Den Kefar na ini a Libi

„Ala sani di wan sma e du tapu iniwan dei kan de a lasti sani di a sma dati du na ini a libi. Srefi te wan sma e sribi, dan kefar kan de.”​—A tijdschrift Discover.

SMA agersi a libi nanga a waka di yu e waka na ini wan presi pe landmijn de (wan presi di lai nanga pikinpikin dinamit di kan sutu iniwan momenti te sma trapu na tapu den). Libisma agersi a libi so, bika iniwan ten yu kan kisi mankeri noso dede srefi, furutron sondro fu yu kisi wan warskow fu dati na fesi. Ibri kondre abi en eigi kefar. Den sani disi kan de mankeri di yu kan kisi tapu strati, feti na ini a kondre srefi, angriten, AIDS, kanker, ati-siki, nanga furu tra sani. Fu eksempre, na ini kontren na zuidsei fu a Sahara na ini Afrika, AIDS tron a moro prenspari sani di e meki taki sma e lasi den libi. Na ini wan yari di no pasa so langa srefi, AIDS „teki a libi fu 2,2 milyun sma, 10 tron moro furu leki den sma di lasi den libi na ini ala den feti na ini den kondre fu Afrika,” na so U.S.News & World Report e taki.

Na a srefi ten, dan grontapu e pai bun furu moni fu meki sma libi moro langa èn fu meki a kefar kon moro pikin taki sma e kon siki èn e kisi mankeri. Sani soleki fu nyan èn dringi bun sani èn fu oefen a skin, na sani di kan tyari winimarki kon. Ma wan moro bun sani de di yu kan frutrow èn di e taki fu ibri prenspari tori fu a libi; dati kan yepi yu fu nyan bun fu wan moro seiker libi. A sani dati na a Bijbel. A abi tirilin na ini fu yepi wi nanga furu sani di abi fu du nanga wi gosontu èn nanga a tanbun fu wi. A no de fu taki, dati Bijbel no e taki fu ibri problema finifini. Ma toku, a e gi kefalek moi gronprakseri fu tiri wi na ini den tori soleki nyanyan, gosontu na skin sei, fa fu denki, seks, fa fu gebroiki sopi, tabaka, èn na ini den tori soleki san den e kari drugs fu prisiri ten, èn furu tra sani moro.

Gi furu sma a libi hebi tu nanga a sabi di den no sabi fa a sa go na moni sei. Srefi na ini a tori dati, Bijbel e yepi wi. No wawan Bijbel e gi deki-ati fu si moni tori na wan koni fasi, ma so srefi Bijbel e sori fa fu de wan moro bun wrokoman noso wan moro bun wrokobasi. So bun, wi kan taki dati Bijbel e gi bun tiri, no wawan fu de seiker na moni sei èn fu tanbun na skin sei, ma Bijbel e gi bun tiri tu gi a libi srefi. Yu ben sa wani si o bun wi kan gebroiki Bijbel na ini wi libi na ini a ten disi? Dan grantangi leisi go moro fara.