Srakti-ofrandi Di Ben Plisi Gado

„Ibri granpriester poti na wroko fu òfer presenti èn so srefi srakti-ofrandi.”—HEBREWSMA 8:3.

1. Fu san ede libisma e firi taki a de fanowdu fu suku yepi na Gado?

„A GERSI taki neleki fa begi na wan aladei sani gi libisma, na so fu tyari ofrandi de wan aladei sani tu. Te wan sma e tyari ofrandi dan dati e sori fa a e firi fu ensrefi, na a tra sei, te wan sma e begi, dan dati e sori fa a e firi fu Gado”, na so a Bijbel historia skrifiman Alfred Edersheim e skrifi. Sensi a ten di sondu kon na ini grontapu, a sondu tyari ala sortu pen kon soleki a firi di sma e firi taki den fowtu, taki den de sma di drifi komoto fu Gado, èn taki den no sabi san den musu du. A de fanowdu fu kisi frulekti fu den firi disi. Wi kan frustan taki te sma de nanga den sortu bruya firi disi, dan den e firi taki den musu suku yepi na Gado.—Romesma 5:12.

2. Sortu tori fu ofrandi di ben tyari biginbigin gi Gado, wi kan feni na ini Bijbel?

² A fosi Bijbel tori di e taki fu ofrandi di ben tyari gi Gado, na a tori fu Kain nanga Abel. Wi e leisi: „Baka wan seiker ten, a ben pasa taki Kain ben go fu tyari wan tu froktu fu gron leki wan ofrandi gi Yehovah. Ma Abel, fu en sei, en tu ben tyari wan tu fu den fosiwan fu en ipi, iya, den fatu pisi fu den” (Genesis 4:3, 4). Baka dati wi e leisi fu Noa, wan man di Gado ben kibri en libi pasa a bigi Frudu. Na a ten dati Gado ben pori den godelowsu sma. Fu dati ede Noa en ati ben pusu en fu „òfer bron-ofrandi na tapu na altari” gi Yehovah (Genesis 8:20). Na difrenti okasi, Abraham, a getrow futuboi nanga a mati fu Gado, ben ’bow wan altari èn ben kari a nen fu Yehovah’, fu di den pramisi nanga den blesi fu Gado ben naki en ati (Genesis 12:8; 13:3, 4, 18). Baka dati Abraham ben kisi fu du nanga a moro bigi tesi tapu a bribi fu en, di Yehovah ben taigi en fu òfer en manpikin Isak leki wan bron-ofrandi (Genesis 22:1-14). Ala di den tori disi de syatu, toku den e leri wi furu fu tyari srakti-ofrandi, soleki fa wi sa si.

3. Sortu rol srakti-ofrandi e prei na ini na anbegi?

³ Fu den Bijbel tori disi nanga fu tra Bijbel tori, a de krin taki na òfer di sma ben òfer wan sortu ofrandi, ben de wan pisi fu na anbegi langa bifo Yehovah ben meki spesrutu wet fu dati. Akruderi nanga dati, wan tra buku e taki fu „srakti-ofrandi” leki „wan kerki gwenti pe wan sani e òfer gi wan gado fu seti wan bun matifasi na mindri a sma nanga a santawan, noso fu meki a bun matifasi dati tan, noso fu meki a matifasi dati kon bun baka”. Ma disi e meki taki wi musu poti wan tu prenspari aksi di bun fu wi poti prakseri na den, soleki: Fu san ede srakti-ofrandi de fanowdu na ini na anbegi? Sortu srakti-ofrandi Gado e teki? Èn san den srakti-ofrandi fu owruten wani taki gi wi na ini a ten disi?

Fu San Ede Srakti-ofrandi De Fanowdu?

