Ondrofenitori

Yehovah Gi Mi Krakti Mi Heri Libi Langa

SOLEKI FA FORREST LEE FRUTERI

Didyonsro skowtu ben teki den gramofon nanga den Bijbel publikâsi fu wi. A di fu Tu Grontapufeti ben gi gensman wan bun okasi fu overtoigi wan nyun tiriman fu Kanada, fu taki dati a wroko fu den Kotoigi fu Yehovah de teige a wet. Disi pasa tapu 4 yuli 1940.

FU DI wi no ben frede a sani disi, meki wi go teki moro publikâsi na a presi pe wi ben poti den, èn wi go doro nanga a preikiwroko fu wi. Ala ten mi sa memre den wortu di mi papa ben taki na a okasi dati: „Wi no e tapu so makriki. Yehovah gi wi a komando fu preiki.” Na a ten dati mi ben abi tin yari, èn mi ben de nanga faya srefisrefi. Ma srefi now, mi e memre fa ala ten mi papa ben abi a fasti bosroiti fu preiki, èn a ben de nanga faya trutru. A fasi fa a ben de e memre mi ibritron baka taki Yehovah, a Gado fu wi, e gi den loyaalwan fu en krakti.

A tra leisi di skowtu ben tapu wi, dan den no teki den publikâsi fu wi nomo ma den ben tyari mi papa go na dungru-oso tu. Mi mama ben tan en wawan nanga fo pikin. Dati pasa na ini september 1940 na ini Saskatchewan. Heri esi baka dati den ben seni mi gowe fu skoro, fu di mi no ben wani taki a fraga odi èn mi no ben wani singi a singi fu a kondre. Mi no ben wani du den sani disi fu mi konsensi ede di kisi leri fu Bijbel. Mi go doro nanga mi skoroleri nanga yepi fu brifi. Disi ben meki taki mi ben man du moro, èn mi ben kan gebroiki moro ten na ini a preikiwroko.

Na ini 1948, den pionier noso furuten dinari fu Yehovah Kotoigi, ben kisi a kari fu froisi go na a owstu syoro fu Kanada. So bun, mi ben go pionier na ini Halifax, Nova Scotia, èn na ini Cape Wolfe, na Prince Edward-èilanti. A yari na baka, mi teki a kari di mi ben kisi fu go wroko tu wiki langa na a bijkantoro fu Yehovah Kotoigi na ini Toronto. Den tu wiki dati ben tron siksi yari, pe  mi ben du diniwroko di ben gi mi furu prisiri. Te fu kaba mi miti Myrna, di ben lobi Yehovah neleki fa mi ben lobi En, èn wi ben trow na ini december 1955. We go libi na ini Milton, Ontario, èn no langa baka dati wan nyun gemeente opo drape. A kamra di ben de na ondrosei fu wi oso, ben tron a Kownukondre zaal.

Wi Wani Du Moro na ini Wi Diniwroko

Na ini den yari di ben kon baka dati, wi ben kisi siksi pikin, èn den ben kon esi baka makandra. Wi umapikin Miriam ben de a fosiwan. Baka en yu ben kisi Charmaine, Mark, Annette, Grant, èn te fu kaba Glen. Te mi ben e kon na oso fu wroko, dan furutron mi ben e si den pikinwan sidon na gron lontu a faya fu a brantmiri. Myrna ben e leisi gi den fu Bijbel, a ben fruklari den tori fu Bijbel gi den, èn a ben poti trutru lobi gi Yehovah go dipi na ini den ati. Fu di a ben yepi den na so wan lobi-ati fasi, meki ala den pikin fu wi ben kisi nofo sabi fu Bijbel, ala di den ben yongu ete.

