Yu Feni Taki Sma E Si Sani na wan Heri Tra Fasi Leki San Yu Ben Abi na Prakseri?

WAN sani ben e gi Antonio broko-ede. Wantronso èn sondro taki a ben sabi fu san ede, en bun mati Leonardo no ben wani taki moro nanga en. * Na difrenti okasi Leonardo no ben taki Antonio odi, èn te den ben de makandra, a ben gersi taki Leonardo no ben sabi en moro. Atonio bigin frede taki a ben du noso taki wan sani di en mati Leonardo ben frustan na wan heri tra fasi. Ma san dati ben de?

A e pasa furu taki sma e si sani heri tra fasi leki san wan trawan ben abi na prakseri. Furutron a no de fu wan seryusu sani ede èn sma kan meki sani bun baka esi-esi. Ma son leisi te sma e si sani heri tra fasi leki san yu ben abi na prakseri, dan dati kan gi furu broko-ede. Dati de spesrutu so te wan sma e tan si wan sani na wan fowtu fasi ala di ala sortu muiti du fu no meki den denki so moro. Fu san ede sma e si sani heri tra fasi leki san wan trawan ben abi na prakseri? Fa sma di de na ini a tori e firi te dati pasa? San yu kan du te trawan e si sani na wan heri tra fasi leki san yu ben abi na prakseri? Yu musu broko yu ede trutru nanga san trawan e denki fu yu?

Wan Sani Di Yu No Man Wai Pasi gi

Fu di trawan no man si san wi e denki èn san wi wani, dan te fu kaba wan sma kan si den sani di wi e taki noso e du, na wan heri tra fasi. Furu sani de di kan meki taki wan sma si wan sani na wan heri tra fasi. Son leisi, wi no e taki soifri fa wi e denki fu wan tori, fu meki trawan frustan wi bun. A kan de so taki babari di de fu yere noso tra sani di e hari a prakseri fu sma, e meki taki trawan no man poti ala prakseri na den sani di wi e taki.

A fasi fa son sma de èn a fasi fa den e du, e meki tu taki trawan e si den na wan heri tra fasi leki fa den de. Fu gi wan eksempre, sma kan meki a fowtu fu denki taki wan sma di fruleigi na wan sma di no abi firi gi trawan èn den kan si en leki wan sma di no wani abi demakandra nanga trawan, noso leki wan sma di abi bigifasi. A kan de so taki den sani di wan sma ondrofeni na ini a ten di pasa e meki taki na ini son situwâsi a e taki noso handri akruderi den firi fu en, na presi fu a gebroiki en frustan. Fu di libisma abi difrenti kulturu nanga tongo, dan wi no musu fruwakti taki trawan ala ten sa frustan wi bun. So srefi te sma no e fruteri sani soleki fa den de trutru noso te sma e konkru, dan wi no musu  skreki te trawan son leisi e kisi wan heri tra denki fu sani. Ma a tru taki ala den sani disi no e gi wan sma furu trowstu, te den e si taki sma drai a heri sani di den ben wani taki noso du.

Fu gi wan eksempre, Anna no ben abi no wan takru sani na prakseri di a taigi trawan taki a mati fu en di no ben de na den mindri na a pisi ten dati, ben pôpi. Wan sma go taigi a mati disi baka san Anna ben taki, ma a no taki a sani leki fa a ben de. A bakapisi ben de taki a mati fu Anna mandi nanga en èn a taigi Anna na fesi difrenti trawan taki a ben dyarusu fu di wan mansma ben e suku en. Anna skreki èn a kisi sari fu a sani disi ede. A mati fu Anna no ben yere san Anna ben taki trutru, èn ala di Anna meki ala sortu muiti fu meki a kon frustan taki a no ben wani du en wan ogri, dati no yepi. A situwâsi dati tyari furu sari kon, èn a teki moi langa bifo Anna ben man poti sani kon bun baka nanga a mati fu en.

