Yu Sabi San A Wani Taki fu Wakti?

YU ABI wan idea, omeni ten sma e gebroiki ibri yari soso fu di den e wakti? Den e wakti te den de na ini wan rij na wenkri noso te den musu lai oli na ini a wagi fu den. Den e wakti na ini wan restaurant fu sma tyari nyanyan gi den. Den e wakti fu go na datra noso tifidatra. Den e wakti fu feni wan bus noso fu teki wan loko. Iya, furu fu a ten di wan sma abi na ini en libi, a e gebroiki fu wakti taki sani e pasa. Soleki fa sma e denki, dan den Doisri wawan, e lasi 4,7 milyard yuru wan yari, soso fu di den e wakti na tapu strati te den no man rei go moro fara fu di a druk tumusi. Wan sma bereken taki disi na a srefi leki a ten di so wan 7000 sma ben sa libi.

A wakti di wan sma musu wakti, kan de trutru wan fruferi sani. Na ini a ten disi, a gersi taki noiti a ten sari fu man du ibri sani. Te wi e prakseri den tra sani di wi ben sa musu du, dan a wakti di wi musu wakti kan de wan bigi tesi. A skrifiman Alexander Rose ben taki wan leisi: „A moro fruferi sani fu a libi na fu wakti.”

Na Amerkan politiekman, Benjamin Franklin, ben erken taki te sma musu wakti, dan dati kan meki taki den e lasi furu moni. Moro leki 250 yari pasa a ben taki: „Time is money” (Ten na moni). Fu dati ede meki wrokopresi e suku fasi fu no skoifi wroko di musu du poti na wan tra ten, efu dati no de fanowdu. Te den e gebroiki moro mendri ten fu meki moro sani, dan dati kan tyari moro moni kon. Wrokopresi di e yepi sma wantewante e pruberi fu du dati esi-esi — den e meki taki yu kan bai nyanyan esi-esi na son presi, den e meki taki yu kan seti bank tori sondro fu komoto na yu oto, èn tra srefi sortu sani — bika den sabi taki, efu den wani plisi den sma di e kon na den, dan den no musu meki den wakti langa.

A Lasi Di a Libi fu Wi E Lasi Gowe

A di fu tinaneigi yarihondro Amerkan puwema skrifiman di nen Ralph Waldo Emerson ben kragi wan leisi: „O Furu fu a libi fu libisma e lasi gowe  fu di den e wakti!” No so langa pasa, a skrifiman Lance Morrow ben kragi taki a wakti di wi musu wakti na wan soi sani èn so srefi wan sani di e meki sma lasi-ati. Ma dan a ben taki fu „a moro triki èn a moro takru sani fu a wakti di wan sma musu wakti”. San na a sani dati? „Dati na a sabi di wan sma sabi taki ten, a moro prenspari sani di a abi èn di de wan pikin pisi fu a libi fu en, e lasi gowe èn a no kan kisi en baka noiti moro.” Dati na wan sari sani, ma wan tru sani. Ten di wan sma lasi fu di a musu wakti, lasi trutru.

A no de fu taki dati efu a libi no ben syatu so, dan wi no ben o broko-ede so furu fu di wi musu wakti. Ma a libi syatu trutru. Dusundusun yari pasa, a Bijbel psalm skrifiman ben taki: „Den dei srefi fu den yari fu wi, na seibitenti yari, èn aititenti yari, efu a de fu spesrutu krakti ede; toku a wan-enkri sani di den e tyari kon nomonomo, na broko-ede nanga sani di e hati sma; bika a musu pasa gowe esi, èn na so wi e frei gowe” (Psalm 90:10). Awinsi pe wi e libi, noso suma wi de, toku a libi fu wi — den dei, den yuru, nanga den miniti di musu kon ete te wi gebore — no de gi ala ten. Ma toku wi no kan wai pasi gi situwâsi pe wi musu lasi pikinso fu a warti ten dati, fu di wi musu wakti sani di musu pasa noso fu di wi musu wakti sma.

