Prisiri Nanga a Kownukondre Howpu!

WAN prisiri okasi ben tyari 5784 sma kon makandra tapu 10 maart 2001, na ini den dri gebow na ini a foto New York pe a bigi Bethelfamiri e wroko èn e tan. Den sma disi ben kon makandra fu di brada nanga sisa ben klari a di fu 110 klas fu a Gilead zendelingskoro nanga bun bakapisi.

Carey Barber, wan memre fu a Tiri Skin fu Yehovah Kotoigi, ben bari ala sma wan switikon èn a bigin a programa nanga den wortu disi: „Wi breiti fu si taki 110 difrenti klas fu Gilead studenti now kisi leri fa fu dini leki zendeling, èn taki den kisi toewijzing na difrenti presi na heri grontapu.”

Fa fu Tan Abi Prisiri

Baka di Brada Barber ben taki na a bigin fu a programa, dan Don Adams taki nanga den arkiman èn so srefi nanga den 48 nyun zendeling. A taki fu a tori „A Blesi fu Yehovah E Meki Wi Kon Gudu.” A publikitaki fu en ben taki moro fu Odo 10:22, èn a memre den arkiman taki Yehovah e horibaka gi den futuboi fu en èn a e blesi den so srefi te den e poti Kownukondre afersi na a fosi presi na ini den libi. A brada disi gi den studenti deki-ati fu teki a nyun toewijzing fu den nanga prisiri, soleki fa Paulus ben prisiri fu ’abra go na Masedonia fu yepi’, di den brada ben aksi en fu du so (Tori fu den Apostel 16:9). Ala di problema ben miti Paulus, toku a ben kisi furu winimarki, fu di a ben de klariklari fu preiki na a presi pe den ben seni en go.

Den nyun zendeling ben klari a skoro di ben teki feifi mun. Na ini a pisi ten dati den studeri Bijbel èn den ben leri fa fu sreka densrefi gi a zendelingwroko. Toku, Brada Daniel Sydlik, wan memre fu a Tiri Skin fu Yehovah Kotoigi, ben gi den deki-ati fu tan go doro fu teki leri. Ala di a brada disi ben taki fu a tori „Unu Musu De Trutru Futuboi” dan a taigi den arkiman so srefi: „Fu de wan futuboi wani taki dati yu e gi yesi doronomo na den wortu fu Yesus. A wani taki dati wi ala ten de klariklari fu arki en wortu, en boskopu, èn so srefi a leri fu en.” A ben taigi den arkiman taki den futuboi fu Krestes no ben teki bosroiti sondro fu arki a sten fu a Masra; a koni fu Gado kibri na ini a libi fu Krestes (Kolosesma 2:3). No wan fu wi kan denki taki wi sabi ala sani fu Yesus, fu di wi ben yere den wortu fu en wan leisi. Fu dati ede, Brada Sydlik gi den nyun zendeling deki-ati fu tan go doro fu teki leri, fu tan gebroiki san den e leri, èn fu tan leri sma Kresten waarheid, san abi fri leki bakapisi.—Yohanes 8:31, 32.

Fu man tan nanga prisiri na ini a diniwroko fu Gado, dan wan sma musu man teki trangaleri nanga piri-ai. Na aksi di a Gilead leriman Lawrence Bowen ben poti gi den arkiman ben de „Den Niri fu Yu Sa Gi Yu Piri-ai?” A sori den arkiman taki na ini Bijbel den niri e prenki den dipi denki nanga firi fu wan sma. Den niri kan gi wan sma piri-ai efu a rai fu Bijbel  di skrifi nanga yepi fu a santa yeye fu Gado, abi krakti tapu a fasi fa wan sma de trutru (Psalm 16:7; Yeremia 17:10). A getrow fasi fa wan sma e libi kan naki na ati fu Yehovah seryusu srefi. Baka di a takiman ben leisi Odo 23:15, 16, dan a aksi: „Den niri fu yu sa gi yu piri-ai?” A ben taki moro fara: „Wi e begi taki den e du dati, èn na so fasi yu sa meki taki Yehovah e prisiri fu tru. Yu sa abi krakti tapu den moro dipi firi fu en. Iya, yu sa meki den niri fu Gado kon breiti pasa marki te yu tan getrow na a toewijzing fu yu.”

Brada Mark Noumair ben hori a lasti taki na ini a pisi disi fu a programa. A brada disi ben dini leki wan zendeling na ini Kenia bifo a tron wan Gilead leriman. A taki fu en di ben nen „A Moro Bun fu Si Nanga Yu Ai”, ben sori o prenspari a de fu kweki tevredefasi. Brada Noumair gi den studenti a rai di skrifi na Preikiman 6:9. A taigi den: „Si sani soleki fa den de. Dati wani taki dati wi musu ’si sani nanga wi ai’. Na presi taki wi e poti prakseri nomo na wan tra sani di wi ben sa wani du, dan meki wi du muiti fu de tevrede nanga a fasi fa wi libi e waka now. Yu no sa de tevrede te yu e si sani heri tra fasi leki fa den trutru de, te yu abi tumusi bigi fruwakti fu sani, noso te yu e si soso den takru sei fu yu toewijzing.” Iya, awansi o pe wi de, noso awansi sortu situwâsi wi de na ini, te a bun matifasi di wi abi nanga Gado e gi wi tevredefasi, dan wi sa man dini wi Gran Mekiman nanga moro prisiri na ini a toewijzing fu wi.