4. San ben pasa nanga Adam nanga Efa baka di den ben sondu?

⁴ Di Adam ben sondu, a ben du dati fu espresi.  Di a ben teki èn ben nyan fu a froktu fu a bon fu sabi bun nanga ogri, dan a ben sabi heri bun taki a ben trangayesi Gado. A strafu fu a trangayesi disi ben de dede, soleki fa Gado ben taki dati krin: „Na a dei di yu sa nyan fu dati, yu sa dede nomonomo” (Genesis 2:17). Te fu kaba, Adam nanga Efa ben kisi a paiman fu sondu — den dede.—Genesis 3:19; 5:3-5.

5. Fu san ede Yehovah ben de a fosiwan fu du wan sani gi a bun fu den bakapikin fu Adam, èn san A ben du gi den?

⁵ Ma fa a de nanga den bakapikin fu Adam? Fu di den ben kisi sondu nanga onvolmaaktifasi fu Adam, dati meki den musu ondrofeni den srefi sani di den tu fosi libisma ben ondrofeni; dati meki den de sma di drifi komoto fu Gado, di de sondro howpu, èn di e dede (Romesma 5:14). Ma Yehovah de wan Gado fu retidu èn so srefi wan Gado di abi makti, ma — fu taki en reti, na a fosi presi — a de wan Gado fu lobi (1 Yohanes 4:8, 16). So bun, en na a fosi wan di e suku dresi gi a siki disi. Baka di Bijbel e taki dati „a pai fu sondu na dede”, dan a e go moro fara fu taki, „ma a presenti di Gado e gi, na têgo libi nanga yepi fu Krestes Yesus, wi Masra”.—Romesma 6:23.

6. San na a wani fu Yehovah ini a tori fu a pori di Adam pori sani nanga a sondu fu en?

⁶ Te fu kaba, san Yehovah Gado ben du fu sorgu taki a presenti dati de seiker, na taki A ben gi wan sani di ben sa tapu san ben lasi gowe fu di Adam ben sondu. Na ini Hebrewtongo, biginbigin a wortu ka·pharʹ ben wani taki kande „fu tapu” noso kande „fu figi puru”, èn a vertaal tu nanga „verzoen”. * Nanga tra wortu, Yehovah ben gi wan soifri sani fu tapu a sondu di wi kisi fu Adam èn fu figi puru na ogri di ben kon fu dati. Na so wan fasi den wan di Yehovah feni bun nofo fu kisi a presenti, ben kan kon fri fu a strafu fu sondu nanga dede.—Romesma 8:21.

7. (a) Sortu howpu sma ben kisi fu a krutu strafu di Gado leisi gi Satan? (b) Sortu paiman musu pai fu fri libisma fu sondu nanga dede?

⁷ Wantewante baka di den tu fosi libisma ben sondu, Gado ben taki kaba fu a howpu fu libisma kon fri fu sondu nanga dede. Di Yehovah ben leisi strafu gi Satan, a sneki, dan Yehovah ben taki: „Mi sa poti feantifasi na mindri yu nanga na uma èn na mindri yu siri nanga en siri. A sa masi yu na a ede èn yu sa masi en na a bakafutu” (Genesis 3:15). Nanga a profeiti taki dati, wantronso wan howpu ben kon gi ala den wan di ben sa bribi a pramisi dati. Ma wan paiman musu pai fu kisi a fri dati. A pramisi Siri no ben sa kon nomo èn kiri Satan wawan; Satan ben sa masi a Siri na en bakafutu, noso fu taki en tra fasi, dan a Siri ben musu pina fu di a ben o dede, ma a no ben o dede gi ala ten.

8. (a) Fa a du kon taki Kain no ben bun? (b) Fu san ede Gado ben teki a srakti-ofrandi fu Abel?

