Yehovah E Gi Krakti na a Sma Di Weri

„[Yehovah] e gi krakti na a sma di weri, èn a sma di no abi dinamik krakti a e gi krakti pasa marki.”—YESAYA 40:29.

1. Gi wan eksempre fu a krakti di de na ini den sani di Gado meki.

YEHOVAH abi krakti pasa marki. Èn dinamik krakti trutru de fu si na ini den sani di a meki! A pikin atoom — di de fu feni na ini ala sani — de so pikin taki wán dropu watra abi wán hondro milyard milyard atoom. * Den atoom na tapu a son e meki krakti komopo, èn ala libisani na wi grontapu abi a krakti dati fanowdu fu tan na libi. Ma omeni krakti fu a son de fanowdu fu meki a libi na grontapu go doro? Grontapu e kisi soso wan pikinpikin pisi fu a krakti di e komopo na a son. Ma toku, a moro pikin pisi fu a krakti fu a son di e doro grontapu, bigi omeni tenti leisi moro leki ala a stroom di den masyin fu den wrokopresi na grontapu e gebroiki.

2. Te yu luku en bun, dan san Yesaya 40:26 e taki fu a krakti fu Yehovah?

² Awansi fa a no fa, efu wi e prakseri fu na atoom noso efu wi e luku a kefalek bigi universum, a kefalek bigi krakti fu Yehovah e naki wi ati. A no de fu fruwondru taki a ben kan taki: „Opo un ai go na loktu èn luku. Suma meki  den sani disi? Na a Sma di e tyari a legre fu den go na doro, so srefi a nomru fu den, di e kari den alamala srefi na den nen. Fu di a abi dinamik krakti pasa marki, èn fu di a abi tumusi bigi krakti tu, meki no wan fu den no e mankeri”! (Yesaya 40:26). Iya, Yehovah „abi tumusi bigi krakti” èn en na a Sma pe „dinamik krakti” e komopo, a krakti di a gebroiki fu meki a heri universum.

Wi Abi Moro Fanowdu Leki Wi Eigi Krakti Nomo

3, 4. (a) San na wan tu sani di kan meki wi kon weri srefisrefi? (b) Sortu aksi wi musu hori na prakseri?

³ Ala di Gado abi krakti pasa marki, libisma e kon weri srefisrefi. Ala presi pe wi e go, wi e si sma di weri. Den weri te den e wiki, den weri te den e go na wroko noso na skoro, den weri te den doro oso, èn te den e go sribi, den weri sote taki den no man du noti moro srefi. Son sma e winsi taki den kan go na wan presi fu rostu pikinso fu di den abi en tranga fanowdu. Leki futuboi fu Yehovah wi e kon weri tu, fu di wi musu du furu muiti na ini wi diniwroko gi Gado (Markus 6:30, 31; Lukas 13:24; 1 Timoteus 4:8). Èn someni tra sani de ete di e puru a krakti fu wi.

⁴ Ala di wi na Kresten, toku a no de so taki wi no e kisi fu du nanga den problema di moro furu sma abi (Yob 14:1). Siki, problema na moni sei, noso tra problema fu a libi kan meki wan sma lasi-ati, san kan meki taki a no abi a deki-ati fu go doro. Boiti den tyalensi disi, dan wi abi den sma di kisi tesi fu di den kisi frufolgu fu regtfardikifasi ede (2 Timoteus 3:12; 1 Petrus 3:14). Fu di wi abi fu du nanga so furu problema na grontapu ibri dei èn fu di sma e gens a Kownukondre preikiwroko fu wi, meki kande son wan fu wi kon de so weri taki wi wani go du en safrisafri na ini a diniwroko fu Yehovah. Boiti dati, Satan Didibri e gebroiki ala san a man fu meki taki wi no hori wi soifri retifasi na Gado. Fu dati ede, fa wi kan kisi a krakti na yeye fasi di wi abi fanowdu fu no kon weri èn fu no tapu nanga a diniwroko?

