Fa Gado En Yeye E Wroko na ini a Ten Disi?

A BEN malengri sensi a ben gebore. Ibri dei a ben e sidon na a tempel portu di den ben kari Tumusi Moi so taki a ben kan aksi presenti fu sari-ati fu den sma di ben e go na ini a tempel. Ma na wan okasi, a malengri begiman disi ben kisi wan presenti di trutru ben warti moro leki wan tu pikin moni nomo. ¡A ben kon betre!—Tori fu den Apostel 3:2-8.

Ala di den apostel Petrus nanga Yohanes ben de den sma di „ben hari en opo tanapu”, so taki „en ondrofutu . . . ben kon kisi krakti”, toku den no ben teki a grani taki na den ben meki en kon betre. Fu san ede den no ben du dati? Petrus ensrefi ben fruklari: „Man fu Israèl, fu san ede unu e fruwondru fu a sani disi, noso fu san ede unu e luku wi nanga fruwondru, neleki wi meki en waka fu wi eigi krakti ede noso fu di wi gi wisrefi na ini a dini fu Gado?” Fu tru, Petrus èn so srefi Yohanes, ben frustan taki a no ben de fu di den ben makti so, ma a ben de fu Gado en santa yeye ede taki den ben man du so wan sani.—Tori fu den Apostel 3:7-16; 4:29-31.

Na a ten dati, Gado ben meki sma du „krakti wroko” fu sori taki A ben e horibaka gi a nyun Kresten gemeente (Hebrewsma 2:4). Ma baka di den krakti wroko ben doro a marki fu den, dan den ben sa „kon na wan kaba”, na so na apostel Paulus ben taki (1 Korentesma 13:8). * Fu dati ede, na ini a ten disi wi no e si na ini a tru Kresten gemeente taki sma e kon betre fu di Gado komanderi dati, wi no e si profeiti boskopu noso taki ogri yeye e puru na sma tapu.

¿Ma disi wani taki dati a santa yeye fu Gado no e wroko moro? ¡Kwetikweti! Meki wi go luku tra fasi fa Gado en yeye ben wroko na ini a fosi yarihondro èn fa a e wroko na ini a ten fu wi.

„A Yeye fu Waarheid”

Wan fasi fa Gado en santa yeye e wroko na fu meki wi kon sabi sani, fu meki wi frustan sani moro bun, fu tyari waarheid kon na krin. Syatu bifo Yesus dede a ben taigi den disipel fu en: „Mi abi furu sani ete fu taigi unu, ma unu no man tyari den now. Ma te en e doro, a yeye fu waarheid, a sa tiri unu na ini ala waarheid.”—Yohanes 16:12, 13.

Na a Pinksterfesa fu 33 G.T, Gado ben kanti „a yeye fu waarheid” kon na tapu so wan 120 disipel di ben kon makandra na ini wan kamra na tapu sodro na ini Yerusalem èn den ben dopu nanga santa yeye (Tori fu den Apostel 2:1-4). Na apostel Petrus ben de wan fu den sma di ben de na a alayari fesa dati. Petrus di ben furu nanga santa yeye, „ben opo tanapu” èn ben fruklari finifini, noso a ben tyari wan tu tru tori fu Yesus kon na krin. Fu eksempre, a ben fruteri fa „Yesus fu Nasarèt” ben „meki kon hei go na a reti-anu fu Gado” (Tori fu den Apostel 2:14, 22, 33). Gado en yeye ben meki Petrus fruklari sondro frede tu gi den Dyu arkiman fu en: „Meki a heri oso fu Israèl sabi trutru taki Gado ben meki a Yesus disi, di unu ben spikri na wan postu, tron Masra èn Krestes so srefi” (Tori fu den Apostel 2:36). Leki wan bakapisi fu Petrus en boskopu di a ben taki nanga yepi fu Gado en santa yeye, so wan dri dusun sma „ben teki a wortu fu en nanga den heri ati” èn ben dopu. Na so, Gado en santa yeye ben meki den kon sabi waarheid.—Tori fu den Apostel 2:37-41.

