„En Yuru No Ben Doro Ete”
„En Yuru No Ben Doro Ete”
„No wan sma ben fasi en, bika en yuru no ben doro ete.”—YOHANES 7:30.
1. Sortu tu sani ben de prenspari na ini ala sani di Yesus ben du na grontapu?
„A MANPIKIN fu libisma no ben kon fu sma dini en, ma fu dini sma èn fu gi en sili leki wan lusu-paiman ini a presi fu furu sma”, na so Yesus Krestes ben taigi den apostel fu en (Mateus 20:28). A ben taigi Pontius Pilatus, a tiriman fu Rome: „Fu a sani disi ede mi gebore, èn na fu a sani disi ede mi kon na grontapu, fu mi gi kotoigi fu a waarheid” (Yohanes 18:37). Yesus ben sabi soifri fu san ede a ben o dede èn a ben sabi soifri sortu wroko a ben musu du fosi a dede. A ben sabi tu omeni ten a ben abi fu du a wroko fu en. A diniwroko fu en leki a Mesias ben o teki soso dri nanga afu yari. A diniwroko fu en ben bigin di a ben dopu na ini watra na ini a Yordanliba (na ini 29 G.T.), na a bigin fu a lasti wiki fu a profeititori fu den 70 wiki; èn a diniwroko fu en leki a Mesias ben kaba nanga a dede di a ben dede na wan pina udu na mindri fu a lasti wiki dati (ini 33 G.T.) (Danièl 9:24-27; Mateus 3:16, 17; 20:17-19). Fu dati ede, tu sani ben de prenspari na ini ala sani di Yesus ben du na grontapu, namku: a marki fu san ede Yesus kon èn a du di Yesus ben du sani na a yoisti ten.
2. Fa den Evangelie tori e sori Yesus Krestes, èn fa Yesus ben sori taki a ben sabi san a ben musu du?
2 Den Evangelie tori e sori Yesus Krestes leki wan man di e du sani, di ben teki waka na a heri kondre fu Palestina, pe a ben meki a bun nyunsu fu Gado Kownukondre bekènti èn pe a ben du furu krakti wroko. Na ini a fosi pisi fu a krakti diniwroko fu Yesus, dan den ben taki fu en: „En yuru no ben doro ete.” Yesus srefi ben taki: „A yoisti ten fu mi no doro krinkrin ete.” Di en diniwroko ben doro en kaba, dan Yesus ben gebroiki den wortu „a yuru doro” (Yohanes 7:8, 30; 12:23). A sabi di Yesus ben sabi a yuru, noso a ten di a ben abi fu du en wroko, so srefi a gi di a ben musu gi en libi leki wan srakti-ofrandi, ben musu abi krakti tapu san a ben taki èn san a ben du. Te wi e frustan disi, dan dati kan meki wi kon sabi moro bun sortu sma Yesus ben de èn wi kan kon frustan fa Yesus ben denki, èn dati baka sa yepi wi „fu waka” moro „soifri na ini en futustap”.—1 Petrus 2:21.
Abi a Fasti Bosroiti fu Du Gado Wani
3, 4. (a) San e pasa na wan trow fesa na Kana? (b) Fu san ede a Manpikin fu Gado no wani du san Maria e aksi en te a win no de nofo? San wi kan leri fu disi?
3 A yari na 29 G.T. Soso wan tu dei nomo ben pasa di Yesus srefi ben teki den fosi disipel fu en. Den alamala kon now na a dorpu Kana na ini a distrikt Galilea. Den e go na wan trowfesa. Yesus en mama, Maria, de drape tu. A win e kaba. Maria wani sori en boi taki a musu du wan sani, ne a e taigi en boi: „Den no abi win.” Ma Yesus e piki: „Uma, san mi abi fu du nanga yu? A yuru fu mi no doro ete.”—Yohanes 1:35-51; 2:1-4.