⁸ A ben musu fu de so taki Adam nanga Efa ben prakseri furu suma ben o de a pramisi Siri. Di Efa ben kisi a fosi boi fu en, Kain, dan Efa ben taki: „Mi meki wan man nanga a yepi fu Yehovah” (Genesis 4:1). San a ben denki, a ben denki taki kande na en boi ben sa tron a Siri? Efu na so a ben denki efu no, Kain nanga so srefi san en ben òfer, no ben bun. Na a tra sei, en brada Abel ben sori bribi na ini a pramisi fu Gado èn dati ben pusu Abel fu òfer wan tu fu den fosi meti di a kisi fu na ipi fu en leki wan srakti-ofrandi gi Yehovah. Wi e leisi: „Nanga bribi Abel ben òfer wan moro warti srakti-ofrandi na Gado leki Kain, èn nanga a bribi dati kotoigi ben gi taki a ben de regtfardiki.”—Hebrewsma 11:4.

9. (a) Na ini san Abel ben bribi, èn fa a ben sori a bribi dati? (b) San na ofrandi fu Abel ben du?

⁹ Abel no ben bribi wawan taki wan Gado musu de, wan sani di Kain srefi ben musu bribi. Abel ben bribi den pramisi fu Gado fu wan Siri di ben sa kon fu tyari frulusu gi getrow libisma. Abel no ben kisi fu sabi fa dati ben sa pasa, ma a pramisi fu Gado ben meki Abel si taki wan sma ben sa musu masi a Siri na en bakafutu. Iya, soleki fa a sori, dan Abel ben kon na a bosroiti taki brudu ben sa musu lon — dati na soifri a prakseri fu wan srakti-ofrandi. Abel ben òfer wan  presenti fu libi nanga brudu gi a Sma di e gi trawan libi, kande fu sori taki a wani nomonomo fu si a pramisi fu Yehovah kon tru. A fasi disi fa Abel ben sori bribi, ben meki taki en srakti-ofrandi ben plisi Yehovah, èn dati e sori pikinso tu san a wani taki fu tyari srakti-ofrandi trutru — wan sani di e yepi sondu libisma fu kan go na Gado fu kisi a bun-ati fu en.—Genesis 4:4; Hebrewsma 11:1, 6.

10. O prenspari den srakti-ofrandi ben de, efu wi luku na aksi di Yehovah ben aksi Abraham fu òfer Isak?

¹⁰ San a wani taki fu tyari srakti-ofrandi trutru, ben kon krinkrin na fesi di Yehovah ben taigi Abraham fu òfer en manpikin Isak leki wan bron-ofrandi. Ala di a no ben gi en manpikin leki wan srakti-ofrandi trutru, toku a ben sori san Yehovah srefi ben o du te fu kaba — òfer en wan-enkri Manpikin leki a moro bigi srakti-ofrandi di oiti ben tyari, so taki A ben kan du gi libisma san En ben wani (Yohanes 3:16). Nanga den srakti-ofrandi èn nanga den òfer di ben skrifi na ini a Wet fu Moses, Yehovah ben leri en pipel na wan profeiti fasi san den ben musu du fu kisi pardon fu den sondu èn fu meki a howpu fu den kon de wan moro seiker sani. San wi kan leri fu disi?

Srakti-ofrandi Di Yehovah E Teki

11. Sortu tu grupu fu ofrandi a granpriester fu Israèl ben tyari, èn fu san ede?

¹¹ „Ibri granpriester poti na wroko fu òfer presenti èn so srefi srakti-ofrandi”, na so na apostel Paulus e taki (Hebrewsma 8:3). Luku taki Paulus e prati den ofrandi di a granpriester ben tyari na ini owruten Israèl na ini tu grupu, namku „presenti” nanga „srakti-ofrandi”, noso „srakti-ofrandi gi sondu” (Hebrewsma 5:1). Furutron, sma e gi presenti na trawan fu sori den fa den lobi den èn e warderi den, èn so srefi fu tron mati fu den, fu kisi bun sani fu den, noso fu plisi den (Genesis 32:20; Odo 18:16). Na a srefi fasi, furu fu den ofrandi di skrifi na ini a Wet, de leki „presenti” gi Gado fu suku a bun-ati fu Gado èn fu plisi En. * Efu wan sma ben pasa a Wet, dan a ben musu pai wan paiman, èn fu poti sani reti baka, „srakti-ofrandi gi sondu” ben òfer. Den fosi feifi buku fu Bijbel, spesrutu den buku Exodus, Lefitikus, nanga Numeri, e sori wi kefalek furu sani di abi fu du nanga den difrenti sortu srakti-ofrandi di ben òfer. Ala di a kan de wan trutru tyalensi fu frustan èn fu memre ala den finifini sani disi, toku wan tu prenspari sani fu den difrenti sortu srakti-ofrandi, de warti fu wi poti prakseri na den.

