Wi No Ben De Wi Wawan di Wi Bribi Ben Kisi Tesi

Vicky ben de wan moi beibi umapikin. A ben gosontu, a ben moi fu si, èn a ben de libilibi fu tru. Iya, di a ben gebore na ini a lente fu 1993, wi ben koloku srefisrefi. Wi ben tan na ini wan pikin foto na a zuidsei fu Sweden, èn a libi ben bun.

MA DI Vicky ben abi wan nanga afu yari, dan a ben de neleki wi heri libi drai tapu. A no ben gosontu wan pisi ten, so bun wi ben tyari en go na wan ati-oso. Noiti wi sa frigiti a momenti di a datra fruteri wi taki na umapikin fu wi ben abi seryusu limfoblastis leukemie, wan sortu kanker di pikin-nengre kan kisi èn san e wroko tapu den weti brudu cel.

A ben muilek fu frustan èn fu erken taki a pikin meisje fu wi ben abi a takru siki disi. A no ben libi wan bun fasi ete, dan a ben de fu dede kaba. A datra ben pruberi fu trowstu wi. Dati meki a taigi wi taki sani ben kan waka bun gi wi pikin, efu den ben o gi chemotherapie (wan sortu fasi fu dresi kanker), makandra nanga furu brudutransfusie. Disi na wan tra sani di ben meki wi ati dyompo.

A Bribi fu Wi E Kisi Tesi

Wi ben lobi wi umapikin trutru èn wi ben wani taki a ben musu kisi a moro bun datra yepi. Toku wi no ben wani kwetikweti fu a kisi brudutransfusie. Wi e bribi tranga na ini Gado Wortu, Bijbel, di e taki krinkrin taki Kresten musu ’tan farawe fu brudu’ (Tori fu den Apostel 15:28, 29). Wi ben sabi tu taki brudutransfusie kan abi takru bakapisi srefi. Dusundusun sma kisi siki, èn den dede fu brudutransfusie ede. A wan-enkri sani fa wi ben kan yepi wi pikin, na fu teki a moro bun datra yepi sondro taki den e gebroiki  brudu. Ini a tori disi, wi ben bigin a feti fu wi gi a bribi.

San wi ben kan du? Wi ben kontakti a Ziekenhuisinformatiedienst na a bijkantoro fu Yehovah Kotoigi na Sweden, fu aksi efu den ben kan yepi wi. * Wantewante den ben seni fax go na difrenti ati-oso na ini Europa, èn den ben suku wan ati-oso nanga wan datra di ben de klariklari fu gi chemotherapie sondro brudutransfusie. A fasi fa wi Kresten brada ben yepi wi fayafaya èn a lobi di den sori, ben gi wi deki-ati srefisrefi. Wi no ben de wi wawan na ini a feti fu wi gi a bribi.

Baka wan tu yuru den ben feni wan ati-oso nanga wan datra na ini Homburg/Saar, na Doisrikondre. Den ben seti en so taki a dei na baka wi ben kan go drape nanga opolani, fu den ben kan ondrosuku Vicky. Di wi doro, dan wi Kresten brada fu a gemeente fu Yehovah Kotoigi na ini Homburg, so srefi wan tu famiriman fu wi, ben drape fu kon teki wi. Wan fu den sma di e teki presi gi a Ziekenhuiscontactcomité fu drape, ben gi wi wan waran switikon. A sma ben go nanga wi na ati-oso, èn a ben gi wi ala yepi di a ben man gi. Wi ben kisi trowstu di wi si taki srefi na ini wan freimde kondre, wi ben abi brada na yeye fasi di ben horibaka gi wi.

Di wi miti Datra Graf na ati-oso, dan wi ben kisi trowstu ete wan leisi. A ben abi switifasi trutru èn a ben gi wi a dyaranti taki a ben o du ala san a ben man du fu yepi Vicky sondro brudutransfusie. Srefi efu a sali fu Vicky ben o saka te kon miti 5, toku a ben o de klariklari fu tan yepi en sondro brudutransfusie. A ben taki tu, dati a ben de wan bun sani taki den datra ben si fruku kaba sortu siki Vicky abi, èn taki wi no ben draidrai fu tyari en kon na ati-oso. Dati meki Vicky ben abi wan bigi tyans fu sani waka bun nanga en. A ben erken taki na ini a kefal fu Vicky, disi ben o de a fosi leisi taki a ben o gi chemotherapie sondro brudu. Wi ben de nanga tangi na ati srefisrefi èn wi ben warderi en trutru taki Datra Graf ben abi a deki-ati nanga a fasti bosroiti fu yepi wi.

