Ondrofenitori

Mi Ben Kisi wan Spesrutu Gudu Leki Blesi

SOLEKI FA CAROL ALLEN BEN FRUTERI

Mi ben de mi wawan, ala di mi ben e hori mi moi nyun buku steifi. Mi ben e frede srefisrefi, èn mi ben e krei langalanga watra-ai. Dati no musu fruwondru sma, bika mi ben de wan pikin meisje di ben abi seibi yari nomo èn mi ben lasi na ini wan foto di mi no ben sabi, ala di tin dusundusun sma ben de lontu mi!

NO SO langa pasa, pikinmoro 60 yari baka dati, mi e memre a sani dati di mi ben ondrofeni leki wan pikin-nengre, libilibi. Mi ben memre dati, di mi nanga mi masra Paul, ben go na a moi Waktitoren Skoro Centrum na Patterson, New York. Paul ben kisi wan kari fu go drape na a di fu tu klas fu a skoro di e hori gi kringopziener fu Yehovah Kotoigi.

A leti fu a son e skèin kon na ini a kantoro pe den e ontfanga sma. Dan mi ben si wan bigi bord pe „KONGRES” ben skrifi na tapu. Krosibei fu a mindrisei pisi fu a bord, wan owru blaka-weti fowtow ben de pe pikin di ben e prisiri srefisrefi, ben tanapu e wai nanga den buku. Dati na a buku fu mi pikin-nengre ten! Esi-esi mi ben leisi san skrifi na a fowtow: „1941 — Na ini St. Louis, Missouri, di a mamanten programa ben bigin, dan 15.000 pikin — di ben de mindri 5 nanga 18 yari — ben kon makandra na a presi na ini a stadion, na fesi a podium. . . . Brada Rutherford ben meki bekènti taki a nyun buku Kinderen (Pikin-nengre) ben kon na doro.”

Ibri pikin ben kisi en eigi buku. Baka dati den pikin ben drai go baka na a presi pe den papa nanga den mama ben sidon — den alamala, boiti mi. Mi ben lasi! Wan dienstverlener nanga switifasi ben opo mi èn a ben poti mi na tapu wan bigi bijdrage boksu èn a ben taigi mi fu luku efu mi ben man si wan sma di mi ben sabi. Nanga wan beifi-ati mi ben e luku ala sma na ini na ipi di ben e saka a bigi trapu. Wantronso mi ben si wan fesi di mi ben sabi! „Omu Bob! Omu Bob!” Den feni mi! Bob Rainer ben tyari mi go na mi papa nanga mama di ben e wakti ala di den ben e broko den ede.

 Sani Di Ben Pasa Biginbigin Di Ben Abi Krakti Tapu Mi Libi

Di mi ben e luku den sani dati na tapu a bord, dan mi ben e bigin memre furu sani — sani di ben abi krakti tapu mi libi èn di ben meki taki wi ben kan de na a moi presi na Patterson. Mi ben bigin prakseri sani di ben pasa moro leki wán hondro yari pasa. Mi ben yere den sani disi spesrutu fu mi granpapa nanga mi granmama èn fu mi papa nanga mi mama.

Na ini December 1894 wan furuten dinari fu den Bijbel Ondrosukuman, soleki fa den ben kari Yehovah Kotoigi na a ten dati, ben kon luku mi granpapa fu mi papa sei, Clayton J. Woodworth, na en oso na ini Scranton, na Pennsylvania, Amerkankondre. Clayton ben trow paspas. A ben skrifi wan brifi go na a presidenti fu a Watch Tower Bible and Tract Society, Charles Taze Russell, èn den ben tyari dati kon na doro na ini The Watchtower fu 15 yuni 1895. A ben skrifi fu san ede:

„Wi na wan yongu man nanga yongu uma di trow èn wi ben de memre fu a kerki dyaso so wan tin yari langa; ma now wi e bribi taki wi e komoto na dungru fu a kerki èn wi e kon na ini a leti fu a nyun dei di e bigin gi den pikin fu a Moro Heiwan, di kon santa. . . . Langa ten bifo wi ben miti makandra srefi, dan wi ben winsi fu dini Masra, efu a ben de en wani kande, leki zendeling na ini wan tra kondre.”