A faya di mi papa ben sori gi a diniwroko de dipi na ini mi frustan nanga mi ati (Odo 22:6). So bun na ini 1968, di osofamiri fu Yehovah Kotoigi ben kisi a kari fu froisi go na Centraal nanga Zuid Amerika fu yepi nanga a preikiwroko, dan na osofamiri fu wi ben wani go trutru. Na a ten dati, den pikin fu wi ben abi 5 yari te go miti 13 yari, èn no wan fu wi ben sabi wán wortu Spanyoro. Soleki fa mi ben kisi a rai, dan mi ben go na difrenti kondre fu luku fa den sma drape ben e libi. Di mi kon baka, wi ben begi leki osofamiri èn wi luku sortu sani wi ben kan du. Wi bosroiti fu froisi go na Nikaragwa.

Wi E Du Diniwroko na ini Nikaragwa

Na ini oktober 1970 wi ben de na ini wi nyun oso, èn dri wiki no ben tapu ete srefi di mi ben musu hori wan syatu takimakandra na wan gemeente konmakandra. Nanga furu muiti mi hori a takimakandra ini wan tu Spanyoro wortu nomo di mi ben sabi. Na a kaba fu a pisi di mi ben hori, mi kari a heri gemeente fu kon na wi oso gi cerveza tapu satra, 9.30 mamanten. San mi ben wani taki trutru na servicio, dati na a wortu gi preikiwroko. Ma te yu e luku en bun, dan mi ben kari ala sma fu kon dringi biri na mi oso. A ben de wan tyalensi trutru fu leri a tongo!

Biginbigin, mi ben e skrifi na ini mi anu san mi ben o taigi wan ososma, èn mi ben taki en ibri leisi baka te mi ben waka go na wan oso. Mi ben e taki: „Efu yu e teki a buku, dan yu o kisi wan oso-bijbelstudie tu sondro taki yu abi fu pai gi dati.” Wan sma di ben teki a buku ben taki baka ten, dati a ben kon na den konmakandra fu di a ben wani sabi san mi ben e pruberi fu fruteri en. A man disi ben tron wan Kotoigi fu Yehovah. A de krin fu si taki Gado na a sma di e meki den siri fu waarheid gro na ini na ati fu sma di abi sakafasi, neleki fa na apostel Paulus ben taki!—1 Korentesma 3:7.

Baka di wi ben tan so wan tu yari na a mamafoto  fu Managwa, den brada ben aksi wi fu froisi go na a zuidsei fu Nikaragwa. Drape wi wroko nanga a gemeente di ben de na ini Rivas. Wi ben wroko tu nanga grupu fu sma di ben wani sabi moro ma trawan no ben man fisiti so makriki fu di den ben de fara. Pedro Peña, wan getrow Kotoigi di ben owru kaba, ben kon nanga mi te wi ben go na den grupu disi. Wan fu den grupu ben de na tapu wan vulkaan èilanti na ini a Nikaragwa Meer, pe soso wán osofamiri ben de Kotoigi fu Yehovah.

Ala di na osofamiri disi no ben abi furu na materia sei, toku den ben du furu muiti fu sori taki den ben warderi en taki wi ben go na den. A neti di wi doro, nyanyan ben e wakti wi kaba. Wi tan wan wiki langa, èn furu fu den sma drape di abi switifasi èn di lobi Bijbel, ben prati a nyanyan fu den nanga wi. Wi ben prisiri srefisrefi fu si taki 101 sma ben kon na a publiki Bijbel taki tapu sonde.

Na wan tra okasi wi ben go na wan grupu sma di ben wani sabi moro, èn den ben libi na den bergi krosibei fu a lanki fu Kosta Rika. Mi e si taki Yehovah trutru ben horibaka gi wi fu di a ben gi wi krakti. A dei di wi ben musu gowe, dan Pedro kon teki mi, ma mi ben de na bedi fu di mi ben abi malaria. „Mi no man go Pedro”, na so mi ben taki. Pedro poti en anu na mi fesi-ede èn a taki: „Yu abi hebi korsu, ma toku yu musu kon! Den brada e wakti wi.” Baka dati a ben taki wan fu den moro moi begi di mi ben yere oiti. A begi disi ben kon fu en ati trutru.

