Fa fu Feni Trutru Koloku

A DALAI LAMA, a fesiman fu a Buda bribi, ben taki: „Mi e bribi taki a moro prenspari marki na ini wi libi, na fu suku koloku.” A ben fruklari moro fara taki a ben bribi taki sma kan de koloku te den e gi a frustan nanga na ati fu den trangaleri. „Frustan na a moro prenspari sani di wan sma abi fanowdu fu de koloku trutru”, a ben taki. A fesiman disi feni taki a no de fanowdu fu bribi na ini Gado. *

Kontrari fu dati, poti prakseri na Yesus, di ben abi wan tranga bribi na ini Gado èn na ini den hondrohondro yari di pasa, den leri fu en abi krakti tapu hondrohondro milyun sma. Yesus ben wani taki libisma de koloku. A ben bigin a barinen Bergitaki fu en nanga neigi koloku-taki — neigi sani di a taki di e bigin nanga den wortu: „Koloku fu . . .” (Mateus 5:1-12). Na ini a srefi taki dati, a ben leri den arkiman fu en fu ondrosuku, fu soifri, èn fu gi a frustan nanga na ati fu den trangaleri. Den ben musu kisi bun, krin nanga switi prakseri na presi fu prakseri di ben ogri, doti, èn di ben abi fu du nanga densrefi nomo (Mateus 5:21, 22, 27, 28; 6:19-21). Soleki fa wan fu den disipel fu en ben gi wi leki rai, wi musu „tan prakseri” den sani di ’tru, sani di de wan seryusu afersi, sani di de regtfardiki, sani di krin, sani di de fu lobi, sani di sma e taki bun fu en, sani di abi bunfasi, èn di musu kisi prèise’.—Filipisma 4:8.

Yesus ben sabi taki te sma wani de koloku trutru, dan den musu abi matifasi nanga trawan. Wi leki libisma lobi fu abi matifasi nanga trawan, fu dati ede wi no kan de koloku trutru te wi e hari wisrefi puru fu trawan noso te wi e kisi trobi nomo nanga den sma na wi lontu. Soso te wi e firi taki trawan lobi wi èn te wisrefi lobi trawan, dan wi kan de koloku. Yesus ben leri taki a moro prenspari sani di de fanowdu gi so wan lobi, na a matifasi di wi abi nanga Gado. Spesrutu ini a tori disi, a leri fu Yesus e difrenti fu di fu a Dalai Lama, fu di Yesus ben leri taki libisma no kan de koloku trutru te den no abi wan matifasi nanga Gado. Fu san ede dati de so?—Mateus 4:4; 22:37-39.

Prakseri den Yeye Nowtu fu Yu

Wan fu den koloku-taki na: „Koloku fu den sma di sabi den yeye nowtu” (Mateus 5:3). Fu san ede Yesus ben taki a sani disi? Fu di, tra fasi leki meti, wi abi yeye nowtu. Fu di wi meki soleki fa Gado de, dan wi kan kweki son eigifasi fu Gado, soleki lobi, retidu, sari-ati, nanga koni (Genesis 1:27; Mika 6:8; 1 Yohanes 4:8). Wan tra yeye nowtu di wi abi, na taki wi wani abi wan marki na ini wi libi.

Fa wi kan satisferi den sortu yeye nowtu disi? A no nanga yepi fu transcendente meditatie (te sma e denki dipi fu sani ala di den e taki spesrutu wortu baka makandra) noso na ondrosuku di wi e ondrosuku wisrefi. Na presi fu den sani dati, Yesus  ben taki: „Libisma no musu libi fu brede wawan, ma fu ibri wortu di e kon fu Yehovah en mofo” (Mateus 4:4). Luku taki Yesus ben taki dati Gado na a sma fu pe „iniwan wortu” e komopo di prenspari trutru gi a libi fu wi. Na Gado wawan kan yepi wi fu feni piki tapu wan tu aksi. Na ini a ten disi wi abi a koni disi moro fanowdu leki noiti bifo, te wi e luku omeni leri de di abi fu du nanga a marki fu libi èn nanga a fasi fa wi kan feni koloku. Bukuwenkri lai nanga buku di e pramisi sma wan bun gosontu, gudu, nanga koloku. Tapu Internet sani de fu leisi di abi spesrutu fu du nanga koloku.

