Yu E Libi Akruderi a Gi Di Yu Gi Yusrefi Abra na Gado?

„Awansi san unu e du, du en nanga un heri sili leki gi Yehovah èn no gi libisma.”​—KOLOSESMA 3:23.

1. Na sortu fasi sma e gi densrefi abra na sport?

SAN e meki taki atleet e du heri bun na ini a sport fu den? Den wan di e prei tennis, futubal, basketbal, honkbal, e teki prati na streilon, noso e du iniwan tra sortu sport, man du dati heri bun bika den e gi densrefi dorodoro na ini na oefen di den e oefen a skin fu den. Den wan di wani kisi barinen leki atleet e poti ala den prakseri tu na a prei, so taki den man tron a moro bun atleet na ini a sport di den teki. A moro prenspari sani na fu de srekasreka na skin sei èn so srefi na frustan sei. Te Bijbel e taki fu a gi di wi e gi wisrefi abra na Gado, dan dati na a srefi leki te wan atleet e gi ensrefi dorodoro na wan sport?

2. San den wortu „gi yusrefi abra na Gado” wani taki na ini Bijbel? Fruklari en pikinso.

² San den wortu „gi yusrefi abra na Gado” wani taki na ini Bijbel? Den wortu „gi yusrefi abra” na wan vertaling fu wan Hebrew wortu di wani taki „tan aparti; poti aparti; hari puru”. * Na ini Israèl fu owruten, a Granpriester Aron ben weri na en edebanti, „a santa marki fu a gi di den gi densrefi abra na Gado”. Dati ben de wan brenki plaat di den ben meki fu soifri gowtu èn na tapu en den ben kerfu den Hebrew wortu gi „Yehovah abi Santafasi”. Dati ben musu memre a granpriester taki a no ben musu du no wan-enkri sani di ben kan pori a santa presi „bika a marki fu a gi di den gi densrefi abra na Gado, a salfu oli fu en Gado [ben] de na en tapu”.​—Exodus 29:6; 39:30; Lefitikus 21:12.

3. Fa a gi di wi gi wisrefi abra na Gado, musu abi krakti na tapu a fasi fa wi e tyari wisrefi?

³ Te wi luku den tekst disi, dan wi kan si taki a gi di wan sma gi ensrefi abra na Gado, na wan seryusu sani. A wani taki dati wan sma nanga en eigi friwani e meki sma kon sabi taki a de wan futuboi fu Gado, èn a musu tyari ensrefi na wan krin fasi. Fu dati ede wi kan frustan fu san ede na apostel Petrus ben kari den wortu fu Yehovah, di ben taki: „Unu musu de santa, bika mi de santa” (1 Petrus 1:15, 16). Leki Kresten, wi abi a bigi frantwortu fu libi akruderi a gi di wi gi wisrefi abra na Gado, èn wi musu du dati getrow te na a kaba. Ma san a gi di wi gi wisrefi abra na Gado leki Kresten wani taki?​—Lefitikus 19:2; Mateus 24:13.

4. San wi musu du te wi wani gi wisrefi abra na Gado, èn nanga san wi kan gersi dati?

⁴ Baka di wi kon kisi soifri sabi fu Yehovah Gado, fu den prakseri fu en, èn fu Yesus Krestes di de wan prenspari sma na ini den prakseri fu Gado, dan wisrefi teki a bosroiti fu dini Gado nanga wi heri ati, frustan, sili, èn nanga ala wi krakti (Markus 8:34; 12:30; Yohanes 17:3). Wi ben kan si a bosroiti dati leki wan sani di wisrefi pramisi Gado na ini wi ati, taki wi e gi wisrefi abra krinkrin fu dini en. Wi no gi wisrefi abra na Gado, fu di wi ben kisi a firi wantronso fu du dati. Wi ben prakseri bun fu a tori fosi, wi ben aksi Gado na ini begi fu yepi wi, èn fu dati ede wi ben sabi bun san wi ben du. So bun, a no ben de wan bosroiti di wi teki fu wan syatu pisi ten nomo. Wi no kan de leki wan sma di e bigin plugu wan gron èn e tapu nanga a wroko afu pasi fu di a e feni taki a wroko tranga tumusi, noso fu di a gersi kande taki a musu wakti langa bifo a kan koti froktu, noso no sa koti noti srefi. Luku den eksempre fu wan tu sma di „go plugu”, fu di den teki a frantwortu fu theokrasia wroko, awansi sortu problema nanga tesi ben miti den.​—Lukas 9:62; Romesma 12:1, 2.

