„Koloku a Sma De Di Feni Koni”

A BEN de wan puwema skrifiman, wan architect (wan man di e denki fa fu seti oso, so taki sma kan bow den), a ben de wan kownu so srefi. Nanga den moro leki 200 milyun Amerkan dala di a ben meki ala yari, a man disi ben gudu moro leki iniwan tra kownu na grontapu. So srefi furu sma ben sabi èn ben warderi a man disi, fu di a ben koni. Wan koningin di ben go na en ben si èn ben kisi fu yere someni sani di ben naki en ati, taki a bari: „Luku! Den no ben fruteri mi afu srefi. A koni nanga a gudu fu yu pasa krinkrin den sani di mi ben yere kaba en di mi ben arki” (1 Kownu 10:4-9). Na so a ben de nanga Kownu Salomo fu owruten Israèl.

Salomo ben gudu èn a ben koni. Fu dati ede a ben de a yoisti man di ben kan taki sortu wan fu den tu sani disi ben de moro prenspari. A ben skrifi: „Koloku a sma de di feni koni, èn a sma di e kisi a koni fu man si sani krin, bika fu abi en leki wini, de moro bun leki fu abi solfru leki wini, èn fu abi en leki san yu kisi fu yu wroko, moro bun leki gowtu. A de moro diri leki koraal, èn ala yu tra prisiri sani no kan kon de a srefi leki en.”—Odo 3:13-15.

Ma pe wan sma kan feni koni? Fu san ede a warti moro leki gudu? San e meki taki a warti so? A di fu aiti kapitel fu a Bijbel buku Odo di Salomo ben skrifi, e piki den aksi disi na wan tumusi moi fasi. A kapitel dati e prenki koni leki wan libisma di man taki èn di man handri. Èn koni ensrefi e tyari kon na krin fu san ede a bun èn fu san ede a warti.

„A E Tan Kari Nanga wan Tranga Sten”

Kapitel aiti fu Odo e bigin nanga wan aksi di poti sondro taki sma musu gi wan piki: „Koni no e tan bari, èn a koni fu man si sani krin no e tan opo en sten?” * Iya, koni èn so srefi a koni fu man si sani krin e tan bari, ma a de tra fasi srefisrefi leki a huru-uma di e luru na ini dungru presi èn di e taki switi wortu na ini a yesi fu wan yonkuman di de en wawan èn di no abi ondrofeni (Odo 7:12). „Na tapu den hei preisi pe den pasi e miti makandra, drape a tanapu. Na sei den portu, na a doromofo, pe sma e pasa go na ini a foto, a e tan kari nanga wan tranga sten” (Odo 8:1-3). A krakti èn a tranga sten fu koni de fu yere bun èn krinkrin na ini den publiki presi — na den portu fu wan foto, èn pe den pasi e miti makandra, na den doromofo fu wan foto. A no de wan muilek sani fu sma yere a sten disi èn piki na tapu.

Suma kan taki dati a no de so taki a koni fu Gado, soleki fa a skrifi na ini a Wortu fu Gado, a Bijbel, de fu kisi gi pikinmoro ala sma na grontapu di wani abi en? „Bijbel na a wan-enkri buku na ini historia di so furu sma e leisi”, na so a buku The World Book Encyclopedia e taki. A e taki moro fara: „Bijbel e prati moro leki iniwan tra buku na grontapu. So srefi a Bijbel vertaal moro furu leisi, èn na ini moro furu tongo, leki iniwan tra buku.” Fu di a heri Bijbel noso  pisi fu en de fu kisi na ini moro leki 2100 tongo, dati meki moro leki 90 procent fu a libisma famiri kan abi a Wortu fu Gado na ini den eigi tongo, awansi a de wan pisi fu en nomo.

Yehovah Kotoigi e meki a boskopu fu Bijbel bekènti na ala sma èn na ala presi. Na ini 235 kondre, den e preiki a bun nyunsu fu a Kownukondre fu Gado fayafaya èn den e leri sma den tru tori di de fu feni na ini a Wortu fu Gado. Den tijdschrift fu den, A Waktitoren, di e tyari kon na doro na ini 140 tongo èn na Ontwaakt!, di e druk na ini 83 tongo abi den gron na tapu Bijbel. Yehovah Kotoigi e prati moro leki 20 milyun eksemplaar fu iniwan fu den tu tijdschrift disi. Koni trutru e tan bari nanga tranga sten na ini den publiki presi!