Ma a fasi fa libisma e denki fu den sani disi, furutron no e tyari bun bakapisi kon. Sma sa wani satisferi den eigi lostu nomo èn den kan kisi bigifasi. Den sma di abi den eigi denki, no abi nofo sabi noso ondrofeni, èn furutron den sani di den e bribi no tru. Fu gi wan eksempre, moro nanga moro skrifiman fu buku di e fruteri sma fa densrefi kan lusu den problema fu den, e bow den prakseri fu den tapu a leri fu „evolutionaire psychologie”. A leri disi e sori taki libisma abi firi fu di den na bakapikin fu meti, soleki fa sma e bribi. A trutru de so taki iniwan muiti di sma e du fu feni koloku di abi en gron na tapu wan leri di no e poti prakseri na wi Mekiman, no kan de wan bun sani èn te fu kaba, a sa meki wan sma lasi-ati. Wan profeiti fu owruten ben taki: „Den koni sma kisi syen. . . . Luku! Den trowe a wortu fu Yehovah srefi, èn sortu koni den abi?”—Yeremia 8:9.

Yehovah Gado sabi fa wi meki èn san sa meki wi koloku trutru. A sabi fu san ede a poti libisma na grontapu èn san a ten di e kon sa tyari gi wi. A e meki wi kon sabi den sani dati nanga yepi fu Bijbel. Den sani di Yehovah e tyari kon na krin na ini a santa buku dati e naki na ati fu opregti sma èn e meki taki sma e kon de koloku (Lukas 10:21; Yohanes 8:32). A sani disi ben pasa nanga tu fu Yesus en disipel. Den ben brokosaka srefisrefi baka di a dede. Ma baka di Yesus srefi di ben kisi wan opobaka ben taigi den taki Gado ben o gebroiki en fu frulusu a libisma famiri, dan den taki: „A no de so taki wi ati ben prisiri di a ben taki nanga wi na pasi, ala di a ben fruteri wi a trutru prakseri fu den Buku fu Bijbel?”—Lukas 24:32.

A sortu prisiri disi e kon moro bigi te wi e meki Bijbel waarheid de a markitiki na ini a libi fu wi. Ini a tori disi, wi kan teki koloku gersi wan alenbo. A de fu si te a weer moi, ma den kloru fu en e kon moro srapu — a e tron wan dobru alenbo srefi — te a weer moi trutru. Meki wi luku wan tu eksempre now di e sori fa wi kan kisi moro koloku te wi e du san Bijbel e leri wi.

De Tevrede Nanga San Yu Abi

Na a fosi presi, luku a rai di Yesus e gi ini a tori fu gudu. Baka di a ben gi a rai fu no meki gudu tron a moro prenspari sani na ini wi libi, dan a taki wan sani di e fruwondru sma. A taki: „Fu dati ede, efu yu ai soifri, dan yu heri skin sa de krin” (Mateus 6:19-22). Yesus ben wani taki dati te wi e feti baka gudu, makti, noso iniwan tra marki di  sma abi gi densrefi, dan wi no sa kisi den moro prenspari sani. Bika, soleki fa Yesus ben taki na wan tra okasi, „srefi te wan sma abi sani pasa marki, a libi fu en no e kon fu den sani di a abi” (Lukas 12:15). Te wi e poti den moro prenspari sani na a fosi presi, soleki a matifasi di wi abi nanga Gado, famiri afersi, nanga tra afersi di abi fu du nanga den sani disi, dan wi „ai” sa de „soifri”, a sa de krin.

Frustan taki Yesus no ben wani taki sma ben musu fromsu so taki den no abi prisiri na ini a libi. Bika ensrefi no ben libi so wan libi (Mateus 11:19; Yohanes 2:1-11). Na presi fu dati, a ben leri wi taki den sma di e si a libi leki wan okasi nomo fu suku moro nanga moro gudu, fu taki en leti, no e kisi prisiri fu a libi.