 Den No Ben Tapu fu Handri Akruderi a Gi Di Den Gi Densrefi Abra na Gado

5. Fa Yeremia ben de wan tumusi moi eksempre fu wan futuboi di gi ensrefi abra na Gado?

⁵ Yeremia ben du en diniwroko leki profeiti na Yerusalem, na ini wan pisi ten fu moro leki 40 yari (647-607 b.G.T.), èn a wroko no ben makriki. A ben sabi heri bun taki a no ben man du ala sani leki wan libisma (Yeremia 1:2-6). A ben abi deki-ati fanowdu nanga horidoro fu man handri nanga den tranga-ede sma fu Yuda ibri dei baka (Yeremia 18:18; 38:4-6). Ma Yeremia ben frutrow tapu Yehovah Gado, di ben tranga en. Na so fasi a ben sori taki a ben de wan futuboi fu Gado di trutru gi ensrefi abra na en.​—Yeremia 1:18, 19.

6. Sortu eksempre na apostel Yohanes ben gi wi?

⁶ Fa a de nanga a getrow apostel Yohanes? Fu di a ben e „taki fu Gado èn ben e gi kotoigi fu Yesus”, meki sma ben seni en go na ini katibo na a èilanti Patmos. Yohanes ben owru kaba, èn a libi drape na a èilanti ben tranga (Openbaring 1:9). Toku a ben horidoro èn a ben libi akruderi a gi di a gi ensrefi abra na Gado leki wan Kresten, so wan 60 yari langa. A ben libi pasa a pori di den legre fu Rome ben pori Yerusalem. A ben kisi a grani fu skrifi wan fu den Evangelie tori, a ben skrifi dri brifi ondro a krakti fu santa yeye, èn a buku Openbaring pe a ben si na orloku fu Armagedon na fesi. A ben tapu nanga en wroko di a kon sabi taki Armagedon no ben o kon na ini a ten fu en? A ben kisi wan mi-no-ke-fasi? Nôno. Yohanes ben tan getrow teleki a dede; a ben sabi taki ala di ’a fasti ten ben de krosibei’, toku den fisyun di a ben si ben o kon tru na ini wan tra pisi ten.​—Openbaring 1:3; Danièl 12:4.

Disiten Eksempre fu Sma Di Gi Densrefi Abra na Gado

7. Fa wán brada ben de wan tumusi moi eksempre fu wan sma di gi ensrefi abra na Gado leki Kresten?

⁷ Na ini a ten disi, dusundusun getrow Kresten ben tan hori densrefi fayafaya na a gi di den gi densrefi abra na Gado, ala di den no tan na libi fu si Armagedon. Ernest E. Beavor fu Ingrisikondre ben de so wan sma. A ben tron wan Kotoigi na ini 1939 na a bigin fu a di fu Tu Grontapufeti. A ben abi wan bisnis fu meki fowtow gi koranti èn dati ben drai bun srefisrefi. Toku a ben tapu a bisnis disi, so taki a ben man go na ini a furuten diniwroko. Fu di a ben tan neutraal leki Kresten, meki a ben musu go na strafu-oso èn a ben tan drape tu yari langa. En wefi nanga den pikin fu en ben horibaka gi en na wan getrow fasi, èn na ini 1950 den dri pikin fu en ben go na a Waktitoren Bijbelskoro Gilead na New York fu kisi leri gi a zendelingwroko. Brada Beavor ben du en preikiwroko so fayafaya taki den mati fu en ben kari en Armagedon Ernie. A ben tan loyaal na ini a gi di a gi ensrefi abra na Gado, èn te na en dede na ini 1986 a ben meki bekènti taki Gado en orloku fu Armagedon, de krosibei srefisrefi. A no ben si a gi di a gi ensrefi abra na Gado leki wan kruderi di a ben sroto nanga Gado fu wan pisi ten nomo! *​—1 Korentesma 15:58.

