Poti Prakseri Na a Profeiti Wortu fu Gado
Poti Prakseri Na a Profeiti Wortu fu Gado
„A profeiti wortu meki kon moro fasti gi wi; èn a ben sa bun te unu e poti prakseri na en.”—2 PETRUS 1:19.
1, 2. Sortu eksempre fu wan falsi mesias yu kan fruteri?
FURU yarihondro, falsi mesias pruberi fu taki na fesi san ben o pasa na ini ten di o kon. Na ini a di fu feifi yarihondro G.T., wan man di ben kari ensrefi Moses ben overtoigi Dyu na tapu na èilanti Kreita taki a ben de a mesias èn taki a ben o frulusu den fu a kwinsi di sma ben e kwinsi den. A dei di a ben o frulusu den, den ben waka na en baka fu go na tapu wan hei presi pe den ben man luku abra a Mindrikondre Se. A ben taki dati soso trowe den ben abi fu trowe densrefi go na ini a se nomo, èn leti na den fesi a se ben o prati ensrefi na tu. Wan lo fu den sma disi di ben dyompo go na ini a watra, dede èn a falsi mesias dati ben lowe gowe fu drape.
2 Na ini a di fu 12 yarihondro, wan „mesias” ben sori ensrefi na Yemen. A Moslim kerki edeman, noso tiriman, ben aksi a man fu sori en wan marki leki wan buweisi taki en ben de a mesias. A „mesias” disi ben aksi a Moslim kerki edeman fu koti en ede puru. A ben taki na fesi dati a ben o kisi wan opobaka leti na baka dati èn disi ben o de a marki taki a de a mesias. A Moslim kerki edeman ben feni a prakseri dati bun — èn disi ben de a kaba fu a „mesias” dati.
3. Suma na a tru Mesias, èn san a diniwroko fu en ben sori?
3 Den falsi mesias no man abi bun bakapisi kwetikweti èn den sani di den e taki na fesi no e kon tru kwetikweti tu, ma efu wi e poti prakseri na a profeiti wortu fu Gado, dan dati sa meki taki wi no sa lasi-ati noiti. Furu Bijbel profeititori ben kon tru na ini Yesus Krestes, a tru Mesias. Fu eksempre, na Evangelie skrifiman Mateus di ben teki den wortu fu a profeititori fu Yesaya, ben skrifi: „’¡O kondre fu Seibulon èn kondre fu Naftali, na a se pasi, na abrasei fu a Yordan, Galilea fu den nâsi! a pipel di ben sidon na ini dungru ben si wan bigi leti, èn leti ben skèin na tapu den wan di ben sidon na ini wan kontren fu a skaduw fu dede.’ Sensi a ten dati, Yesus ben bigin preiki èn a ben taki: ’Abi berow, bika a kownukondre fu hemel kon krosibei’” (Mateus 4:15-17; Yesaya 9:1, 2). Yesus ben de a „bigi leti” dati èn a diniwroko fu en ben sori taki en ben de a Profeiti di Moses ben taki fu en na fesi. Den sma di no ben wani arki Yesus, ben o dede.—Deuteronomium 18:18, 19; Tori fu den Apostel 3:22, 23.
4. Fa Yesus ben meki Yesaya 53:12 kon tru?
4 Yesus ben meki den profeitiwortu fu Yesaya 53:12 kon tru so srefi: „A kanti en sili trowe na ini dede srefi èn nanga den sma di pasa a wet den ben teri en; èn ensrefi ben tyari a sondu fu furu sma, èn a ben go dini leki mindriman gi den sma di pasa a wet.” Fu di Yesus ben sabi taki a no ben de langa moro bifo a ben sa musu gi en libi leki wan lusu-paiman, meki a ben tranga a bribi fu den disipel fu en (Markus 10:45). A ben du disi na wan tumusi aparti fasi, fu di a ben gebroiki a transfigurâsi.
