Wi Na Den Sma Di Abi Bribi

Preiki a Kownukondre na Tapu na Altiplano na ini Peru

A KONTREN Altiplano e didon na mindri den owstusei nanga den westsei Andesbergi — pe Bolifia nanga Peru e miti. A nen Altiplano wani taki „heipresi” noso „hei kontren”. A moro bigi pisi fu a kontren disi de na ini Bolifia.

A presi Altiplano bradi 100 kilometer èn a langa 1000 kilometer, èn a hei so wan 3700 meter moro leki a se. Te yu de na ini wan opolani di e frei komoto fu Lima, a mamafoto fu Peru di de na syoro sei, dan yu e pasa El Misti. El Misti na wan vulkaan pe ijs de na tapu èn di hei 5822 meter go miti den wolku. Den ede fu Nevado Ampato nanga Nevado Coropuna di de moro fara èn di tapu nanga snew, hei moro leki 6000 meter. Wantronso baka dati yu e si wan bun bigi kontren — a zuidsei fu na Altiplano na ini Peru.

Puno na a mamafoto fu na Altiplano na ini Peru, di e didon na a kabapisi fu a noord-westsei fu a Titikaka Meer. A Titikaka Meer na a watra pe moro boto kan pasa moro leki ala tra bigi watra na grontapu. Fu di a kontren dati hei moro leki 3000 meter, meki a e teki wan pisi ten bifo sma di e go drape, kon gwenti a loktu dati. Den Quechua Ingi nanga den Aymara Ingi e libi na a Titikaka Meer. Yu kan si den e wroko na ini den chacras, noso pikin burugron, ala di den weri krosi di lai furu kloru soleki redi, grun noso blaw. Ala di Spanyoro na a moro prenspari tongo di den e taki na ini Peru, toku den e taki Quechuatongo nanga Aymaratongo tu na tapu na Altiplano.

Den E Teki Fesi na ini a Preikiwroko

No so langa pasa, furu fu den sma di abi sakafasi èn di e wroko tranga, èn di e taki Quechuatongo nanga Aymaratongo kon leri sabi a soifri waarheid fu Bijbel. Disi e pasa moro furu fu di Yehovah e blesi den furu muiti srefisrefi di den furuten Kownukondre preikiman e du leki spesrutu pionier.

Fu eksempre, den spesrutu pionier José nanga Silvia ben seni go na a foto Putina, so wan 50 kilometer fu a Titikaka Meer. Na ini tu mun, Silvia ben abi 16 oso-bijbelstudie, èn Jose ben abi 14. Na ini siksi mun nomo, a nomru fu preikiman ben kren fu 23 te go miti 41. Na a srefi ten, a nomru fu sma di ben kon na a konmakandra ben kren fu 48 te go miti wan heimarki fu 132.

„Di wi bigin hori gemeente konmakandra na den farawe libimakandra disi”, na so José e taki, „dan wi ben si taki a ben o de wan bun sani fu bigin nanga a Publiki Konmakandra nanga a Gemeente Bukustudie. Gi den nyun sma di wani sabi moro, a moro makriki dan fu bigin go na den konmakandra.”

Tu sisa — wan fu den na wan pionier — ben de den fosiwan di ben tyari a bun nyunsu go na Muñani di de farawe, so wan 20 kilometer fu Putina. Drape den bigin wan bijbelstudie nanga wan breni man di nen Lucio. * Lucio ben gi en brada Miguel wan kari fu kon na a bijbelstudie. Miguel ben de wan zendeling fu a Lomsu kerki, èn wan fesiman na ini a libimakandra fu a kontren di ben de ini a birti. Di wan mati ben aksi Miguel fu san ede a ben e go na Muñani ibri wiki, dan a ben taki dati a e du dati fu leri fu Yehovah, èn fu en Wortu. Ne a mati ben aksi: „Fu san ede wi no e studeri Bijbel dyaso dan?” Fu di den sma fu a presi pe Miguel ben tan, ben wani sabi moro, meki heri esi den Kotoigi ben sreka sani fu hori konmakandra drape.

Miguel ben bigin fruteri tra sma san a ben e leri. Ma fa a ben de nanga a posisi fu en leki Lomsu zendeling, so srefi a posisi fu en leki wan sma di e teki presi gi den tiriman? Di den ben kon makandra na a konmakandra presi pe den ben libi, dan a ben meki bekènti taki a libi a wroko fu en leki wan Lomsu zendeling. Den ben o poti wan tra sma na en presi? Wan sma na ini a publiki ben taki: „Fu san ede wi abi wan tra zendeling fanowdu te wi e leri a waarheid kaba?” A no de fu taki dati a ben e taki fu den sani di Yehovah Kotoigi ben  leri den. Wan tra sma ben taki moro fara: „Wi no feni en bun taki yu wawan e puru yu nen na kerki. Fu san ede wi alamala no e puru wi nen?” Leki wán man ala sma di ben de drape bari taki: „Wi alamala e puru wi nen!”

Syatu baka dati, di den ben hori wan konmakandra na a presi pe den ben libi, den ben taki fu den kruktu gado nanga den kroisi. Wan man ben aksi taki ala sma di de drape ben musu leisi Deuteronomium 7:25, di e taki „Yu musu bron den koti popki fu den gado fu den na ini faya. Yu no musu angri fu abi a solfru nanga a gowtu di de na den popki tapu, èn yu no musu teki en kwetikweti gi yusrefi, so taki den no e meki yu fadon na ini wan trapu; bika a de wan tegu sani gi Yehovah, yu Gado.”

Ne a man aksi den sma di ben wani bron den kruktu gado, fu opo den anu go na loktu. Ala sma ben sutu den anu wantewante go na loktu (Tori fu den Apostel 19:19, 20). Now 23 fu den 25 famiri fu a libimakandra dati e studeri Gado Wortu. Tu sma e dini leki preikiman di no dopu ete, èn feifi paar e sreka sani fu trow na lanti so taki den kan abi wan bun nen na Yehovah.—Titus 3:1; Hebrewsma 13:4.

Gi Leri Nanga Yepi fu Cassette Lolo

Fu di furu sma na tapu na Altiplano no man leisi èn skrifi, meki den video nanga den cassette lolo fu a Waktitoren Genootschap na ini den tongo di den e taki drape, na wan bigi yepi — srefi fu hori oso-bijbelstudie. Wan spesrutu pionier di nen Dora e hori bijbelstudie komoto na a brochure San Gado e aksi foe wi?, nanga yepi fu wan cassette lolo. Ibri leisi a e meki a bijbelstudenti arki wán paragraaf nomo, èn baka dati a e aksi a sma wan tu sani fu san a yere didyonsro.

Wan radiostation fu a birti e meki sma yere wan pisi fu a San Gado e aksi-brochure na wan fasti ten, na ini Quechuatongo. A e du a srefi sani nanga wan tu pisi fu a tijdschrift Ontwaakt! na ini Spanyoro. Dati meki furu sma sabi a Kownukondre boskopu èn den wani leri moro te Yehovah Kotoigi e kon na den oso fu den.

Grontapu no e poti prakseri na Altiplano, ma Gado e si a presi dati. Na fu di Yehovah lobi a libisma famiri, meki furu sma di e libi na den hei presi na tapu na Altiplano na den Andesbergi, e kon tron wan pisi fu a bigi grupu sma di e prèise a moi oso fu En tru anbegi.—Hagai 2:7.

[Futuwortu]