4 A piki fu Yesus, „Uma, san mi abi fu du nanga yu?”, na wan fasi fa den sma fu fositen ben poti aksi. Nanga so wan aksi den e sori taki den no wani du a sani di wan trawan aksi den fu du. Fu san ede Yesus no wani du san Maria e aksi en? We, Yesus abi 30 yari kaba. Soso wan tu wiki pasa, a ben teki dopu, Yehovah ben salfu en nanga santa yeye, èn Yohanes a Dopuman ben kari en „a Pikin Skapu fu Gado di e teki a sondu fu grontapu tyari gowe” (Yohanes 1:29-34; Lukas 3:21-23). A Sma di abi Ala Makti e seni Yesus, èn na En musu tiri Yesus now (1 Korentesma 11:3). No wan sma kan kon na mindri Yesus nanga a wroko di a kon du na grontapu, srefi den krosibei famiri fu en no sa man du dati. Fu tru, di Yesus ben piki Maria, dan Yesus ben sori taki a ben abi a fasti bosroiti fu du en Tata wani! Meki wi abi a srefi fasti bosroiti, fu du wi „heri plekti” na Gado.—Preikiman 12:13.
5. Sortu wondru Yesus Krestes e du na ini Kana? Èn sortu krakti a wondru disi abi tapu trawan?
5 Fu di Maria e frustan san en boi taki, dati meki wantewante a e go na wan sei èn a e taigi den yepiman di drape: „Awansi san a e taigi unu, du en.” Yesus e lusu a problema. A e taigi den yepiman drape fu furu den bari nanga watra, èn a e meki a watra tron a moro switi win. Nanga a sani disi, Yesus e bigin fu a fosi leisi fu du wondruwroko nanga a krakti di a kisi; èn dati e sori taki a yeye fu Gado de na en tapu. Te den nyun disipel e si a wondru disi, dan a bribi fu den e kon moro tranga.—Yohanes 2:5-11.
De Fayafaya gi Yehovah En Oso
6. Fu san ede Yesus en ati e bron nanga den sani di a e si na ini a tempel na Yerusalem? Èn san a e du?
6 Esi-esi a tron lente fu 30 G.T., èn Yesus nanga den mati fu en de na pasi fu go na Yerusalem fu hori a Paska. Te den drape, dan den disipel e si a Fesiman fu den e du wan sani di noiti ete den si en du kande. Den gridi Dyu seriman e seri meti nanga fowru gi den wan di sa tyari srakti-ofrandi, leti na inisei fu a tempel. Èn den e aksi den getrow Dyu anbegiman bun furu moni gi den sani dati. Yesus en ati e bron srefisrefi, èn a e bigin du wan sani. A e meki wan wipi fu titei, èn a e yagi ala den seriman gowe. A e trowe ala moni fu den sma di e broko moni, te a e drai den tafra fu den tapu. „Puru den sani disi gowe fu dya!” a e komanderi den wan di e seri den doifi drape. Te den disipel fu Yesus e si a fayafaya fasi fa a e handri, dan den e memre a profeititori di e taki fu a Manpikin fu Gado: „A faya gi yu oso sa nyan mi” (Yohanes 2:13-17; Psalm 69:9). Wi musu luku bun srefisrefi fu no meki sani fu grontapu pori na anbegi fu wi.
7. (a) San meki Nikodeimus e go luku a Mesias? (b) San wi e leri fu a kotoigi di Yesus e gi na wan Samaria uma?
