Heri Esi​—Wan Grontapu Sa De Sondro Bruya

A LIBI e aksi furu fu wi moro nanga moro, èn furu sani de di kan meki wi bruya fu dati ede. Te wi no sabi san fu du moro, dan wi kan feni en wan tranga sani fu hori wisrefi. We, srefi den sma di lobi a libi kan tron sma di no e prisiri kwetikweti nanga a libi moro! Prakseri fu wan tu eksempre.

Na ini owruten, a profeiti Moses ben lasi-ati so kefalek taki a ben taigi Gado: „Grantangi kiri mi, ala sani fu mi, efu mi feni bun na ini yu ai, èn no meki mi si a rampu fu mi” (Numeri 11:15). Di a profeiti Elia ben lon gi den feanti fu en, dan a ben bari taki: „A nofo! Tyari mi sili [mi libi] gowe now, o Yehovah” (1 Kownu 19:4). Èn a profeiti Yona ben taki: „O Yehovah, grantangi teki mi sili puru fu mi, bika a moro bun gi mi fu dede, leki fu de na libi” (Yona 4:3). Ma no wán fu den dri profeiti disi, Moses, Elia, noso Yona, ben kiri ensrefi. Ala den dri ben sabi a komando fu Gado: „Yu no musu kiri sma” (Exodus 20:13). Fu di den abi wan tranga bribi na ini Gado, meki den ben sabi taki no wan situwâsi de pe howpu no de èn taki a libi na wan presenti fu Gado.

 Fa a de nanga den problema di wi e kisi noyaso? Boiti taki wi e pina nanga a lasi-ati di wi e lasi-ati noso taki wi e siki, dan sontron wi e kisi fu du nanga sma na ini na osofamiri, birtisma, nanga wroko-mati di no e handri bun nanga wi. Bijbel e taki fu sma di furu „nanga ala onregtfardikifasi, godelowsufasi, gridifasi, takrufasi, furu nanga bigi-ai, kiri, suku trobi, bedrigifasi, takrudu, ala di den e syusyu na baka, gongosaman, di abi bita-ati gi Gado, no e syen, di abi heimemre, di asranti, di e feni ogri sani, di no e arki papa nanga mama, sondro frustan, no e hori densrefi na kruderi, sondro naturu firi fu lobi, sondro sari-ati” (Romesma 1:28-31). Fu di ala dei den sortu sma disi e lontu wi, dan dati kan meki a libi de wan hebi. Fa wi kan yepi den wan di abi trowstu nanga frulusu fanowdu?

A Wani Di Sma Wani Arki

Te a gersi taki no wan sani e waka bun nanga wan sma èn te a e pina, dan dati kan meki a sma lasi ensrefi. A koniman ben taki: „Bika soso kwinsi kan meki wan koniman du law sani” (Preikiman 7:7). So bun, te wan sma e taki dati a o kiri ensrefi, dan wi musu teki a sma seryusu. Den problema di a abi, awansi a de na a sei fu fa a e firi, noso na skin sei, noso na a fasi fa a e denki, noso na yeye fasi, kan meki taki wantewante wi musu du wan sani. Sma de di abi a wroko fu yepi sma nanga den problema disi, èn a no de fu taki dati a fasi fa den sortu sma disi e du den wroko, e difrenti; dati meki ibri sma musu teki en eigi bosroiti fu sortu yepi a o suku ini a tori disi.—Galasiasma 6:5.

Awansi fu san ede wan sma wani kiri ensrefi, toku a situwâsi fu en kan kenki. A kan kenki te a miti nanga wan sma di abi a koni fu man si sani krin, di de nanga pasensi, èn di a kan frutrow. Famiriman nanga mati di wani arki, kan yepi a sma kande. Boiti fu firi gi a sma èn fu de nanga switifasi, dan wan tu prakseri fu Gado Wortu di e gi deki-ati, kan de wan bigi yepi gi a wan di lasi howpu.