Leri Fa fu Wakti

Furu fu wi ben de kaba na ini wan oto pe a sma di e rei na oto, e suku doronomo fu pasa a wagi di e rei na en fesi. Furutron a no de trutru fanowdu fu du dati — a sma di e rei na oto no abi wan prenspari mofo nanga wan tra sma. Ma toku a no wani srefisrefi taki wan tra sma di e rei wagi e bepaal gi en o tranga a musu rei. Taki a sma disi no abi furu pasensi, e sori taki a no leri fa fu wakti. Leri? Iya, sabi fa fu wakti, na wan sani di sma musu leri. No wan sma gebore nanga a sabi dati. Te nyunyun pikin abi angri noso te den e sari, dan den wani taki wantewante sma musu poti prakseri na den tapu. Soso te den kon bigi den e frustan taki, son leisi den musu wakti fu kisi san den wani. A wakti di wi musu wakti, na wan pisi fu na aladei libi. Fu di dati de so, dan wan sma e sori taki a lepi te a sabi fa fu wakti nanga pasensi, efu a de fanowdu.

A no de fu taki dati, efu sani de di musu du wantewante, dan wi kan frustan taki sma no abi pasensi. Wi kan frustan taki wan yongu masra di e tyari en wefi go na ati-oso bika a wefi de fu kisi wan beibi, no ben sa abi pasensi te sma e draidrai tumusi. Den engel di ben gi Lot deki-ati fu gowe libi Sodom, no ben wani wakti di Yob ben draidrai. A pori ben de krosibei kaba, èn a libi fu Lot nanga en famiri ben de na ini kefar (Genesis 19:15, 16). Ma na ini moro furu fu den kefal te sma musu wakti, dan a libi fu sma no de na ini kefar. Na ini den kefal dati, dan a ben o de moro switi efu ibriwan sma ben leri fu abi pasensi — srefi efu sma ben musu wakti fu di wan tra sma no e du en wroko bun noso no e broko-ede trutru. Boiti dati, a ben sa de moro makriki fu abi pasensi efu ibriwan sma ben leri fa fu gebroiki a ten di den e wakti, na wan bun fasi. A faki tapu bladzijde 5 abi wan tu rai di e sori fa fu tan wakti nanga pasensi. Boiti dati a e sori srefi fa yu kan gebroiki a ten di yu musu wakti, na wan bun fasi.

Wi musu erken taki wan sma di no abi pasensi, e sori taki a abi bigifasi, èn a e sori taki a bigi tumusi fu tan wakti. A ben o de wan bun sani taki iniwan sma nanga a denki dati, e poti prakseri na den wortu fu Bijbel di e kon now: „Wan sma di abi pasensi moro bun leki wan sma di abi heimemre fu yeye” (Preikiman 7:8). Heimemre, noso bigifasi, na wan tumusi takru maniri di sma abi. A Bijbel odo e taki: „Ibriwan sma di abi wan bigimemre ati, na wan tegu sani gi Yehovah” (Odo 16:5). Fu dati ede, a leri di wi e leri fu abi pasensi — a leri di wi e leri fa fu wakti — wani taki kande dati wi musu ondrosuku wisrefi finifini èn wi musu ondrosuku so srefi a fasi fa wi e libi nanga tra sma.

Wi Sa Kisi Blesi te Wi Abi Pasensi

Moro furu wi e feni en moro makriki fu wakti te wi abi na overtoigi taki a sani di wi e wakti na wan warti sani, èn taki te fu kaba, a sa kon trutru. Di wi e taki fu a tori disi kaba, dan a bun fu prakseri a tru tori taki ala den opregti sma di e anbegi Gado, e wakti a kontru fu den tumusi bigi pramisi fu en di skrifi na ini Bijbel. Fu eksempre, wan psalm di Yehovah meki sma skrifi, e taigi wi: „Na den regtfardiki sma sa abi grontapu leki a gudu fu den, èn den sa libi na tapu fu têgo.” Na apostel Yohanes ben taki baka fu a pramisi disi, di a ben taki: „A sma di e du a wani fu Gado, sa tan fu têgo” (Psalm 37:29; 1 Yohanes 2:17). A de krin taki, efu wi ben sa libi fu têgo, dan a no ben o de wan bigi problema  fu wakti. Ma nownow, wi no e libi fu têgo. A de wan koni sani dan, fu taki fu têgo libi srefi?

