A Prenspari Taki Sma Musu Leri fu Gi Yesi na ini Pikin-Nengreten?

„PAPA Nanga Mama Wani Pikin Di Abi Den Eigi Denki. Den No Wani Pikin Di E Gi Yesi Nomo.” Disi ben de a nen fu wan artikel na ini wan koranti. Sma ben poti a pisi tori disi na ini a koranti dati, baka di den du wan ondrosuku na Nyun Zeeland. Na ondrosuku dati ben sori taki soso „22 procent fu den sma di ben piki san den e denki, feni taki a de na oso taki papa nanga mama musu leri den pikin fu den fu gi yesi.” Na ondrosuku ben sori tu taki papa nanga mama fu now, feni taki a moro prenspari fu leri pikin-nengre sani soleki bun maniri, so srefi fa den kan teki den eigi bosroiti, èn fa den musu tyari frantwortu.

Na ini a pisi ten disi, moro furu sma e bribi taki ibri sma musu abi den eigi denki èn den eigi fasi fu du sani èn musu prakseri den eigi wini nomo. Fu dati ede, a no e fruwondru wi taki moro furu sma no e feni taki a de prenspari fu gi yesi èn fu leri pikin-nengre fu gi yesi. Ma wi musu si en nomo leki wan sani di no fiti a ten fu wi, taki wi musu leri pikin-nengre fu gi yesi? Noso a de wan fu den prenspari sani di pikin-nengre kan leri èn kan kisi wini fu en? A moro prenspari sani na fu luku efu Yehovah Gado, a Sma di seti na osofamiri libi, wani taki pikin-nengre musu gi yesi na papa nanga mama. Èn san na wan tu fu den winimarki te den e gi yesi?—Tori fu den Apostel 17:28; Efeisesma 3:14, 15.

„Disi Regtfardiki”

Na apostel Paulus ben skrifi gi a fosi yarihondro Kresten gemeente na Efeise: „Un pikin, un gi yesi na un papa nanga mama ini wánfasi nanga Masra, bika disi regtfardiki” (Efeisesma 6:1). So bun, a prenspari srefisrefi fu gi yesi na papa nanga mama, fu di a de akruderi Gado en markitiki fu san bun. Soleki fa Paulus ben taki en, dan „disi regtfardiki”.

Nanga disi na prakseri, wi e si taki Gado Wortu e taki dati te papa nanga mama e gi den pikin fu den trangaleri nanga piri-ai na wan lobi-ati fasi, dan dati de leki wan moimoi sani, „wan moi kransi gi yu ede èn wan moi keti gi yu neki”, èn leki wan sani di „e plisi Masra srefisrefi” (Odo 1:8, 9; Kolosesma 3:20). Kontrari fu dati, Gado no feni en bun kwetikweti te pikin-nengre no e gi yesi na a papa nanga mama fu den.—Romesma 1:30, 32.

„So Taki A Kan Go Bun Nanga Yu”

Paulus ben sori go na wan tra winimarki di pikin-nengre kan kisi te den e gi yesi, di a ben skrifi: „’Gi grani na yu papa nanga yu mama’, san na a fosi komando nanga wan pramisi: ’So taki a kan go bun nanga yu èn yu kan tan wan langa ten na grontapu’” (Efeisesma 6:2, 3; Exodus 20:12). Na sortu fasi a kan go bun nanga wan pikin te a e gi yesi na en papa nanga mama?

Na a fosi presi, a no de so taki papa nanga mama moro owru èn taki den abi furu ondrofeni? Ala di a kan gersi leki den no sabi furu fu computer tori noso fu tra sani di den pikin fu den e leri na skoro, toku den sabi furu fu a fasi fa sani e waka na ini a libi èn fa den musu kakafutu gi den problema na ini a libi. Yongu sma, na a tra sei, no abi na ondrofeni ete di lepi sma abi fu man si sani krin èn teki yoisti bosroiti. Fu dati ede den e teki hasti bosroiti. Nofotron den e brokokindi te den speri fu den e dwengi den fu du takru sani, èn furutron den e ondrofeni den ogri bakapisi fu dati. Nanga reti, Bijbel e taki: „Lawfasi tai na a ati fu wan boi; a tiki fu trangaleri na a sani di sa puru en poti farawe fu en.”—Odo 22:15.

