fu wi — wan kontren pe wi preiki kande furu yari ibritron baka nanga pikinso bakapisi, — dan wi ben kan lasi-ati. Na a srefi fasi Yeremia ben lasi-ati fu di a ben abi fu du nanga gens, spotu nanga wan mi-no-ke fasi. „Mi no e go taki moro fu [Gado], èn mi no sa taki na ini en nen moro”, a ben taigi ensrefi. Ma a no ben man tan tiri. A boskopu fu en „ben de leki wan faya di ben leti na ini [en] bonyo” (Yeremia 20:9). San ben gi en krakti baka ala di a ben abi fu du nanga someni gens? „Yehovah ben de nanga mi neleki wan kefalek maktiwan”, Yeremia ben taki (Yeremia 20:11). A frustan di Yeremia ben frustan taki a boskopu fu en èn a wroko di Gado ben gi en ben prenspari tumusi, ben meki a ben handri bun di Yehovah ben gi en deki-ati.
A Makti fu Hati Sma èn a Makti fu Dresi Sma
14. (a) O makti a tongo de? (b) Gi eksempre di e sori sortu ogri a tongo kan du.
14 A no ala makti di wi abi e kon langalanga fu Gado. Fu eksempre, a tongo abi a makti fu hati sma èn so srefi fu dresi sma. „Dede nanga libi de na ini a makti fu a tongo”, Salomo e warskow (Odo 18:21). A bakapisi fu a syatu takimakandra di Satan ben abi nanga Eva e sori omeni ogri den wortu fu sma du (Genesis 3:1-5; Yakobus 3:5). Wisrefi kan du furu ogri nanga wi tongo. Te sma e taki o fatu wan yongu umapikin de ala di den e du disi na wan fasi fu broko en saka, dan dati kan meki taki a no wani fu nyan moro srefisrefi. A taki di wan sma e taki wan ogri-ati lei baka sondro fu denki, ben sa kan pori wan matifasi di yu abi wan langa ten kaba. Iya, sma musu basi a tongo.
15. Fa wi kan gebroiki wi tongo fu tranga sma èn fu dresi den?
15 Ma a tongo kan tranga wan sma èn kan pori wan sma so srefi. Wan odo na ini Bijbel e taki: „Wan sma de di e taki sondro fu denki, neleki nanga den dyuku fu wan feti-owru, ma a tongo fu den koniwan na wan dresi” (Odo 12:18). Koni Kresten e gebroiki a makti fu a tongo fu trowstu den wan di brokosaka èn den wan di e pina fu di wan lobiwan fu den dede. Wortu di e sori taki yu e firi gi trawan kan gi den tini di e feti nanga na ogri druk fu speri, deki-ati. Wan sma di e denki dipi bifo a e gebroiki en tongo kan gi den owru brada nanga sisa a dyaranti taki wi abi den fanowdu èn taki wi lobi den ete. Switi wortu kan meki den sikiwan firi moro bun. Na tapu fu ala, wi kan gebroiki a tongo fu wi fu prati a krakti Kownukondre boskopu nanga ala sma di wani arki. Wi abi a makti fu meki a bun nyunsu fu a Wortu fu Gado bekènti, efu wi ati de na ini a tori. Bijbel e taki: „No tapu yusrefi fu du bun gi den wan di musu kisi dati, te a de ini a makti fu yu anu fu du dati.”—Odo 3:27.
Gebroiki Makti na wan Yoisti Fasi
16, 17. Fa owruman, papa nanga mama, trowmasra èn wefi kan waka na baka Yehovah te den e gebroiki a makti di Gado gi den?
16 Ala di Yehovah na a almaktiwan, toku a e tiri a gemeente nanga lobi (1 Yohanes 4:8). Kresten opziener e waka na en baka te den e sorgu gi na ipi fu Gado na wan lobi fasi te den e gebroiki a makti fu den bun èn no na wan fowtu fasi. A tru taki son leisi den opziener musu „piri-ai, gi strafu, frumane”, ma den e du disi „nanga furu langa pasensi èn nanga a koni fu gi sma leri” (2 Timoteus 4:2). So bun, den owruman e denki dipi doronomo fu den wortu di na apostel Petrus ben skrifi gi den wan di abi makti na ini a gemeente: „Wei na ipi fu Gado di de na ondro un sorgu, no nanga dwengi, ma fu di unu de klariklari; no fu di unu lobi kisi wini na wan kruka fasi, ma nanga faya; no leki sma di e basi den wan di de a gudu fu Gado, ma fu di unu e sori taki unu de eksempre gi na ipi.”—1 Petrus 5:2, 3; 1 Tesalonikasma 2:7, 8.