A denki di trawan abi fu yu, furutron e anga fu a fasi fa den e si den sani di yu e du. Fu dati ede sma sa firi fruferi te trawan no e denki bun fu den sani den e du. A kan de so taki yu e mandi, fu di yu e firi taki sma no abi reide fu denki takru fu yu. Yu feni taki den sma dati no sabi fa a tori de trutru, den e luku sani tumusi fini, noso den e fruteri sani di no tru kwetikweti, èn den sani di den sma disi e taki kan hati yu. A e hati yu spesrutu te yu e lespeki a denki fu den sma disi di e taki den fruferi sani.

Ala di a kan de so taki yu no lobi a fasi fa sma e denki fu yu, toku a bun fu lespeki a denki fu trawan. Wi no e handri leki Kresten te wi no e broko wi ede nanga a denki fu trawan. So srefi wi noiti sa wani taki, noso du sani di e tyari takru bakapisi kon gi tra sma (Mateus 7:12; 1 Korentesma 8:12). Fu dati ede a kan de fanowdu son leisi, taki yu e du muiti fu meki wan sma di no e denki bun fu wi, e kon denki tra fasi. Ma te wi e broko wi ede tumusi nanga a fasi fa sma e denki fu wi, dan dati sa abi wan takru bakapisi, fu di wi no sa lespeki wisrefi en wi sa firi taki no wan sma sa lobi wi. Fu taki en leti, a trutru waarde fu yu no e anga fu a denki di trawan abi fu yu.

Na a tra sei, kande yu e si taki sma abi bun reide fu no agri nanga wan sani di yu taki noso a fasi fa yu handri. A sani dati kan hati yu tu, ma efu yu de klariklari fu erken den swakifasi fu yu na wan eerlijk fasi, dan den ondrofeni dati kan abi bun bakapisi, fu di den e gi yu deki-ati fu tyari kenki kon di de fanowdu.

Takru Bakapisi

Te sma e si sani heri tra fasi leki san wan sma ben abi na prakseri trutru, dan son leisi dati kan abi seryusu bakapisi. Fu gi wan eksempre, te yu e yere wan man e taki bun tranga na ini wan restaurant, dan yu kan denki taki a man bradyari noso taki a e meki opo-opo. Kande yu no abi leti fu denki so. Kande a sma di a man disi e taki nanga en no man yere bun. A kan de so tu taki wan sma di e seri sani na ini wan wenkri no abi switifasi, ma kande dati e kon fu di a no e firi bun. Ala di den sani disi kan meki taki yu e kisi wan takru denki fu sma, toku den no sa abi wan tumusi takru bakapisi. Ma son leisi te sma abi wan heri tra denki fu den sani di trawan e du, dan dati kan abi wan bun takru bakapisi. Luku den tu tori disi di feni presi ini a historia fu owruten Israèl.

Di Nahas, a kownu fu Amon, dede, dan David seni boskopuman fu go trowstu en manpikin Hanun di ben tron kownu na presi fu en papa. Ma Hanun si den boskopuman leki spion di ben kon drape fu luku a kontren fu en. Fu dati ede Hanun gi den man disi syen èn baka dati a bigin feti nanga Israèl. Leki bakapisi, pikinmoro 47.000 sma dede — soso fu di Hanun ben si a bun sani di David ben wani du leki wan takru sani.—1 Kroniki 19:1-19.