Te pikin-nengre e gi yesi  na a papa nanga mama fu den, dan a no na osofamiri wawan sa kisi wini fu dati. Te sma wani taki sani na ini a libimakandra musu waka bun èn sma musu du bun sani, dan den musu wroko makandra, èn dati baka, wani taki dati den abi fu gi yesi na makandra. Fu eksempre, sma sa abi vrede, wánfasi, nanga koloku na ini wan trowlibi te den de klariklari fu arki san a tra sma abi na prakseri, na presi fu wani ala ten fu du san ensrefi wani èn no prakseri den reti èn den firi fu a tra sma. Na a wrokopresi, a prenspari taki wrokoman e saka densrefi na ondro den basi fu den, efu den wani taki sani musu waka bun na ini iniwan bisnis noso wroko. Te wan sma e gi yesi na lantiwet, dan dati no wawan wani taki dati a no e kisi strafu, ma so srefi taki dati e kibri en pikinso gi kefar.—Romesma 13:1-7; Efeisesma 5:21-25; 6:5-8.

Yongu sma di e trangayesi sma di abi makti noso frantwortu, nofotron e tron sma di trawan no wani, noso di no man fiti densrefi na ini a libimakandra. Kontrari fu dati, te wan pikin e leri na ini en pikin-nengreten fu gi yesi, dan dati kan gi en wini en heri libi langa. A e tyari winimarki trutru fu leri pikin-nengre taki den musu gi yesi!

A Bigi Paiman Di wan Sma Sa Kisi te A E Gi Yesi

Te sma e gi yesi, dan dati e meki den kon abi wan koloku osofamiri-libi, èn so srefi e meki den kisi tra winimarki den heri libi langa. A e gi sma a fondamenti tu fu kon abi a moro prenspari matifasi — a matifasi fu wan sma nanga en Mekiman. Leki a „Gran Mekiman” di de „a Sma fu pe a libi komopo”, Yehovah Gado abi a reti fu aksi taki wi gi yesi na en dorodoro.—Preikiman 12:1; Psalm 36:9.

Den difrenti fasi fu a wortu „gi yesi” de furu leisi na ini Bijbel. Boiti dati, hondrohondro tekst e taki fu den wet fu Gado, fu den ordru fu en, den komando, den krutu bosroiti, nanga den reglementi fu en, èn ala den sani disi e sori taki sma musu saka densrefi na ondro Gado. A de krin taki Gado e si a gi di wan sma e gi yesi, leki wan sani di wan sma musu du fu kisi a bun-ati fu en. Iya, te wan sma wani tron wan mati fu Yehovah, dan a prenspari srefisrefi taki a e gi yesi na en (1 Samuèl 15:22). A de wan sari sani taki libisma no gebore nanga a gwenti fu gi yesi, ma fu trangayesi. „Den firi di libisma abi na ini en ati, takru fu sensi en yongu yari”, na so Bijbel e taki (Genesis 8:21). Fu dati ede, sma no musu leri fu gi yesi na ini pikin-nengreten wawan, ma musu leri dati na ini a heri libi. Te wan sma e du dati, dan a sa kisi wan bigi paiman.

Hori na prakseri taki, soleki fa na apostel Paulus ben taki, pikin-nengre sa kisi tu winimarki te den e hori densrefi na a komando fu gi yesi na a papa nanga mama fu den, èn dati na taki ’a kan go bun nanga den èn den kan tan wan langa ten na grontapu’. Den wortu di skrifi na ini Odo 3:1, 2 e buweisi taki a pramisi disi tru srefisrefi: „Mi manpikin, no frigiti mi wet, èn meki yu ati gi yesi na mi komando, bika yu sa kisi furu dei nanga furu yari nanga vrede na tapu.” A bigi paiman di den sma di e gi yesi sa kisi, na wan tranga banti nanga Yehovah nownow èn têgo libi na ini wan nyun grontapu pe vrede sa de.—Openbaring 21:3, 4.

[Prenki na tapu bladzijde 30, 31]

Te sma e gi yesi, dan den e libi koloku nanga makandra na ini na osofamiri, e wroko bun nanga makandra na a wrokope, èn e kon abi wan tranga banti nanga Yehovah