A Transfigurâsi E Tranga a Bribi
5. Fa yu ben sa taki nanga yu eigi wortu san na a transfigurâsi?
5 A transfigurâsi ben de wan sani di ben pasa na profeiti fasi. Yesus ben taki: „A Manpikin fu libisma sa kon trutru na ini a glori fu en Tata makandra nanga den engel fu en . . . Fu tru, mi e taigi unu taki son wan fu den sma di e tanapu dya, kwetikweti no sa tesi dede bifo den e si a Manpikin fu libisma e kon na ini en kownukondre” (Mateus 16:27, 28). ¿Son wan fu den apostel trutru ben si Yesus e kon na ini en Kownukondre? Mateus 17:1-7 e taki: „Siksi dei na baka, Yesus ben teki Petrus nanga Yakobus nanga en brada Yohanes go nanga en èn a ben tyari den go na tapu wan hei bergi, pe den ben de den wawan. Èn a ben kisi wan transfigurâsi na fesi fu den.” ¡Fa dati ben de wan tumusi aparti sani fu si! „En fesi ben skèin leki a son èn den tapusei krosi fu en ben kon brenki leki a leti. Èn ¡luku! Moses nanga Elia ben kon na den drape èn ben e taki nanga en.” So srefi, „wan krin wolku ben tapu den”, èn den ben yere Gado en eigi sten e taki: „’ Disi na mi Manpikin, a lobiwan, di mi feni bun; arki en.’ Di den disipel ben yere disi, dan den ben fadon na tapu den fesi èn den ben kon frede srefisrefi. Ne Yesus ben kon na den, a ben fasi den èn ben taki: ’Opo tanapu èn no frede.’”
6. (a) Fu san ede Yesus ben kari a transfigurâsi wan fisyun? (b) Fu sortu sani a transfigurâsi ben de wan prenki?
6 A tumusi aparti sani disi di ben pasa, ben feni presi kande na tapu wan fu den pisi fu Hermonbergi, pe Yesus nanga den dri apostel ben tan a neti dati. Soleki fa a sori, dan a transfigurâsi ben pasa na neti, èn disi ben meki taki a ben de wan tumusi aparti sani fu si. Wan sani di ben meki taki Yesus ben kari en wan fisyun ben de fu di Moses nanga Elia di ben dede langaten kaba, no ben drape trutru. Soso Krestes ben drape trutru (Mateus 17:8, 9). A brenki sani disi di Petrus, Yakobus nanga Yohanes ben si, ben yepi den fu si na fesi fa a glori denoya fu Yesus na ini Kownukondre makti ben o de. Moses nanga Elia e agersi den salfu kompe-erfgenaam fu Yesus, èn a fisyun ben horibaka na wan krakti fasi gi a kotoigi di Yesus ben gi fu a Kownukondre èn fu a tron di a ben o tron kownu.
7. Fa wi sabi taki Petrus ben kan memre a transfigurâsi krinkrin ete?
7 A transfigurâsi ben yepi fu tranga a bribi fu den dri apostel di ben o plèi wan prenspari rol ini a Kresten gemeente. Krestes en fesi di ben e koti faya, den brenki krosi fu en, èn Gado en eigi sten di ben meki bekènti taki Yesus ben de En lobi Manpikin di den ben musu arki — ala den sani disi ben doro a marki fu den heri bun. Ma den apostel no ben musu fruteri no wan sma a fisyun te leki Yesus ben kisi wan opobaka. So wan 32 yari baka dati, a fisyun disi ben de krinkrin ete ini a prakseri fu Petrus. A ben taki fu a fisyun disi èn san a ben wani taki, di a ben skrifi: „Nôno, di wi ben meki unu kon sabi a krakti nanga a denoya fu wi Masra Yesus Krestes, dan wi no ben waka na baka leitori di sma fruteri na wan koni fasi, ma fu di wi ben si en bigi glori nanga wi eigi ai. Bika nanga bigi glori, Gado, a Tata, ben gi Yesus grani nanga glori, di a ben taigi Yesus wortu leki den wan disi: ’Disi na mi manpikin, mi lobiwan, di misrefi feni bun.’ Iya, wi ben yere den wortu disi komoto na hemel di wi ben de nanga en na tapu a santa bergi.”—2 Petrus 1:16-18.
8. (a) Na sortu sani den wortu fu Gado di ben e taki fu en Manpikin, ben poti prakseri? (b) San a wolku di ben de fu si na ini a transfigurâsi ben wani taki?
8 A tumusi prenspari sani ben de a sani di Gado ben meki bekènti: „Disi na mi Manpikin, a lobiwan, di misrefi feni bun; arki en.” Den wortu disi e poti prakseri na Yesus leki a sma di Gado ben poti leki Kownu, èn di ala kriaturu musu gi yesi na en. A wolku di ben tapu den, ben sori taki sma no ben o si a kontru fu a fisyun disi nanga den ai. Soso den sma di e erken „a marki” fu Yesus en denoya di wi no man si nanga ai, ben o si a kontru nanga den ai fu a frustan (Mateus 24:3). Fu taki en leti, a taigi di Yesus ben taigi den fu no fruteri no wan sma a fisyun te leki a ben opo baka na dede, e sori taki Gado ben o hei Yesus èn ben o gi en glori, baka te a ben kisi wan opobaka.