5. Fu san ede moro leki libisma krakti de fanowdu fu du a Kresten diniwroko?

⁵ Efu wi wani kisi krakti na yeye fasi, dan wi musu frutrow tapu Yehovah, a Mekiman di abi ala krakti. Na apostel Paulus ben sori taki efu sma ben o du a Kresten diniwroko, dan den ben o abi moro krakti fanowdu leki san onvolmaakti sma abi. A ben skrifi: „Wi abi a gudu disi na ini prapi, so taki a krakti di bigi pasa marki, sa de fu Gado, no fu wisrefi” (2 Korentesma 4:7). Salfu Kresten e du „a diniwroko fu meki sani kon bun baka” èn den e du dati nanga a yepi fu den kompe fu den di abi a howpu fu libi na grontapu (2 Korentesma 5:18; Yohanes 10:16; Openbaring 7:9). Fu di wi leki onvolmaakti sma e du Gado wroko ala di wi e kisi frufolgu, meki wi no man du en nanga wi eigi krakti wawan. Yehovah e yepi wi nanga en santa yeye, èn na so fasi a swaki di wi swaki e gi glori na en krakti. Èn a dyaranti taki „Yehovah sa horibaka gi den regtfardikiwan”, e gi wi trowstu trutru!—Psalm 37:17.

’Yehovah Na a Sma Di E Gi Wi Krakti’

6. Fa den Buku fu Bijbel e gi wi a dyaranti taki Yehovah na a Sma di e gi wi krakti?

⁶ Wi hemel Tata „abi tumusi bigi krakti” èn a kan gi wi krakti makriki. Fu taki en leti, Bijbel e fruteri wi: „[Yehovah] e gi krakti na a sma di weri, èn a sma di no abi dinamik krakti a e gi krakti pasa marki. Den boi sa kon weri èn den sa kon swaki, èn den yonkuman srefi seiker sa naki futu fadon, ma den wan di e howpu tapu Yehovah, sa kisi krakti baka. Den sa opo go na loktu nanga frei neleki aka. Den sa lon èn den no sa kon swaki; den sa waka èn den no sa kon weri” (Yesaya 40:29-31). Fu di wi e kisi fu du nanga tesi moro nanga moro, meki kande wi e firi leki wan lonman di weri sote taki a no man lon go doro srefisrefi. Ma a winistrepi ini a streilon fu kisi libi, de leti na wi fesi èn wi no musu tapu fu lon (2 Kroniki 29:11). A Gensman fu wi, Didibri, e waka lontu „leki wan krasi lew”, èn a wani tapu wi fu go doro (1 Petrus 5:8). Meki wi hori na prakseri taki ’Yehovah na wi krakti nanga wi skilt’, èn a seti so furu sani ’fu gi krakti na a sma di weri’.—Psalm 28:7.

7, 8. Sortu buweisi de taki Yehovah ben gi krakti na David, Habakuk nanga Paulus?

 ⁷ Yehovah ben gi David a krakti so taki a ben man go doro te a ben kisi fu du nanga seryusu problema. Fu dati ede, David di ben abi furu bribi nanga frutrow ben skrifi: „Na Gado sa meki wi kisi krakti, èn ensrefi sa trapu masi den gensman fu wi” (Psalm 60:12). Yehovah gi Habakuk krakti tu, so taki a ben man kaba en wroko leki profeiti. Habakuk 3:19 e taki: „Yehovah, a Soeverein Masra, e gi mi krakti; èn a sa meki mi futu leki den futu fu den dia, èn na tapu den hei presi a sa meki mi waka.” San moi fu si tu, na a eksempre fu Paulus di ben skrifi: „Gi ala sani mi abi a tranga fu [Gado] di e gi mi krakti.”—Filipisma 4:13.

⁸ Neleki David, Habakuk nanga Paulus, wi musu sori bribi na ini a man di Gado man gi wi krakti èn wi musu bribi taki a abi a makti fu kibri wi. Fu di wi sabi taki a Soeverein Masra Yehovah na a Sma di e gi „ krakti”, dan meki wi luku wan tu fasi now fa wi kan kisi krakti na yeye fasi fu den someni sani di Gado e seti.