12. Pe na ini Bijbel wi kan feni syatu ala sani ini a tori fu den srakti-ofrandi, noso ofrandi ini a Wet?

¹² Na ini Lefitikus kapitel 1 te nanga 7 wi kan si feifi prenspari sortu ofrandi — bron-ofrandi, siri-nyanyan ofrandi, gemeenschap-ofrandi, sondu-ofrandi, nanga paiman-ofrandi — di kari aparti, ala di wan tu fu den ben òfer makandra. Wi e si so srefi taki den e kari den ofrandi disi tu tron na ini den kapitel disi, ma nanga difrenti marki: wán tron, na ini Lefitikus 1:2 te nanga 6:7, pe skrifi san ben musu òfer na tapu na altari, èn a di fu tu tron, na ini Lefitikus 6:8 te nanga 7:36, pe a e sori den pisi fu na ofrandi di ben musu gi na den priester nanga den pisi di ben de gi a sma di ben tyari na ofrandi. Baka dati, na ini Numeri kapitel 28 nanga 29, Gado ben sori krin san ben musu òfer èn o ten den ofrandi ben musu tyari, efu dati na ibri dei, ibri wiki, ibri mun, noso na den ibri yari fesa.

13. Fruteri fu den ofrandi di ben òfer nanga friwani leki presenti gi Gado.

¹³ Den bron-ofrandi, siri-nyanyan ofrandi, nanga  gemeenschap-ofrandi, ben de wan tu fu den ofrandi di wan sma ben òfer nanga friwani leki wan presenti gi Gado noso fu go na En fu kisi a bun-ati fu en. Wan tu sabiman e denki taki den Hebrew wortu gi „bron-ofrandi” abi a prakseri fu „wan ofrandi di e opo go na loktu”. Disi e fiti, bika te wan sma ben òfer wan bron-ofrandi, dan a meti di ben srakti, ben bron na tapu na altari, èn wan switismeri ben opo go na loktu na Gado. Wan aparti sani fu a bron-ofrandi ben de taki, baka di a brudu ben fringi lontu na altari, dan a heri meti ben òfer gi Gado. Den priester ben „bron a heri srakti-ofrandi na tapu na altari leki wan bron-ofrandi, wan ofrandi nanga faya leki wan switismeri di ben kowru na ati fu Yehovah”.—Lefitikus 1:3, 4, 9; Genesis 8:21.

14. Fa den ben òfer a siri-nyanyan ofrandi?

¹⁴ Lefitikus kapitel 2 e skrifi fu a siri-nyanyan ofrandi. A ben de wan friwani ofrandi fu moi blon, di furutron den ben natinati pikinso nanga oli, èn den ben bron hars so srefi leki wan switismeri. „A priester musu teki wan anu furu fu a blon fu en nanga na oli fu en nanga ala hars di e smeri switi; èn a musu bron en leki wan ofrandi fu memre na tapu na altari, leki wan ofrandi nanga faya leki wan switismeri di e kowru na ati fu Yehovah” (Lefitikus 2:2). Hars ben de wán fu den sani fu a santa switismeri di ben bron na tapu a switismeri altari na ini a tabernakel nanga a tempel (Exodus 30:34-36). Krinkrin disi na san Kownu David ben abi na prakseri di a ben taki: „Meki a begi fu mi meki na yu fesi leki switismeri, na opo di mi e opo mi inisei-anu leki a siri-nyanyan ofrandi na mofoneti.”—Psalm 141:2.