9. Fu san ede a transfigurâsi musu tranga a bribi fu wi?
9 Baka di Petrus ben taki fu a transfigurâsi, dan a ben taki: „Fu dati ede a profeiti wortu meki kon moro fasti gi wi; èn a ben sa bun te unu e poti prakseri na en neleki fa yu e du dati nanga wan lampu di e skèin na ini wan dungru presi, te leki deibroko èn wan deistari opo kon, na ini un ati. Bika na a fosi presi unu sabi disi, taki no wan profeititori fu den Buku fu Bijbel e kon fu di sma srefi ben tyari en kon na krin. Bika noiti profeititori ben kon de fu libisma ede, ma Gado ben meki libisma taki soleki fa santa yeye ben tyari den” (2 Petrus 1:19-21). A transfigurâsi e sori krin taki wi kan frutrow a profeiti wortu fu Gado. Wi musu poti prakseri na a wortu dati èn no na „leitori di sma fruteri na wan koni fasi” èn di no e kon fu Gado noso di a no feni bun. A transfigurâsi musu tranga a bribi di wi e bribi na ini a profeiti wortu fu di a fisyun dati di ben sori Yesus en glori nanga en Kownukondre makti na fesi, tron wan trutru sani. Iya, wi abi krin buweisi taki Krestes de noya na ini a ten disi leki wan hemel Kownu di abi furu makti.
Fa a Deistari E Opo
10. Suma noso san na a „deistari” di Petrus ben taki fu en, èn fu san ede yu e piki so?
10 Petrus ben skrifi: „A ben sa bun te unu e poti prakseri na [a profeiti wortu] neleki wan lampu di e skèin na ini wan dungru presi, te leki deibroko èn wan deistari e opo kon.” Suma noso san na a „deistari”? Soso wán leisi yu man feni a wortu „deistari” na ini Bijbel, èn a wani taki a srefi leki „mamanten stari”. Openbaring 22:16 e kari Yesus Krestes „a krin mamanten star”. Na ini son pisi ten fu a yari, den stari disi na den lastiwan di e opo na a owstusei fu hemel. Den e opo leti bifo a son e kon de fu si, èn na so fasi den e fruteri wi taki wan nyun dei e bigin. Petrus ben gebroiki a wortu „deistari” fu taki fu Yesus baka di A ben kisi Kownukondre makti. ¡Na a ten dati, Yesus ben opo hei na ini a heri universum, so srefi a grontapu fu wi! Fu di en na a Mesias Deistari, meki a e fruteri wi taki wan nyun dei, noso pisi ten e bigin gi a libisma famiri di e gi yesi.
11. (a) Fu san ede 2 Petrus 1:19 no wani taki dati „wan deistari” e opo na ini a trutru ati fu libisma? (b) Fa yu ben sa fruklari 2 Petrus 1:19?
11 Furu sma di e vertaal Bijbel e prakseri taki den wortu fu na apostel Petrus di ben skrifi na ini 2 Petrus 1:19 e taki fu a trutru libisma ati. Na ati fu wan bigisma e wegi soso 250 te 300 gram. Fa Yesus Krestes — di de wan glori yeye kriaturu na hemel now di no man dede — ben kan opo na ini den pikin memre disi fu libisma? (1 Timoteus 6:16) A no de fu taki dati na agersi ati fu wi abi fu du nanga a tori disi, bika nanga dati wi e poti prakseri na a profeiti wortu fu Gado. Ma luku 2 Petrus 1:19 fini, èn yu sa si taki a Nieuwe-Wereldvertaling (Nyun-Grontapuvertaling) e gebroiki komma fu poti den wortu „te leki deibroko èn wan deistari opo kon” di e fruklari wan sani, aparti fu den wortu di ben kari kaba na ini a vers èn fu den wortu „na ini yu ati”. Wi ben sa kan taki a vers disi so: ’Wi meki a profeiti wortu kon moro fasti; èn a bun te unu e poti prakseri na en neleki na wan lampu di e skèin na ini wan dungru presi, dati wani taki, na ini yu ati, te leki deibroko èn wan deistari opo.’
