Tan Hori Yu Prisiri na ini a Diniwroko fu Yehovah
Tan Hori Yu Prisiri na ini a Diniwroko fu Yehovah
„Abi prisiri na ini Masra ala ten. Ete wan leisi mi sa taki: Abi prisiri!”—FILIPISMA 4:4.
1, 2. Fa wan brada nanga en osofamiri ben man tan hori a prisiri fu den, ala di den ben lasi ala san den ben abi?
JAMES na wan Kresten di abi 70 yari, èn a e libi na ini Sièra Leon. A man disi ben wroko tranga en heri libi langa. Prakseri fa a ben prisiri di a ben poti nofo moni na wan sei te fu kaba, fu bai wan pikin oso nanga fo kamra! Ma wan pisi ten baka di James nanga en osofamiri go tan na ini na oso, wan borgu orloku broko na ini a kondre dati, èn a heri oso fu den bron. Den lasi na oso fu den, ma den no lasi den prisiri. Fu san ede dati no pasa?
2 James nanga en osofamiri no ben poti den prakseri na den sani di den ben lasi, ma na den sani di den ben abi ete. James e fruklari: „Srefi na a ten di so furu takru sani ben e pasa, wi ben e hori konmakandra, wi ben e leisi Bijbel, wi ben e begi nanga makandra, èn wi ben e prati a pikinso di wi ben abi nanga trawan. Wi ben man tan nanga prisiri fu di wi ben poti prakseri na a tumusi moi matifasi di wi abi nanga Yehovah.” Fu di den getrow Kresten disi ben poti prakseri na den blesi di den ben abi, meki den ben man „tan prisiri”. Èn a moro bun wan fu den blesi fu den, na a krosibei matifasi di iniwan fu den ben abi nanga Yehovah (2 Korentesma 13:11). A tru taki a no ben de wan makriki sani gi den fu horidoro na ten fu banawtu. Ma den no tapu fu abi prisiri na ini Yehovah.
3. Fa wan tu fositen Kresten ben man tan nanga prisiri?
3 Den fositen Kresten ben kisi den srefi sortu tesi di James nanga en osofamiri ben kisi. Ma na apostel Paulus ben skrifi den wortu disi gi den Hebrew Kresten: „Nanga prisiri so srefi unu ben teki a fufuru di sma fufuru den gudu fu unu.” Baka dati Paulus ben fruklari fu san ede den ben prisiri: „Fu di unu ben sabi taki unu abi wan moro bun gudu di e tan fu ala ten” (Hebrewsma 10:34). Iya, den Kresten dati fu a fosi yarihondro ben abi wan tranga howpu. Den ben frutrow na tapu taki den ben o kisi wan sani di no wan sma ben o man fufuru — a „kownu-ati fu libi” di no e kisi pori, na ini a hemel Kownukondre fu Gado (Openbaring 2:10). Na ini a ten disi, a Kresten howpu fu wi — efu na wan howpu fu libi na hemel noso na grontapu — kan yepi wi fu tan nanga prisiri srefi te wi e kisi fu du nanga muilek situwâsi.
„Prisiri na ini a Howpu”
4, 5. (a) Fu san ede a rai di Paulus ben gi fu „prisiri na ini a howpu”, ben kon na a yoisti ten gi den Romesma? (b) Sortu sani kan meki taki wan Kresten e frigiti a howpu fu en?
4 Na apostel Paulus ben gi en Kresten brada nanga sisa deki-ati fu „prisiri na ini a howpu” fu têgo libi (Romesma 12:12). Den Romesma ben kisi a rai disi na a yoisti ten. A no ben doro tin yari baka di Paulus ben skrifi den, taki den kisi bun hebi frufolgu, èn Kèiser Nero ben meki sma fon wan tu fu den kiri. A bribi fu den taki den ben o kisi a kownu-ati fu libi di Gado ben pramisi den, seiker ben yepi den di den ben pina. Fa a de nanga wi na ini a ten disi?