8, 9. (a) Sortu eksempre furu yonkuman na Spanyorokondre ben gi na a ten di Fransisco Franco ben tiri? (b) San wi ben kan aksi?

 ⁸ Wan tra eksempre fu sma di ben tan dini fayafaya ben kon fu Spanyorokondre. Na ini a ten di Fransisco Franco ben tiri nanga tranga (1939-1975), dan hondrohondro yongu Kotoigi di gi densrefi abra na Gado, ben teki a bosroiti fu tan neutraal leki Kresten. Furu fu den ben de na strafu na ini legre strafu-oso, tin yari noso moro langa. Wan Kotoigi di nen Jesús Martín, ben kisi strafu furu leisi srefi taki ala nanga ala a ben musu tan 22 yari langa na strafu-oso. Den ben fon en srefisrefi di a ben de na ini a legre strafu-oso na Noord-Afrika. Ala den sani disi ben tranga tumusi, ma toku a ben tan hori ensrefi na Bijbel gronprakseri.

⁹ Den yonkuman disi, moro furu no ben sabi o ten den ben o kon fri. Den no ben sabi efu den ben o kon fri srefi, bika den ben kisi strafu someni leisi baka makandra taki den ben musu go tan na strafu-so. Toku den ben tan hori den soifri retifasi, èn den ben tan du a diniwroko fayafaya di den ben na strafu-oso. A situwâsi ben kon moro bun na ini 1973. Furu fu den Kotoigi disi, di ben de pikinso moro owru leki 30 yari na a ten dati, ben kon fri. Den ben go na ini a furuten diniwroko wantewante, èn sonwan fu den tron spesrutu pionier nanga opziener di e reis. Den ben libi akruderi a gi di den gi densrefi abra na Gado, di den ben de na strafu-oso, èn moro furu fu den go doro sensi den kon fri. * Fa a de na ini a ten disi? Wi e libi akruderi a gi di wi gi wisrefi abra na Gado na wan getrow fasi, neleki den loyaal sma disi?​—Hebrewsma 10:32-34; 13:3.

A Yoisti Fasi fa Wi Musu Denki fu a Gi Di Wi Gi Wisrefi Abra na Gado

10. (a) Fa wi musu si a gi di wi gi wisrefi abra na Gado? (b) Fa Yehovah e si a diniwroko di wi e du gi en?

¹⁰ Fa wi e si a gi di wi gi wisrefi abra na Gado fu du en wani? A de a moro prenspari sani na ini wi libi? Awansi sortu situwâsi wi e libi na ini, efu wi yongu noso owru, efu wi trow noso no trow, efu wi gosontu noso siki, wi musu du muiti fu libi akruderi a gi di wi gi wisrefi abra na Gado, akruderi den situwâsi fu wi. Kande a situwâsi fu wan sma e meki taki a kan du furuten diniwroko leki wan pionier, leki wan friwani wrokoman na wan fu den bijkantoro fu a Watch Tower Society, leki wan zendeling, noso leki opziener di e reis. Na a tra sei, wan tu papa nanga mama kande abi so furu fu du bika den musu sorgu gi na osofamiri fu den, na yeye fasi èn na skin sei. A no sori leki den yuru di den man wroko na ini a diniwroko ibri mun, furu, te wi e teki dati gersi nanga den yuru di wan furuten dinari e wroko. Ma dati wani taki dati a wroko fu den no abi a srefi waarde gi Yehovah? Nôno. Gado noiti no e fruwakti fu wi taki wi e gi en sani di wi no abi. Na apostel Paulus ben taki fu a gronprakseri disi: „Efu a de di wan sma de klariklari fu gi, ben de kaba, dan disi bun spesrutu akruderi den sani di wan sma abi, èn no akruderi den sani di wan sma no abi.”​—2 Korentesma 8:12.