Baka ten na ini 1903, dan Sebastian nanga Catherine Kresge, a papa nanga a mama fu mi granpapa èn di fu mi granmama fu mama sei, ben arki a Bijbel boskopu nanga prisiri. Tu sma di ben teki presi gi a Waktitoren Genootschap ben tyari a boskopu disi gi den na a bigi burugron pe den ben e libi, na ini den moi Poconobergi fu Pennsylvania. Den umapikin fu den, Cora nanga Mary, ben e libi drape tu nanga den masra fu den, Washington nanga Edmund Howell. Carl Hammerle nanga Ray Ratcliffe, di ben teki presi gi a Waktitoren Genootschap, ben tan wan heri wiki langa nanga den fu leri den furu sani. Ala den siksi memre fu a famiri disi ben arki, studeri èn esi-esi den ben kon tron fayafaya Bijbel Ondrosukuman.

Na a srefi yari dati, 1903, Cora nanga Washington Howell ben kisi wan umapikin di nen Catherine. Fa a ben trow te fu kaba nanga mi papa Clayton J. Woodworth, na wan moi tori èn, mi denki, wan tori di e leri sma wan sani. A tori e sori taki mi granpapa, Clayton J. Woodworth, ben abi a koni nanga a lobi fu frustan sani èn a ben e broko en ede leki wan papa.

Mi Papa E Kisi Yepi na wan Lobi-ati Fasi

Mi papa Clayton, ben gebore na ini Scranton na ini 1906, so wan 80 kilometer fu a burugron fu famiri Howell. Na ini den bigin yari dati, granpapa Woodworth ben kon sabi a bigi famiri Howell heri bun. Furutron a ben e prisiri fu a fasi fa den ben lobi fu ontfanga en bun. Furu sma ben sabi taki a famiri disi ben lobi fu du a sani disi. Mi granpapa ben yepi a gemeente fu Bijbel Ondrosukuman fu a kontren dati furu. Baka wan pisi ten, den ben aksi mi granpapa fu trow den dri manpikin fu famiri Howell. Fu di a ben hori a tan bun fu en eigi manpikin na prakseri, meki mi granpapa ben tyari mi papa go na ibriwan fu den trow-oso disi.

Na a ten dati, mi papa no ben teki prati trutru na a diniwroko fu den Bijbel Ondrosukuman. We, a tru taki a ben e rei mi granpapa go na den gobaka di mi granpapa ben abi. Ma awinsi mi granpapa ben gi en deki-ati, toku mi papa no ben teki prati ensrefi. Na a ten dati, mi papa ben lobi poku moro leki ala tra sani, èn a ben e meki muiti fu dati kon tron wan libiwroko.

Catherine, na umapikin fu Cora nanga Washington Howell, ben kon tron so srefi wan bun pokuman di ben e prei piano èn di ben e leri trawan fa fu du dati. Ma di a ben kisi na okasi fu teki dati leki  wan libiwroko, dan a ben poti poku tori na wan sei èn a ben bigin teki prati na a furuten diniwroko. Mi granpapa no ben sa kan abi wan moro betre patna na prakseri gi en manpikin — ma dati na soleki fa mi e si dati! Mi papa ben dopu èn a ben trow nanga mi mama siksi mun baka dati na ini yuni 1931.

Ala ten mi granpapa ben prisiri nanga en manpikin fu di a ben sabi poku bun. A ben de so koloku di den ben aksi mi papa fu leri den moro prenspari pokuman fu a grupu wan tu poku tori. Den ben o prei na a internationaal kongres fu 1946, na ini Cleveland, Ohio. Na ini den yari baka dati, mi papa ben teki fesi na ini a grupu fu pokuman na furu tra kongres fu Yehovah Kotoigi.

A Ten Di Mi Granpapa Ben Kisi Krutustrafu èn Ben De na Strafu-oso

Na a presi fu Patterson pe den e ontfanga sma, Paul nanga mi ben si wan bord tu nanga a fowtow na tapu, di de fu si na tapu a tra bladzijde. Wantewante mi ben memre a fowtow dati, fu di mi granpapa ben seni wan kopi fu a fowtow disi gi mi so wan 50 yari pasa. En na a sma di e tanapu leki a lasti wan na a leti-anusei.

