Fa Yu Kan Abi wan Yoisti Denki fu Moni?

A no tide libisma lobi moni nanga materia sani; èn a no de so tu taki Bijbel no e taki fu den sani disi fu di a sani disi na wan nyun problema. Lobi gi moni nanga materia gudu na sani di de bun langa kaba. Na ini a Wet fu Moses, Gado ben taigi den Israèlsma: „Yu no musu abi tranga lobi gi na oso fu wan tra sma . . . noso gi iniwan sani di de fu wan tra sma.”—Exodus 20:17.

FURU sma ben lobi moni nanga gudu na ini a ten di Yesus ben de na grontapu. Luku san Yesus ben taigi wan yonkuman di ben „gudu srefisrefi”: „A taigi en: ’Wan sani de ete di yu e mankeri: Seri ala den sani di yu abi èn prati gi den pôti sma, èn yu sa abi gudu na ini hemel; èn kon tron mi bakaman.’ Di a yere disi, a ben sari srefisrefi, bika a ben abi furu gudu.”—Lukas 18:18-23.

Wan Yoisti Denki fu Moni

Toku, a no ben o bun fu taki dati Bijbel e taki takru fu moni èn fu iniwan sani di wi kan du nanga en. Bijbel e sori taki moni e sorgu dati sma no e kon pôti èn taki den no e kisi tra problema di abi fu du nanga pôtifasi. Moni e yepi sma so srefi fu bai den sani di den abi fanowdu. Kownu Salomo ben skrifi: „Koni na wan sani di e kibri sma neleki fa moni e kibri sma.” Èn a ben taki so srefi: „Brede na fu meki den wrokoman lafu, èn win srefi e meki a libi prisiri; ma moni na san e teri na ini ala sani.”—Preikiman 7:12; 10:19.

Te wi e gebroiki moni na a yoisti fasi, dan Gado e feni dati bun. Fu gi wan eksempre, Yesus ben taki: „Meki mati gi unsrefi nanga yepi fu onregtfardiki gudu” (Lukas 16:19). Disi wani taki dati wi kan gi moni leki bijdrage fu horibaka gi a tru anbegi fu Gado, bika a no de fu taki dati wi wani Gado leki wi Mati. Salomo srefi, di ben waka baka na eksempre fu en papa David, ben gi furu moni nanga gudu leki bijdrage fu yepi bow a tempel fu Yehovah. Wan tra komando di Kresten kisi, na fu yepi den pôtiwan nanga materia sani. „Gi den santawan akruderi san den abi fanowdu”, na apostel Paulus ben taki. A ben taki go moro fara: „Kari sma kon na ini yu oso nanga prisiri” (Romesma 12:13). A sani disi furutron e meki taki wi musu gebroiki pikinso fu a moni di wi abi. Ma fa a de nanga a lobi di sma abi gi moni?

’A Lobi gi Solfru’

Paulus ben taki finifini fu „a lobi gi moni” — noso fu taki en leki fa a de, „lobi gi solfru” — di a ben skrifi Timoteus, wan tra Kresten di ben yongu moro en. Wi kan leisi a frumane disi fu Paulus na 1 Timoteus 6:6-19. A ben taki fu „a lobi gi moni” di a ben taki finifini fu materia sani. Fu di a libimakandra na ini a ten disi e si moni leki so wan prenspari sani, dan a bun taki wi e studeri den sani di Paulus taki finifini nanga yepi fu a yeye fu Gado. So wan ondrosuku seiker sa tyari winimarki kon, fu di a sa leri wi fa wi kan „hori a trutru libi steifi”.

Paulus e warskow: „A lobi gi moni na wan rutu fu ala sortu takru sani, èn fu di sonwan e feti na baka a lobi disi, meki den gowe libi a bribi èn den sutu densrefi na den heri skin nanga furu pen” (1 Timoteus 6:10). A vers disi no taki dati moni srefi takru — èn no wan enkri tra vers ini Bijbel e taki dati tu. Na apostel no e taki tu dati moni na a moro prenspari reide fu san ede „takru sani” e pasa, noso taki moni na a rutu fu ibri problema. Na presi fu dati, a lobi di sma abi gi moni kan sorgu taki ala sortu „takru sani” e pasa, awansi a de  so taki tra reide de tu fu san ede den sani disi e pasa.