 Wan pisi ten moro na fesi na ini a historia fu Israèl, wan tra sani pasa fu di sma si sani na wan heri tra fasi leki fa den ben de, ma a sani disi ben abi wan heri tra bakapisi. Den lo fu Ruben nanga Gad èn so srefi afu fu a lo fu Manase ben bow wan bigi altari na a Yordanliba. Den tra lo fu Israèl ben feni taki den lo disi no ben de getrow na Yehovah, den ben feni taki den lo disi ben opo densrefi teige En. Fu dati ede den tra lo kon makandra fu go feti nanga den. Den no handri wantewante, ma den seni boskopuman go na den tu nanga afu lo fu taigi den taki den no ben feni en bun srefisrefi taki den ben bow wan altari. Den tra lo fu Israèl ben feni taki na so wan fasi den lo disi ben sori taki den no ben de getrow. A ben bun taki den ben seni boskopuman go, fu di den sma di ben bow na altari piki den taki den no ben abi no wan enkri prakseri fu drai den baka gi a tru anbegi. Kontrari fu dati, na altari ben musu de leki buweisi taki den ben de getrow na Yehovah. A fasi disi fu si wan sani na wan heri tra fasi leki fa a de, sa kan abi leki bakapisi taki ipi-ipi sma lasi den libi, ma koni meki taki so wan takru bakapisi no kon.—Yosua 22:10-34.

Taki Nanga Makandra na wan Lobi-ati Fasi

Wi kan leri wan bun sani te wi e teki den tu tori disi gersi makandra. Soleki fa a sori, dan sma e handri nanga koni te den e taigi trawan san e trobi den. Suma sabi omeni sma ben tan na libi na ini a lasti tori fu na artikel, soso fu di den tu grupu ben taki nanga makandra? Na ini furu kefal, a kefar no sa de taki sma e lasi den libi efu yu no si wan sani leki fa a de trutru, ma matifasi kan pori. So bun, efu yu feni taki wan sma no handri bun nanga yu, dan yu de seiker taki yu e si den sani trutru leki fa den de, noso yu e si den na wan heri tra fasi leki san a sma abi na prakseri? Fu san ede a sma ben taki noso handri so fasi? Aksi en. Yu feni taki wan sma si sani heri tra fasi leki san yu ben abi na prakseri? Taki nanga a sma dati. No meki heimemre tapu yu fu du dati.

Yesus ben gi sma a moro bun reide fu meki sani bun baka te wi nanga trawan abi wan kesekese: „Fu dati ede, te yu e tyari yu presenti go na a altari èn drape yu e memre taki a brada fu yu abi wan sani nanga yu, dan libi yu presenti drape na fesi na altari èn gowe; suku vrede fosi nanga a brada fu yu, èn baka dati, te yu drai kon baka, òfer a presenti fu yu” (Mateus 5:23, 24). So bun, a yoisti sani fu du, na fu go taki nanga a sma wawan, sondro fu tyari trawan kon na ini a tori. Sani sa kon moro takru te a sma di du wan hati sani nanga yu, e yere fosi fu trawan san na a kragi fu yu (Odo 17:9). Yu musu abi a marki fu meki vrede nanga a sma na wan lobi-ati fasi. Sondro fu atibron, taki san na a problema, ala di yu e taki a sani leki fa a de sondro fu krutu a sma. Taigi a sma fa yu e firi. Dan arki nanga lespeki san a sma abi fu taki. No de gaw fu krutu a sma taki a du sani di yu no lobi. De klariklari fu bribi san a tra sma e taki. Hori na prakseri taki lobi „e bribi ala sani”.—1 Korentesma 13:7.

A no de fu taki dati srefi te sma meki sani bun nanga a trawan di no ben e si sani leki fa a de trutru, dan a sani di pasa kan hati den firi fu den sma disi ete noso a kan abi takru bakapisi di e tan. San wi kan du te dati de so? Te a de fanowdu, a bun fu aksi sma opregti pardon èn fu du so srefi iniwan tra sani di de fanowdu fu poti sani bun baka. Na ini ala den sortu situwâsi disi, a ben o bun efu a sma di wan trawan ben du wan hati sani nanga en, e handri akruderi a rai disi di Gado e gi: „Tan frudrage makandra èn gi makandra pardon na wan fri fasi efu a wan abi wan sani fu kragi fu a trawan. Soleki fa Yehovah gi unu pardon na wan fri fasi, na so unu musu du tu. Ma boiti ala den sani disi, weri lobi gi unsrefi, bika a de wan volmaakti banti fu wánfasi.”—Kolosesma 3:13, 14; 1 Petrus 4:8.

