Wan Organisâsi fu Sma na Heri Grontapu Di E Sorgu Makandra

ALA sei pe yu e luku, yu e si sma. Furu fu den owru, son wan fu den siki sote taki pikinmoro den no man waka. Yu e si umasma di de nanga bere, so srefi yongu trowpaar, makandra nanga den yosiyosi pikin fu den. Ala den sma disi lowe komoto fu a kondre fu den — mansma, umasma, nanga pikin-nengre. Borgrufeti, naturu rampu, noso tra situwâsi meki taki den ben musu gowe libi den oso fu suku wan kibripresi na ini wan birtikondre. Son wan fu den ben abi fu gowe libi den tanpresi furu leisi baka makandra. Te den e si taki dyugudyugu na mindri borgru noso wan naturu rampu o bigin, dan den e grabu wan tu ososani, den e teki den pikin fu den, èn den e go na wan presi pe ogri no sa miti den so makriki. Baka dati, te a situwâsi e kon bun baka, dan furu loweman e drai go baka fu bow den oso agen èn fu bigin den libi nyunyun.

Na ini den yari di pasa, dan a Republiek fu Centraal-Afrika ben gi pasi meki loweman fu wan tu tra kondre, kon na ini a kondre fu den. No so langa pasa, a feti di ben de na ini a Demokrasia Republiek Kongo meki taki dusundusun sma, so srefi Kotoigi fu Yehovah, ben abi fu lowe go na a Republiek fu Centraal-Afrika pe a situwâsi no de so takru.

Brada Kon Yepi Den Wan Di De na Nowtu

Kotoigi na ini a Republiek fu Centraal-Afrika ben feni en wan grani taki den ben kan orga sani fu yepi sma. Den ben seti wan tu presi gi den Kresten brada nanga sisa di kon drape. Biginbigin, den ben feni kamra na ini sma oso, ma di den loweman kon moro furu, dan den ben si taki den ben abi fu suku moro bigi presi. Den ben meki wan tu Kownukondre zaal kon tron sribipresi. Kotoigi fu drape ben de klariklari fu yepi. Den ben poti moro lampu gi faya, so srefi peipi gi watra, èn den ben tranga a gron fu den zaal, so taki den ben man gi den sma wan bun presi fu tan. Den loweman ben wroko makandra nanga den brada fu drape fu seti den sribipresi disi di ben o de fu wan syatu pisi ten nomo. Wan heri programa fu Kresten konmakandra ben seti na ini a tongo Lingala, so taki den sma di ben kon drape ben sa kisi nyanyan na yeye fasi fu tranga den. A wroko di den Kotoigi fu drape ben wroko makandra nanga den fisitiman fu den, ben sori taki wan bradafasi na heri grontapu de trutru.

Osofamiri di lowe komoto fu a kondre fu den, no ben doro nanga makandra ala ten. Son leisi, memre fu osofamiri di ben prati fu makandra  ben feni makandra baka te den doro a presi pe den musu de. Na ibri Kownukondre zaal, den brada ben abi den nen fu den sma di doro bun. Den ben seti sani fu suku den wan di no doro ete. A bijkantoro di e tiri a wroko fu Yehovah Kotoigi na ini a kondre dati, ben seni dri oto ibri dei fu yepi den Kotoigi di ben de na pasi ete, èn fu suku den wan di lasi pasi kande. Sma ben kan si suma ben abi den oto disi, bika marki ben poti na tapu den oto nanga den wortu „WAKTITOREN—Yehovah Kotoigi”.

Luku a tori fu wan grupu fu seibi pikin-nengre di ben lowe komoto fu a kondre fu den èn di ben lasi a papa nanga mama fu den. Prakseri fa den ben prisiri srefisrefi di den si wan oto fu Yehovah Kotoigi. Wantewante den lon go na a oto, dan den taki dati den na Kotoigi. Den brada ben poti den na ini na oto, dan den tyari den go na wan Kownukondre zaal pe te fu kaba, den feni den famiri fu den baka.

San meki taki den opregti Kresten disi ben man kakafutu gi den situwâsi disi, no soso wán leisi nomo ma ibritron baka? Den e bribi trutru taki wi e libi na ini den lasti dei soleki fa den Santa Buku fu Bijbel ben taki na fesi.—2 Timoteus 3:1-5; Openbaring 6:3-8.

Fu dati ede, den sabi taki dyonsro Yehovah Gado sa tyari wan kaba kon na orloku, bita-ati, ogri di sma e du nanga tranga, èn so srefi na feti. A problema taki sma musu lowe komoto fu den kondre, no sa de moro kwetikweti. Ma nownowde, Yehovah Kotoigi e meki muiti fu sorgu makandra, akruderi a frumane di na apostel Paulus ben gi na 1 Korentesma 12:14-26. Ala di liba, lanki, tongo, nanga fara pasi e prati den, toku den e prakseri a tanbun fu makandra; so bun, den e handri esi-esi te wan sma de na nowtu.—Yakobus 1:22-27.

[Karta na tapu bladzijde 30]

(Efu yu wani si pe den sani disi skrifi, luku a tijdschrift)

AFRIKA

A Republiek fu Centraal-Afrika

A Demokrasia Republiek Kongo

[Sma di abi a reti fu a prenki]

Mountain High Maps® Copyright © 1997 Digital Wisdom, Inc.

[Prenki na tapu bladzijde 30]

Dri Kownukondre zaal ben tron presi fu ontfanga sma

[Prenki na tapu bladzijde 31]

Den ben seti presi wantewante fu man bori nyanyan

[Prenki na tapu bladzijde 31]

Moro nanga moro loweman ben doro

[Prenki na tapu bladzijde 31]

Den gebore no so langa ete, dan den de loweman kaba