11. Fa wi kan kisi frulusu nomo?

¹¹ Awansi fa no fa, wi no e kisi frulusu fu wan  sani ede di wi man du, ma wi e kisi frulusu nomo fu di Yehovah e sori wi no-frudini bun-ati nanga yepi fu Krestes Yesus, wi Masra. Paulus ben fruklari krinkrin: „Den alamala sondu èn no e doro a glori fu Gado. Na wan presenti di Gado gi den fu soso, taki a sori den no-frudini bun-ati èn taki a fruklari den regtfardiki nanga yepi fu a lusu-paiman di Yesus Krestes ben pai fu meki den kon fri.” Ma den wroko fu wi e sori taki wi e bribi fayafaya na ini den pramisi fu Gado.​—Romesma 3:23, 24; Yakobus 2:17, 18, 24.

12. Fu san ede wi no musu teki wisrefi gersi nanga tra sma?

¹² Wi no abi fu teki den yuru di wi e wroko na ini wi diniwroko gi Gado, gersi nanga di fu trawan. Wi no musu du dati tu nanga den Bijbel publikâsi di wi e prati, noso den oso-bijbelstudie di wi e hori (Galasiasma 6:3, 4). Awansi san wi man du na ini a Kresten diniwroko, wi alamala musu prakseri den wortu fu Yesus di e meki wi abi sakafasi: „So tu nanga unu, te unu du ala den sani di den komanderi unu, dan unu musu taki: ’Wi de soso-srafu. San wi du na san wi ben musu du’” (Lukas 17:10). Omeni leisi wi kan taki fu tru dati wi du „ala den sani di den komanderi” wi? So bun, na aksi de, Fa wi musu du wi diniwroko gi Gado?​—2 Korentesma 10:17, 18.

Gebroiki a Ten Di Wi Abi Ibri Dei, Bun

13. Sortu denki wi musu abi ala di wi e du akruderi a gi di wi gi wisrefi abra na Gado?

¹³ Baka di Paulus ben gi rai na wefi, masra, pikin-nengre, papa nanga mama, èn na srafu, dan a e skrifi: „Awansi san unu e du, du en nanga un heri sili leki gi Yehovah èn no gi libisma, bika unu sabi taki na fu Yehovah unu sa kisi a reti paiman fu na erfenis. Wroko leki srafu gi Masra, Krestes” (Kolosesma 3:23, 24). Wi no e dini Yehovah fu di wi wani sori sma nomo san wi e du na ini a diniwroko fu en. Wi e pruberi fu dini Gado, fu di wi e waka baka na eksempre fu Yesus Krestes. A ben du en diniwroko wan syatu pisi ten nomo, ma a ben si en leki wan seryusu sani di a ben musu du wantewante.​—1 Petrus 2:21.

14. Sortu warskow Petrus ben gi fu den lasti dei?

¹⁴ Na apostel Petrus so srefi ben sori taki en  diniwroko ben de wan seryusu sani di a musu du wantewante. Na ini a di fu tu brifi fu en, a ben warskow taki na ini den lasti dei, spotuman ben o de — sma di fadon komoto na bribi nanga sma di e tweifri. Den sma disi ben o handri akruderi den eigi lostu te den e poti aksi di abi fu du nanga Krestes en denoya. Ma Petrus ben taki: „Yehovah no e draidrai nanga a pramisi fu en, soleki fa son sma e denki taki a e draidrai, ma a abi pasensi nanga unu fu di a no wani taki wan sma e kisi pori, ma a wani taki ala sma musu abi berow. Ma toku a dei fu Yehovah sa kon leki wan fufuruman”. Iya, a dei fu Yehovah sa kon sondro misi. Fu dati ede, wi musu prakseri ibri dei efu trutru wi abi wan tranga bribi na ini Gado en pramisi.​—2 Petrus 3:3, 4, 9, 10.