5 Leki Kresten, wi tu e fruwakti taki sma sa frufolgu wi (2 Timoteus 3:12). Moro fara, wi sabi taki „ten nanga sani di e pasa” e miti wi alamala (Preikiman 9:11). Wan lobiwan fu wi kan dede fu di a e kisi wan mankeri. Wan takru siki kan kiri wan papa noso mama noso wan bun mati. Efu wi no e hori a Kownukondre howpu fu wi krinkrin na prakseri, dan wi kan de na ini problema na yeye fasi, te den sortu tesi disi e miti wi. So srefi a bun te wi e aksi wisrefi, ’Mi e „prisiri na ini a howpu”? Mi abi a gwenti fu denki dipi fu a howpu disi? Mi e bribi taki a Paradijs sa kon trutru? Mi e si misrefi drape kaba? Mi e fruwakti a kaba fu a seti fu sani disi nanga a srefi faya di mi ben abi di mi kon leri sabi a waarheid?’ Wi musu poti seryusu prakseri na a lasti aksi disi. Fu san ede? Bika wi kan lasi na ai o prenspari a de taki a nyun grontapu fu Gado e kon. A sani disi kan pasa te — awansi fu wan syatu pisi ten — wi abi wan bun gosontu, wi abi nofo moni fu bai den sani di wi wani, èn wi e libi na wan presi na grontapu pe feti no de furu, pe sma no e pina fu angri, èn pe rampu fu a naturu no e pasa.
6. (a) Na san Paulus nanga Silas ben poti prakseri di den ben de na ini banawtu? (b) Fa na eksempre fu Paulus nanga Silas e gi wi deki-ati na ini a ten disi?
6 Paulus taigi den Romesma moro fara fu „tan frudrage banawtu” (Romesma 12:12). Paulus srefi ben de na ini banawtu. Wan leisi a ben kisi wan fisyun taki wan man e kari en fu „abra kon na Masedonia” fu yepi sma drape fu kon sabi Yehovah (Tori fu den Apostel 16:9). A sani disi meki taki Paulus, makandra nanga Lukas, Silas, nanga Timoteus, teki sipi go na Europa. San ben wakti den fayafaya zendeling dati? Banawtu! Baka di den ben preiki na ini a foto Filipi na ini Masedonia, dan sma fon Paulus nanga Silas èn poti den na strafu-oso. A krin fu si taki a no ben de so nomo taki wan tu fu den sma fu Filipi no ben broko den ede nanga a Kownukondre boskopu, ma a ben de so taki den ben gens a boskopu na wan takru-ati fasi. A sani disi ben meki den fayafaya zendeling lasi a prisiri fu den? Nôno. Baka di sma ben fon den èn ben poti den na strafu-oso, dan „na mindrineti so, Paulus nanga Silas ben e begi èn ben e prèise Gado nanga singi” (Tori fu den Apostel 16:25, 26). A tru taki a skin-ati di Paulus nanga Silas ben kisi no ben de wan prisiri sani gi den, ma den tu zendeling no ben poti prakseri na a sani dati. Den ben poti den prakseri na Yehovah èn na a fasi fa a ben blesi den. Fu di Paulus nanga Silas ben ’tan frudrage banawtu’ nanga prisiri, dati meki den gi den brada fu den na ini Filipi nanga tra presi, wan bun eksempre.
7. Fu san ede wi musu taki Yehovah tangi te wi e begi en?
7 Paulus ben skrifi: „Horidoro na ini begi” (Romesma 12:12). Yu e begi Gado te wan sani e gi yu broko-ede? Fu sortu sani yu e begi? A sa de so taki yu e taki soifri san e moro yu èn taki yu e aksi Yehovah fu yepi yu. Ma yu kan taki Yehovah tangi so srefi fu den blesi di yu kisi. Te problema miti wi, dan wi musu prakseri a bun fasi fa Yehovah e handri nanga wi, èn dati sa yepi wi fu „prisiri na ini a howpu”. David di ben miti nanga furu problema, ben skrifi: „Furu sani yusrefi du, o Yehovah, mi Gado, srefi den wondruwroko fu yu èn den prakseri fu yu gi wi; no wan sma de di kan de leki yu. Te mi ben sa wani fu fruteri èn taki fu den, den tron kefalek furu, moro leki mi man fruteri” (Psalm 40:5). Efu neleki David, wi e denki dipi doronomo fu den blesi di Yehovah e gi wi, dan seiker wi sa de nanga prisiri.