Na a ten fu a Fosi Grontapufeti, di sma ben krasi fu feti srefisrefi gi a kondre fu den, dan den ben sroto den aiti Bijbel Ondrosukuman disi. Joseph F. Rutherford (di e sidon na mindrisei), presidenti fu a Waktitoren Genootschap, ben de na mindri den man disi di den ben sroto sondro taki den ben du wan sani. No wan lusu moni ben kan pai gi den fu meki den kon fri baka. Den kragi di den ben tyari kon na fesi, ben abi fu du moro furu nanga sani di ben skrifi na ini a di fu seibi pisi fu Studies in the Scriptures, di ben abi a nen The Finished Mystery. Den ben frustan na wan fowtu fasi taki den sani di ben skrifi na ini a buku disi no ben gi sma fu Amerkankondre deki-ati fu teki prati na a Fosi Grontapufeti.

Na ini wan pisi ten fu furu yari, Charles Taze Russel ben skrifi den fosi siksi pisi fu Studies in the Scriptures, ma a dede bifo a ben man skrifi a di fu seibi pisi. So bun, mi granpapa nanga wan tra Bijbel Ondrosukuman ben kisi den notisi fu en, èn den ben skrifi a di fu seibi pisi. Den ben tyari dati kon na doro na ini 1917, bifo a feti ben tapu. Na a krutu di ben hori, den ben leisi strafu gi mi granpapa èn so srefi gi furu fu den trawan. Ibriwan fu den ben musu koti 80 yari strafu.

Den sani di skrifi na a fowtow na ini a presi pe den e ontfanga sma na Patterson e fruklari: „Neigi mun baka di Rutherford nanga den kompe-wrokoman fu en ben kisi strafu — èn baka di a feti ben pasa — tapu 21 maart 1919, a hei krutubangi ben teki a bosroiti taki ala den aiti man di lanti ben kragi, ben musu pai wan lusu moni. Tapu 26 maart den ben lusu den na ini Brooklyn, baka di ibriwan fu den ben pai wan  lusu moni fu 10.000 Amerkan dala. Tapu 5 mei 1920, a nen fu J. F. Rutherford nanga di fu den trawan ben krin dorodoro.”

Baka di den ben leisi strafu gi den aiti brada, ma bifo den ben seni den go na a strafu-oso fu Atlanta, Georgia, den ben sroto den aiti brada wan tu dei fosi na ini a strafu-oso na Raymond Street, na ini Brooklyn, New York. Fu a strafu-oso dati, mi granpapa ben skrifi taki den ben poti en na ini wan ’kefalek fisti, morsu’ strafu-oso kamra di ben langa pikinmoro tu meter èn di ben bradi pikinmoro tu nanga afu meter. A ben taki: „Wan ipi koranti de dyaso. Kande biginbigin yu e si den leki sani di no warti noti, ma heri esi yu sa si taki den koranti disi, nanga sopo, nanga wan wasi duku, na den wan-enkri sani di yu abi fu hori yusrefi krin èn fu tan abi lespeki gi yusrefi.”

Ma toku mi granpapa ben tan si a switi fu a tori ete. A ben e kari a strafu-oso „Hôtel de Raymondie”, èn a ben skrifi: „Mi sa gowe fu dyaso te mi no e kisi nyanyan moro.” A e taki tu fa a ben de fu koiri na a dyari fu a strafu-oso. Wan leisi di a ben e waka na a dyari, dan a ben stop fu meki wan sma kan en wiwiri. Tapu a momenti dati, dan wan fufuruman ben grabu en oloisi di ben e tan na en saka. Ma soleki fa a ben skrifi: „A keti ben koti èn mi ben man kibri na oloisi.” Di mi ben go luku Brooklyn Bethel na ini 1958, dan Grant Suiter, di ben de sekretarsi-penningmeester fu a Waktitoren Genootschap na a ten dati, ben kari mi na ini en kantoro èn a ben gi mi na oloisi dati. Te now ete mi e kibri en bun.

A Krakti Di Dati Ben Abi Tapu Mi Papa

Di den ben sroto mi granpapa na ini 1918, sondro taki a ben du wan sani, dan mi papa ben abi 12 yari nomo. Mi granmama ben sroto na oso fu den. Dan makandra nanga mi papa a go libi na en mama èn en dri sisa. A famirinen fu mi granmama (no en trow-nen) ben de Arthur. A famiri ben dyaf taki wan fu den famiriman fu den, Chester Alan Arthur, ben de a di fu 21 presidenti fu Amerkankondre.

