¿Bijbel Abi wan Sikrit Boskopu Di Kibri?

SO WAN tu yari baka di den kiri Yitzhak Rabin, a Fosi Ministri fu Israèl na ini 1995, dan wan nyunsuman ben taki dati nanga yepi fu a computer, a ben feni sani di ben sori na fesi taki a sani dati ben o pasa. Disi ben kibri na ini den Hebrew Bijbel wortu di sma ben skrifi biginbigin. Nyunsuman Michael Drosnin ben skrifi taki a ben pruberi fu warskow a fosi ministri moro leki wan yari bifo sma kiri a ministri, ma a warskow ben de fu soso.

Tra buku nanga artikel kon na doro now di e taki dati a sikrit boskopu disi di kibri na wan krin buweisi taki na Gado ben meki sma skrifi Bijbel. ¿So wan sikrit boskopu de trutru? ¿Wan sikrit boskopu di kibri musu de a fondamenti di e meki sma bribi taki na Gado meki sma skrifi Bijbel?

¿A De Wan Nyun Prakseri?

A prakseri taki wan sikrit boskopu de di kibri na ini Bijbel, a no wan nyun sani. A de wan prenspari leri na ini a Kabala, noso den dangratori soleki fa den Dyu gwenti den. Den leriman fu a Kabala e taki dati a fondamenti fruklari fu den Bijbel wortu, a no a trutru fruklari. Den e bribi taki Gado ben gebroiki den aparti letter fu den wortu na ini a Hebrew Bijbel leki simbôl di e tyari wan moro bigi waarheid kon na krin, efu sma e frustan en na wan yoisti fasi. Soleki fa den e si en, dan ibri Hebrew letter èn a presi pe a letter e tanapu na ini Bijbel, na Gado ben poti en so fu di a ben abi wan spesrutu marki na prakseri.

Jeffrey Satinover, wan sabiman di e ondrosuku a sikrit boskopu fu Bijbel, e taki dati den Dyu disi di e bribi na ini dangratori denki taki den Hebrew letter di sma ben gebroiki fu skrifi a tori na ini Genesis di e taki fu a ten di Gado kria sani, abi wan bigi dangra krakti na ini. A e skrifi: „Fu taki en syatu, Genesis a no soso wan tori di e fruteri wi wan sani; a de a wrokosani srefi di Gado ben gebroiki fu kria sani, wan plan ini a prakseri fu Gado di kon na krin na wan trutru fasi.”

Bachya ben Asher fu Saragossa, Spanyorokondre, wan rabi fu a di fu 13 yarihondro di ben e leri sma a Kabala, ben skrifi fu wan tu tori di ben kibri èn di ben tyari kon na krin gi en fu di a ben leisi ibri di fu 42 letter fu wan pisi fu Genesis . A fasi disi fu dyompo letter akruderi wan spesrutu sistema fu pruberi fu feni den boskopu di kibri, na a gron fu a disiten leri di e taki fu a sikrit boskopu fu Bijbel.

 Computer „E Tyari” a Sikrit Boskopu „Kon na Krin”

Bifo a ten fu a computer, libisma no ben man du furu fu ondrosuku den Bijbel wortu na a fasi disi. Ma na ini augustus 1994, a tijdschrift Statistical Science ben tyari wan artikel kon na doro pe Eliyahu Rips fu a Jerusalem’s Hebrew University nanga den sma di ben e ondrosuku sani makandra nanga en, ben taki wan tu sani di ben fruwondru sma. Den ben fruklari taki fu di den ben puru ala weti pisi na mindri den letter èn fu di den ben gebroiki wan sistema pe den ben e dyompo den letter fu den Hebrew wortu na ini Genesis na fasti presi, meki den ben feni den nen fu 34 barinen rabi di ben kibri na ini den wortu. Krosibei fu den nen fu den rabi, den ben feni tra tori tu soleki a dei di den rabi ben gebore noso dede. * Baka di den ondrosukuman ben ondrosuku a tori disi wan lo leisi, dan den ben tyari a bosroiti fu den kon na doro. Soleki fa a bosroiti disi e taki dan nomru e sori taki den tori di kibri na ini Genesis no ben man kon fu ensrefi — disi na wan buweisi taki na fu espresi Gado ben meki sma kibri sikrit tori na ini Genesis dusundusun yari pasa kaba.

