A De So, Taki a Wortu „Kresten” No De Moro San a Ben Wani Taki Fosi?

SAN a wani taki fu de wan Kresten? San yu ben sa piki? Dati na a aksi di den ben poti gi wan tu sma na ini difrenti kondre. Dyaso wan tu fu den piki fu den de:

„Fu waka na Yesus baka èn fu du san a ben du.”

„Fu de wan bun sma èn fu prati sani nanga trawan.”

„Fu teki Krestes leki Masra nanga Frulusuman.”

„Fu go na Mis, begi a Rowskransi, èn teki a Santa Komuni.”

„Mi no e bribi taki yu musu go na kerki fu de wan Kresten.”

Wortubuku srefi e taki difrenti sani san a wortu Kresten wani taki, ma den sani disi e bruya sma. Fu taki en leti, dan wán buku abi tin difrenti fruklari fu a wortu „Kresten”. A e taki fu a wortu, dati a wani taki „fu bribi na ini a relisi fu Yesus noso fu de wan pisi fu dati”, ma a e taki tu, „wan bun sma noso wan sma di trawan e feni bun”. A no de fu fruwondru taki furu sma e feni en muilek fu fruklari san a wani taki fu de wan Kresten.

Sma Kon Kisi wan Moro Fri Fasi fu Denki

Na mindri sma na ini a ten disi di e taki dati den na Kresten — srefi na mindri den wan di e sidon makandra na tapu a srefi bangi na ini kerki — yu abi furu difrenti fasi fu si sani, soleki a meki di Gado meki sma skrifi Bijbel nanga yepi fu en santa yeye, a leri fu na evolutie, a bumui di kerki e bumui nanga politiek, nanga a prati di wan sma e prati a bribi fu en nanga tra sma. Sani di abi fu du nanga bun gwenti nanga gronprakseri soleki a puru di sma e puru bere, homo-sekslibi, èn a libi di tu sma e libi nanga makandra sondro taki den trow, furutron e kon tron wan streipenti. Tweifri no de taki sma kon kisi wan moro fri fasi fu denki.

Fu eksempre, wan Protestant kerki krutu ben sori no so langa pasa taki den ben wani fu horibaka gi a reti di kerki abi „fu teki wan owruman di ben libi wan homo-sekslibi na ini a tiri fu den”, na so a tijdschrift Christian Century e taki. Wan tu theologiaman ben tyari na idea kon na fesi srefi taki a no de fanowdu fu bribi na ini Yesus fu kisi frulusu. Den e bribi taki Dyu, Moslimsma, nanga tra sma „kan go na hemel tu [neleki fa Kresten kan go na hemel]”, na so wan raportu na ini The New York Times e taki.

Pruberi, efu yu man, fu si na ini yu prakseri taki wan Marxist (wan sma di abi komunist denki) e horibaka gi kapitalisme. Noso pruberi fu si taki wan demokrasiasma (wan sma di e bribi taki a makti fu tiri de na a pipel) e horibaka gi tiriman di e kwinsi a pipel. Noso pruberi fu si wan sma di e feti fu meki a busi no lasi gowe, ma di e gi yepi na sma di e suku fu koti ala den bon fu busi puru. „A sma dati no kan de trutru wan Marxist noso wan demokrasiasma, noso wan sma di e feti fu meki a busi no lasi gowe”, yu ben sa taki — èn yu ben o abi leti. Ma te yu e luku den difrenti fasi fa sma di e taki dati den na Kresten, e si sani, dan yu e si taki den e bribi sani di e difrenti fu makandra srefisrefi. Furutron, den sani disi no e kruderi nanga san Yesus Krestes ben leri, a Sma di seti Krestendom. San dati e sori fu Krestendom di den e horibaka gi?—1 Korentesma 1:10.

Soleki fa wi sa si, dan a de wan heri pisi ten kaba taki sma wani kenki den Kresten leri srefisrefi fu den leri disi kan fiti a fasi fa den e denki na ini wan spesrutu pisi ten. Fa Gado nanga Yesus Krestes e denki fu den sortu kenki disi? Den kerki di e horibaka gi leri di no rutu na ini Krestes, kan taki nanga reti dati den na Kresten? Wi sa go luku den aksi disi na ini a tra artikel.