Kownukondre Preikiman E Fruteri

Den Puru a Syen Di Ben Tyari Kon Tapu Gado Nen

GADO Wortu, Bijbel, e taki: „Tan tyari unsrefi na wan bun fasi na mindri den nâsi, so taki ini den sani di den e taki fu unu leki unu na ogri sma, leki wan bakapisi fu den bun wroko fu unu, di den ben si nanga den eigi ai, den kan gi glori na Gado na a dei te a sa ondrosuku sani” (1 Petrus 2:12). Fu dati ede, tru Kresten e meki muiti fu tan tyari densrefi na wan bun fasi, so taki den no e tyari syen kon tapu Yehovah nen.

Na Senanga, wan farawe presi fu Sambia, wan sma ben fufuru a radio fu wan skoromeester na en oso. Fu di Yehovah Kotoigi ben e preiki na ini a gebied, meki a skoromeester ben taki dati na den fufuru en. A ben go piki skowtu, taki den Kotoigi ben kon fufuru a radio fu en. Fu buweisi taki den Kotoigi ben du dati, a ben langa wan traktaat gi den, di a ben feni na gron. Ma toku, den skowtu no ben wani bribi en. Den ben gi en a rai fu go ondrosuku a tori moro fini.

A skin fu owruman ben gi den Kotoigi di ben wroko a dei dati na ini a birti fu a skoromeester, a deki-ati fu go taki nanga en fu a tori. Wan tu fu den brada ben go taki nanga en èn fruteri en taki den wani puru a syen di ben tyari kon tapu Yehovah nen. Di den ben e taki, dan den taigi en taki den ben miti wan yonkuman na en oso èn taki den ben gi en wan traktaat. A skoromeester ben man sabi suma na a man, di den fruteri en fa a man tan. Fu taki en leti en nanga a man ben de fu a srefi kerki. A skoromeester ben taki nanga a yonkuman, ma a man ben taki dati a no tru. Dan a skoromeester ben taki nanga a papa nanga a mama fu a yonkuman èn a ben drai go baka na en oso. A no kisi wan yuru baka dati di a mama fu a yonkuman ben tyari a fufuru radio kon baka.

Fu di a skoromeester sari taki a ben taki na den Kotoigi du so wan sani, meki a go na a skin fu owruman èn aksi den pardon fu di a ben lei gi den. Den owruman ben taki dati den ben kaba nanga a tori, ma den ben wani taki a ben musu meki bekènti na publiki san ben de a tru tori so taki ibriwan sma ben o sabi taki den Kotoigi no du noti. Den ben meki dati bekènti na skoro, èn na so wan fasi a syen di a ben tyari kon tapu Yehovah nen ben puru. Yehovah Kotoigi man tan preiki fri na a kontren dati.

[Karta na tapu bladzijde 19]

(Efu yu wani si pe den sani disi skrifi, luku a tijdschrift)

AFRIKA

Sambia

[Sma di abi a reti fu a karta]

Mountain High Maps® Copyright © 1997 Digital Wisdom, Inc.