Moni Problema

Now wi ben aksi wisrefi: Fa wi ben o pai a datra yepi di Vicky ben o kisi? Wi ati dyompo di wi yere taki wi ben abi fu pai 150.000 deutsche mark (a moni fu Doisrikondre), fu Vicky kisi datra yepi tu yari langa. Wi no ben abi pikinso fu a moni dati srefi, ma toku a ben de tumusi prenspari taki Vicky kisi datra yepi wantewante. Fu di wi ben gowe libi Sweden fu suku datra yepi na Doisrikondre, meki wi no ben abi reti fu kisi moni fu lanti gi datra yepi. So bun, a pikin meisje fu wi ben siki srefisrefi èn bun datra ben de klariklari fu yepi wi, ma wi no ben abi nofo moni.

Na ati-oso ben yepi wi. Den taigi wi taki wi ben kan kisi datra yepi wantewante efu wi ben o pai 20.000 mark na fesi. Ma wi ben musu poti wi nen leki dyaranti na tapu papira taki wi ben o pai a tra pisi fu a moni baka ten. Wi ben abi pikinso moni fu wisrefi, èn nanga a yepi fu wan tu mati nanga famiriman wi ben man pai den 20.000 mark. Ma fa wi ben o du nanga a tra pisi fu a moni?

Ete wan leisi wi ben si taki wi no ben de wi wawan na ini a feti fu wi gi a bribi. Wan brada fu wi na yeye fasi, di wi no ben sabi na a ten dati, ben wani teki a frantwortu na en tapu fu pai a tra pisi fu a moni. Ma a no ben de fanowdu fu wi gebroiki a moni di a ben wani gi wi, bika wi ben man seti wan tra sani.

Koni Datra E Du Bun Wroko

Den datra ben bigin nanga a chemotherapie. Dei nanga wiki pasa. Son leisi a ben muilek srefisrefi èn a ben tranga gi wi nanga a pikin meisje fu wi. Na a tra sei, wi ben breiti trutru èn wi ben de nanga tangi na ati, ibri leisi te wi ben si fa a ben go bun nanga en moro nanga moro. Den datra ben gi chemotherapie aiti mun langa. A sali fu Vicky ben doro 6, èn Datra Graf ben du san a ben pramisi.

Moro leki siksi yari pasa, èn a lasti leisi di datra ondrosuku a foktu na ini en bakabonyo, no wan-enkri sani sori moro taki a abi leukemie. A de wan koloku umapikin now nanga no wan-enkri  marki fu a siki. Iya, a gersi wan tumusi aparti sani taki Vicky kon betre dorodoro. Wi e erken taki furu pikin-nengre nanga a srefi siki e dede, awinsi den e kisi chemotherapie nanga brudutransfusie.

Wi wini a feti gi a bribi, ma wi no ben sa man du dati efu wi no ben kisi yepi fu wi famiriman, wi Kresten brada nanga sisa, èn so srefi fu den bun datra. A Ziekenhuisinformatiedienst ben horibaka gi wi dorodoro ibri dei. Datra Graf nanga den sma di ben wroko makandra nanga en, ben gebroiki a koni fu den fu yepi meki Vicky kon betre. Wi de nanga tangi na ati srefisrefi gi ala den sani disi.

A Bribi fu Wi Kon Tranga

Ma boiti ala sani, wi e taki wi Gado, Yehovah, tangi dati a sorgu wi na wan lobi-ati fasi èn taki wi kisi krakti fu en Wortu, Bijbel. Te wi e prakseri den sani di miti wi, dan wi e kon si o furu wi leri èn fa a hebi sani disi di wi ondrofeni na ini a libi, tranga a bribi fu wi.

Now a sani di wi wani du trutru, na fu tan abi wan bun banti nanga Yehovah Gado, èn fu leri na umapikin fu wi o warti a de fu libi akruderi den markitiki fu en. Iya, wi wani gi en wan warti yeye gudu fu têgo libi na ini a Paradijs di sa kon dyonsro dyaso na grontapu.—Wan sma seni na ondrofenitori disi kon gi wi.

[Futuwortu]