15. Fa wi musu si ibri dei fu wi libi?

¹⁵ Efu wi wani libi na wan opregti fasi akruderi a gi di wi gi wisrefi abra na Gado, dan wi musu gebroiki ibri dei fu prèise Yehovah. Na a kaba fu ibri dei, te wi e luku san wi ben du a dei dati, dan wi kan aksi wisrefi: San wi ben du fu santa a nen fu Gado noso fu meki a bun nyunsu fu a Kownukondre bekènti? Kande wi ben du dati fu di wi tyari wisrefi na wan krin fasi, fu di wi gi sma deki-ati nanga den sani di wi taigi den, noso fu di wi du bun sani gi wi famiri nanga mati fu sori taki wi lobi den. Wi gebroiki ala den okasi di wi ben kisi fu prati wi Kresten howpu nanga tra sma? Wi yepi wan sma fu prakseri seryusu fu den pramisi fu Gado? Meki wi tan du bun sani ibri dei di abi fu du nanga yeye afersi so taki, fu taki en na wan agersi fasi, wi kan tyari den sani dati kon na wan èn kon abi furu gudu na yeye fasi.​—Mateus 6:20; 1 Petrus 2:12; 3:15; Yakobus 3:13.

Wi Musu Sorgu fu Tan Si Sani Krin

16. Na sortu fasi Satan e pruberi fu puru wi prakseri fu a gi di wi gi wisrefi abra na Gado?

¹⁶ Wi e libi na ini wan ten di e kon muilek moro nanga moro gi Kresten. Satan nanga den  wrokoman fu en e pruberi fu meki wi no si krin moro san bun èn san takru, san krin èn san no krin, san na a yoisti fasi fu tyari wisrefi èn san na a fowtu fasi, san na den yoisti markitiki èn sortuwan no bun (Romesma 1:24-28; 16:17-19). Satan meki taki wi kan pori wi ati nanga wi denki so makriki nanga den sani di de fu si tapu telefisi, noso tapu na Internet. Den sani dati kan meki taki wi no e si sani na yeye fasi so soifri moro, so taki wi no e si krin sortu triki Satan e gebroiki. Te wi e skoifi den markitiki fu wi na yeye fasi na wan sei, dan dati kan meki wi no hori tranga moro na wi bosroiti fu libi akruderi a gi di wi gi wisrefi abra na Gado èn a kan meki wi no hori a „plugu” so steifi moro.​—Lukas 9:62; Filipisma 4:8.

17. Fa Paulus en rai kan yepi wi fu tan wan mati fu Gado?

¹⁷ Fu dati ede den sani di Paulus ben taigi a gemeente na Tesalonika, e fiti gi wi tu na ini a ten disi: „Bika disi na san Gado wani: taki unu musu kon santa, taki unu tan farawe fu hurudu; taki ibriwan fu unu musu sabi fa fu kisi en eigi prapi na ini santafasi èn na ini grani, èn no gridi fu satisferi seks lostu, neleki den nâsi di no sabi Gado (1 Tesalonikasma 4:3-5). Wan tu sma ben du hurudu, dati meki den ben puru den fu a Kresten gemeente. Den de sma di no ben libi akruderi a gi di den gi densrefi abra na Gado. Den meki a matifasi di den abi nanga Gado kon swaki, so taki den no ben feni taki Gado na wan prenspari Sma moro na ini den libi. Ma Paulus ben taki: „Gado no ben kari wi fu du fisti sani, ma fu du sani di santa. Fu dati ede dan, a sma di e sori taki a wisiwasi dati, no e wisiwasi libisma, ma Gado, di e poti en santa yeye na ini unu.”​—1 Tesalonikasma 4:7, 8.