7 Te Yesus de na Yerusalem, a e du wondru sani di trawan kan si, èn dati meki furu sma e poti bribi na ini Yesus. Yesus naki na ati srefi fu Nikodeimus, wan memre fu a Sanhedrin, fu a Dyu hei krutu so bun; èn dati meki Nikodeimus e kon na Yesus te neti fu leri moro. Dan, Yesus nanga den disipel fu en e tan na ini a „kondre fu Yudea” so wan aiti mun, pe den e preiki èn e meki disipel. Ma baka di den poti Yohanes a Dopuman na ini dungru-oso, dan den e gowe libi Yudea fu go na Galilea. Te den e teki waka pasa a distrikt Samaria, dan Yesus e grabu na okasi fu gi wan finifini kotoigi na wan Samaria uma. Disi e opo a pasi gi furu Samariasma fu tron bribiman. Meki wi de na ai tu gi okasi di wi e kisi fu taki fu a Kownukondre.—Yohanes 2:23; 3:1-22; 4:1-42; Markus 1:14.
Furu Leri na ini Galilea
8. Sortu wroko Yesus e bigin na Galilea?
8 Fosi a „yuru” doro gi Yesus fu dede, dan a abi furu fu du ini a diniwroko fu en hemel Tata. Na ini Galilea, Yesus e bigin srefi nanga wan diniwroko di moro bigi leki di na ini Yudea nanga Yerusalem. Yesus e waka „na ini heri Galilea, ala di a e gi leri na den snoga fu den èn e preiki a bun nyunsu fu a kownukondre èn e dresi ala sortu siki èn ala sortu mankeri na den sma” (Mateus 4:23). Den tranga wortu fu en na: „Abi berow, bika a kownukondre fu hemel kon krosibei”, de fu yere na ini a heri distrikt (Mateus 4:17). Baka wan tu mun, te tu disipel fu Yohanes a Dopuman e kon na Yesus fu di den wani yere san Yesus srefi e taki fu den sani di a ben du, dan a e taigi den: „Go èn taigi Yohanes san yu si èn san yu yere: den breniwan e si baka, den malengriwan e waka, den gwasiman e kon krin èn den dofuwan e yere, den dedewan e opo baka, den pôtiwan e kisi a bun nyunsu fu yere. Èn koloku a sma di no e naki futu fu mi ede.”—Lukas 7:22, 23.
9. Fu san ede den ipi sma e kon na Krestes Yesus? Èn sortu sani wi kan leri fu disi?
9 ’Na ini a heri kondre, sma e taki bun fu Yesus’, èn ipi-ipi sma e kon na en — fu Galilea, Dekapolis, Yerusalem, Yudea, nanga a tra sei fu a Yordanliba (Lukas 4:14, 15; Mateus 4:24, 25). Den e kon na Yesus no wawan fu a wondru fasi fa a e dresi sma, ma so srefi fu di a e gi kefalek moi leri. A boskopu fu en e hari sma èn a gi den deki-ati (Mateus 5:1–7:27). Den wortu fu Yesus na moi wortu èn den switi fu yere (Lukas 4:22). Den ipi sma e „fruwondru fu a fasi fa a e gi leri”, bika a e taki komoto fu den Buku fu Bijbel leki wan sma di abi makti (Mateus 7:28, 29; Lukas 4:32). Suma na a sma di a man disi no e hari? Meki wi kweki a koni tu fu gi leri, so taki a waarheid kan hari den opregti sma.
10. Fu san ede den sma fu a foto Nasaret e pruberi fu kiri Yesus? Èn fu san ede den no man kiri en?
10 Ma a no ala sma di yere Yesus, wani a boskopu fu en. Srefi na ini a bigin fu en diniwroko, te a e gi leri na ini en mamafoto na a snoga na ini Nasaret, dan sma e pruberi fu kiri en. Ala di den sma na ini a foto drape e fruwondru nanga den „moi wortu” fu en, toku den wani si wondru. Ma na presi fu Yesus du furu krakti wroko drape, dan a e tyari kon na krin taki den e denki densrefi nomo èn taki den e mankeri bribi. Den wan na ini a snoga e atibron srefisrefi, den e opo, den e grabu Yesus, èn den e waka esi-esi fu tyari en go na wan bergi, so taki den kan trowe en fu drape go na ondrosei. Ma Yesus e lusu ensrefi fu a grabu di den grabu en hori, èn a e lowe gowe sondro wan sani pasa nanga en. A „yuru” fu en no doro ete fu dede.—Lukas 4:16-30.