So langa leki wi de onvolmaakti, wi sa abi kesekese èn wi sa du sani di e hati trawan. Iniwan sma kan meki wan fowtu noso kan taki na wan fasi di e sori taki a no e broko en ede nanga den firi fu trawan. Bijbel e sori: „Bika wi alamala e naki futu fadon furutron. Efu wan sma no e naki futu fadon na ini wortu, dan a sma dati na wan volmaakti sma, di man dwengi [en] heri skin tu.” (Yakobus 3:2). Fu di Yehovah sabi a sani disi heri bun, dati meki a gi wi a rai disi: „No hasti yusrefi fu atibron na ini yu yeye, bika  atibron de na ini na ati fu den wan sondro frustan. So srefi no gi yu ati fu yere ala den wortu di sma kande e taki, so taki yu no sa yere yu futuboi e taki takru fu yu. Bika yu eigi ati sabi heri bun omeni lesi srefi di yu, srefi yu, taki takru fu trawan.”—Preikiman 7:9, 21, 22.

„Yehovah E Ondrosuku den Ati”

Ma san fu du te a sori leki yu no man kenki a takru denki di wan trawan abi fu yu? No lasi ati. Tan kweki èn tan sori den Kresten eigifasi so bun leki yu man du dati. Aksi Yehovah fu yepi yu fu go na fesi pe dati de fanowdu. Te fu kaba, a no sma e bepaal san na a trutru waarde fu yu leki libisma. Yehovah wawan man „ondrosuku [na] ati” na wan soifri fasi (Odo 21:2). Sma no ben lespeki Yesus srefi èn den ben wisiwasi en, ma a sani dati no ben abi krakti na tapu a fasi fa Yehovah ben si en (Yesaya 53:3). Ala di son sma kan denki takru fu sani di yu du, toku yu kan ’taigi Yehovah san de tapu yu ati’ èn yu kan de seiker taki a e frustan fa yu e firi, „bika Gado no e luku sani na a fasi fa libisma e luku sani, bika libisma e si san na ai e si nomo; ma fu a sei fu Yehovah, a e si fa na ati de” (Psalm 62:8; 1 Samuèl 16:7). Efu yu e tan du san bun, den sma di abi wan takru denki fu yu, baka wan pisi ten kande sa si taki den no ben abi leti èn den kan denki tra fasi fu yu.—Galasiasma 6:9; 2 Timoteus 2:15.

Yu e memre Antonio, di ben kari na a bigin fu na artikel? A teki deki-ati fu handri akruderi a rai di Bijbel e gi, èn a taki nanga en mati Leonardo. A aksi Leonardo efu a ben du wan sani di ben hati en. San ben de a bakapisi? Leonardo ben fruwondru srefisrefi. A taigi en mati Antonio taki a no ben du no wan enkri sani di hati en, èn a gi en a dyaranti taki a no ben abi a denki fu wai pasi gi en fu espresi. Efu a ben sori leki a no ben wani taki nanga en, a ben kan de fu di a ben e prakseri tra sani. Leonardo aksi en mati pardon fu di a ben afrontu den firi fu en sondro taki a ben sabi dati èn a taki Antonio tangi fu di a ben taigi en a sani disi. A taigi en so srefi taki wan tra leisi a ben o luku moro bun fu no gi sma a srefi denki dati. Ala sani ben bun baka na mindri den tu mati disi, èn now den de bun mati leki noiti bifo.

A no switi srefisrefi te sma e si sani leki fa a no de trutru. Ma efu yu e du ala san yu man fu taki fu a tori èn efu yu e handri akruderi den Bijbel gronprakseri fu lobi nanga a gi di wi musu gi trawan pardon, dan seiker yu tu sa abi den bun bakapisi disi tu.

[Futuwortu]

[Prenki na tapu bladzijde 23]

Te yu e taki fu wan tori na wan lobi-ati fasi èn te yu e gi trawan pardon, dan dati sa abi bun bakapisi