„Mi Sten De gi den Manpikin fu Libisma”

Koni di e pristeri ensrefi leki wan libisma, e bigin taki: „Unu, mi e kari, un mansma, èn mi sten de gi den manpikin fu libisma. O unu sma sondro ondrofeni, frustan koni; èn unu, don sma, frustan na ati.”—Odo 8:4, 5.

Koni e bari kari na heri grontapu. A e gi kari na a heri libisma famiri. Srefi den wan di no abi ondrofeni e kisi kari fu tron koni sma, noso sma di abi frustan, èn den wan di don, kan kisi frustan fu sani. Fu tru, Kotoigi fu Yehovah e bribi taki Bijbel na wan buku gi ala sma èn den e du muiti fu gi deki-ati na ibri sma di den e miti, fu luku go na ini a buku disi so taki den kan feni den wortu fu koni di skrifi na ini.

’Mi Mofo E Taki San Tru’

Koni e go doro fu hari wi prakseri, èn a e taki: „Arki, bika mi e taki fu sani di de prenspari srefisrefi, èn mi e opo mi mofobuba fu taki fu san reti. Bika mi mofo e taki tru sani nomo nanga wan safu sten; èn ogridu na wan tegu sani gi mi mofobuba. Ala den sani di mi mofo e taki de regtfardiki. No wan konkru noso kruktu sani no de na den mindri.” Iya, den sani di koni e leri wi na sani di bun èn reti srefisrefi, getrow èn opregti. Den no abi no wan kruktu noso takru sani na ini. „Den alamala de krin gi a sma di abi a koni fu man si sani krin, èn den de reti gi den wan di e feni koni.”—Odo 8:6-9.

Fu dati ede a de wan bun sani taki koni e gi wi a deki-ati disi: „Teki mi trangaleri èn no teki solfru, èn teki sabi na presi fu a moro bun gowtu.” A sani disi di koni e aksi wi fu du na wan bun sani, „bika koni moro bun leki koraal, èn a de moro bun leki ala tra sani di e gi sma bogobogo prisiri” (Odo 8:10, 11). Ma fu san ede? San e meki taki koni warti moro leki gudu?

„Den Froktu fu Mi Bun Moro Leki Gowtu”

Den presenti di koni e gi den sma di e arki en, warti moro leki gowtu, solfru, noso koraal. Koni e sori san na den presenti disi, te a e taki: „Mi, koni, e tan makandra nanga konifasi èn mi e kisi sabi fu a frustan di libisma man frustan sani. A frede gi Yehovah wani taki dati wi no wani si ogri na ai. A hei di wan sma e hei ensrefi èn bigimemre èn a takru pasi èn a takru mofo mi no wani si na ai.”—Odo 8:12, 13.

A sma di abi koni e kisi konifasi èn so srefi frustan fu sani. A man di abi a koni fu Gado abi bigi lespeki so srefi gi Gado, fu di „a frede gi Yehovah  na a bigin fu koni” (Odo 9:10). Fu dati ede a sma dati e tegu den sani di Yehovah no wani si na ai. Den sani soleki heimemre, a libi di sma no e libi akruderi den gronprakseri fu Gado, èn so srefi doti taki, no de fu feni na ini en. Fu di a no wani si takrudu na ai, meki dati e tapu en fu no gebroiki a makti fu en na wan fasi di e tyari pori kon. A de prenspari srefisrefi taki den sma di abi frantwortu na ini a Kresten gemeente, èn so srefi edeman fu osofamiri, e suku fu kisi koni!