Yepi na Yeye Fasi gi Den Wan Di Lasi-ati

A kan fruwondru yu fu sabi o furu deki-ati yu kan kisi te yu e leisi Bijbel. Ala di Bijbel no de wan buku fu yepi sma fa fu dresi densrefi na frustan sei, toku Bijbel kan yepi wi abi warderi gi a libi. Soleki fa Kownu Salomo ben taki: „Mi kon sabi taki no wan sani moro bun gi den leki fu prisiri èn fu du bun na ini a libi fu den; èn so srefi taki ibriwan sma musu nyan èn dringi trutru èn si a bun fu ala en tranga wroko. A de a presenti fu Gado” (Preikiman 3:12, 13). Boiti a wroko di e meki sma de tevrede èn di e meki sma libi wan moro bun libi, dan tra sempel sani de di Gado gi wi leki presenti èn di wi kan nyan bun fu den; sani soleki switi winti di e wai, son di e skèin, bromki, bon, nanga fowru.

Wan sani di e gi wi moro krakti srefi na a dyaranti fu Bijbel taki Yehovah Gado nanga en Manpikin, Yesus Krestes, e broko den ede nanga wi (Yohanes 3:16; 1 Petrus 5:6, 7). Dati meki a fiti taki a psalm skrifiman ben taki: „Blesi fu Yehovah, di e tyari a lai gi wi ala dei, a tru Gado fu wi frulusu” (Psalm 68:19). Ala di wi kan firi taki wi no de noti èn wi no warti notinoti, toku Gado e gi wi a kari fu wi begi en. Yu kan de seiker taki Gado no sa wisiwasi no wan sma di na wan sakafasi èn na wan oprègti fasi e aksi yepi fu En.

No wan sma kan fruwakti taki a sa libi wan libi sondro problema na ini a ten disi (Yob 14:1). Ma toku, a waarheid fu Gado Wortu sori furu sma taki fu kiri densrefi a no a bun fasi fu lusu den problema fu den. Prakseri nomo fa na apostel Paulus ben yepi wan waktiman fu wan dungru-oso di ben kon bruya: „[a waktiman fu a dungru-oso] ben wiki fu sribi, èn di a ben si taki den doro fu a dungru-oso ben opo, dan a ben hari en feti-owru èn a ben de fu kiri ensrefi, fu di a ben denki taki den strafuman ben lowe.” Na tapu wán momenti, a waktiman dati ben kon na a bosroiti taki a ben moro bun fu kiri ensrefi dan fu kisi syen èn kande dedestrafu te fu kaba fu di a no ben du en wroko bun. Na apostel ben bari taki: „No du yusrefi ogri, bika wi alamala de dyaso!” Paulus no ben taki dati wawan. Fu taki en leti, en nanga Silas ben trowstu a waktiman èn den ben du wan sani gi en di a ben aksi den: „Un masra fu mi, san mi musu du fu kisi frulusu?” Den ben piki en: „Bribi ini Masra Yesus èn yu sa kisi frulusu, yu nanga yu osofamiri.” Baka dati den taki nanga en èn nanga en osofamiri fu a wortu Yehovah, èn fu dati ede „wantewante en nanga ala sma di ben de nanga en, ben teki dopu”. A waktiman dati nanga ala sma fu en osofamiri ben prisiri furu èn den ben man nyan bun fu a libi baka.—Tori fu den Apostel 16:27-35.

Noyaso, fu tru a e meki wi firi bun fu sabi taki  Gado no de frantwortu gi ogridu! En Wortu e meki wi kon sabi wan ogri yeye, „a wan di den e kari Didibri nanga Satan”, leki a wan di „e kori heri grontapu pe sma e libi”. Ma a ten fu Satan e doro en kaba (Openbaring 12:9, 12). Ala den banawtu di Satan nanga den ogri yeye fu en tyari kon tapu libisma na grontapu, sa kon na wan kaba heri esi te Gado sa teki abra. Dan a regtfardiki nyun grontapu di Gado pramisi, sa tyari wan kaba kon fu ala ten na ala sani di e meki taki sma de sondro howpu èn di e meki taki den e kiri densrefi.—2 Petrus 3:13.

Trowstu gi Den Wan Di E Suku Yepi

Srefi now, den wan di e sari kan kisi trowstu fu den Buku fu Bijbel (Romesma 15:4). A psalm skrifiman David ben singi: „Wan ati di broko èn di masi, o Gado, yu no sa wisiwasi” (Psalm 51:17). A tru, sondro misi wi e kisi wan tu tesi èn e firi san onvolmaaktifasi e du nanga wi. Ma te wi e teki soifri sabi fu wi lobi-ati hemel Tata di de nanga switifasi èn di de reidelek, dan dati sa gi wi a dyaranti taki wi de warti na ini en ai. Gado kan tron wi moro bun Mati nanga wi moro bun Leriman. Efu wi e kweki wan krosibei matifasi nanga Yehovah Gado, dan noiti a sa meki wi lasi-ati. „Mi, Yehovah, na yu Gado,” na so wi Mekiman e taki, „a Sma di e leri yu fu gi yusrefi wini, a Sma di e meki yu waka na tapu a pasi di yu musu waka.”—Yesaya 48:17.