Nyunsuman Drosnin di e gebroiki a fasi disi, ben ondrosuku sani ensrefi fu di a ben suku tori di kibri na ini den fosi feifi buku fu a Hebrew Bijbel. Soleki fa Drosnin e taki, dan a ben feni a nen fu Yitzhak Rabin di ben kibri na ini den Bijbel wortu fu di a ben gebroiki wan sistema di e dyompo ibri 4772 letter. A ben kon si taki te a ben seti den Bijbel wortu na ini lin di ibriwan fu den ben abi 4772 letter, dan a nen fu Rabin (di yu e leisi fu tapusei go na ondro) ben tuka nanga wan lin (Deuteronomium 4:42, di e waka fu a leti-anusei go na a kruktu-anusei) di Drosnin ben vertaal nanga „a kiriman di sa kiri sma”.

Te yu e luku en bun, dan Deuteronomium 4:42 e taki fu wan kiriman di no kiri fu espresi. So bun, furu sma krutu a fasi disi fa Drosnin ben fruklari a tori, èn den ben taki dati sma kan gebroiki a fasi fu en di no gron na tapu sabidensi fu feni den srefi sortu boskopu na ini awansi sortu tekst. Ma Drosnin no ben kenki a fasi fa a ben denki, èn a ben kon nanga a tyalensi disi: „Te den sma di e krutu mi, feni wan boskopu di kibri na ini [a buku] Moby Dick èn di e taki dati sma o kiri wan Fosi Ministri, dan mi o bribi den.”

¿Na wan Buweisi Taki A Kon fu Gado?

Professor Brendan McKay fu na Afdeling Computer Sabidensi na a Nationaal Universiteit fu Australia, ben teki a tyalensi fu Drosnin èn a ben ondrosuku den wortu fu a buku Moby Dick di de na ini na Ingrisitongo finifini na tapu computer. * McKay, di e gebroiki a srefi fasi di Drosnin e taki fu en, e fruteri taki a feni „sani di e taki na fesi” dati sma ben o kiri Indira Gandhi, Martin Luther King, Jr, John F. Kennedy, Abraham Lincoln, nanga trawan. McKay e taki, dati a kon si taki Moby Dick „ben taki na fesi” tu dati sma ben o kiri Yitzhak Rabin.

Ma te wi e go baka na den Hebrew wortu fu Genesis, dan Professor McKay nanga den sma di e wroko makandra nanga en, tyalensi den sani tu di Rips nanga den sma di e wroko makandra nanga en kon feni, baka di den pruberi fu ondrosuku sani. McKay nanga den sma fu en ben feni taki den bakapisi fu na ondrosuku no abi someni fu du nanga wan sikrit boskopu di e kon fu Gado, ma taki moro furu a abi fu du nanga a fasi di den ondrosukuman gebroiki èn a fasi fa den wroko — den ondrosukuman meki den tori fiti moro furu soleki fa densrefi denki taki a musu de. Te now ete sabidensiman e haritaki fu a tori disi.

Wan tra sani e opo ede kon te sma e taki dati den sikrit boskopu dati kibri fu espresi na ini den wortu fu a Hebrew Bijbel di de „standaard” noso di den „ben skrifi biginbigin”. Rips nanga den sma di e ondrosuku sani makandra nanga en, e taki dati di den ben ondrosuku sani, dan den ben gebroiki a „standaard tekst fu Genesis di moro furu sma sabi”. Drosnin e skrifi: „Ala den Bijbel di de now di skrifi na ini a Hebrew tongo di sma ben taki biginbigin de a srefi, te yu e luku den letter wan fru wan.” ¿Ma disi tru? Na presi fu wan „standaard” tekst, den e gebroiki difrenti sortu vertaling fu a Hebrew Bijbel na ini a ten disi èn di gron na tapu difrenti owruten dokumenti. Ala di a boskopu na ini Bijbel no e difrenti, toku den aparti dokumenti no de a srefi te yu luku den letter wan fru wan.