11. (a) Fu san ede wan tu kerki fesiman e kon arki Yesus? (b) Fu san ede den e krutu Yesus taki a no e hori ensrefi na a wet fu a Sabadei?
11 Furutron den kerki fesiman — soleki den leriman fu Wet, den Fariseiman, den Saduseiman, nanga trawan — de na a presi pe Yesus e preiki. Furu fu den de drape, no fu arki èn fu leri, ma fu feni fowtu na en èn fu pruberi fu seti krafana gi en (Mateus 12:38; 16:1; Lukas 5:17; 6:1, 2). Fu eksempre, di Yesus go na Yerusalem gi a Paska fu 31 G.T., dan a dresi wan man di ben siki 38 yari kaba. Den Dyu kerki fesiman e krutu Yesus taki a e broko a wet fu a Sabadei. Yesus e piki den: „Mi Tata tan wroko te now ete, èn mi e tan wroko.” Now den Dyu e krutu en taki a e kosi Gado, taki a e kari ensrefi Gado Manpikin fu di a e kari Gado en Tata. Den e suku fu kiri Yesus, ma en nanga den disipel fu en e gowe libi Yerusalem fu go na Galilea. Na a srefi fasi, te wi e gi wi krakti na a wroko fu preiki a Kownukondre èn fu meki disipel, dan wi sa handri nanga koni te wi no e go suku trobi nanga gensman.—Yohanes 5:1-18; 6:1.
12. O furu kotoigi Yesus e gi na ini a kontren fu Galilea?
12 Na ini a wan nanga afu yari so di e kon baka dati, Yesus e du furu fu en diniwroko soso na Galilea; èn a e go na Yerusalem nomo fu fisiti den dri Dyu fesa di e hori ibri yari. Ala nanga ala, Yesus teki dri preikiwaka na ini Galilea: a fosiwan a ben waka nanga 4 nyun disipel; a di fu tu wan a ben waka nanga den 12 apostel; èn wan moro bigi waka a ben waka di a ben seni den apostel di teki leri, fu go preiki tu. Fu tru, kefalek furu kotoigi fu a waarheid e gi na ini Galilea!—Mateus 4:18-25; Lukas 8:1-3; 9:1-6.
Nanga Deki-ati A E Gi Kotoigi na ini Yudea èn na ini Perea
13, 14. (a) Na sortu okasi den Dyu ben suku fu kisi Yesus? (b) Fu san ede den ofsiri no man tyari Yesus go sroto?
13 A de a herfst fu 32 G.T., èn Yesus en „yuru” ben musu doro ete. A Wiwirikampu-fesa de krosibei. Den afu-brada fu Yesus e gi en leki rai: „Komopo fu dya, èn go na Yudea.” Den wani taki Yesus musu sori en wondru krakti na ala sma di e kon na a fesa na ini Yerusalem. Ma Yesus sabi a kefar. Fu dati ede, a e taigi den brada fu en: „Mi no e go ete na a fesa disi, bika a yoisti ten fu mi no doro krinkrin ete.”—Yohanes 7:1-8.
14 Yesus e tan wan pisi ten na Galilea, dan baka dati a e go na Yerusalem „no so taki sma ben kan si en, ma na wan kibri fasi”. Fu tru den Dyu e suku Yesus na a fesa, èn den e taki: „Pe a man dati de?” Te afu fu a fesa pasa kaba, dan Yesus e go na ini a tempel èn nanga deki-ati a e bigin gi leri. Den Dyu e suku fu kisi en, kande fu di den wani poti en na ini dungru-oso noso fu di den wani kiri en. Ma dati no e pasa soleki fa den wani, fu di Yesus ’en yuru no doro ete’. Now furu sma e poti bribi na ini Yesus. Srefi den ofsiri di den Fariseiman ben seni fu go kisi en, e drai kon baka sondro fu kisi en, èn den e taki: „Noiti ete wan tra sma taki na so wan fasi.”—Yohanes 7:9-14, 30-46.