Sani Di Yehovah Seti na Yeye Fasi fu Gi Wi Krakti

9. Fa Kresten publikâsi e yepi fu tranga wi?

⁹ Efu wi e studeri den Buku fu Bijbel fayafaya nanga yepi fu den Kresten publikâsi, dan dati kan gi wi krakti èn a kan yepi wi fu go doro. A psalm skrifiman ben singi: „Koloku fu a sma di . . . en prisiri de na ini a wet fu Yehovah, èn na ini en wet a e leisi nanga wan safri sten dei nanga neti. Èn fu tru a sa tron leki wan bon di prani na libawatra, di e gi en eigi froktu te en ten doro èn den wiwiri fu en no e kon flaw, èn ala san a e du sa waka bun” (Psalm 1:1-3). Neleki fa wi musu nyan fu tan tranga na skin sei, na so wi musu teki nyanyan na yeye fasi di Gado gi wi nanga yepi fu en Wortu èn nanga yepi fu Kresten publikâsi, so taki wi kan tan tranga na yeye fasi. Fu dati ede, a prenspari taki wi e studeri seryusu èn e denki dipi.

10. O ten wi ben sa kan feni ten fu studeri èn fu denki dipi?

¹⁰ A e tyari winimarki trutru efu wi e denki dipi fu „den dipi sani fu Gado” (1 Korentesma 2:10). Ma o ten wi kan feni ten fu denki dipi? Abraham en manpikin Isak „ben waka lontu na dorosei na mofoneti fu denki dipi na gron” (Genesis 24:63-67). A psalm skrifiman David ’ben denki dipi fu Gado na neti’ (Psalm 63:6). Wi ben kan studeri Gado Wortu èn denki dipi fu en na mamanten, na mofoneti, na netiten — iya, na ala ten. A studeri di wi e studeri èn e denki dipi na so wan fasi, e meki wi gebroiki wan tra sani di Yehovah seti fu gi wi krakti na yeye fasi, dati na begi.

11. Fu san ede wi musu si en leki wan prenspari sani fu begi doronomo?

¹¹ Efu wi e begi Gado doronomo, dan dati e yepi wi fu kisi krakti. Meki wi „horidoro na ini begi” fu dati ede (Romesma 12:12). Son leisi a de fanowdu fu aksi spesrutu gi a koni nanga a krakti fu man kakafutu gi wan tesi (Yakobus 1:5-8). Meki wi taigi Gado tangi tu èn meki wi prèise en te wi e si taki den prakseri fu en e kon tru, noso te wi ondrofeni taki a tranga wi fu go doro na ini a diniwroko fu en (Filipisma 4:6, 7). Efu wi e tan krosibei na Yehovah na ini begi, dan a no sa gowe libi wi. „Luku!”, na so David ben singi, „Gado na mi yepiman.”—Psalm 54:4.

12. Fu san ede wi musu aksi Gado fu gi wi en santa yeye?

¹² Wi hemel Tata e gi wi krakti èn a e tranga wi nanga yepi fu en santa yeye, noso en wroko krakti. Paulus ben skrifi: „Mi e boigi mi kindi gi a Tata . . . so taki a kan gi unu akruderi a gudu fu a glori fu en, so taki unu kon tranga ini a sma di unu de na inisei nanga a krakti fu en yeye” (Efeisesma 3:14-16). Wi musu begi fu kisi santa yeye, èn wi musu abi a frutrow taki Yehovah sa blesi wi nanga dati. Yesus ben rideneri: Efu wan pikin e aksi wan fisi, dan wan lobi papa sa gi en wan sneki? Kwetikweti. Fu dati ede, a taki  na a kaba: „Efu unu, ala di unu [e sondu èn fu dati ede, te yu e luku en bun,] de takru, sabi fa fu gi bun presenti na den pikin fu unu, omeni moro dan a Tata di de na hemel, sa gi santa yeye na den wan di e aksi en fu dati!” (Lukas 11:11-13). Meki wi abi a sortu frutrow dati te wi e begi, èn meki wi memre ala ten taki Gado kan meki den getrow futuboi fu en „kon tranga” nanga krakti di a yeye fu en e gi den.

A Gemeente​—Wan Yepi Di E Tranga Sma

13. Fa wi musu si Kresten konmakandra?

¹³ Yehovah e gi wi krakti nanga yepi fu den konmakandra fu a Kresten gemeente. Yesus ben taki: „Pe tu noso dri sma e kon makandra na ini mi nen, na drape mi de na den mindri” (Mateus 18:20). Di Yesus ben pramisi a sani dati, dan a ben taki fu afersi di sma di ben teki fesi na ini a gemeente, ben musu poti prakseri na den (Mateus 18:15-19). Ma te yu e luku en bun dan a sani di Yesus taki, e fiti ala den gemeente konmakandra, bigi konmakandra nanga kongres fu wi, fu di den e bigin èn e tapu nanga begi na ini a nen fu en (Yohanes 14:14). So bun, a de wan grani fu go na den sortu Kresten demakandra dati, awansi wan tu sma nomo kon na a konmakandra noso dusundusun sma de drape. Fu dati ede, meki wi sori tangi gi den okasi disi di seti fu gi wi krakti na yeye fasi èn fu gi wi tranga fu sori lobi èn du tumusi bun wroko.—Hebrewsma 10:24, 25.

