Kownukondre Preikiman E Fruteri

Latfia E Teki a Bun Nyunsu

BIJBEL e sori krinkrin taki Gado wani dati „ala sortu sma musu kisi frulusu èn kon kisi wan soifri sabi fu waarheid” (1 Timoteus 2:4). Sma di no ben kisi na okasi fu yere a bun nyunsu furu yari langa fu di trawan ben gens den, e kisi na okasi dati now! Na ini Latfia èn so srefi na ini tra pisi fu grontapu, difrenti sma e teki a boskopu soleki fa den ondrofenitori di e kon now e sori.

• Na ini Rēzekne, wan owstusei foto fu Latfia, wan mama nanga en tini umapikin ben aksi wan uma na strati fu fruteri den pe wan presi de. Baka di na uma ben fruteri den pe a presi de, dan na uma disi di ben de wan Kotoigi fu Yehovah, ben gi den wan kari fu kon na den konmakandra fu den Kotoigi.

Fu di a mama disi nanga en umapikin ben lobi Gado tori, meki den ben teki a bosroiti fu go na a konmakandra. Di den ben de na pasi e go, den ben meki mofo taki efu den ben feni iniwan sani di no bun drape, dan den ben o opo gowe wantewante. Ma a konmakandra ben de so moi taki no wan momenti a ben kon na ini den ede fu opo gowe. Den ben teki a kari fu studeri Bijbel èn den ben bigin go na den konmakandra doronomo. Na ini dri mun nomo, den ben taki dati den wani go na a preikiwroko tu, èn taki den ben abi na prakseri fu teki dopu.

• Na ini wan westsei foto fu Latfia, wan Kotoigi ben miti Anna di abi 85 yari. Anna ben sori taki a wani sabi moro trutru, èn a ben teki wan bijbelstudie. En umapikin nanga tra famiriman ben gens en srefisrefi. Ma Anna no ben tapu nanga en bijbelstudie fu a gens disi ede, noso fu di a owru, noso fu di en gosontu no bun.

Wan dei, Anna ben taigi en umapikin taki a ben o teki dopu. „Efu yu dati e teki dopu, dan mi o poti yu na ini wan presi pe den e sorgu bigisma”, na so na umapikin fu Anna ben piki. Ma den wortu disi no ben tapu skreki gi Anna. Fu di a ben swaki, meki den brada ben dopu en na ini en eigi oso.

San na umapikin fu Anna ben du baka dati? A fasi fa na umapikin ben denki kon kenki, a ben sreka wan spesrutu nyanyan gi en mama baka di a teki dopu. Dan a ben aksi en mama: „Now di yu dopu, dan fa yu e firi dan?” San Anna piki en? „Leki wan beibi di gebore paspas!”

• Na ini december 1998, tu Kotoigi ben miti wan legre ofsiri fu a fositen Rosiakondre. A man disi ben kisi pensyun kaba. Fu di a ben bribi taki wan Mekiman de, meki a teki wan bijbelstudie. Baka ten en wefi ben studeri tu. Den ben go na fesi esi-esi, èn na ini wan syatu pisi ten den ben kon tron preikiman di no dopu ete. Ini a zomer di ben kon baka dati, a man di ben de wan ofsiri fosi ben teki dopu. A lobi fu a trowpaar disi gi yeye sani na trutru wan sani di e gi ala sma na ini a gemeente deki-ati. Boiti dati, den e gi den krakti fu yepi nanga a wroko fu kenki wan oso ini a birti kon tron wan moi Kownukondre zaal.