15. Fu san ede den Dyu e piki ston fu trowe tapu Yesus, èn nanga sortu kotoigiwroko Yesus e bigin baka dati?
15 Den kesekese na mindri Yesus nanga den Dyu gensman fu en e go doro te Yesus e gi leri fu en Tata na a tempel na a ten di a fesa e hori. Tapu a lasti dei fu a fesa, den Dyu e atibron fu a taki di Yesus e taki dati a ben libi na ini hemel fosi a ben tron wan libisma; dati meki den e piki ston fu trowe na en tapu. Ma Yesus e kibri na wan presi èn a e lowe fu drape sondro fu kisi mankeri (Yohanes 8:12-59). Yesus e tan dorosei fu Yerusalem, èn a e bigin nanga wan fayafaya kotoigiwroko na Yudea. A e teki 70 disipel èn, baka di a gi den leri, a e seni den go tu-na-tu fu preiki na ini a kondre. Den 70 disipel e waka fosi Yesus; den e waka go na ibri presi nanga foto pe Yesus nanga den apostel fu en o go.—Lukas 10:1-24.
16. Fu sortu kefar Yesus e lon gowe na a ten fu na Inwijding-fesa? Èn nanga sortu wroko a e furu en ten ete wan tron?
16 Na ini a winter fu 32 G.T., a „yuru” fu Yesus e doro. A e kon na Yerusalem gi na Inwijding-fesa. Den Dyu e suku fu kiri en ete. Te Yesus e waka na ini a tempel na a gadri nanga postu na tu sei, dan den Dyu e lontu en. Agen den e krutu en taki a e kosi Gado, èn den e piki ston fu kiri en. Ma soleki fa Yesus ben du den tra leisi, dan a e lon gowe. Heri esi Yesus de na pasi e gi leri, a leisi disi a e waka foto fu foto èn dorpu fu dorpu na ini a distrikt Perea, na a tra sei fu a Yordanliba komoto fu Yudea. Èn furu sma e poti bribi na ini en. Ma wan boskopu di a e kisi di abi fu du nanga en lobi-ati mati Lasarus, e meki en go baka na Yudea.—Lukas 13:33; Yohanes 10:20-42.
17. (a) Sortu prenspari boskopu Yesus e kisi te a e preiki na Perea? (b) San na a sani di e sori taki Yesus sabi heri bun fu san ede a musu du sani èn o ten den sani musu pasa?
17 A prenspari boskopu e kon fu Marta nanga Maria, den sisa fu Lasarus, di e libi na ini Betania na Yudea. „Masra, luku! a wan di yu lobi sote, siki”, na so a boskopu e taki. „A siki disi no de fu dede,” Yesus e piki, „ma a de fu gi glori na Gado, so taki a Manpikin fu Gado kan kisi glori nanga a sani disi.” Fu du a sani disi, dan fu espresi Yesus e tan tu dei langa na a presi pe a de. Dan a e taigi den disipel fu en: „Meki wi drai go na Yudea baka.” Den no man bribi taki a e taki disi, èn den e piki: „Rabi, no so langa pasa den sma fu Yudea ben suku fu kiri yu nanga ston, ne yu e go drape baka?” Ma Yesus sabi heri bun taki a ten di tan abra fu den ’yuru fu wan dei’, noso a ten di Gado gi Yesus fu a du en diniwroko na grontapu, no furu moro. Yesus sabi soifri san a musu du èn fu san ede a musu du so.—Yohanes 11:1-10.