Mi granpapa Woodworth ben kisi wan langa krutustrafu fu di, neleki fa den ben taki, a ben du ogridu teige Amerkankondre. Baka dati, a ben de krin taki famiri Arthur ben feni taki a ben pori a nen fu a famiri. A sani di ben pasa na a ten dati, ben hati mi papa trutru. Kande dati ben de wan sani di ben meki taki biginbigin a ben draidrai fu teki prati na a publiki diniwroko.

Di den ben lusu mi granpapa fu strafu-oso, dan a ben froisi nanga en osofamiri go libi na wan bigi sortu ston oso na Quincy Street na ini Scranton. Leki pikin-nengre, mi ben sabi na oso dati — èn den moi posren sani fu mi granmama — heri bun. Wi ben kari den, den santa sani fu mi granmama, bika no wan sma boiti mi granmama ben mag wasi den. Baka di mi granmama dede na ini 1943, dan furutron mi mama ben gebroiki den moi sani disi gi fisitiman.

Abi Furu fu Du na ini a Kownukondre Diniwroko

Wan tra dei na Patterson, mi ben si wan fowtow fu Brada Rutherford di ben taki na wan kongres na Cedar Point, Ohio, na ini 1919. Drape a ben gi ala sma deki-ati fu meki a Kownukondre fu Gado bekènti fayafaya èn fu gebroiki a nyun tijdschrift, Het Gouden Tijdperk, di ben tyari kon na doro na a kongres dati. Den ben poti mi granpapa leki a skrifiman èn a ben skrifi artikel gi a tijdschrift teleki den yari bifo 1950, syatu bifo a dede. Na ini 1937 a nen fu a tijdschrift ben kenki kon tron Vertroosting èn na ini 1946 Ontwaakt!

Mi granpapa ben skrifi na oso na ini Scranton èn so srefi na a edekantoro fu a Waktitoren Genootschap na ini Brooklyn, so wan 240 kilometer moro fara, ala di a ben e tan tu wiki na ibri presi. Mi papa taki dati a e memre a babari fu a skrifimasyin fu mi granpapa, di ben de fu yere furutron feifi yuru mamanten kaba. Ma toku mi granpapa no ben meki spotu nanga a frantwortu di a ben abi fu teki prati na a preikiwroko. Fu taki en leti, na en ben e meki wan dyakti gi mansma di ben abi bigi saka inisei fu hori  Bijbel buku. Te now ete mi tanta, Naomi Howell, di abi 94 yari, abi wan fu den. Mi granpapa ben meki wan tas tu gi umasma, fu poti buku na ini.

Wan leisi, baka di mi granpapa ben hori wan fayafaya Bijbel takimakandra, dan en velddienst patna ben taigi en: „C. J., yu meki wan fowtu.”

„Sortu fowtu?”, mi granpapa ben aksi. A ben luku en dyakti. Ala tu saka fu en ben leigi.

„Yu frigiti fu pristeri a man wan abonnement fu a tijdschrift Het Gouden Tijdperk.” Den ben abi fu lafu trutru fu di a skrifiman fu a tijdschrift frigiti fu pristeri a tijdschrift fu en.

Mi E Memre Fa A Ben De Di Mi Ben E Gro Kon Bigi

Mi e memre ete fa mi ben e sidon na tapu mi granpapa en bowtu leki wan pikin. Mi pikin anu ben de na ini di fu en, di a ben fruteri mi a „Tori fu den Finga”. A ben bigin nanga a bigidoi èn a ben go doro nanga a finga fu sori sani èn a ben fruteri wan spesrutu sani fu ibriwan fu den finga. Dan safrisafri a ben beni ala den finga kon na wan ala di a ben taki san a tori disi e leri wi: „Den finga e wroko moro bun te den de ini wánfasi nanga makandra, te ibriwan e yepi ala den trawan.”

Baka di mi papa nanga mi mama trow, dan den ben froisi go libi na Cleveland, Ohio, èn den ben kon tron bun mati fu Ed nanga Mary Hooper. Den famiri fu den ben de Bijbel Ondrosukuman kaba, sensi a kenki fu a yarihondro. Mi papa nanga mi mama èn Omu Ed nanga Tanta Mary, soleki fa mi ben kari den, ben de tumusi bun mati. Famiri Hooper ben lasi a wan-enkri beibi fu den, wan umapikin. So bun di mi ben kon drape na ini 1934, mi ben kon tron a spesrutu „umapikin” fu den. Fu di mi ben gro kon bigi na mindri den sma disi di ben tranga na yeye fasi, meki mi ben gi misrefi abra na Gado èn teki dopu bifo mi ben tapu aiti yari.

