San Yu Sabi fu den Sani Di Heks E Du?

¡DEN sani di heks e du! ¿San yu e denki te yu e yere den wortu dati?

Gi furu sma, den wortu disi abi fu du nanga kruktu bribi èn nanga anansitori, èn sma no e si den leki wan seryusu sani. Gi den sma disi, dan den sani di heks e du na sani di de soso na ini a prakseri fu sma — te den e denki fu disi, dan den e si owru heks di e weri wan dyakti di den kan tapu den ede nanga dati èn di e poti freifrei fu fremusu na ini wan patu di e kuku, di e kenki sma kon tron todo èn di e frei na loktu na neti na tapu sisibitiki, ala di den e kroku na wan ogri-ati fasi.

Ma gi tra sma, den sani di heks e du a no wan lafutori. Son ondrosukuman e taki dati moro leki afu fu den sma di e libi na grontapu e bribi taki heks na trutru sma èn taki den kan abi krakti tapu a libi fu trawan. Milyunmilyun sma e bribi taki den sani di heks e du na takru sani, taki den de kefalek, èn taki sma musu frede den sani disi srefisrefi. Fu eksempre, wan buku di e taki fu relisi na ini Afrika e fruklari: „A bribi di sma e bribi na ini a fasi fa obia e wroko nanga a kefar fu takru obiawroko, towfruwroko nanga bonu, abi en rutu dipi na ini a libi fu Afrika . . . Na ini a libimakandra fu den, obiaman nanga towfruman na sma di trawan no wani si na ai srefisrefi. Srefi na ini a ten disi presi de èn son okasi de pe sma e naki den obiaman nanga den towfruman disi te den dede.”

Ma na ini den Westsei kondre, sma kon si bonu leki wan bun sani. Buku, telefisi, nanga kino du furu sani fu meki a frede di sma e frede bonu, kon moro mendri. David Davis, wan sma di e ondrosuku sani di abi fu du nanga prisiriten, e taki: „Wantronso, den heks de moro yongu èn den moro moi, den moro moi trutru. Hollywood (a presi na Amerkankondre pe den e meki kino) e si esi-esi san sma wani. . . . Te den e meki den heks disi kon moro moi èn e meki den na so wan fasi taki sma lobi den moro, dan den e hari a prakseri fu moro furu sma, so srefi umasma nanga moro yongu pikin.” Hollywood sabi fa fu meki iniwan sani di sma lobi fu si kon tron wan sani di den kan meki furu moni nanga dati.

Wan tu sma e taki dati bonu tron wan fu den sani na relisi sei di e gro moro esi na ini Amerkankondre. Na ini ala den gudu kondre, moro nanga moro sma e suku fu satisferi den nowtu fu den na yeye fasi nanga den difrenti fasi fu bonu. Disi den e du fu di den e kisi deki-ati fu grupu sma di e bribi taki umasma abi den srefi reti leki mansma èn fu di den moro bigi relisi broko den saka. Fu taki en leti, so furu fasi fu bonu de, taki sma no e agri srefi nanga san a wortu „obiaman” wani taki. Ma sma di e taki dati den na obiaman noso heks, furutron de a srefi leki Wicca — di wan wortubuku e taki fu en leki „wan heiden naturu relisi di abi en rutu na West-Europa na ini a ten bifo a pisi ten fu den Kresten èn di e kon na  libi baka na ini a di fu twenti yarihondro”. * Fu dati ede, furu fu den sma disi e taki fu densrefi dati den na heiden noso nyun heiden.

Na ini a heri historia, sma no ben wani si obiaman noso heks na ai, den ben frufolgu den, den gi den skin-ati, èn den ben kiri den srefi. A no de fu fruwondru dan taki den sma na ini a ten disi di e du bonu, wani srefisrefi fu kisi wan moro bun nen. Na ini wan ondrosuku di ben du, den ben aksi dusundusun heks sortu boskopu den ben wani gi a publiki. Margot Adler, wan uma di e ondrosuku sani, ben taki syatu san a piki fu den ben de: „Wi a no takru sma. Wi no e anbegi Didibri. Wi no e du trawan ogri noso no e kori sma. Wi no de kefalek sma. Wi na gewoon sma neleki yu. Wi abi osofamiri, wi e wroko, wi abi sani di wi e howpu na tapu, èn wi abi marki di wi wani doro. Wi a no wan sekte. Wi a no dangra sma. . . . Yu no abi fu frede wi. . . . Wi gersi yu moro leki yu e denki srefi.”

Moro nanga moro sma teki a boskopu dati. ¿Ma disi wani taki dati wi no abi fu broko wi ede nanga den sani di heks e du? Meki wi luku na aksi dati na ini na artikel di e kon now.

[Futuwortu]