San Na Yu Fasti Bosroiti?

18. San musu de wi fasti bosroiti?

¹⁸ Efu wi e frustan taki a gi di wi gi wisrefi abra na Yehovah Gado na wan seryusu sani, dan san musu de wi fasti bosroiti? Wi musu abi a fasti bosroiti fu abi wan bun konsensi ini a tori fu a fasi fa wi e tyari wisrefi èn ini a tori fu wi diniwroko. Petrus ben frumane: „Tan hori wan bun konsensi, so taki den sma di e taki sondro lespeki gi a bun fasi fa unu e tyari unsrefi na ini Krestes, kan kisi syen srefi fu den sani di den e taki teige unu” (1 Petrus 3:16). A kan de so taki wi musu pina fu di wi e tyari wisrefi na wan bun fasi leki Kresten èn a kan taki sma e kosi wi, ma Krestes ben ondrofeni a srefi sani fu en bribi ede, èn fu di a ben de loyaal na Gado. „Fu dati ede”, na so Petrus ben taki, „fu di Krestes ben pina ini a skin, na so unu so srefi musu abi a srefi fasi fu denki; bika a sma di pina ini a skin, no e du sondu moro”.​—1 Petrus 4:1.

19. San wi wani dati sma musu taki fu wi?

¹⁹ Iya, wi fasti bosroiti fu libi akruderi a gi di wi gi wisrefi abra na Gado, sa kibri wi fu den trapu fu Satan en grontapu di siki na yeye fasi, di siki na skin sei, èn di no e libi akruderi bun gwenti nanga gronprakseri. Ma boiti dati, wi sa kon abi a frutrow taki Gado feni wi bun, èn dati moro betre leki iniwan sani di Satan nanga den wrokoman fu en kan gi wi. So bun, no meki sma taki dati wi no abi a lobi moro di wi ben abi na a ten di wi ben kon sabi a waarheid a fosi leisi. Na presi fu dati, meki sma taki a srefi sani di den ben taki fu a fosi yarihondro gemeente na Tiatira: „Mi sabi den sani di yu e du, èn a lobi fu yu èn a bribi fu yu èn a diniwroko fu yu èn a horidoro fu yu, èn mi sabi taki den sani di yu e du nownow, de moro leki den wan fu fosi” (Openbaring 2:4, 18, 19). Iya, no meki wi broko-kowru ini a tori fu a gi di wi gi wisrefi abra na Gado, ma meki wi „de fayafaya na ini yeye”, meki wi de fayafaya te na a kaba — èn a kaba de krosibei.​—Romesma 12:11; Openbaring 3:15, 16.

[Futuwortu]

Yu E Memre Disi Ete?

• San a gi di wi gi wisrefi abra na Gado wani taki?

• Sortu owruten nanga disiten eksempre fu futuboi fu Gado de, di gi densrefi abra na en èn di warti fu waka na baka?

• Fa wi musu si wi diniwroko gi Gado?

• San musu de wi fasti bosroiti ini a tori fu a gi di wi gi wisrefi abra na Gado?

[Aksi fu a tori disi]

[Prenki na tapu bladzijde 15]

Yeremia ben tan getrow awansi sma ben du en ogri srefisrefi

[Prenki na tapu bladzijde 16]

Ernest Beavor ben gi den pikin fu en wan bun eksempre leki wan fayafaya Kresten

[Prenki na tapu bladzijde 17]

Hondrohondro yongu Kotoigi di ben de na strafu-oso na Spanyorokondre ben hori den soifri retifasi

[Prenki na tapu bladzijde 18]

Meki wi tan du bun sani ibri dei di abi fu du nanga yeye afersi