Grontapu​—Wan Presi fu Luku Nomo efu Sma Bun Nofo?

DATI na wan hebi di komoto na en tapu! A slaag. A studenti ben kisi te fu kaba wan moi boskopu, baka di a ben pasa tu hebi wiki fu examen. Now a ben kan go du a wroko di a ben wani du ala ten kaba.

Furu sma e si a libi na grontapu na a srefi fasi disi. Den e denki taki a libi na grontapu na wan sortu examen di ala sma musu meki fosi. Na wan noso tra fasi den wan di slaag e kisi wan moro betre libi baka te den dede. Fu tru, a ben o de wan sari sani, efu a libi di wi abi nownow — san wani taki gi furu sma taki den de na libi nomo — ben o de a moro betre sani di wan sma ben sa man kisi. Yob ben de gosuntu a moro bigi pisi fu en libi èn a ben abi furu gudu. Toku a man disi di Bijbel e taki fu en ben taki: „Libisma, di wan uma meki, e libi syatu èn a lai problema.”—Yob 14:1.

A New Catholic Encyclopedia di e sori fa moro furu sma e denki fu disi e taki: „Gado meki libisma so taki den man kisi hemel glori. . . . Son sma e denki taki libisma kan de koloku soso te den e libi na ini wan hemel paradijs.” No so langa pasa di a Kerki fu Krestes ben ondrosuku sani na ini Amerkankondre, dan den ben taki dati 87 procent fu den sma di den ben taki nanga den e bribi taki kande den o go na hemel baka te den dede.

Furu sma di no de Kresten e howpu tu, fu gowe libi grontapu fu go na wan moro betre presi baka te den dede. Moslimsma fu eksempre, e howpu fu go na ini wan hemel paradijs. Bakaman fu a Soifri Kondre sekte fu a Buda bribi na ini China nanga Yapan e bribi taki den o gebore baka na ini a Soifri Kondre, noso a Paradijs fu Westsei. Den e bribi taki den o abi a moro bigi sortu koloku di de, efu den e tan taki „Amitabha”, a nen fu a Buda Di Abi Leti Pasamarki.

A moi fu si taki Bijbel, a santa buku di vertaal èn panya na ala sei na grontapu moro ala tra buku, no e taki fu grontapu leki wan presi pe sma musu suku fu lon komoto, wan sani fu yepi den fu man kisi wan moro betre libi baka ten. Bijbel e taki fu eksempre: „Na den regtfardiki sma, densrefi, sa abi grontapu leki a gudu fu den, èn den sa libi na tapu fu têgo” (Psalm 37:29). Den pôpi wortu fu Yesus de fu feni tu na ini Bijbel: „Koloku fu den safri-atiwan, bika den sa kisi grontapu.”—Mateus 5:5, King James Version.

A denki di moro furu sma abi taki grontapu na wan presi pe wi e tan fu wan pisi ten, e sori taki dede na wan sani di e yepi sma fu kisi wan moro betre libi baka ten. Efu dati de so, dan dede na trutru wan blesi. Ma sma e si dede moro furu na a fasi dati? Noso den e pruberi fu libi moro langa? Ondrofenitori e sori taki te sma de gosuntu èn te den abi nofo seikerfasi, dan den no wani dede.

Ma fu di a libi na grontapu lai ogridu nanga pina, meki furu sma e si hemel ete leki a wan-enkri presi di kan yepi den fu feni trutru vrede nanga koloku. Hemel na wan paradijs pe soso vrede de fu feni? Na wan presi pe ogri noso dyugudyugu no kan pori a vrede dati? Wan libi baka te wan sma dede de fu feni soso na ini sortu hemel kownukondre? Kande yu sa fruwondru fu si san Bijbel e piki. Grantangi leisi go moro fara.