Wan psychotherapeut (wan datra di e dresi sma di brokosaka noso sma di e siki na frustan sei) na ini a foto San Franscisco, na Amerkankondre, ben taki fu wan tu sma di ben kon gudu yonguyongu na ini den libi. A ben taki fu den sma disi taki moni na „a sani di e meki taki den e kisi broko-ede èn e bruya”. Den sma disi, a ben taki go moro fara, „e bai tu noso dri oso, wan wagi, den e bai ala sortu sani. Ma te den sani disi no e meki den koloku, dan den e kon brokosaka, den e firi taki a libi fu den no e gi noti èn den e lasi-ati.” Kontrari fu dati, den sma di e arki a rai di Yesus gi fu de tevrede nanga san den abi èn fu teki ten gi yeye afersi, abi moro tyans taki den sa feni trutru koloku.

Tom, wan man di e du bow-wroko èn di e libi na ini Hawai, na wan friwani-wrokoman di e yepi bow presi fu anbegi na tapu den èilanti na ini a Stille Zuidzee. Den sma drape na pôtisma. Tom si wan sani na den sma disi di abi sakafasi. A taki: „Den Kresten brada nanga sisa fu mi na den èilanti disi koloku trutru. Den yepi mi fu frustan moro krin taki moni nanga gudu a no den prenspari sani di e meki sma de koloku.” A luku den friwani-wrokoman so srefi di ben wroko makandra nanga en na den èilanti èn a si fa den de tevrede. „Den ben kan meki furu moni,” Tom taki. „Ma den teki a bosroiti fu gi yeye afersi fosi presi èn fu de tevrede nanga san den abi.” Den eksempre disi gi Tom deki-ati fu kenki a fasi fa a ben libi so taki a ben kan teki moro ten gi en osofamiri èn gi yeye afersi — èn te nanga now a breiti taki a du dati.

Koloku Nanga Lespeki gi Wisrefi

A de wan prenspari sani taki wi e lespeki wisrefi efu wi wani de koloku. Fu di libisma no de volmaakti èn fu di wi abi swakifasi, meki taki son sma no e denki bun fu densrefi. Furu fu den sma disi abi den firi disi sensi den ben de pikin. A kan de wan muilek sani fu wini den firi disi, ma wi kan wini den. A Wortu fu Gado sa yepi wi du fu dati te wi e handri akruderi dati.

Bijbel e fruteri fa a Mekiman e denki fu wi. A denki fu Gado no de moro prenspari leki a di fu iniwan libisma — srefi a di fu wi? Gado di de lobi srefi, no e prakseri takru fu wan sma èn a no wani du wi ogri. A no e fruwakti moro fu wi leki san wi kan du, èn a de tevrede nanga wi te a e si taki wi e meki muiti fu du a wani fu en (1 Samuèl 16:7; 1 Yohanes 4:8). Fu taki en leti, a e si den sma di wani du a wani fu en leki warti sma, iya a e feni den bun, awansi sortu swakifasi den abi.—Danièl 9:23; Hagai 2:7.

A tru taki Gado no e du leki a no e si den swakifasi noso den sondu fu wi. Gado e fruwakti taki wi sa du ala muiti fu du san bun, èn a e horibaka gi wi te wi e du dati (Lukas 13:24). Toku, Bijbel e taki: „Neleki fa wan papa e sori den manpikin fu en sari-ati, na so Yehovah sori sari-ati na den wan di e frede en.” A e taki so srefi: „Efu na fowtu yu  ben musu luku, O Yah, O Yehovah, dan suma ben kan tan tanapu? Bika na yu e gi trutru pardon, so taki sma kan frede yu.”—Psalm 103:13; 130:3, 4.