„Mi abi rai nanga koni di yu sa man gebroiki bun”, koni e go doro fu taki. „Mi na frustan — mi abi makti. Na fu mi ede meki kownu srefi e tan hori makti, èn hei tiriman srefi e sorgu taki sma e handri na wan regtfardiki fasi. Na fu mi ede meki kownu manpikin e tan hori a makti fu den, èn heihei-sma den alamala e tan krutu sma na wan reti fasi” (Odo 8:14-16). A froktu fu koni abi fu du tu nanga a koni fu man si sani krin, frustan, nanga makti — sani di tiriman, hei tiriman, nanga heihei-sma abi tranga fanowdu. Koni na wan prenspari sani gi den sma di abi makti èn gi den sma di e gi trawan rai.

Ala sma kan kisi tru koni na wan makriki fasi. Ma a no ala sma e feni en. Wan tu sma no wani en noso den e tan fara fu en, srefi te a de leti na a doromofo fu den. „Den sma di lobi mi, misrefi lobi den tu”, koni e taki „èn den sma di e suku mi, den sa feni mi tu” (Odo 8:17). Soso den sma di e suku koni nanga den heri ati, sa kisi en.

Den pasi fu koni na retidu nanga regtfardikifasi. Den sma di e suku en e kisi pai fu en. Koni e taki: „Gudu nanga glori de na mi, so srefi warti eigifasi di sma e kisi leki erfenis èn regtfardikifasi. Den froktu fu mi bun moro leki gowtu, iya, moro leki soifri gowtu srefi, èn a nyanyan di mi ben koti, bun moro leki fini solfru. Mi e waka na tapu a pasi fu regtfardikifasi, na mindri fu den pasi fu retidu, fu meki den sma di lobi mi, teki gudu gi densrefi; èn mi e tan furu den maksin fu den.”—Odo 8:18-21.

Makandra nanga den tumusi moi eigifasi disi soleki frustan, a krakti fu man denki, sakafasi, a koni fu man si sani krin, nanga a frustan fu sani, dan tra presenti fu koni na so srefi gudu nanga grani. Wan koni sma kan kisi gudu na wan regtfardiki fasi, èn sani sa go bun nanga en na yeye fasi (3 Yohanes 2). Koni e meki taki wan sma e kisi grani tu. Moro fara, a sma e breiti nanga den sani di a e kisi, èn a abi wan korostu ati èn so srefi wan krin konsensi na fesi Gado. Iya, koloku fu a man di feni koni. Den froktu fu koni trutru bun moro leki soifri gowtu nanga fini solfru.

Wi trutru e kisi a rai disi na a yoisti ten, fu di wi e libi na ini wan grontapu pe sma e prakseri soso materia sani èn pe sma e du ala muiti fu kon gudu, awansi san den musu du fu kisi dati! Meki a de so taki noiti wi no e frigiti o warti koni de èn meki wi noiti suku fu kon gudu na wan onregtfardiki fasi. Meki wi ala ten poti prakseri na den sani di seti gi wi fu gi wi koni — den Kresten konmakandra fu wi èn a studeri di wisrefi e studeri Bijbel èn so srefi den publikâsi di a „getrow èn koni srafu” e gi wi — na presi fu poti prakseri soso na san wi musu du fu kan kisi gudu.—Mateus 24:45-47.

 „Fu Sensi Ten Di No Abi Marki A Ben Poti Mi na Wroko”

Na ini a di fu aiti kapitel fu a buku Odo, koni no e prenki leki wan libisma soso fu fruklari san na den eigifasi fu koni. Na wan agersi fasi, a e sori go so srefi na a moro prenspari sani di Yehovah meki. Koni e taki go moro fara: „Yehovah srefi ben meki mi leki a bigin fu en pasi, leki a moro fruku sani fu en wroko fu owruten. Fu sensi ten di no abi marki a ben poti mi na wroko, fu a bigin kaba, fu sensi ten moro fruku leki a grontapu. Di watra dipi no ben de, a ben meki mi leki nanga pen fu wan bere-uma, di fonten fu watra no ben de, lai nanga watra. Bifo a ben saka den bergi, bifo den pikin bergi, a ben meki mi leki nanga den pen fu wan bere-uma, di a no ben meki grontapu ete, èn no den opo presi tu, èn so srefi no a fosi pisi fu a fugufugu santi fu a fatu gron.”—Odo 8:22-26.