12. Fa a de nanga na ati fu moro furu libisma, ma fa a de nanga trutru Kresten?
12 Fa a de nanga na agersi ati fu moro furu sondu libisma? ¡We, na ati fu den de na dungru na yeye fasi! Ma efu wi na tru Kresten, dan a de neleki wan lampu e skèin na ini wi ati, di ben o dungru efu leti no ben o skèin drape. Soleki fa den wortu fu Petrus e sori, dan disi o pasa te wi e poti prakseri na a profeiti wortu fu Gado di e skèin leti na wi tapu èn di ben o meki trutru Kresten de na ai. A ben o yepi den tu fu si krin te wan nyun dei ben o bigin. Den ben o sabi taki a Deistari ben opo, no na ini a trutru ati fu libisma, ma gi ala sani di Gado kria.
13. (a) Fu san ede wi kan de seiker taki a Deistari opo kaba? (b) Fu san ede Kresten kan horidoro na ini den muilek situwâsi di Yesus ben taki na fesi dati den o pasa na ini a ten fu wi?
13 ¡A Deistari opo kaba! Wi kan de seiker fu dati te wi e poti prakseri na a moi profeititori di e taki fu a denoya fu Yesus. Na ini a ten disi, den sani leki feti di e feti na wan fasi soleki fa sma noiti no si ete, angriten, gronseki, èn a preiki di a bun nyunsu e preiki na heri grontapu, e meki wi si fa a profeititori disi e kon tru (Mateus 24:3-14). Ala di den muilek situwâsi di Yesus ben taki na fesi fu den abi krakti na tapu wi leki Kresten tu, toku wi man horidoro nanga vrede èn nanga prisiri na ini wi ati. Fu san ede? Fu di wi e poti prakseri na a profeiti wortu fu Gado èn wi e bribi na ini den sani di a pramisi gi a ten di e kon. ¡Wi sabi taki wi de na a dromofo fu a moro bun ten di oiti ben de, bika wi doro bun fara kaba na ini „a ten fu a kaba”! (Danièl 12:4) Grontapu de na ini den tumusi muilek situwâsi di Yesaya 60:2 ben taki na fesi: „¡Luku! dungru srefi sa tapu grontapu, èn deki dungru den nationaal grupu.” Fa wan sma kan feni en pasi na ini a dungru disi? Wan sma musu poti prakseri na a profeiti wortu fu Gado na wan sakafasi nownowde, fosi a lati tumusi. Sma di abi wan krin ati musu go na Yehovah Gado, a Sma fu pe a libi nanga a leti komopo (Psalm 36:9; Tori fu den Apostel 17:28). Soso te wan sma e du disi, dan a kan abi trutru leti èn a howpu taki a sa prisiri fu a tumusi moi tamara di Gado abi na prakseri gi libisma di e gi yesi.—Openbaring 21:1-5.
„A Leti Kon na Grontapu”
14. San wi musu du fu si a kontru fu den tumusi moi profeititori di de na ini Bijbel?
14 Bijbel e sori krin taki Yesus Krestes e tiri now leki Kownu. Fu di a kisi makti na ini 1914, meki tumusi moi profeititori sa kon tru ete. Efu wi wani si a kontru fu den, dan wi musu sori taki wi na safri-ati sma di abi bribi na ini Yesus Krestes, di abi berow fu sondu wroko èn fu sondu di wi ben du fu di wi no ben sabi. A no de fu taki, dati den sma di lobi dungru no sa kisi têgo libi. Yesus ben taki: „Disi na a fondamenti fu a krutu, taki a leti kon na grontapu, ma libisma lobi a dungru moro leki a leti, bika den wroko fu den ben godelowsu. Bika a sma di e du tegu sani, no wani si a leti na ai èn a no e kon na a leti, so taki sma no kan krutu den wroko fu en. Ma a sma di e du san tru e kon na a leti, so taki en wroko kan tyari kon na krin leki wroko di a ben du akruderi Gado.”—Yohanes 3:19-21.