Bifo wi e gi piki, dan luku taki Gado ben meki wi fosi papa nanga mama nanga a howpu fu libi fu têgo. A ben de soso fu di den ben sondu taki den nanga den pikin fu den — so srefi wi — no ben abi a howpu dati moro. Ma toku, wantewante baka di den sondu, Gado ben meki bekènti taki a o puru den bakapisi di ben kon fu di den no ben gi yesi. A ben pramisi taki wan „siri” ben o kon, èn dati ben de Yesus Krestes.—Genesis 3:15; Romesma 5:18.

Wisrefi musu bosroiti efu wi wani kisi wini te den pramisi fu En o kon tru. Fu du dati e aksi taki wi musu abi pasensi. Fu yepi wi fu abi a sortu pasensi disi, dan Bijbel e gi wi deki-ati fu prakseri dipi fu na eksempre fu wan gronman. A e sai en siri, èn a kan du noti moro leki fu wakti nanga pasensi — ala di a e du san a man fu kibri den sani di a prani — teleki a ten doro fu du a kotiwroko. Dan a pasensi fu en e kisi pai èn a e si den froktu fu en wroko (Yakobus 5:7). Na apostel Paulus e kari wan tra eksempre fu pasensi. A e meki wi prakseri den getrow man nanga uma fu owruten. Den ben e fruwakti taki Gado ben o du san a pramisi, ma den ben abi fu wakti a ten di Gado poti. Paulus e gi wi deki-ati fu waka baka na eksempre fu den wan disi „di nanga bribi èn nanga pasensi e kisi den pramisi”.—Hebrewsma 6:11, 12.

Iya, na ini a libi ala sma musu wakti. Ma dati no abi fu de wan sani di ala ten e meki yu firi tumusi fruferi. A kan de wan sani di e prisiri den wan di e wakti a kontru fu den pramisi fu Gado. Den kan gebroiki a ten di den e wakti, fu kweki wan krosibei matifasi nanga Gado èn fu du wroko di e sori taki den abi bribi. Èn te den e begi, e studeri èn e denki dipi, dan den kan leri fa fu frutrow dorodoro taki ibriwan sani di Gado pramisi o pasa na tapu en reti ten.

[Faki/​Prenki na tapu bladzijde 5]

ABI MORO PRISIRI TE YU E WAKTI!

Seti sani na fesi! Efu yu sabi taki yu sa musu wakti, dan sreka yusrefi so taki yu kan leisi, skrifi, brei, haak, noso du wan tra bun sani.

Gebroiki a ten fu denki dipi, wan sani di wi no man du so makriki moro na ini a grontapu disi pe wi abi tumusi furu fu du.

Poti wan sani fu leisi sei a telefon so taki yu kan leisi, efu yu musu wakti bifo yu e kisi a sma; na ini feifi noso tin miniti, yu kan leisi wan tu bladzijde.

Te yu e wakti na ini wan grupu, dan gebroiki a ten, efu a kan, fu bigin taki nanga trawan èn fruteri den wan tu sani di kan gi den deki-ati.

Poti wan pikin buku fu skrifi sani syatu noso wan sani fu leisi na ini yu oto, so taki yu kan gebroiki en na ini den ten di yu musu wakti sondro taki yu fruwakti dati.

Tapu yu ai, no span yu srefi, noso begi.

EFU YU WANI WAKTI NANGA PRISIRI, DAN YU MUSU POTI PRAKSERI NA A FASI FA YU E DENKI ÈN YU MUSU SREKA SANI NA FESI.