Yu Kan De Koloku Trutru?

GEORGE ala ten ben lobi lafu te a ben e taki sma odi. A ben e si libi leki wan warti presenti di sma musu nyan bun fu en. Sma ben sabi en leki wan man di ala ten ben de koloku èn ala ten a ben si a bun sei fu sani — a no ben kenki srefi di a bigin firi den pen fu a grani di a ben kon grani. Teleki a dei di George dede, sma ben sabi en leki wan koloku man. Yu na wan koloku sma neleki George? Yu e si ibri nyun dei leki wan presenti di yu musu nyan bun fu en? Noso a de so taki a dei fu tamara no e gi yu prisiri, noso e gi yu broko-ede srefi? Wan sani de di e meki taki yu no e firi koloku?

Koloku wani taki dati wan sma e firi bun, wan firi di moro furu e tan. A koloku di wan sma koloku de fu si na ini a tevredefasi di a abi, a sma kan abi wan bigi prisiri srefi èn a no man yepi taki a wani a firi disi fu tan. A sortu koloku dati de trutru fu feni?

Na ini a ten disi, a libimakandra e leri sma taki den ben o de koloku efu den ben gudu nofo. Milyunmilyun sma e tan du ala sortu muiti fu kon gudu. A bakapisi de taki furu sma no e broko den ede moro nanga a matifasi di den abi nanga trawan èn den no e broko den ede so srefi moro nanga tra prenspari sani fu a libi. Neleki mira na tapu wan mira bergi, den e lonlon nomo, èn den no e poti nofo prakseri na san den e du. So srefi den no abi furu ten gi trawan. Dati meki a no e fruwondru wi taki „a nomru fu sma di kisi fu yere fu datra taki den brokosaka, e tan gro”, na so wan verslag na ini a Los Angeles Times e taki „èn den sma di e firi brokosaka moro nanga moro na yongu sma. . . . Dresi di e yepi sma di brokosaka, na den wan di sma e bai  moro furu”. Milyunmilyun sma e gebroiki drug di den no mag gebroiki noso den e dringi sopi fu frigiti den problema fu den. Te son sma e firi brokosaka, dan den e go bai wan lo sani di den no abi trutru fanowdu. Soleki fa wan ondrosuku sori, „uma moro furu na den sma di sa go bai wan lo sani te den wani firi bun”, na so na Ingrisi koranti The Guardian e taki. „Uma dri tron so furu leki man sa go bai wan lo sani te den e firi brokosaka.”

Toku, wan wenkri, sopi, wan perki, wan spoiti, noso moni na bangi no e tyari koloku kon gi sma. Sma no man bai koloku; sma kan kisi en sondro fu pai fu en. Pe wi kan feni so wan warti presenti? Wi sa taki fu a tori dati na ini na artikel di e kon now.