Gado en santa yeye ben wroko tu leki wan leriman èn leki wan yeye di ben e memre sma na sani. Yesus ben taki: „A yepiman, a santa yeye, di a Tata sa seni kon na ini mi nen, a wan dati sa leri unu ala den sani èn a sa tyari kon na ini un prakseri baka ala den sani di mi ben fruteri unu.”—Yohanes 14:26.

Fa a santa yeye ben wroko leki wan leriman?  Gado en yeye ben opo a frustan fu den disipel so taki den ben kan frustan moro krin, san ben de den sani di den ben yere fu Yesus, ma di den no ben frustan so bun. Fu eksempre, den apostel ben sabi taki na a krutu fu Yesus, a ben taigi Pontius Pilatus, a Rome tiriman fu Yudea: „Mi kownukondre no de wan pisi fu a grontapu disi.” Toku na a ten di Yesus ben opo go na hemel 40 dei baka dati, dan den apostel ben abi a fowtu denki ete taki Yesus ben o seti a Kownukondre dya na grontapu (Yohanes 18:36; Tori fu den Apostel 1:6). Soleki fa a sori, dan den apostel no ben man frustan dorodoro san den wortu fu Yesus ben wani taki, te leki a kanti di Gado ben kanti en santa yeye go na den tapu na a Pinksterfesa fu 33 G.T.

Gado en yeye ben meki den memre sani tu fu di a ben tyari difrenti leri fu Yesus kon na ini den prakseri baka. Fu eksempre, santa yeye ben yepi den fu kon frustan profeititori di ben abi fu du nanga a dede fu Yesus èn na opobaka fu en moro bun (Mateus 16:21; Yohanes 12:16). A memre di den apostel ben memre den leri fu Yesus, ben meki taki den no ben frede fu horibaka gi a posisi fu den na fesi fu kownu, tiriman, nanga relisi fesiman.—Markus 13:9-11; Tori fu den Apostel 4:5-20.

Boiti dati, Gado en santa yeye ben yepi den fositen Kresten fu feni kontren na ini a diniwroko pe sma ben o arki (Tori fu den Apostel 16:6-10). Gado en yeye ben meki den fositen Kresten abi wan prati tu na a wroko fu skrifi Gado Wortu, Bijbel, gi a bun fu a heri libisma famiri (2 Timoteus  3:16). Fu dati ede, a de krin fu si taki, santa yeye ben wroko na difrenti fasi na ini a fosi yarihondro. Gado no ben gi sma a santa yeye fu du wondru nomo.

Santa Yeye na ini Wi Ten

Na so santa yeye wroko tu gi a bun fu tru Kresten na ini wi ten. Wan pikin grupu fu Bijbel studenti, na Allegheny, Pennsylvania, Amerkankondre, ben kon si disi, na ini a kabapisi fu a di fu 19 yarihondro. Den opregti bijbelstudenti disi ben angri fu kon sabi „a waarheid”.—Yohanes 8:32; 16:13.

Charles Taze Russell, wan memre fu a grupu disi, ben taki fu a feti di a ben feti fu kon sabi waarheid fu den Buku fu Bijbel: „Mi ben e begi . . . taki mi ben kan krin mi ati nanga mi frustan fu ibri firi fu krutu sani na fesi, san ben kan de wan problema èn ben kan meki mi lasi en yeye fu kon frustan sani bun. Gado ben blesi a begi disi di Russell ben begi nanga sakafasi.

Di Russell nanga den kompe fu en ben ondrosuku den Buku fu Bijbel fayafaya, dan den ben kon frustan wan lo sani moro bun. „Wi ben kon frustan,” na so Russell ben fruteri, „taki difrenti sekte nanga grupu ben prati den Bijbel leri na den mindri, èn ben moksi den moro furu nanga sani di libisma ben taki sondro fu abi buweisi gi dati èn nanga libisma fowtu.” A bakapisi ben de san en ben kari „a si di sma e si waarheid na wan fowtu fasi”. Fu tru, den ben beri waarheid fu den Buku fu Bijbel na ondro wan heri ipi heiden leri di ben boro kon na ini Krestenhèit na ini den yarihondro di pasa. Ma nomonomo Russell ben wani kon sabi a waarheid èn meki dati bekènti.