Baka dati, mi taki: „Go teki wan fresco (wan dringi di meki fu froktu). Mi o kaba baka tin miniti.” Tu osofamiri di ben de Kotoigi ben e libi na ini a kontren pe wi ben go, èn den ben sorgu wi heri bun. A dei na baka wi go preiki makandra nanga den, ala di mi ben swaki ete fu a korsu ede. A ben gi wi krakti trutru di wi si moro leki wan hondro sma na a konmakandra tapu sonde!

Wi E Froisi Baka Go na wan Tra Presi

Na ini 1975, Vaughn, a di fu seibi pikin fu wi, gebore. A yari na baka dati, wi ben musu froisi go baka na Kanada, fu di wi ben abi problema na moni sei. A no ben de makriki fu gowe libi Nikaragwa, fu di wi ben si fa Yehovah ben horibaka gi wi trutru èn fa a ben gi wi krakti di wi ben tan drape. Na a ten di wi gowe, moro leki 500 sma na ini a gebied fu a gemeente fu wi, ben go na den konmakandra.

Wan pisi ten na fesi, di mi nanga mi umapikin Miriam ben musu wroko leki spesrutu pionier na ini Nikaragwa, dan Miriam aksi mi: „Papa, efu oiti yu musu go baka na Kanada, dan yu o meki mi tan dyaso?” Mi no ben prakseri srefisrefi fu gowe libi Nikaragwa, so bun mi ben taki: „We, a no de fu taki dati yu kan tan!” So bun, di wi gowe, Miriam ben tan na Nikaragwa fu go doro nanga a furuten diniwroko fu en. Baka ten, a trow nanga Andrew Reed. Na ini 1984 den go na a di fu 77 klas fu Gilead, a zendelingskoro fu Yehovah Kotoigi. Na a ten dati a skoro ben de na ini Brooklyn, New York. Miriam nanga en masra e dini now na ini a Dominikan Republiek. Nanga disi, a winsi di Miriam ben abi ben kon tru fu di a ben si a tumusi bun eksempre fu den zendeling na ini Nikaragwa.

Ma ala di den sani dati ben pasa, dan den wortu fu mi papa di ben taki „wi no e tapu so makriki”, ben de leki wan faya ete na ini mi ati. So bun na ini 1981 wi ben poti nofo moni na wan sei fu go baka na Centraal Amerika, èn wi ben froisi agen. Disi leisi wi go na Kosta Rika. Di wi ben e dini drape, dan den aksi wi fu yepi nanga a bow fu a nyun bijkantoro fu den. Ma na ini 1985 wi manpikin Grant ben abi datra yepi fanowdu, so bun wi go baka na Kanada. Glen ben tan na ini Kosta Rika fu yepi bow a bijkantoro, ala di Annette nanga Charmaine ben dini leki spesrutu pionier. Den wan fu wi di ben gowe libi Kosta Rika, noiti no ben dren srefi taki wi no ben o go baka.

 Wi E Kisi Seryusu Problema

A dei, 17 september 1993 ben bigin heri bun èn son ben skèin moi. Mi nanga Mark, a moro owru manpikin fu wi, ben e meki wan daki. Wi ben e wroko sei na sei èn wi ben e taki fu yeye tori soleki fa wi ben gwenti. Na a wan noso tra fasi mi lasi mi balansi èn mi fadon fu a daki. Di mi kisi misrefi baka, a wan-enkri sani di mi si na brenki leti nanga sma di ben weri weti krosi. Mi ben de na ini na EHBO fu ati-oso.