17 So srefi papa nanga mama èn trowmasra abi makti di Yehovah gi den, èn den musu gebroiki a makti disi fu yepi trawan, kweki pikin, èn fu sori lobi (Efeisesma 5:22, 28-30; 6:4). Na eksempre fu Yesus e sori taki den kan gebroiki makti bun na wan lobi fasi. Efu trangaleri de na ini balansi èn e gi na a srefi fasi doronomo, dan den pikin no sa lasi-ati (Kolosesma 3:21). Trowlibi e kon moro bun te den Kresten trowmasra e du den wroko leki edeman na wan lobi fasi èn te den wefi abi dipi lespeki gi na edeman wroko fu a masra fu den, na presi taki den e pasa a makti di Gado gi den fu abi krakti na tapu sani, fu basi trawan noso fu du san den wani.— Efeisesma 5:28, 33 ; 1 Petrus 3:7.
18. (a) Fa wi kan waka baka na eksempre fu Yehovah fu basi a tongo? (b) Sortu sani den wan di abi makti sa pruberi fu gi den sma di de na ondro den sorgu?
18 Den wan di kisi makti na ini na osofamiri èn na ini a gemeente musu luku bun spesrutu taki den e basi na atibron fu den, fu di atibron e meki wan sma e frede na presi fu meki a abi lobi. A profeiti Nahum ben taki: „Yehovah no e atibron esi èn a tranga na ini makti” (Nahum 1:3; Kolosesma 3:19). A basi di wi e basi wi atibron e sori taki wi tranga, ala di a sori di wi e sori atibron na wan faya fasi na wan buweisi fu swakifasi (Odo 16:32). A marki di poti na ini na osofamiri èn na ini a gemeente na fu kweki lobi — lobi gi Yehovah, lobi gi makandra, nanga a lobi gi bun gronprakseri. Lobi na a moro tranga banti fu wánfasi nanga a moro tranga sani di e pusu wi fu du san reti.—1 Korentesma 13:8, 13; Kolosesma 3:14.
19. Sortu dyaranti di e gi sma trowstu Yehovah e gi, èn fa wi musu handri tapu dati?
19 Te wi sabi Yehovah dan wi e erken en makti. Nanga yepi fu Yesaya, Yehovah ben taki: „¿Yu no kon sabi noso yu no yere? Yehovah, a Kriaman fu den moro farawe presi fu grontapu, na wan Gado te ten di no skotu. A no e weri noso en skin no e kon hebi” (Yesaya 40:28). A makti fu Yehovah no man kaba. Efu wi e frutrow tapu en èn no tapu wisrefi, dan a no sa drai baka gi wi. A e gi wi a dyaranti: „No frede, bika mi de nanga yu. No luku lontu nanga fruwondru, bika mi na yu Gado. Mi wani tranga yu. Mi wani yepi yu trutru. Mi wani hori yu trutru bun steifi nanga mi reti-anu fu regtfardikifasi” (Yesaya 41:10). Fa wi musu handri tapu a lobi-ati fasi fa Yehovah e sorgu wi? Meki wi, neleki Yesus gebroiki ala ten awansi sortu makti Yehovah e gi wi fu yepi èn fu tranga trawan. Meki wi basi wi tongo so taki wi kan dresi sma, na presi fu hati den. Èn meki wi tan na ai na yeye fasi ala ten, tanapu kánkan na ini bribi, èn kon tranga na ini a makti fu wi Gran Kriaman, Yehovah Gado.—1 Korentesma 16:13.
[Futuwortu]
^ paragraaf 9 Soleki fa a sori, dan den Dyu ben feni na owru kopi fu a Wet fu Moses, di den ben kibri na ini a tempel furu yarihondro na fesi.
¿Yu Kan Tyari Disi Kon na Krin?
• Fa Yehovah e gebroiki a makti fu en?
• Na sortu fasi wi kan kisi a krakti fu Yehovah?
• Fa sma musu gebroiki a makti fu a tongo?
• Fa a makti di Gado e gi kan de wan blesi?
[Aksi fu a tori disi]
[Prenki na tapu bladzijde 15]
Yesus ben gebroiki a krakti fu Yehovah fu yepi trawan
[Prenki na tapu bladzijde 17]
Wi abi a makti fu meki a bun nyunsu fu a Wortu fu Gado bekènti efu wi ati de ini a tori