14. Sortu wini wi e kisi fu a muiti di Kresten owruman e du?

¹⁴ Kresten owruman e gi yepi na yeye fasi èn den e gi deki-ati (1 Petrus 5:2, 3). Paulus ben yepi den gemeente pe a ben dini èn a ben gi den deki-ati, neleki fa opziener di e reis e du dati nownowde. Fu taki en leti, a ben angri fu de nanga den kompe-bribiman fu en so taki den ben man gi makandra deki-ati (Tori fu den Apostel 14:19-22; Romesma 1:11, 12). Meki wi sori ala ten taki wi e warderi den owruman fu wi gemeente nanga tra Kresten fesiman di e du furu fu tranga wi na yeye fasi.

15. Fa kompe-bribiman na ini wi gemeente trutru de ’wan yepi di e tranga sma’?

¹⁵ Tra bribiman na ini wi gemeente kan de wan ’yepi di e tranga sma’ (Kolosesma 4:10, 11). Leki ’trutru mati’ den kan yepi wi te wi de na nowtu (Odo 17:17). Fu eksempre, di 220 futuboi fu Gado ben teki fu a Sachsenhausen strafuman kampu fu den Nazi na ini 1945, dan den ben musu waka 200 kilometer. Den ben waka ini wan grupu, èn den ben poti den moro swaki sma na ini wan tu wagi fu udu, èn den moro tranga sma ben hari den. San ben de a bakapisi? Na ini a dede waka pe moro leki 10.000 sma fu a strafuman kampu dede, no wán Kotoigi fu Yehovah dede. Den sortu ondrofenitori disi di de fu feni na ini Waktitoren publikâsi, so srefi na ini a Jaarboek van Jehovah’s Getuigen nanga a buku Jehovah’s Getuigen — Verkondigers van Gods koninkrijk, e sori taki Gado e gi en pipel krakti, so taki den no e tapu fu dini en.—Galasiasma 6:9. *

 A Preikiwroko fu Wi E Meki Wi Kon Tranga

16. Fa a teki di wi e teki prati doronomo na a diniwroko e tranga wi na yeye fasi?

¹⁶ Efu wi e teki prati na a Kownukondre preikiwroko doronomo, dan dati e tranga wi na yeye fasi. A wroko disi e yepi wi fu poti prakseri na Gado en Kownukondre èn a e yepi wi fu hori têgo libi nanga den blesi di dati e tyari kon, na prakseri (Yudas 20, 21). Den pramisi fu Bijbel di wi e taki fu den na ini wi diniwroko, e gi wi howpu èn den kan meki wi teki wan fasti bosroiti, soleki fa a profeiti Mika ben du, di ben taki: „Wi . . . sa waka na ini a nen fu Yehovah, wi Gado, te ten di no skotu, iya fu têgo.”—Mika 4:5.

17. Sortu rai wi e kisi ini a tori fu oso-bijbelstudie?

¹⁷ A matifasi di wisrefi abi nanga Yehovah e kon tranga te wi e gebroiki den Buku fu Bijbel fu gi tra sma leri. Fu eksempre, te wi e hori oso-bijbelstudie nanga yepi fu a buku Sabi di e tjari joe go na têgo libi, dan a de wan koni sani fu leisi èn fu taki fu wan tu tekst di skrifi na ini a buku. Disi e yepi a studenti, èn wi srefi e kon frustan sani na yeye fasi moro bun. Efu wan studenti no man frustan bun san wan idea na ini Bijbel noso wan agersitori wani taki, dan wi kan studeri moro leki wán leisi nomo fu kaba wan kapitel na ini a Sabi-buku. Wi e prisiri trutru fu sreka wisrefi bun na fesi èn fu du muiti fu yepi tra sma, meki den kon tron mati fu Gado!