Fu di Bijbel e taki dati wi no musu teki brudu, meki a fosi sani di mi ben taki ben de: „Mi no wani brudu, mi no wani brudu!” (Tori fu den Apostel 15:28, 29) Mi ben kisi krakti baka di mi ben yere Charmaine taki: „Yu no abi fu broko yu ede Papa. Wi alamala de dyaso.” Baka ten mi yere taki den datra ben si mi brudukarta èn den no ben prakseri srefi fu gi mi brudu. Mi ben broko mi neki èn mi ben kon lan. Mi no ben man bro moro srefi sondro yepi.

Fu di mi no ben man buweigi moro, meki moro leki oiti bifo mi ben abi a krakti fu Yehovah fanowdu. Datra ben koti mi fu poti wan peipi go na ini mi kruktu neki di ben musu yepi mi bro. Ma a peipi disi ben meki taki loktu no ben doro den neki titei fu mi. So bun, mi no ben man taki. Sma ben musu luku mi mofububa fu frustan san mi ben e pruberi fu taki.

Heri esi wi ben kisi furu kostu. Mi wefi nanga moro furu fu den pikin fu mi ben de na ini a furuten diniwroko. Fu dati ede mi ben aksi misrefi efu den ben sa musu tapu nanga a diniwroko disi, fu yepi pai den kostu disi. Ma Mark ben man feni wan wroko di ben yepi wi na ini soso dri mun, fu pai gi furu fu den kostu. Leki bakapisi fu dati, ala den pikin ben man tan na ini a furuten diniwroko, boiti mi nanga mi wefi.

Hondrohondro karta nanga brifi fu siksi difrenti kondre ben de na den sei-planga fu mi ati-oso kamra. Yehovah ben gi mi krakti trutru. Na ini wan pisi ten fu feifi mun mi ben de na a intensive care afdeling. Na ini a pisi ten disi, a gemeente ben yepi mi osofamiri tu fu di den ben tyari nyanyan gi den. Ibri dei na bakadina, wan Kresten owruman ben e tan nanga mi. A ben e leisi gi mi fu Bijbel èn fu Bijbel publikâsi, èn a ben e fruteri mi ondrofenitori di ben e gi mi deki-ati. Tu sma fu mi osofamiri ben sreka ibri gemeente konmakandra nanga mi, so bun ala ten mi ben kisi a prenspari nyanyan na yeye fasi.

Ala di mi ben de na ati-oso ete, toku den brada ben sreka sani so taki mi ben kan de tapu wan spesrutu dei konmakandra. Na ati-oso ben sreka sani so taki wan ati-oso zuster ben o kon nanga mi, makandra nanga wan sma di ben sabi heri bun fa fu gebroiki a wrokosani di musu yepi mi  fu bro. Fa a ben de wan prisiri fu de baka nanga mi Kresten brada nanga sisa! Noiti mi sa frigiti fa hondrohondro sma ben tanapu na ini wan rei, soso fu taki mi odi.

Mi Tan Hori Mi Yeyefasi

Wan sani fu wan yari baka na ongoloku, dan mi ben man drai go baka na oso na mi osofamiri, ala di mi ben abi wan ati-oso zuster fanowdu ete, di ben e luku mi dei nanga neti. Nanga wan oto di meki spesrutu fu tyari malengri sma, mi kan go na den konmakandra èn pikinmoro noiti mi e misi den. Ma mi musu taki dati disi e aksi trutru deki-ati. Sensi a ten di mi kon na oso baka, mi ben man de na ala den distrikt kongres.

Baka ten, na ini februari 1997, mi ben man taki pikinso baka. Wan tu fu den ati-oso zuster di e sorgu mi e arki nanga warderi te mi e fruteri den fu a Bijbel howpu fu mi. Wan ati-oso zuster ben leisi a heri buku Jehovah’s Getuigen — Verkondigers van God’s Koninkrijk gi mi èn so srefi tra publikâsi fu a Waktitoren Genootschap. Mi e skrifi brifi gi sma nanga yepi fu computer, fu di mi e gebroiki wan tiki fu wroko na a computer. Ala di a fasi disi fu wroko na a computer na wan sani di e weri mi trutru, toku a e gi mi prisiri fu man tan abi wan prati na a diniwroko.

