A Feni San A Ben Suku Langa Ten Kaba

„YEHOVAH? Suma na Yehovah?” Silvia di ben abi aiti yari ben si a nen disi na ini wan Armenia Bijbel. A Bijbel disi ben de wan warti famiri sani di wan tra yongu umapikin ben sori en. A ben aksi trawan suma na Yehovah. Ma no wan sma ini Yerevan, na Armenia pe a ben libi, ben man fruteri en suma na Yehovah — no en papa nanga mama, no en skoromeester nanga skoromisi, èn srefi den kerki dinari drape no ben man fruteri en dati.

Silvia gro kon bigi, a kaba en skoro èn a ben feni wan wroko. Ma toku a no ben sabi ete suma na Yehovah. Leki wan yongu sma a ben musu lon gowe fu Armenia, èn baka wan pisi ten a ben feni ensrefi te na ini Polen. Drape a ben libi na ini wan pikin kamra nanga tra sma di lowe gowe fu den kondre. Sma ben gwenti fu kon luku na uma di ben de nanga en na ini a srefi kamra. „Suma na den sma di e kon luku yu?”, na so Silvia ben aksi. „Den na Yehovah Kotoigi, di e kon dyaso fu leri mi den sani fu Bijbel”, na so na uma ben piki.

Di Silvia ben yere a nen Yehovah, dan en ati ben dyompo fu prisiri. Te fu kaba a ben bigin leri suma na Yehovah èn a ben kon sabi taki a de wan lobi-ati Gado. Ma esi-esi baka dati a ben abi fu gowe libi Polen. A ben lowe gowe fu go suku kibri na Deinsikondre, abrasei fu a Baltis Se. A ben abi wan tu sani nomo na en, ma na mindri den sani dati a ben abi Bijbel publikâsi di Yehovah Kotoigi ben tyari kon na doro. Na bakasei fu wan fu den publikâsi, Silvia ben feni den adres fu difrenti bijkantoro fu a Waktitoren Genootschap. Dati ben de wan fu den moro prenspari sani di a ben abi — a sani di ben sa yepi en fu feni Yehovah!

Na ini Deinsikondre, den ben tyari Silvia go na wan loweman kampu, èn a ben bigin luku wantewante efu a ben man feni Yehovah Kotoigi. Den adres na bakasei fu a publikâsi di a ben abi, ben sori en taki a bijkantoro fu a Waktitoren Genootschap na Deinsikondre ben de na ini a foto Holbæk. Ma pe dati ben de dan? Nanga wan loko den ben tyari Silvia go na wan tra kampu. We, di den ben de na pasi fu go drape, den ben pasa Holbæk! Agen en ati ben dyompo fu prisiri.

Heri esi baka dati, di a son ben skèin moi wan dei, Silvia ben teki loko go na Holbæk. Di a loko doro a lokostation, dan Silvia ben waka go na a bijkantoro. A e memre: „Baka di mi ben waka kon na ini a dyari, dan mi ben go sidon na tapu wan bangi èn mi ben taigi misrefi: ’Disi na paradijs!’” A ben kisi wan switi kon na a bijkantoro èn te fu kaba ensrefi ben man studeri Bijbel.

Ma a ben abi fu froisi omeni leisi. Di a ben doro na a wan loweman kampu baka a trawan, dan a ben abi fu suku pe Yehovah Kotoigi de, èn ibri leisi a ben musu bigin baka nanga a bijbelstudie fu en. Ma toku, baka tu yari a ben leri nofo fu man gi ensrefi abra na Yehovah. A ben teki dopu èn syatu baka dati a ben go na ini a furuten diniwroko. Na ini 1998 a tirimakti fu Deinsikondre ben gi en primisi fu tan drape.

Now Silvia abi 26 yari èn a e dini na ini a presi di ben meki a prakseri paradijs, èn dati na a bijkantoro fu Yehovah Kotoigi na ini Deinsikondre. „San mi kan taki?”, a e taki now. „Sensi mi ben de wan yongu umapikin, mi ben e suku Yehovah. Now mi feni en. Mi ben dren taki mi ben o gebroiki mi libi na ini a diniwroko fu en, èn dyaso mi de na Bethel. Mi e begi taki disi sa de mi oso na ini den yari di o kon ete!”