18. Sori fa Kotoigi e gebroiki a Sabi-buku bun.

¹⁸ Ibri yari, Kotoigi e gebroiki a Sabi-buku bun fu yepi dusundusun sma fu tron futuboi fu Yehovah di gi densrefi na en. Na mindri den sma disi wan tu sma de di no kisi no wan leri fu Bijbel srefi. Fu eksempre, di wan Hinduman na Sri Lanka ben de wan pikin-nengre ete, dan a ben yere wan Kotoigi taki fu Paradijs. Wan tu yari baka dati, a Hinduman go na a sisa èn heri esi a masra fu a sisa bigin wan bijbelstudie nanga en. Fu taki en leti, a yonkuman ben kon ibri dei fu studeri, èn a ben kaba a Sabi-buku baka wan syatu pisi ten. A bigin kon na ala den konmakandra, a gowe libi a bribi di a ben abi fosi èn a tron wan Kownukondre preikiman. Na a ten di a teki dopu, a ben hori wan oso-bijbelstudie kaba nanga wan man di a ben sabi.

19. San wi kan fruwakti seiker te wi e suku a Kownukondre fosi?

¹⁹ Te wi e suku a Kownukondre fosi, dan dati e gi wi prisiri di e tranga wi (Mateus 6:33). Ala di wi e ondrofeni ala sortu tesi, toku wi e go doro nanga prisiri èn wi e meki a bun nyunsu bekènti fayafaya (Titus 2:14). Furu fu wi e doro den markitiki fu du a furuten pionier diniwroko, èn wan tu e dini na presi pe den abi moro furu evangelie preikiman fanowdu. Efu nanga prisiri wi e yepi na den fasi noso na tra fasi fu meki Kownukondre afersi go na fesi, wi abi a frutrow taki Yehovah no sa frigiti a wroko fu wi èn a lobi di wi sori gi a nen fu en.—Hebrewsma 6:10-12.

Go Doro Nanga Krakti fu Yehovah

20. Fa wi kan sori taki wi e suku krakti na Yehovah?

²⁰ Meki wi de klariklari fu sori taki wi e howpu tapu Yehovah nanga wi heri ati èn e suku krakti na en. Wi kan du dati efu doronomo wi e gebroiki den sani di Yehovah seti na yeye fasi nanga yepi fu a ’getrow srafu’ (Mateus 24:45). A studeri di yu e studeri Gado Wortu nanga yusrefi èn nanga a gemeente fu di yu e gebroiki Kresten publikâsi, opregti begi, yepi na yeye fasi fu den owruman, tumusi moi eksempre fu getrow kompe-bribiman, èn wan prati na a diniwroko doronomo, na wan tu sani di seti fu tranga wi matifasi nanga Yehovah èn fu gi wi krakti fu go doro na ini en santa diniwroko.

21. Fa na apostel Petrus nanga na apostel Paulus sori taki den ben abi a krakti fu Gado fanowdu?

 ²¹ Ala di wi abi libisma swakifasi, toku Yehovah sa tranga wi fu du en wani efu wi e frutrow na en tapu fu yepi wi. Fu di na apostel Petrus ben sabi taki a ben abi a yepi fanowdu, meki a ben skrifi: „Efu wan sma e dini, dan meki a dini leki wan sma di e bow tapu a krakti di Gado e gi” (1 Petrus 4:11). Èn Paulus ben sori taki a ben frutrow tapu a krakti fu Gado di a ben taki: „Mi abi prisiri na ini swakifasi, kosikosi, nowtu, frufolgu nanga problema, gi Krestes. Bika te mi swaki, dan mi tranga” (2 Korentesma 12:10). Meki wi sori a srefi overtoigi èn meki wi gi glori na a Soeverein Masra Yehovah, di e gi krakti na a sma di weri.—Yesaya 12:2.

[Futuwortu]

San Yu Ben Sa Piki?

• Fu san ede Yehovah en pipel abi moro fanowdu leki den eigi krakti nomo?

• Sortu buweisi wi e feni na ini Bijbel taki Gado e gi den futuboi fu en krakti?

• San na wan tu sani di Yehovah seti na yeye fasi fu tranga wi?

• Fa wi kan sori taki wi e suku krakti na Gado?

[Aksi fu a tori disi]

[Prenki na tapu bladzijde 12]

A matifasi di wi abi nanga Yehovah e kon tranga te wi e gebroiki a Bijbel fu gi tra sma leri