Leki wan yongu pikin mi ben e leisi Bijbel ala ten. Wan fu den pisi fu Bijbel di mi ben lobi srefisrefi na a wan fu Yesaya 11:6-9, di e taki fa a libi na ini a nyun grontapu fu Gado o de. A fosi leisi di mi ben meki muiti fu leisi a heri Bijbel ben de na ini 1944, baka di mi ben kisi mi eigi American Standard Version. Wan spesrutu uitgave fu a Bijbel disi ben tyari kon na doro na a kongres na ini Buffalo, na New York. Mi ben prisiri srefisrefi fu leisi a vertaling disi, di ben poti a nen fu Gado, Yehovah, baka na a yoisti presi moro leki pikinmoro 7000 leisi na ini na „Owru Testamenti”!

Satra nanga sonde ben de switi dei. Mi papa nanga mi mama nanga famiri Hooper ben e tyari mi go fu go preiki makandra nanga den na ini den boitipresi. Wi ben e tyari wi nyan go èn ben e sidon nyan dati na wan kriki. Dan wi ben e go na wan burugron fu wan sma fu hori wan Bijbel lezing dorosei èn wi ben e gi ala birtisma wan kari fu kon. A libi no ben frekti. Wi ben abi prisiri leki famiri. Baka ten wan tu fu den owru mati fu wi famiri ben kon tron kringopziener noso distriktopziener, so srefi Ed Hooper, Bob Rainer, nanga den tu manpikin fu en. Richard Rainer e du a wroko disi ete, ala di en wefi Linda e go makandra nanga en.

Spesrutu, zomerten ben de switi ten. Mi ben e tan na a burugron fu famiri Howell makandra nanga den nicht fu mi. Na ini 1949 Grace, na umapikin fu mi tanta, ben trow nanga Malcolm Allen. Mi no ben denki srefi taki yari baka dati, mi ben sa trow nanga en brada. Marion, di ben yongu moro Grace èn di ben de na umapikin fu mi omu, ben de wan zendeling na Uruguay. En ben trow nanga Howard Hilborn na ini 1966. Furu yari langa, Grace nanga Marion ben dini makandra nanga den masra fu den, na a edekantoro na Brooklyn.

Mi Granpapa èn a Klari Di Mi Ben O Klari Skoro

Na a pisi ten di mi ben e go na heiskoro, dan ala ten mi granpapa ben de wan sma di ben e skrifi brifi gi mi baka. Nanga den brifi fu en, a ben e seni so srefi furu owru fowtow fu a famiri. Na bakasei fu den fowtow disi, finifini tori ben skrifi, di ben abi fu du nanga owru famiri tori. Na so mi ben kisi a fowtow pe en e tanapu makandra nanga den trawan di den ben poti na dungru-oso, sondro taki den ben du wan sani.

Na a kaba pisi fu 1951, mi granpapa ben lasi en trotro fu di a ben abi kanker. A ben man frustan sani krin ete, ma a ben abi fu skrifi den wortu fu en na tapu wan pisi papira fu wan notisi buku di a ben abi na en ala ten. Mi ben o kaba mi heiskoro na ini yanuari 1952. Na a bigin fu december mi ben seni den papira gi mi granpapa, pe mi ben skrifi san mi ben abi na prakseri fu taki na a dei di mi ben o kaba skoro. A ben puru wan tu fowtu èn na tapu a lasti bladzijde a ben skrifi tu wortu di ben naki mi ati trutru: „Granpapa breiti.” Tapu 18 december 1951, di a ben abi 81 yari, a ben kaba en libiwroko na grontapu. * Te now ete mi e kibri den owru papira dati fu a sani di  mi ben abi na prakseri fu taki na a dei di mi ben o kaba skoro. Den tu wortu skrifi na tapu a lasti bladzijde fu den owru papira disi di kon lasi ai.