Tan Denki Bun fu Sani
8. San e yepi wan Kresten fu tan nanga prisiri te a e ondrofeni frufolgu?
8 Yesus e gi den futuboi fu en deki-ati fu denki bun fu sani te difrenti tesi e miti den. A e taki: „Koloku fu unu te sma e skempi unu èn e frufolgu unu èn na wan lei fasi e taki ala sortu ogri sani fu unu, fu mi ede” (Mateus 5:11). Sortu reide wi abi fu de koloku te wi de na ini den sortu situwâsi dati? A kakafutu di wi man kakafutu te trawan e gens wi, na wan buweisi taki a yeye fu Yehovah de na wi tapu. Na apostel Petrus ben taigi den Kresten brada nanga sisa di ben libi na a ten fu en: „Efu unu e kisi syen fu a nen fu Krestes ede, dan unu de koloku, bika a yeye fu glori, srefi a yeye fu Gado, e rostu na un tapu” (1 Petrus 4:13, 14). Yehovah sa gebroiki a yeye disi tu fu yepi wi fu horidoro, èn leki bakapisi fu dati, wi sa tan nanga prisiri.
9. San yepi wan tu brada fu feni reide fu de nanga prisiri na a ten di den ben de na strafu-oso fu a bribi fu den ede?
9 Srefi te wi de na ini a moro takru situwâsi, wi kan feni reide fu prisiri. Wan Kresten di nen Adolf ondrofeni dati. A e libi na ini wan kondre pe a wroko fu Yehovah Kotoigi ben tapu furu yari langa. Fu di Adolf nanga wan tu fu den mati fu en no ben wani kenki a bribi fu den di de akruderi Bijbel, dan lanti grabu den èn poti den na strafu-oso. A libi na strafu-oso no ben makriki, ma neleki Paulus nanga Silas, Adolf nanga den kompe fu en ben feni reide fu gi Gado tangi. Den skrifi taki den sani di den ondrofeni na strafu-oso yepi den fu kisi wan moro tranga bribi èn fu kweki warti Kresten eigifasi. Den leri fu gi trawan sani, fu firi gi trawan, èn fu lobi makandra. Fu gi wan eksempre, te wan fu den brada noso sisa di ben de na strafu-oso ben kisi wan sani fu en famiri na oso, dan a ben prati a sani dati nanga den tra Kresten. Den brada nanga sisa ben si den sani disi di den ben kisi fu famiriman, leki sani di ben komopo fu Yehovah, a Sma di te fu kaba e gi „ibri bun presenti nanga ibri volmaakti presenti”. Den bun sani disi di den brada ben du e gi prisiri na a sma di e gi èn so srefi na den sma di e kisi. So bun, fu taki en leti, a srefi ondrofeni di ben musu swaki a bribi fu den, ben meki den kisi moro krakti na yeye fasi!—Yakobus 1:17; Tori fu den Apostel 20:35.
10, 11. Fa wan sisa ben handri di sma ben dwengi en doronomo fu piki ala sortu aksi, èn san a ben du di a ben kisi so furu yari langa strafu-oso baka dati?
10 Skowtu ben hori Ella di e libi so srefi na ini wan kondre pe a Kownukondrewroko ben tapu wan heri pisi ten, di a ben prati a Kresten howpu fu en nanga trawan. Aiti mun langa, sma ben dwengi en doronomo fu piki ala sortu aksi. Te fu kaba, di den tyari Ella go na krutu, den gi en wan strafu fu tin yari èn den poti en na ini wan strafu-oso pe no wan tra anbegiman fu Yehovah ben de. Na a ten dati Ella ben abi 24 yari nomo.