Kibri Yusrefi gi Gridifasi

Ala di den Buku fu Bijbel no e taki takru fu moni srefi, toku wi musu poti prakseri na a krinkrin warskow fu Paulus. Kresten di e bigin lobi moni kan kisi ala sortu problema, èn a moro bigi wan fu den problema disi na te wan sma e gowe libi a bribi. A sani di Paulus ben taigi den Kresten na ini Kolosse, e sori o tru a sani disi de. A ben taigi den: „Kiri fu dati ede, den memre fu un skin di de na grontapu ini a tori fu . . . ogri lostu, nanga bigi-ai, di de a dini fu kruktu gado” (Kolosesma 3:5). Fa bigi-ai, gridi, noso „lobi gi moni” na a srefi leki a dini fu kruktu gado? A sani disi wani taki dati a no bun fu wani wan moro bigi oso, wan moro moi oto, noso wan moro bun wroko? Nôno, efu yu luku en bun, dan no wan fu den sani disi na takru sani. Ma wi musu aksi wisrefi: Fu san ede mi wani den sani disi trutru, èn a de so taki mi abi den trutru fanowdu?

A difrenti na mindri a wani di wan sma wani wan sani èn a gridi di wan sma gridi fu kisi wan sani, na a srefi leki a difrenti na mindri wan pikin faya di e bori nyanyan èn a bun bigi faya di e bron wan heri bigi busi. A bun reide di wi abi fu wani wan sani kan de wan yepi gi wi. A e meki taki wi e wroko èn taki wi e doro den marki di wi poti. A e gi wi deki-ati fu wroko èn fu du bun sani. Odo 16:26 e taki: „A sili fu wan wrokoman di e wroko tranga du tranga wroko gi en, bika en mofo trutru dwengi en fu du dati.” Ma gridifasi na wan kefalek sani èn a e tyari pori kon. Te wi gridi dan dati wani taki dati wi no e basi den firi fu wi moro.

A moro bigi problema di wi alamala abi, na fu sorgu taki wi no e tron gridi sma. A de so taki ala a moni di wi meki noso den materia sani di wi wani, na sani di wi abi trutru fanowdu, noso a de so taki wi sa tron srafu fu moni fu di wi wani den sani disi? Fu dati ede Paulus e taki dati wan „gridi sma . . . na wan anbegiman fu kruktu gado (Efeisesma 5:5). Te wi gridi fu kisi noso fu abi wan sani, dan dati trutru wani taki dati wi e gi wisrefi abra na a sani dati — fu taki en leti, wi e meki a sani dati tron wi masra, wi gado, a sani di wi e dini. Kontrari fu dati, Gado e taki nanga tranga: „Yu no musu abi no wan tra gado teige mi.”—Exodus 20:3.

Te wi gridi dan dati e sori tu taki wi no abi a frutrow taki Gado sa gi wi san wi abi fanowdu, soleki fa a ben pramisi (Mateus 6:33). Fu dati ede, te wi gridi, dan wi e drai wi baka gi Gado, fu taki en leti. Te wi e luku en so, dan disi na „a anbegi fu kruktu gado” so srefi. Fu dati ede a no musu fruwondru wi taki Paulus e warskow wi krinkrin fu kibri wisrefi gi gridifasi!

Yesus ben warskow wi krinkrin so srefi fu kibri wisrefi gi gridifasi. A komanderi wi fu luku bun taki wi no e angri tumusi gi wan sani di wi no abi: „Luku bun èn kibri unsrefi gi ibri sortu bigi-ai, bika srefi te wan sma abi sani pasa marki, a libi fu èn no e kon fu den sani di a abi” (Lukas 12:15). Soleki fa a syatu pisi tori disi èn so srefi na agersitori di Yesus e gi baka dati, e sori, dan a de so taki wan gridi sma abi a don bribi taki den sani di a abi na den moro prenspari sani na ini a libi. A kan de moni, wan bun posisi, makti, noso tra sani di abi fu du nanga den sani disi. Wan sma kan abi gridi gi iniwan sani di de fu kisi. A sma dati e denki kande, taki wi sa de tevrede efu wi abi a sani dati nomo. Ma soleki fa Bijbel nanga ondrofenitori fu libisma e sori, dan a de soleki fa Yesus ben rideneri nanga den bakaman fu en, taki Gado wawan kan gi wi den sani di wi abi trutru fanowdu, èn Gado wawan sa gi wi den sani disi.—Lukas 12:22-31.