15. Fu san ede a gemeenschap-ofrandi ben tyari?

¹⁵ Lefitikus kapitel 3 e skrifi fu wan tra ofrandi di ben tyari nanga friwani, namku a gemeenschap-ofrandi. A nen dati kan vertaal tu nanga „wan ofrandi fu vrede”. Na ini a Hebrewtongo, a wortu „vrede” e sori tapu moro leki nomo a feti di sma no e feti moro. „Na ini Bijbel, a e sori tapu disi tu, èn a e sori so srefi tapu a de di wan sma di na ini vrede nanga Gado, a go di sani e go bun nanga a sma, a prisiri di wan sma e prisiri,  èn a koloku fu wan sma”, na so a buku Studies in the Mosaic Institutions, e taki. So bun, den gemeenschap-ofrandi ben òfer, no fu meki vrede nanga Gado fu plisi en, ma fu taki Gado tangi fu a blesi di A ben blesi a sma nanga a vrede di a abi nanga En. Dati na wan prisiri sani gi den sma di Gado feni bun. A priester nanga a sma di ben tyari na ofrandi ben kisi wan pisi fu a srakti-ofrandi, baka te a brudu nanga a fatu ben òfer gi Yehovah (Lefitikus 3:17; 7:16-21; 19:5-8). Na wan moi fasi disi e prenki taki a sma di ben tyari na ofrandi, a priester, nanga Yehovah ben nyan wan nyanyan makandra, èn dati ben sori taki den ben de mati fu makandra di ben de na ini vrede nanga makandra.

16. (a) Fu san ede sma ben musu tyari sondu-ofrandi èn paiman-ofrandi? (b) Fa den disi ben de tra fasi leki a bron-ofrandi?

¹⁶ Sondu-ofrandi nanga paiman-ofrandi ben de na mindri den ofrandi di ben musu tyari te wan sma ben suku pardon fu sondu noso ben suku fu tapu sondu di a ben du fu di a ben pasa a Wet. Ala di den srakti-ofrandi disi ben musu bron tu na tapu na altari, toku den ben de tra fasi leki a bron-ofrandi, fu di a no a heri meti ben òfer gi Gado, ma soso a fatu nanga wan tu tra pisi fu a meti. A tra pisi fu a meti di tan abra, ben trowe dorosei fu a kampu noso na ini wan tu kefal a priester ben teki a pisi dati. A difrenti na mindri den tu sani disi ben de prenspari. A bron-ofrandi ben òfer leki wan presenti gi Gado fu kisi primisi fu En fu go na En, so bun ala sani fu a srakti-ofrandi disi ben òfer na Gado. A de wan moi sani fu si taki fosi wan sma ben tyari wan bron-ofrandi, dan a ben tyari wan sondu-ofrandi noso wan paiman-ofrandi, èn dati e sori kande taki te a sondari wani taki Gado musu teki en presenti, dan a sma musu suku pardon fu en sondu fosi.—Lefitikus 8:14, 18; 9:2, 3; 16:3, 5.

17, 18. Gi san a sondu-ofrandi ben gi, èn san ben de a marki fu a paiman-ofrandi?

¹⁷ Soso te wan sma no ben sondu fu espresi teige a Wet, sondu di a ben du fu di a skin swaki, dan a ben kan tyari a sondu-ofrandi. „Efu wan sili sondu ma a no de fu espresi, na ini wan fu den sani di Yehovah taki fu no du den”, dan a sondari ben musu òfer wan sondu-ofrandi akruderi a posisi fu en na ini a libimakandra (Lefitikus 4:2, 3, 22, 27). Na a tra sei, sondari di no ben abi berow, ben koti puru; no wan srakti-ofrandi no ben kan tyari gi den.—Exodus 21:12-15; Lefitikus 17:10; 20:2, 6, 10; Numeri 15:30; Hebrewsma 2:2.