15. San sa pasa te wi no e poti prakseri na a frulusu di wi kan kisi fu Gado ben gi wi nanga yepi fu en Manpikin?
15 Na Yesus tyari leti na yeye fasi kon na ini grontapu, èn a de tumusi prenspari fu arki en. Paulus ben skrifi: „Gado, di langaten pasa kaba na furu okasi èn na difrenti fasi ben taki nanga den afo fu wi nanga yepi fu den profeiti, taki nanga wi na a kaba fu den dei disi nanga yepi fu wan Manpikin, di a poti leki erfgenaam fu ala sani” (Hebrewsma 1:1, 2). San sa pasa te wi e drai wi baka gi a frulusu di sma kan kisi fu Gado nanga yepi fu en Manpikin? Paulus ben go doro fu taki: „Efu a wortu di ben taki nanga mofo fu engel, ben sori taki a de fasti, èn ibri fasi fa sma e pasa a wet nanga trangayesi ben kisi strafu akruderi retidu, dan fa wi sa lon komoto efu wi no poti prakseri na so wan bigi frulusu, di den ben meki bekènti ini a bigin nanga yepi fu wi Masra èn di den sma di yere en ben sori wi taki a tru, ala di Gado ben gi kotoigi tu nanga yepi fu marki èn so srefi nanga wondruwroko nanga difrenti krakti wroko èn nanga a prati di a prati santa yeye akruderi a wani fu en?” (Hebrewsma 2:2-4) Iya, Yesus na a moro prenspari sma di ben meki a profeiti wortu bekènti.—Openbaring 19:10.
16. Fu san ede wi kan frutrow dorodoro na tapu ala den profeititori fu Yehovah Gado?
16 Soleki fa a skrifi, dan Petrus ben taki: „No wan profeititori fu den Buku fu Bijbel e kon fu di sma srefi ben tyari en kon na krin.” Sondro yepi, libisma no kan taki tru profeititori, ma wi kan frutrow dorodoro na tapu ala den profeititori fu Gado. Na Yehovah Gado srefi na a rutu fu den. A gebroiki en santa yeye fu meki den futuboi fu en frustan fa den profeititori fu Bijbel e kon tru. Iya, wi e taigi Yehovah tangi trutru taki wi si fa furu fu den profeititori disi kon tru sensi a yari 1914. Èn wi sabi seiker taki den tra profeititori di e taki fu a kaba fu na ogri seti fu sani disi sa kon tru tu. A de tumusi prenspari taki wi e tan poti prakseri na den sani di Gado fruteri na fesi, ala di wi e meki a leti fu wi skèin (Mateus 5:16). ¡Fa wi breiti taki Yehovah e meki ’a leti skèin gi wi na ini a deki dungru’ di e tapu grontapu na ini a ten disi!—Yesaya 58:10.
17. Fu san ede wi abi leti na yeye fasi fu Gado fanowdu?
17 Trutru leti e meki taki wi e si. A e meki tu taki furu sani e gro di e gi wi wan lo difrenti sortu nyanyan. Sondro trutru leti wi no kan libi. Fa a de nanga leti na yeye fasi? A e gi wi tiri èn a e sori wi a tamara soleki fa Bijbel, a Wortu fu Gado, e taki fu en (Psalm 119:105). Fu lobi ede, meki Yehovah Gado ’e seni en leti nanga en waarheid kon’ (Psalm 43:3). Fu tru wi musu sori taki wi e warderi trutru den sani disi di wi e kisi. Fu dati ede, meki wi du ala san wi man fu teki a leti fu „a glori sabi fu Gado” na ini wi, so taki a leti disi e skèin na ini na agersi ati fu wi.—2 Korentesma 4:6; Efeisesma 1:18.
18. San a Deistari fu Yehovah de klariklari fu du now?
18 ¡Fa a de wan bigi blesi taki wi sabi taki na ini 1914, Yesus Krestes, a Deistari, ben opo na ini a heri universum èn taki a ben bigin fu meki a fisyun fu a transfigurâsi kon tru! A Deistari fu Yehovah de noya now, a de klariklari fu du san Gado ben abi na prakseri fu meki a transfigurâsi kon tru moro fara, ini „a feti fu a bigi dei fu Gado na Almaktiwan” (Openbaring 16:14, 16). Baka te na owru seti disi wai puru, dan Yehovah sa meki en pramisi fu den „nyun hemel nanga wan nyun grontapu” kon tru pe wi kan prèise en fu têgo leki a Soeverein Masra fu na universum èn a Gado fu tru profeititori (2 Petrus 3:13). So langa a bigi dei dati no doro ete, meki wi tan waka ini a leti fu Gado fu di wi e poti prakseri na a profeiti wortu fu Gado.
San Yu Ben Sa Piki?
• San yu ben sa taki fu a transfigurâsi fu Yesus?
• Fa a transfigurâsi e tranga bribi?
• Suma noso san na a Deistari fu Yehovah, èn o ten a ben opo?
• Fu san ede wi musu poti prakseri na a profeiti wortu fu Gado?
[Aksi fu a tori disi]
[Prenki na tapu bladzijde 13]
¿Yu kan tyari kon na krin san a transfigurâsi wani taki?
[Prenki na tapu bladzijde 15]
A Deistari opo kaba. ¿Yu sabi fa en o ten?