Wan Wondru Di No wan Sma Kan Taki Dati A No De So
18. Te Yesus doro na ini Betania, dan san na a situwâsi drape? Èn san e pasa baka te Yesus doro?
18 Na ini Betania, a fosiwan di e waka miti Yesus, na Marta èn a e taki: „Masra, efu yu ben dyaso, dan mi brada no ben o dede.” Maria nanga den wan di ben kon na den oso, e waka baka Marta. Den alamala e krei. „Pe unu poti en?” Yesus e aksi. Den e piki: „Masra, kon èn si.” Te den doro na a grebi — wan olo na ini wan bergi pe wan ston de na fesi na olo — dan Yesus e taki: „Puru a ston.” Fu di Marta no e frustan san Yesus wani du, meki a no e agri: „Masra, a musu fu tingi kaba now, bika na fo dei kaba di a de na ini a grebi.” Ma Yesus e aksi: „Mi no ben taigi yu taki efu yu ben sa bribi, dan yu ben o si a glori fu Gado?”—Yohanes 11:17-40.
19. Fu san ede Yesus e begi na fesi ala sma bifo a e opo Lasarus baka?
19 Te den e puru a ston di e tapu a grebi fu Lasarus, dan Yesus e begi nanga wan tranga sten so taki ala sma sa sabi taki san a de fu du, a e du nanga yepi fu a krakti fu Gado. Baka dati a e bari nanga wan tranga sten: „Lasarus, kon na doro!” Lasarus e kon na doro ala di en anu nanga en futu tai ete nanga krosi fu beri sma èn en fesi tapu nanga wan duku. „Lusu en èn meki a go”, Yesus e taki.—Yohanes 11:41-44.
20. Den sma di si fa Yesus ben opo Lasarus baka, san den sma disi e du?
20 Di den si a wondru disi, dan furu fu den Dyu di ben kon fu trowstu Marta nanga Maria, e poti bribi na ini Yesus. Trawan e gowe fu fruteri den Fariseiman san ben pasa. San den Fariseiman e du? Wantewante, den nanga den ede-priester e kari a Sanhedrin kon makandra gi wan nowtu di de. Den bruya, èn den e krei-krei: „San wi musu du, bika a man disi e du furu marki? Efu wi meki a go doro na a fasi disi, dan den alamala sa poti bribi na ini en, èn dan den Romesma sa kon puru a presi fu wi, so srefi a nâsi fu wi.” Ma a Granpriester Kayafas e taigi den: „Unu no sabi taki a moro bun taki wán sma dede gi a heri pipel, na presi fu a heri nâsi kisi pori.” Dati meki sensi a dei dati den ben meki mofo fu kiri Yesus.—Yohanes 11:45-53.
21. Fu san a wondru fu na opobaka fu Lasarus de wan bigin?
21 So bun, na fu di Yesus e wakti fosi a go na ini Betania, dati meki a kan du wan wondru di no wan sma kan taki dati a no de so. Fu di Yesus ben kisi krakti fu Gado, meki a e opo wan man baka di ben dede fo dei kaba. Srefi a kefalek prenspari Sanhedrin musu si a wondru disi èn den e leisi dede-strafu gi a Wondru Wrokoman! So bun, a wondru disi na wan bigin fu wan prenspari pisi na ini a diniwroko fu Yesus pe sani e kenki — e kenki fu a ten di „en yuru no ben doro ete” kon na a ten pe „a yuru doro kaba”.
San Yu Ben Sa Piki?
• Fa Yesus ben sori taki a ben sabi heri bun taki a kisi wan wroko fu Gado fu du?
• Fu san ede Yesus no wani du san en mama e gi en leki rai ini a tori fu a win?
• San wi kan leri fu a fasi fa Yesus ben handri nanga gensman furutron?
• Fu san ede Yesus e wakti fosi a go du wan sani te a yere taki Lasarus siki?
[Aksi fu a tori disi]
[Prenki na tapu bladzijde 12]
Yesus ben gi en krakti na a frantwortu wroko di a kisi fu Gado