¹⁸ Lefitikus kapitel 5 nanga 6 e sori krinkrin fu san ede a paiman-ofrandi ben de fanowdu. Kande wan sma ben sondu ma a no ben de fu espresi. Toku, a sondu fu en ben tyari paiman gi den reti fu tra sma noso gi den reti fu Yehovah Gado, èn a fowtu dati ben musu poti reti. Difrenti sortu sondu skrifi drape. Son wan ben de eigi sondu fu a sma (5:2-6), son wan ben de sondu teige „den santa sani fu Yehovah” (5:14-16), èn son wan, ala di den no ben de fu espresi dorodoro, toku den ben kon fu takru lostu noso swakifasi fu a skin (6:1-3). Boiti taki a sondari ben musu bekènti den sondu dati, a ben musu pai wan paiman pe dati ben de fanowdu èn baka dati a ben musu òfer wan paiman-ofrandi gi Yehovah.—Lefitikus 6:4-7.

Wan Moro Bun Sani De fu Kon

19. Ala di Israèl ben abi a Wet nanga en ofrandi, toku fu san ede den no ben man kisi a bun-ati fu Gado?

¹⁹ A Wet fu Moses, nanga den furu ofrandi fu en, ben gi na den Israèlsma fu yepi den go na Gado so taki den ben kan feni a bun-ati nanga a blesi fu En teleki a pramisi Siri ben o doro. Na apostel Paulus di ben de wan trutru Dyu, ben taki en so: „A Wet tron wi leriman di e tyari wi go na Krestes, so taki den ben sa kan fruklari wi regtfardiki  fu a bribi fu wi ede” (Galasiasma 3:24). A de wan sari sani, taki Israèl leki wan nâsi no ben piki bun tapu a leri fu a leriman dati, ma ben mesbroiki a grani fu den. Fu dati ede, den ipi-ipi srakti-ofrandi di den ben e tyari, ben e tron tegu sani gi Yehovah èn a ben taki: „Mi weri kaba fu den heri bron-ofrandi fu den manskapu nanga a fatu fu den meti di kisi bun nyanyan; èn mi no prisiri nanga a brudu fu yongu mankaw nanga pikin manskapu nanga bokoboko.”—Yesaya 1:11.

20. San ben pasa nanga a Wet nanga den ofrandi fu en na ini 70 G.T.?

²⁰ Na ini 70 G.T. a Dyu seti fu sani, nanga en tempel nanga den priester fu en, ben kon na en kaba. Baka dati, sma no ben kan tyari ofrandi moro na a fasi fa a Wet ben sori dati krinkrin. Dati wani taki dati den ofrandi leki wan pisi fu a Wet, no wani taki notinoti moro gi den anbegiman fu Gado na ini a ten disi? Na ini a tra artikel wi sa ondrosuku disi.

[Futuwortu]

Yu Kan Tyari Disi Kon na Krin?

• San ben pusu den getrow man fu owruten fu tyari ofrandi gi Yehovah?

• Fu san ede ofrandi ben de fanowdu?

• Sortu prenspari ofrandi ben òfer na ondro a Wet, èn fu san ede ibriwan fu den ben de?

• Gi sortu prenspari sani a Wet nanga den ofrandi fu en ben dini, soleki fa Paulus e sori?

[Aksi fu a tori disi]

[Prenki na tapu bladzijde 14]

Abel en srakti-ofrandi ben switi gi Yehovah fu di nanga dati Abel ben sori taki a ben bribi den pramisi fu Yehovah

[Prenki na tapu bladzijde 15]

Yu e frustan o prenspari a sani disi de di yu e si tapu a prenki?