11 A tru taki Ella no ben wani srefisrefi fu de na strafu-oso a moro bigi pisi ten fu den yari di a ben de wan yongu uma. Ma fu di a no ben man kenki a situwâsi fu en, dan a bosroiti fu denki tra fasi. Na so a bigin si a strafu-oso leki en eigi gebied pe a ben kan preiki. „Someni sma ben de di ben musu yere a nyunsu”, a e taki „dati den yari lon pasa heri esi”. Baka moro leki feifi yari, den dwengi Ella baka fu piki ala sortu aksi. Di den man di ben poti den aksi gi Ella kon si taki a bribi fu en no ben kon swaki fu di a ben de na strafu-oso, dan den taigi en „Wi no kan lusu yu; yu no kenki”. „Ma mi kenki trutru!” Ella piki den nanga wan krakti sten. „Mi e si sani na wan moro bun fasi now leki di mi kon na strafu na ini a bigin, èn mi abi wan moro tranga bribi leki bifo! Èn a taki moro fara: „Efu unu no wani lusu mi, dan mi sa tan dyaso te leki Yehovah feni en bun fu lusu mi.” Den feifi nanga afu yari di Ella ben de na strafu-oso, no ben pori en prisiri! A leri fu de tevrede nanga iniwan situwâsi di a ben de na ini. Yu kan leri wan sani fu na eksempre fu en?—Hebrewsma 13:5.
12. San kan gi wan Kresten wan korostu firi te a de na ini wan muilek situwâsi?
12 No denki taki Ella abi wan aparti krakti di e yepi en fu kakafutu gi den sortu tyalensi dati. Ella e taki fu a pisi ten di den ben dwengi en fu piki ala sortu aksi bifo a ben go na strafu-oso. A e erken: „Mi e memre taki mi ben senwe sote taki den tifi fu mi ben e naki tapu makandra, èn mi ben e frede leki wan pikin fowru.” Ma Ella abi wan tranga bribi na ini Yehovah. A leri fu frutrow na en tapu (Odo 3:5-7). Leki wan bakapisi fu dati, a kisi wan moro krosibei matifasi nanga Gado. A e fruklari: „Ibri leisi di mi ben waka go na ini a kamra pe den ben e dwengi mi fu gi piki tapu aksi, mi ben kisi wan korostu firi. . . . O moro a situwâsi ben e gi mi frede, o moro korostu mi ben e firi.” Na Yehovah ben gi mi a korostu firi dati. Na apostel Paulus e fruklari: „No broko unu ede nanga no wan sani, ma na ini ibriwan sani, meki Gado kon sabi san unu wani fu di unu e begi èn e aksi en tangitangi ala di unu e taigi en grantangi tu; èn a vrede fu Gado, di pasa ala suma frustan, sa kibri un ati nanga un prakseri na ini Krestes Yesus.”—Filipisma 4:6, 7.
13. San e gi wi a dyaranti taki wi sa abi a krakti fu horidoro te wi e ondrofeni banawtu?
13 Ella di no de na strafu-oso moro, ben man tan nanga prisiri ala di problema miti en. A no du dati nanga en eigi krakti, ma nanga a krakti di Yehovah ben gi en. A ben de so tu nanga na apostel Paulus, di ben skrifi: „Fu dati ede, mi sa breiti fu taki bigi fu den swakifasi fu mi, taki a krakti fu a Krestes sa tan na mi tapu leki wan tenti. . . . Bika te mi swaki dan mi tranga”.—2 Korentesma 12:9, 10.
14. Fruklari pikinso fa wan Kresten kan denki bun fu wan situwâsi di de wan tesi gi en, èn san kan de a bakapisi fu dati.