A frutrow di furu sma frutrow tapu Gado, de wan yepi gi den. Fu eksempre: Mara ben swaki kaba fu di stress ben naki en wan pisi ten kaba, di a wan-enkri boi fu en go lasi en libi na tapu pasi. * Mara ben bruya èn a ben pruberi fu kiri ensrefi. Ma now a e opo fruku ibri mamanten fu du en osowroko. A e prisiri fu arki poku èn fu yepi trawan. A howpu di a abi taki „wan opobaka o de fu den regtfardikiwan nanga den onregtfardikiwan”, puru furu fu a sari di Mara ben sari, di a lasi en boi na ini dede èn a ben gi en moro krakti fu bribi ini Gado (Tori fu den Apostel 24:15). Fu di noiti Mara ben abi a winsi fu tron wan engel na ini hemel, meki den wortu fu Psalm 37:11 naki en ati: „Den safri-atisma srefi sa abi grontapu leki a gudu fu den, èn den sa feni trutru switi prisiri na ini vrede pasa marki.”

Wan tra Brasyon uma, Sandra, ben wroko tranga fu de a kefalek bun mama gi den dri pikin fu en. A e taki: „Mi ben du so furu sani. Dati meki di wantronso mi papa dede èn mi ben kon sabi taki mi masra ben de nanga wan tra uma, mi no ben denki srefisrefi fu begi Gado fu yepi mi.” Fu di Sandra no ben  sabi san fu du, meki a ben pruberi fu kiri ensrefi. San ben yepi en fu kisi ensrefi baka? A warderi di a ben warderi yeye afersi. „Ibri neti fosi mi e go sribi, mi e leisi Bijbel, èn mi e pruberi fu du neleki mi ben de na ini a presi fu den sma di mi e leisi fu den. Mi e leisi so srefi A Waktitoren nanga Ontwaakt!, èn mi lobi den ondrofenitori moro furu fu di den e yepi mi fu de tevrede nanga san mi abi ini a libi.” Fu di Sandra sabi taki Yehovah na en moro bun mati, meki a e taki fu spesrutu sani te a e begi.

Wan Tamara Sondro Bruya

Fu tru, a de wan kefalek bigi trowstu fu sabi taki a pina di libisma e pina na soso gi wan pisi ten nomo! Nownowde pikin-nengre nanga bigisma e ondrofeni ogri di trawan e du nanga den, den e ondrofeni sani di no reti di trawan e du nanga den, èn trawan e krutu den na fesi sondro fu abi reide gi dati; na ondro Gado en Kownukondre tiri, den pikin-nengre nanga den bigisma dati sa prisiri. Soleki fa a ben taki na fesi na ini wan psalm, dan a Kownu di Yehovah poti na wroko, Yesus Krestes, „sa frulusu a pôtiwan di e bari fu kisi yepi, so srefi a sma di e kisi kwinsi èn ibri sma di no abi yepiman”. Boiti dati, „a sa firi sari gi a mofinawan èn gi a pôtiwan, èn a sa frulusu den sili fu den pôtiwan”. Fu tru, „fu kwinsi èn fu ogri di e du nanga tranga, a sa frulusu a sili fu den, èn a brudu fu den sa de warti na ini en ai”.—Psalm 72:12-14.

A ten doro kaba fu den profeiti wortu dati kon tru. A prakseri fu nyan bun fu têgo libi na grontapu ondro den sortu situwâsi dati, e hari yu? Efu a e hari yu, dan yu abi reide fu de nanga prisiri èn fu si a libi leki wan switi presenti fu Gado. Èn efu yu e prati den Bijbel pramisi disi nanga tra sma, dan yu kan furu a libi fu den wan di e suku yepi, nanga koloku ini a grontapu disi di no e firi gi sma èn di de sondro lobi.

[Futuwortu]

[Prenki na tapu bladzijde 6]

Furu okasi de fu de koloku noyaso

[Prenki na tapu bladzijde 7]

Yu e luku go na wan grontapu sondro bruya?