Furu vertaling na ini a ten disi gron na tapu a Codex Leningradensis — a moro owru Hebrew dokumenti fu den Masoreetsma, di de na ini wán pisi ete — di sma skrifi abra krosibei fu a yari 1000 G.T. Ma Rips nanga Drosnin ben gebroiki wan tra tekst, èn dati na a Koren. Shlomo Sternberg, wan Orthodox  rabi di de wan sabiman tapu a kontren fu wiskunde na Harvard University, e fruklari taki „41 letter fu Deuteronomium na ini [a Codex Leningradensis] e difrenti fu a Koren vertaling di Drosnin gebroiki”. Den Dede Se Bukulolo abi pisi fu den wortu fu Bijbel na ini di sma ben skrifi abra moro leki 2000 yari pasa kaba. Nofotron, a spelling fu den bukulolo disi e difrenti furu fu den tekst fu den Masoreetsma di ben meki baka ten. Na wan heri ipi presi na ini son wan fu den bukulolo, den ben poti son letter na a presi pe klinker musu kon, fu di na a ten dati den no ben feni wan sistema ete fu poti penti pe klinker musu kon. Na ini tra bukulolo, den no ben gebroiki someni letter. Te yu e teki ala den Bijbel dokumenti di de, gersi nanga makandra dan dati e sori taki a sani di den wortu na ini Bijbel wani taki, tan a srefi. Ma a e sori krin tu taki na ini ala den dokumenti di de, a spelling nanga den omeni letter di de na ini, e difrenti.

A suku di sma e suku wan sokari sikrit boskopu di kibri na ini Bijbel, e anga fu wortu di no e kenki kwetikweti. Te wán letter kenki dan dati ben sa kan pori a sistema — èn a boskopu krinkrin, efu trutru wan boskopu de. Na ini heri Bijbel, Gado kibri a boskopu fu En so taki noti no pasa nanga a boskopu. Ma a no kibri ibriwan letter, leki a ben e furu en ede nomo nanga pikinpikin tori soleki a kenki di a spelling kenki na ini den someni yarihondro di pasa. ¿Disi no e sori taki a no poti wan boskopu di kibri na ini Bijbel?—Yesaya 40:8; 1 Petrus 1:24, 25.

¿Wi Abi wan Sikrit Boskopu fu Bijbel Fanowdu Di Kibri?

Na apostel Paulus ben skrifi na wan krin fasi taki „na Gado ben meki sma skrifi ala den Buku fu Bijbel nanga yepi fu en santa yeye èn den bun fu gi leri, fu piri-ai gi sma, fu poti sani kon reti, fu gi trangaleri ini regtfardikifasi, so taki a sma di de fu Gado kan koni dorodoro, de srekasreka dorodoro gi ibri bun wroko” (2 Timoteus 3:16, 17). A krin èn eerlijk boskopu di de na ini Bijbel no muilek tumusi fu frustan noso fu libi akruderi en, ma furu sma no wani poti prakseri na en (Deuteronomium 30:11-14). Den profeititori di poti na ini Bijbel sondro fu kibri wan sani e gi wi nofo buweisi fu bribi taki na Gado ben meki sma skrifi en. * Bijbel profeititori no e anga fu a fasi fa sma e denki noso e si sani, soleki fa dati de nanga wan sikrit boskopu di kibri, èn den profeititori no „e kon fu di sma srefi ben tyari [den] kon na krin”.—2 Petrus 1:19-21.

Na apostel Petrus ben skrifi taki „di wi ben meki unu kon sabi a krakti nanga a denoya fu wi Masra Yesus Krestes, dan wi no ben waka baka leitori di sma fruteri na wan koni fasi” (2 Petrus 1:16). A rutu fu a leri di abi fu du nanga wan sikrit boskopu fu Bijbel komopo na ini den dangratori fu den Dyu di e gebroiki fasi di sma kon feni„na wan koni fasi”. Den fasi disi e tapu sma fu si a krin fruklari fu den Bijbel wortu di Gado ben meki sma skrifi. Krinkrin den Hebrew Buku fu Bijbel srefi ben krutu so wan dangra fasi fu du sani.—Deuteronomium 13:1-5; 18:9-13.

¡Iya, fa wi breiti taki wi kisi a krin boskopu fu Bijbel èn den leri di de na ini, di kan yepi wi fu kon sabi Gado! Disi betre trutru moro a pruberi di sma e pruberi fu leri sani fu wi Kriaman fu di den e suku boskopu di kibri. Den boskopu disi na sani di libisma srefi ben fruklari na den eigi fasi èn di den sidon prakseri nanga yepi fu a computer.—Mateus 7:24, 25.

[Futuwortu]