Fu dati ede, leri fu si yusrefi na a fasi fa Gado e si yu. Te sma sabi taki Gado e si den sma di lobi en leki warti sma èn taki a e frutrow na den tapu — ala di den e si densrefi leki sma di no warti — dan dati kan yepi furu fu meki taki wan sma e kon moro koloku.—1 Yohanes 3:19, 20.

Howpu—Wan Prenspari Sani Di De Fanowdu fu De Koloku

Wan sani di pôpi now èn di sma e kari positieve psychologie e leri taki te sma e si a bun sei fu sani, fu di den abi wan bun denki fu sani èn fu di den e hori den bun eigifasi di den abi na prakseri, dan dati kan meki wan sma de koloku. Furu sma e denki taki wan sma kan de moro koloku te a e luku a bun sei fu a libi èn fu a ten di e kon. Ma te wi e luku a bun sei fu sani, dan wi musu abi bun reide fu du dati, a no musu de so taki wi e howpu tapu sani di no sa kon tru. Boiti dati, awansi fa wi e si a bun sei fu sani, noso awansi sortu bun denki wi abi fu sani, dati no sa puru orloku, a dede di sma e dede fu angri, siki, a pori di sma e pori grontapu, na owru di sma e kon owru, noso dede. Den sani disi e meki taki furu sma no man de koloku. Toku, a bun fu si a bun sei fu sani te dati kan.

A moi fu si, taki Bijbel no e taki dati sma musu si a bun sei fu sani; a e taki dati sma musu abi wan moro krakti sani — howpu. A buku Vine’s Complete Expository Dictionary e sori dati „howpu” soleki fa Bijbel e gebroiki en, wani taki „wan bun fruwakti fu sani di sma kan frutrow na tapu, . . . a koloku fruwakti fu bun sani”. Soleki fa Bijbel e sori, dan howpu wani taki moro leki a si di wi e si a bun sei fu wan situwâsi. A e sori go tu na a sani di wi e howpu na tapu (Efeisesma 4:4; 1 Petrus 1:3). A Kresten howpu, fu gi wan eksempre, wani taki dati ala den takru sani di kari na ini a paragraaf na fesi, heri esi sa puru fu grontapu (Psalm 37:9-11, 29). Ma a wani taki moro.

Kresten e luku go na a ten te getrow libisma sa kisi volmaakti libi na tapu wan paradijs grontapu (Lukas 23:42, 43). Openbaring 21:3, 4 e sori san a howpu dati wani taki moro, te a e taki: „Luku! A tenti fu Gado de na libisma, èn en sa tan nanga den, èn den sa de en pipel. . . . Èn a sa figi puru ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba.”

Iniwan sma di e fruwakti so wan ten, abi ala reide fu de koloku, srefi efu a libi fu en now no e waka leki fa a ben sa wani (Yakobus 1:12). Fu dati ede ondrosuku Bijbel so taki yu kan si fu san ede yu kan bribi en. Meki a howpu fu yu kon moro krakti fu di yu e teki ten ala dei fu leisi Bijbel. Te yu e du dati, dan yu sa gro moro na yeye fasi, a sa yepi yu fu wai pasi gi den sani di e meki taki sma no de koloku, èn a sa yepi yu fu de tevrede nanga san yu abi. Iya, wi musu du a wani fu Gado, bika dati na a moro prenspari sani di e meki taki wi de koloku sma (Preikiman 12:13). Te wi e libi akruderi den gronprakseri fu Bijbel, dan wi sa abi wan koloku libi, bika Yesus ben taki: „Koloku fu den sma di e yere a wortu fu Gado èn e du en!”—Lukas 11:28.

[Futuwortu]

[Prenki na tapu bladzijde 5]

Wi no sa de koloku te wi e suku fu kisi moro nanga moro gudu, te wi e hari wisrefi puru fu trawan, noso te wi e frutrow tapu libisma di no abi nofo sabi

[Prenki na tapu bladzijde 6]

Te wi e libi akruderi a Wortu fu Gado èn e gi yesi na dati, dan wi sa abi wan koloku libi

[Prenki na tapu bladzijde 7]

A Kresten howpu e meki taki wan sma de koloku