Na libimakandra na ini a ten disi e seri èn so srefi e bai someni sani, taki sma e kon gridi leki noiti bifo. Fu di furu sma no e si wantronso sortu bigi krakti a libimakandra abi na den tapu, dan den e bribi taki awansi san den abi no sari. Den abi moro sani fanowdu, den wani moro bigi èn moro bun sani. Ala di wi sabi taki wi no sa man kenki a grontapu na wi lontu, toku fa wi kan kakafutu gi a sani disi di e pasa nanga so furu sma?

Na a Wan Sei Tevredefasi èn na a Tra Sei Gridifasi

Paulus e sori wi wan tra eigifasi di wi kan abi na presi fu gridifasi, èn dati na tevredefasi. A e taki: „So bun, te wi abi nyanyan, krosi nanga wan presi fu tan, dan wi sa de tevrede nanga den sani disi” (1 Timoteus 6:8). A fruklari disi di e sori san na den sani di wi abi trutru fanowdu — „nyanyan, krosi nanga wan presi fu tan” — kande e taki a sani tumusi makriki leki fa a de. Furu sma lobi luku telefisi programa pe den e si pôpi sma di e libi na ini  moi oso di abi ala sani na ini. A sani disi no e meki taki sma kisi tevredefasi.

A no de fu taki, dati futuboi fu Gado no abi fu libi na ini pôtifasi (Odo 30:8, 9). Ma Paulus e memre wi san trutru na pôtifasi: te wi no abi nyanyan, krosi, nanga tanpresi di bun nofo so taki wan sma kan tan na ini. Na a tra sei, efu wi abi den sani dati, dan wi kan de tevrede.

Paulus ben kan de seryusu di a taki na so wan fasi fu tevredefasi? A de trutru so taki wi kan de tevrede nanga soso den moro prenspari sani — nyanyan, krosi, nanga tanpresi? Paulus ben musu fu sabi efu dati de so. Ensrefi ben gudu èn a ben kisi spesrutu wini fu di a ben de wan heiman na ini a libimakandra fu den Dyu èn fu di a ben de wan borgu fu Rome (Tori fu den Apostel 22:28; 23:6; Filipisma 3:5). Paulus ben ondrofeni furu problema so srefi di a ben wroko leki zendeling (2 Korentesma 11:23-28). Ala den sani disi ben leri en wan kibritori di ben yepi en fu tan abi tevredefasi. San ben de a sani di a ben leri?

„Mi Leri a Kibritori”

Paulus ben fruklari na ini wán fu den brifi fu en: „Fu tru mi sabi san a wani taki fu no abi furu sani, fu tru mi sabi san a wani taki fu abi sani pasa marki. Na ini ala situwâsi mi leri a kibritori fu ala tu: fu nyan te a sari mi èn fu abi angri, fu abi sani pasa marki èn fu mankeri sani” (Filipisma 4:12). Paulus e taki a sani disi nanga ala frutrow! Wi kan denki makriki taki a ben libi wan switi libi na a ten di a ben skrifi den sani disi, ma dati no ben de so. A ben de na strafu-oso na Rome!—Filipisma 1:12-14.

Te wi hori na prakseri taki a ben de na strafu-oso, dan den wortu disi e taigi wi na wan krakti fasi taki wi no musu de tevrede nanga materia sani wawan, ma so srefi nanga situwâsi di wi de na ini. Tumusi furu gudu noso tumusi furu problema kan meki taki wi e lasi den moro prenspari sani na ai. Paulus ben taki fu yeye gudu di ben meki taki a ben kan de tevrede, awansi fa a situwâsi fu en ben de na materia sei: „Gi ala sani mi abi a tranga fu [Gado] di e gi mi krakti” (Filipisma 4:13). Awansi Paulus ben abi furu sani noso no ben abi furu sani, noso awansi sortu situwâsi a ben de na ini, a no ben frutrow tapu den sani disi. Na presi fu dati a ben frutrow na tapu taki Yehovah ben o sorgu gi den sani di a ben abi fanowdu. Leki bakapisi fu dati, Paulus ben abi tevredefasi.