14 Den problema di e miti yu na ini a ten disi kande e difrenti pikinso fu den wan di tyari kon na fesi ini na artikel disi. Ma awansi sortu problema yu abi, a no de wan makriki sani fu kakafutu te wi e kisi druk. Fu gi wan eksempre, kande a wrokobasi fu yu e luku a wroko fu yu tumusi fini — moro fini leki fa a e luku a wroko fu den wrokoman di abi tra bribi. Kande yu no man suku tra wroko. Fa yu kan tan nanga prisiri? Memre Adolf nanga den kompe fu en di ben kweki prenspari eigifasi na a ten di den ben de na strafu-oso. Efu yu du bun furu muiti fu meki yu wrokobasi de tevrede — srefi efu a de wan sma di „no de tevrede heri esi” — dan yu sa kweki den Kresten eigifasi soleki a hori di sma e hori doro èn so srefi langa pasensi (1 Petrus 2:18). Moro fara, kande yu sa tron wan moro warti wrokoman gi yu wrokobasi, èn dati kan gi yu moro okasi fu feni wan moro betre wroko baka ten. Meki wi luku tra fasi now fa wi kan tan nanga prisiri na ini a diniwroko fu Yehovah.
Yu E Kisi Prisiri te Yu Abi wan Moro Sempel Libi
15-17. San wan trowpaar si leki wan yepi fu puru broko-ede, ala di a sani dati no e puru ala broko-ede di de?
15 Kande yu no man yepi taki yu e du wan spesrutu sortu grontapu wroko noso taki yu e wroko na wan spesrutu presi, ma tra sani kan de na ini yu libi, di yu kan basi pikinso. Luku na ondrofenitori di e kon now.
16 Wan Kresten trowpaar ben kari wan owruman fu kon nyan na den oso. Na neti ten di na owruman ben de drape, a brada nanga en wefi taigi en taki den dei disi a libi ben kon moro hebi gi den. Ala di den ala tu ben abi wan wroko di e teki furu fu a ten nanga krakti fu den, toku den no ben man suku wan tra wroko. Den ben aksi densrefi o langa den ben o man teki a situwâsi disi.
17 Di den aksi na owruman rai, a taigi den, „Abi wan moro sempel libi”. Fa den ben kan du dati? Fu go na a wroko fu den ala dei a ben teki a masra nanga en wefi dri yuru go-kon. Na owruman di ben sabi a trowpaar bun, taigi den fu prakseri fu froisi go tan moro krosibei fu a presi pe den ben e wroko. Na so fasi den ben o man gebroiki moro mendri ten ibri dei fu go na a wrokope fu den èn fu drai go baka na oso. Den ben kan gebroiki a ten di ben tan abra fu du tra prenspari sani — noso fu teki rostu. Te den hebi fu a libi e meki yu lasi yu prisiri, dan fu san ede yu no e luku efu yu kan feni frulekti, fu di yu e tyari wan tu kenki kon?
18. Fu san ede a prenspari fu prakseri bun bifo wi teki wan bosroiti?
18 Wan tra fasi fu no abi so furu broko-ede, na fu prakseri bun bifo yu teki bosroiti. Fu gi wan eksempre, wan Kresten ben bosroiti fu bow wan oso. Ala di noiti bifo a ben bow wan oso, toku a ben teki wan muilek model oso fu bow. Now a kon si taki a no ben abi fu kisi wan tu fu den broko-ede efu a ben ’luku pe a e poti en futu’ (Odo 14:15). Wan tra Kresten ben agri fu tron borgu gi wan Kresten brada di ben wani leni moni. Soleki fa den ben agri, a sma di ben de borgu ben sa musu pai a moni efu a sma di ben leni en no ben o man pai a moni moro. Ala sani ben waka bun na ini a bigin, ma baka wan pisi ten, a man di ben leni a moni no ben wani pai moro. A sma di ben leni en a moni kon si dati èn a taigi a borguman fu pai en ala moni baka. A sani dati ben de wan bigi hebi gi a borguman. A borguman ben kan wai pasi gi den problema disi efu a ben poti moro bun prakseri na ala den sani di ben abi fu du nanga a tori, bifo a ben agri fu teki frantwortu fu a moni di en mati ben leni?—Odo 17:18.