Mi abi furu pen di e kon fu mi senwe ede. Ma a gersi leki mi e firi pikinso frulekti, te mi e prati Bijbel waarheid nanga tra sma noso te mi e yere trawan e leisi Bijbel waarheid gi mi. Sontron, mi e du stratiwroko nanga mi wefi di e yepi mi furu. A e fruklari sani gi mi na tra sma te mi abi yepi fanowdu. Furu leisi mi ben man dini leki wan yepipionier. A e gi mi prisiri trutru taki mi e dini leki wan Kresten owruman, spesrutu te brada e kon na mi na den konmakandra noso te den e kon na mi na oso, èn mi man yepi den èn e gi den deki-ati.

Ma mi musu taki dati a makriki fu lasi-ati. So bun, ala leisi te mi e firi lasi-ati, dan mi e begi wantewante efu mi kan abi prisiri. Neti nanga dei mi e begi Yehovah fu tan gi mi krakti. Wan brifi fu wan sma noso wan sma di e kon luku mi, ala leisi e meki mi firi prisiri baka. Efu mi e leisi wan Waktitoren noso wan Ontwaakt!, dan mi prakseri e furu nanga bun sani di e gi mi deki-ati. Son leisi, difrenti ati-oso zuster e leisi gi mi fu den tijdschrift disi. Sensi na ongoloku fu mi, dan mi arki a heri Bijbel na tapu cassette, seibi leisi kaba. Disi na wan tu fu den difrenti fasi fa Yehovah gi mi krakti.—Psalm 41:3.

Fu di a situwâsi fu mi kenki, meki mi kisi furu ten fu denki dipi fu den fasi fa wi Gran Leriman, Yehovah, e gi wi leri wi heri libi langa. A e gi wi soifri sabi fu a wani fu en èn fu den sani di a abi na prakseri. A e gi wi wan diniwroko di warti gi wi; wi e kisi rai fa fu meki wi osofamiri de koloku, èn wi e kisi koni fu man si krin san wi musu du te wi e kisi seryusu problema. Yehovah blesi mi nanga wan tumusi bun wefi di de getrow. So srefi den pikin fu mi horibaka gi mi na wan loyaal fasi, èn mi e prisiri taki den alamala abi wan prati na a furuten diniwroko. Fu taki en leti, dan tapu 11 maart 2000, wi manpikin Mark nanga en wefi Allison kaba a di fu 108 klas fu a Gileadskoro, èn den kisi a grani fu go dini na Nikaragwa. Mi nanga mi wefi ben man de na a okasi pe den ben kisi den diploma. Fu tru, mi kan taki dati seryusu problema kenki mi libi, ma den no kenki mi ati.—Psalm 127:3, 4.

Mi e taki Yehovah tangi gi a koni di a gi mi, so taki mi ben kan gi mi osofamiri a gudu na yeye fasi di misrefi ben kisi. Mi e kisi krakti nanga deki-ati te mi e si den pikin fu mi e du diniwroko gi a Mekiman fu den. Den abi a srefi denki di mi papa ben abi, di a ben taki: „Wi no e tapu so makriki. Yehovah gi wi a komando fu preiki.” Fu tru, Yehovah gi mi nanga mi osofamiri krakti wi heri libi langa.

[Prenki na tapu bladzijde 24]

Nanga mi papa, den brada fu mi, nanga mi sisa, sei a wagi fu wi di wi ben gebroiki leki wan tanpresi tu. Wi ben gebroiki disi na a pisi ten di wi ben de pionier. Mi e tanapu na a reti-anusei

[Prenki na tapu bladzijde 26]

Nanga mi wefi, Myrna

[Prenki na tapu bladzijde 26]

Wan nyun fowtow fu wi osofamiri

[Prenki na tapu bladzijde 27]

Mi e gi kotoigi ete nanga yepi fu brifi