Na eksempre fu Paulus ben de spesrutu prenspari gi Timoteus. Na apostel ben gi a yonkuman dati deki-ati fu gi ensrefi fu dini Gado èn fu abi wan krosibei matifasi nanga en, na presi taki a ben suku fu kon gudu. Paulus ben taki: „Ma yu, o man fu Gado, lon gi den sani disi. Ma suku regtfardikifasi, suku fu gi yusrefi na ini a dini fu Gado, suku bribi, suku lobi, suku fu horidoro, èn suku fu abi safri-atifasi” (1 Timoteus 6:11). Ala di a de so taki den wortu disi ben de gi Timoteus, toku den e fiti iniwan sma di wani gi Gado grani èn di wani abi wan trutru koloku libi.

Neleki iniwan tra Kresten, Timoteus ben musu luku bun tu fu no tron wan gridi sma. Soleki fa a sori, gudu Kresten ben de na ini a gemeente na ini Efeise, èn na drape Timoteus ben de di Paulus  ben skrifi wan brifi gi en ((1 Timoteus 1:3). Paulus ben go na ini a foto disi di ben lai nanga gudu sma di ben du bisnis. Paulus go preiki a bun nyunsu fu Krestes na den sma disi, èn a bakapisi ben de taki furu fu den sma disi tron Kresten. A ben musu de so taki wan tu fu den Kresten disi ben de gudu sma, soleki fa a de nanga wan tu sma na ini den Kresten gemeente na ini a ten disi.

Te wi e luku a sani di 1 Timoteus 6:6-10 e leri wi, dan wi musu aksi wisrefi: San gudu sma musu du efu den wani gi Gado grani? Paulus e taki dati den sma disi musu bigin ondrosuku a fasi fu denki di den abi. Te sma gudu dan moro furu den e prakseri taki den no abi trawan fanowdu. Paulus e taki: „Komanderi den wan di gudu na ini a disiten seti fu sani fu no abi heimemre, èn fu no poti a howpu fu den tapu gudu di no e gi seikerfasi, ma tapu Gado di e gi wi ala sani bogobogo fu prisiri fu den” (1 Timoteus 6:17). Gudu sma musu leri fu no poti ala den frutrow tapu a moni fu den; den musu frutrow tapu Gado, a Sma fu pe ala sortu gudu e komopo.

Ma wan yoisti fasi fu denki wawan no sa meki taki sani e waka bun nanga wi. Te fu kaba, Kresten di gudu sa musu gebroiki den gudu fu den na wan koni fasi. Paulus e frumane den: ’Du bun, de gudu na ini bun wroko, lobi fu gi, de klariklari fu prati nanga trawan.’—1 Timoteus 6:18.

„A Trutru Libi”

A moro prenspari sani di a rai fu Paulus e leri wi, na taki wi musu tan prakseri taki materia sani no man du ala sani gi wi. Gado Wortu e taki: „Den warti sani fu a guduwan na en tranga foto, èn ini en prakseri den de leki wan skotu di e kibri en” (Odo 18:11). Iya, te fu kaba wi sa si taki wi ben denki nomo taki den gudu fu wi kan gi wi seikerfasi, èn taki wi hori wisrefi na spotu, fu taki en leti. Na presi taki wi e poti ala wi frutrow tapu den gudu fu wi, wi musu du ala muiti fu sorgu taki Gado feni wi bun.

Fu di materia sani no kan gi wi seikerfasi, dati meki wi no musu poti wi howpu na den tapu kwetikweti. Wi musu poti trutru howpu tapu wan sani di krakti, di warti, èn di no e lasi gowe. Kresten e poti den howpu tapu wi Mekiman, Yehovah Gado, èn tapu a pramisi fu en fu têgo libi. A tru taki moni no e tyari koloku kon, ma san tru srefisrefi na taki moni no man gi wi frulusu. Soso a bribi di wi abi na ini Gado kan gi wi a howpu dati.

So bun, awansi wi na pôti sma noso gudu sma, meki wi libi na wan fasi di sa meki taki wi e kon „gudu ini Gado ai” (Lukas 12:21). Noti warti moro leki wan bun nen na a Mekiman. Ala den muiti di wi e meki fu doro a marki disi sa yepi wi fu ’kibri leki wan gudu gi wisrefi wan bun fondamenti gi a tamara, so taki wi kan hori a trutru libi steifi’.—1 Timoteus 6:19.

[Prenki na tapu bladzijde 7]

Paulus ben leri a kibritori fu tevredefasi

[Prenki na tapu bladzijde 8]

Wi kan de tevrede èn koloku nanga san wi abi