19. San na wan tu fasi fa wi no abi fu kisi so furu broko-ede na ini wi libi?
19 Te wi e kon weri, meki wi no denki noiti taki wi kan puru a hebi di de na wi tapu èn na so fasi kisi wi prisiri baka, fu di wi no e studeri Bijbel so furu moro, fu di wi no e preiki so furu moro, èn fu di wi no e go na den konmakandra so furu muru. Wi no musu du dati srefisrefi, fu di den sani disi na den moro prenspari sani di wi musu du fu kisi a santa yeye fu Yehovah, èn prisiri na wan fu den froktu fu a santa yeye (Galasiasma 5:22). Den Kresten wroko disi ala ten e gi wi nyun krakti èn moro furu a no de so taki wi e kon weri tumusi te wi e du den (Mateus 11:28-30). A tyans moro bigi taki den grontapu wroko fu wi noso den sani di wi e du fu kisi prisiri, èn no den yeye afersi, e meki taki wi e kon weri moro furu. Te wi no e go sribi tumusi lati, dan dati sa yepi wi fu kisi wisrefi baka. Te wi e teki pikinso moro rostu, dan dati kan de wan bigi yepi. Brada N. H. Knorr, di ben dini leki wan memre fu a Tiri Skin fu Yehovah Kotoigi te leki a dede, ben gwenti fu taigi zendeling: „Te yu firi brokosaka, dan a fosi sani di yu musu du, na fu teki pikin rostu. Yu sa fruwondru fu si taki sani no sa sori fu de so muilek moro, baka te yu sribi bun na neti!”
20. (a) Taki syatu fu den fasi fa wi kan tan nanga prisiri. (b) Sortu reide wi abi fu de nanga prisiri? (Luku a faki tapu bladzijde 17.)
20 Kresten abi a grani fu dini „a koloku Gado” (1 Timoteus 1:11). Soleki fa wi si, wi kan tan nanga prisiri srefi te wi abi seryusu problema. Meki wi hori a Kownukondre howpu na wi fesi, meki wi kenki a fasi fa wi e si sani te dati de fanowdu, èn meki wi no teki tumusi furu hebi na wi tapu. Te wi du dati, dan awansi sortu situwâsi kon miti wi, wi sa handri akruderi den wortu fu Paulus: „Abi prisiri na ini Masra ala ten. Ete wan leisi mi sa taki: Abi prisiri!”—Filipisma 4:4.
Poti Bun Prakseri na den Aksi Disi:
• Fu san ede Kresten musu hori a Kownukondre howpu bun na prakseri?
• San kan yepi wi fu tan nanga prisiri na ini muilek situwâsi?
• Fu san ede wi musu pruberi fu meki wi libi kon moro sempel?
• Fa son sma meki den libi kon moro sempel?
[Aksi fu a tori disi]
[Faki/Prenki na tapu bladzijde 17]
Moro Reide fu De Nanga Prisiri:
Leki Kresten wi abi furu reide fu de nanga prisiri. Luku den sani di e kon now:
1. Wi sabi Yehovah.
2. Wi kon sabi a waarheid fu a Wortu fu Gado.
3. Wi kan kisi pardon fu den sondu fu wi nanga yepi fu a bribi di wi abi na ini a srakti- ofrandi fu Yesus.
4. A Kownukondre fu Gado e tiri nownowde — heri esi a nyun grontapu sa de dyaso!
5. Yehovah tyari wi go na ini wan paradijs na yeye fasi.
6. Wi abi bun Kresten demakandra.
7. Wi abi a grani fu teki prati na a preikiwroko.
8. Wi de na libi, èn wi alamala abi nofo krakti.
Omeni tra reide fu de nanga prisiri yu kan kari?
[Prenki na tapu bladzijde 13]
Srefi na strafu-oso Paulus nanga Silas ben de nanga prisiri
[Prenki na tapu bladzijde 15]
Yu poti prakseri na a nyun grontapu fu Gado, wan sani di e gi fu prisiri?