Na ini a tijdschrift Zion’s Watch Tower and Herald of Christ’s Presence, Russell nanga den kompe fu en no ben frede fu krutu den falsi relisi leri di ben gi sma wan fowtu denki fu Gado. Den ben kon si taki — kontrari fu a fasi fa moro furu sma ben si sani na relisi sei — a sili man dede, taki te wi dede dan wi e go na grebi, èn taki Yehovah na a wan enkri tru Gado èn fu dati ede a no de wan pisi fu wan Dri-wánfasi.

Ma soleki fa yu kan prakseri dan den kerki tiriman fu Krestenhèit ben atibron di den falsi leri disi ben tyari kon na krin. Fu di furu Katolik nanga Protestant kerki tiriman ben gridi fu hori den makti posisi fu den, meki den ben orga konmakandra soso fu pori Russell nen. Ma en nanga den kompe fu en no ben lasi-ati. Den ben frutrow taki Gado en yeye ben o tiri den. „A dyaranti di wi kisi fu wi Masra”, na so Russell ben taki, „na taki . . . a santa yeye fu a Tata, di A ben seni kon na ini a nen fu Yesus, wi Frulusuman, Mindriman nanga Edeman, sa de wi tiriman.” ¡Èn a ben tiri den srefisrefi! Den opregti Bijbel Ondrusukuman disi ben tan teki den soifri watra fu waarheid fu Bijbel èn ben meki den bekènti na heri grontapu.—Openbaring 22:17.

Na organisâsi fu Yehovah Kotoigi na ini a ten disi tan waka na baka a tiri di Gado en santa yeye e gi moro leki wan yarihondro kaba. Ala di Yehovah en yeye e meki den Kotoigi frustan profeiti fisyun bun moro nanga moro den e tyari kenki kon di de fanowdu sondro taki sma dwengi den;  fu kan libi akruderi a nyun fasi fa den e frustan sani.—Odo 4:18.

„Unu Sa De Kotoigi fu Mi”

Yesus ben sori wan tra fasi tu fa Gado en santa yeye e wroko, di a ben taigi den disipel fu en: „Unu sa kisi krakti te a santa yeye e kon na un tapu, èn unu sa de kotoigi fu mi . . . te na a moro farawe pisi fu grontapu” (Tori fu den Apostel 1:8). A pramisi fu Yesus taki a ben o gi den disipel fu en„krakti” nanga „santa yeye” so taki den ben man du a wroko di Gado ben gi den, e fiti ete na ini a ten disi.

Leki wan grupu, sma sabi Yehovah Kotoigi fu den preikiwroko ede. (Luku a boksu). Fu tru, Yehovah Kotoigi e meki a boskopu fu waarheid bekènti na ini moro leki 230 kondre nanga èilanti. Awansi sortu situwâsi den e miti, srefi efu a kefar de taki den musu lasi den libi na ini kontren pe sma e feti, toku den e opo den sten nanga deki-ati fu horibaka gi Gado Kownukondre. A faya di den abi gi a Kresten diniwroko, de wan krakti buweisi taki santa yeye e wroko na ini a ten disi. Èn a de krin, taki Yehovah Gado e blesi a tranga muiti di den e du.

Fu eksempre, a yari di pasa, den ben preiki a bun nyunsu fu Gado Kownukondre moro leki wan milyard yuru. San na a bakapisi? So wan 323.439 sma dopu na ini watra fu sori taki ben gi densrefi na ini a dini fu Gado. Boiti dati, Yehovah Kotoigi ben hori 4.433.884 oso-bijbelstudie ala wiki nanga nyun sma di sori belangstelling. Ala nanga ala, den pristeri 24.607.741 buku, 631.162.309 tijdschrift nanga 63.495.728 brochure nanga pikin buku. ¡Disi na wan trutru buweisi taki Gado en santa yeye e wroko!