Wantewante baka di mi ben kaba skoro, mi go na ini a pionier diniwroko, leki fa Yehovah Kotoigi e kari a furuten preikiwroko. Na ini 1958, mi ben go na a bigi kongres na ini New York City, pe wan heimarki fu 253.922 sma fu 123 kondre ben kon na a Yankee Stadion nanga Polo Grounds. Wan dei, mi ben miti wan sma fu Afrika di ben kon drape na a kongres. A ben abi wan lapel karta pe „Woodworth Mills” ben skrifi na tapu. So wan 30 yari bifo, a ben kisi a nen fu mi granpapa!

Mi E Prisiri Nanga a Gudu fu Mi

Di mi ben abi 14 yari, dan mi mama ben bigin pionier baka. A dede 40 yari baka dati, na ini 1988, ala di a ben de wan pionier ete! Mi papa ben teki prati na a pionierwroko te a ben man du dati. A lasi libi neigi mun bifo mi mama. Den wan di wi ben studeri nanga den ben kon tron lobi mati fu wi, wi heri libi langa. Son wan fu den manpikin fu den ben go wroko na a edekantoro na Brooklyn, èn trawan ben teki a pionierwroko.

Gi mi 1959 ben de trutru wan spesrutu yari. Dati ben de a yari di mi ben leri sabi Paul Allen. Baka di a ben kaba a di fu seibi klas fu a Gileadskoro, dan den ben poti en leki wan kringopziener na ini 1946. A skoro disi na fu leri memre fu na organisâsi fu Yehovah Kotoigi, fa fu du a wroko fu wan zendeling. Na a ten di wi ben miti, dan no wan fu wi ben sabi taki a tra toewijzing fu Paul ben o de Cleveland, na Ohio, pe mi ben e pionier. Mi papa ben lobi en, èn mi mama so srefi tu. Wi ben trow ini yuli 1963, na a burugron fu famiri Howel. Den famiri fu wi ben kon na a trow èn Ed Hooper ben hori a trow lezing. Dati ben de wan dren di ben kon tru.

Noiti Paul ben abi en eigi oto. Di wi ben gowe libi Cleveland fu go na a tra toewijzing, dan ala den sani di wi ben abi ben fiti na ini a 1961 Volkswagen fu mi (wan pikin oto). Te wi ben e lai den sani fu wi na ini na oto na tapu munde, a dei di wi ben go na wan tra gemeente, dan furutron tra kotoigi ben e kon luku fa sani e waka. A ben de neleki wan komedi prei fu si fa den kofru, den tas, a boksu nanga dokumenti, a skrifimasyin nanga tra sani, ben e go na ini a pikin oto dati.

Paul nanga mi reis kefalek furu kilometer makandra. Nownowde, wi e prisiri nanga den bun ten èn e horidoro te takru ten de na ini a libi. Wi du ibri sani nanga a krakti di Yehovah wawan man gi. Den yari dati na yari di tyari koloku kon. Wi lobi Yehovah, wi lobi makandra èn so srefi wi mati, owruwan nanga nyunwan srefisrefi. Te nanga now, den tu mun di wi ben de na ini Patterson pe Paul ben kisi leri, ben de a heimarki fu wi libi. Fu si na organisâsi fu Yehovah fu krosibei, e tranga a dyaranti di mi ben abi kaba. A dyaranti disi, di mi kisi leki wan pisi fu a warti yeye gudu fu mi, na: Disi na a organisâsi fu Gado trutru. A de wan prisiri, srefi efu wan sma abi wan pikin prati nomo na ini!

[Futuwortu]

[Prenki na tapu bladzijde 25]

Nanga Ed Hooper syatu bifo a kongres di ben hori na ini St. Louis, na ini 1941, pe mi ben kisi a buku „Kinderen”

[Prenki na tapu bladzijde 26]

Mi granpapa na ini 1948

[Prenki na tapu bladzijde 26]

Na a burugron fu famiri Howell di mi papa nanga mama (di marki tapu a fowtow) ben trow

[Prenki na tapu bladzijde 27]

Den aiti Bijbel Ondrosukuman di ben poti na dungru-oso na ini 1918, sondro taki den du wan sani (Mi granpapa e tanapu leki a lasti wan na a leti-anusei)

[Prenki na tapu bladzijde 29]

Ala den grontapu gudu di wi ben abi ben fiti na ini a Volkswagen fu wi

[Prenki na tapu bladzijde 29]

Nanga mi masra, Paul