A fasi fa den bijbeltekst di skrifi na tapusei e taki fu koni di prenki leki wan libisma, trutru e fiti san den Buku fu Bijbel e taki fu „a Wortu”! „Na ini a bigin a Wortu ben de”, na apostel Yohanes ben skrifi, „èn a Wortu ben de nanga Gado, èn a Wortu ben de wan gado” (Yohanes 1:1). Koni di prenki leki wan libisma, na wan agersi fasi e prenki Gado en Manpikin, Yesus Krestes, na ini a libi fu en bifo a ben tron wan libisma. *

Yesus Krestes na „a fosi geborewan fu ala den sani di Gado meki; bika nanga yepi fu en ala tra sani ben meki na ini hemel nanga na grontapu, den sani di libisma ai kan si nanga den sani di libisma ai no kan si” (Kolosesma 1:15, 16). „Di a [Yehovah] ben sreka den hemel, mi ben de drape”, na so koni, di e pristeri ensrefi leki wan libisma, e taki go moro fara, „di a ben poti wan lontu abra na fesi fu a dipi fu a watra, di a ben poti a bigi wolku na tapusei steifi, di a ben meki den fonten fu a dipi fu a watra kon krakti, di a ben poti en wet gi a se, dati den watra srefi no ben sa pasa en komando, di a ben poti den fondamenti fu a grontapu, ne mi ben tron leki wan meester wrokoman na en sei, èn mi ben tron a sma di spesrutu a ben abi waran firi gi dei na dei, èn mi ben breiti na en fesi ala ten, mi ben breiti nanga a fatu gron fu a grontapu fu en, èn den sani di mi ben abi waran firi gi den trutru, ben de den manpikin fu libisma” (Odo 8:27-31). Yehovah en fosi gebore Manpikin ben de na en Tata sei, e wroko fayafaya makandra nanga en — a Mekiman fu hemel nanga grontapu di no abi speri. Di Yehovah Gado ben meki a fosi libisma, en Manpikin ben du a wroko disi makandra nanga en leki wan Meester Wrokoman (Genesis 1:26). Fu dati ede a no e fruwondru wi, taki Gado en Manpikin trutru wani kon sabi moro fu a libisma famiri, èn taki a lobi libisma trutru!

„Koloku a Sma De Di E Arki Mi”

A Manpikin fu Gado e taki, leki koni di prenki leki wan libisma: „Now, o un manpikin, arki na mi; iya, koloku fu den sma de di e hori mi pasi. Gi yesi na trangaleri èn kon koni, èn no sori taki yu no e poti nofo prakseri na tapu sani. Koloku a sma de di e arki mi fu di a e tan na ai na mi doro dei na dei, fu di a e hori wakti na den postu fu mi doro. Bika suma feni mi, seiker sa feni a libi èn e kisi bun wani fu Yehovah. Ma suma misi mi, e du en sili ogri; ala den sma di no wani si mi na ai srefisrefi, na den sma di trutru lobi dede.”—Odo 8:32-36.

Yesus Krestes na a soifri eksempre fu wan sma di abi a koni fu Gado. „Ala den gudu fu koni nanga sabi, kibri heri bun na ini en” (Kolosesma 2:3). Fu dati ede, meki wi arki en heri bun èn meki wi waka soifri baka na eksempre di a poti gi wi (1 Petrus 2:21). Efu wi drai wi baka gi en, dan dati wani taki dati wi e du wi eigi sili ogri èn taki wi lobi dede, bika „no wan tra sma de di kan gi wi frulusu” (Tori fu den Apostel 4:12). Iya, meki wi teki Yesus leki a wan di Gado gi so taki wi kan kisi frulusu (Mateus 20:28; Yohanes 3:16). Na so wan fasi wi sa ondrofeni a koloku di e kon fu di wi ’feni libi èn fu di wi kisi a bun-ati fu Yehovah’.

[Futuwortu]

[Prenki na tapu bladzijde 26]

Koni na wan tumusi prenspari sani gi den sma di abi frantwortu

[Prenki na tapu bladzijde 27]

Poti prakseri na den seti di e gi koni