Gado En Yeye Nanga Yu

Te wan sma e gi yesi na a bun nyunsu, e meki en libi kon de akruderi den markitiki fu Gado, èn e sori bribi na ini a seti fu a lusu-paiman, dan a pasi opo gi en fu abi wan bun matifasi nanga Gado. Na apostel Paulus ben taigi den wan disi: „Gado . . . e poti en santa yeye na ini unu.”—1 Tesalonikasma 4:7, 8; 1 Korentesma 6:9-11.

Te wi abi Gado en yeye dan dati sa tyari furu moi blesi. Sortu blesi? Wan fu den blesi na san Gado Wortu di a meki sma skrifi nanga yepi fu en santa yeye, e taki: „A froktu fu a yeye na lobi, prisiri, vrede, langa pasensi, switifasi, bun-ati, bribi, safri-atifasi, nanga a dwengi di wan sma e dwengi ensrefi” (Galasiasma 5:22, 23). Fu dati ede, Gado en santa yeye na wan tranga krakti di e pusu sma fu du san bun, a e meki wan sma sori eigifasi fu Gado.

Boiti dati, te yu e leisi Bijbel èn e du den sani di yu e leri, dan Gado en yeye kan yepi yu fu gro na ini koni, sabi, inzicht, koni fu man si sani krin, èn frustan. Kownu Salomo ben kisi „furu koni nanga frustan èn bradi ati” fu di a ben suku fu plisi Gado na presi fu libisma (1 Kownu 4:29). Fu di Yehovah ben gi Salomo santa yeye, dan a de krin taki a sa gi den sma di e du muiti fu plisi en na ini a ten disi, santa yeye tu.

Gado en santa yeye e yepi Kresten so srefi fu kakafutu gi Satan nanga den ogri yeye, na ogri seti fu sani disi èn den sondu eigifasi fu na onvolmaakti skin fu den. Fa dati kan? Na apostel Paulus e piki: „Gi ala sani mi abi a tranga fu en di e gi mi krakti” (Filipisma 4:13). Kande santa yeye no e puru tesi, ma a kan yepi yu fu tan frudrage den. Te wi e frutrow tapu Gado en yeye, dan wi kan kisi „krakti di e pasa san de normaal” fu man lusu iniwan problema noso fu kakafutu gi broko-ede.—2 Korentesma 4:7; 1 Korentesma 10:13.

Te yu e luku ala buweisi, dan wi no abi fu tweifri taki Gado en santa yeye e wroko na ini a ten disi. Yehovah en yeye e gi den futuboi fu en krakti fu kotoigi fu den bigi prakseri di A abi. A e tan skèin leti na yeye fasi, èn a e tranga wi bribi, a e yepi wi fu tan loyaal na wi Kriaman. ¡Wi kan de nanga tangi srefisrefi taki Gado tan hori en pramisi fu di a e gi santa yeye na den getrow futuboi fu en na ini a ten disi!

[Futuwortu]

[Faki na tapu bladzijde 10]

San Trawan E Taki fu Yehovah Kotoigi

„Ala di tra kerki e yuru raiman fu hari sma kon na ini den kerki noso den e feti fu lusu tori fu a ten disi soleki homo-sekslibi nanga a puru fu bere, toku den Kotoigi no meki kruderi nanga sma fu di grontapu e kenki doronomo. Te nanga now den orga sani fu man preiki na heri Grontapu.”​—The Orange County Register fu a Distrikt Orange, California, Amerkankondre.

„Te den musu fruteri sma fu a bribi, dan wan tu relisi organisâsi nomo de so fayafaya  . . leki den Yehovah Kotoigi.”​—The Republic fu Columbus, Indiana, Amerkankondre.

„Den na den wan enkri sma di e go oso fu oso nanga ’a bun nyunsu’ èn di e fiti den Bijbel gronprakseri na ini den libi.”—Życie Literackie, Polen.

„Na ini a moro bigi preiki bariwroko di sma oiti sabi, Yehovah Kotoigi tyari Yehovah en boskopu go na heri grontapu.”​—News-Observer, Tamaqua, Pennsylvania, Amerkankondre.

[Prenki na tapu bladzijde 9]

Gado en santa yeye e meki wi frustan sani na yeye fasi moro bun,

. . . e meki moi Kresten eigifasi gro,

. . . èn e yepi wi na ini a preikiwroko na heri grontapu