 Prisiri Ondrofenitori na ini a Kownukondre Diniwroko èn na Gilead

Baka den bun rai disi di den studenti ben kisi nanga yepi fu den taki dati, dan den fruteri wan tu fu den ondrofenitori di den miti na ini a preikiwroko na ini den feifi mun di den ben de na a skoro. Ondro a tiri fu Wallace Liverance, a brada di abi a frantwortu fu na administrâsi fu Gileadskoro, den nyun zendeling fruteri den arkiman fa den ben sori taki den na dinari fu Gado (2 Korentesma 4:2). Den ben man yepi wan tu sma, fu di den ben man naki a konsensi di Gado gi den. Den ondrofenitori fu den studenti ben sori fa den ben bigin bijbelstudie nanga opregti sma di den ben miti na strati, na ini na oso-fu-oso diniwroko, èn na ini tra situwâsi. Na difrenti okasi, sma di ben wani sabi moro ben taki dati den Bijbel publikâsi fu na organisâsi fu Yehovah e taki fu a waarheid. Wan spesrutu bijbeltekst ben abi bigi krakti tapu wan ososma. Now a sma dati e studeri Bijbel nanga Yehovah Kotoigi.

Baka dati, Joel Adams interview sma di ben de studenti fosi fu a Gileadskoro. A thema fu a taki fu en ben de „Noiti Tapu fu Leri Sani, Noiti Tapu fu Dini Yehovah”. Den sma di a ben interview ben abi bun rai gi den nyun zendeling. Harry Johnson ben taki fu a ten di a ben de wan memre fu a di fu 26 klas fu Gilead. A ben taki: „Wi leri taki Yehovah tiri en pipel èn ala ten sa tiri en pipel. Na ini den yari di pasa a frutrow disi di wi ben abi, gi wi deki-ati.” William Nonkes, wan memre fu a di fu 53 klas fu Gilead, gi den nyun zendeling a rai disi: „A moro prenspari sani fu du, na fu tan prakseri Bijbel gronprakseri, èn fu gebroiki den te yu musu teki bosroiti na ini yu libi now èn ala ten. Leki bakapisi fu dati, yu sa man tan na ini yu toewijzing, èn yu sa kisi furu blesi fu Yehovah.”

A thema di Richard Rian ben taki fu en na ini a programa ben de „Wi Kisi Krakti fu Du a Wani fu Yehovah”. Wan fu den sma di a ben interview ben de John Kurtz, wan brada di ben klari a di fu 30 klas nanga bun bakapisi, èn di wroko moro leki 41 yari leki zendeling na ini Spanyorokondre. Di Brada Richard Rian aksi en san na a leriprograma fu Gilead, dan Brada Kurtz taki: „A moro prenspari leribuku na Bijbel. Boiti dati, wi abi bijbelstudie yepisani di e yepi wi fu frustan Bijbel. Ibriwan sma kan kisi den yepisani dati. Sma no e leri kibritori na Gilead. Ala ten mi e poti krakti na tapu a sani disi, bika ala Kotoigi kan kon sabi den sani di sma e leri na Gilead.”

Brada Gerrit Lösch, wan memre fu a Tiri Skin fu Yehovah Kotoigi, ben hori a lasti lezing fu a yeye programa disi. A ben taki fu a tori „Na Tapu èn na Ondro den Frei fu Yehovah”. A fruklari fa a fasi fa Gado e kibri èn e horibaka gi en getrow futuboi, prenki na ini Bijbel leki den frei fu wan aka (Deuteronomium 32:11, 12; Psalm 91:4). A papa noso mama aka son leisi e bradi den frei fu en furu yuru langa, so taki a kan kibri den pikin fu en. Son leisi, wan mama aka e tapu den pikin fu en srefi nanga en frei, fu kibri den fu kowru winti. Na a srefi fasi èn so srefi akruderi a wani fu en, Yehovah kan yepi den getrow futuboi fu en, spesrutu te tesi na yeye fasi e miti den. Yehovah no e gi pasi taki den futuboi fu en e kisi moro hebi tesi leki san den man tyari, ma a e sori den fa den kan frudrage den tesi disi (1 Korentesma 10:13). Brada Lösch tapu a taki fu en nanga den wortu disi: „Fu man tan feni kibri na yeye fasi, wi musu tan na ondro den frei fu Yehovah. Disi wani taki dati wi no musu kweki wan denki fu du sani sondro fu luku fa Gado e si a tori. Meki wi tan krosibei ala ten fu Yehovah èn fu en organisâsi di de leki wan mama. Wi no musu tapu fu teki a tiri nanga a lobi-ati rai fu den.”

A fesiman ben leisi den brifi di sma fu heri grontapu ben seni kon fu gi den nyun zendeling deki-ati. Baka dati den nyun zendeling kisi den diploma. Di a Gileadskoro ben seti, a ben de fu drai wan tu klas nomo na ini wan pisi ten fu feifi yari. Ma Yehovah Gado meki a skoro tan drai 58 yari langa kaba. Soleki fa Brada Barber ben taki na a bigin fu a programa: „Den Gilead zendeling trutru du bun sani sensi Gilead bigin drai na ini 1943! A muiti di den alamala du abi leki bakapisi taki trutru hondro dusundusun safri-ati sma na grontapu kon na ini a tumusi moi organisâsi fu Yehovah.” Iya, a zendelingskoro disi meki taki milyunmilyun sma e prisiri nanga a Kownukondre howpu.

[Faki na tapu bladzijde 24]

A STATISTIEK FU A KLAS

Nomru fu kondre pe den komoto: 8

Nomru fu kondre pe den kisi toewijzing fu go: 18

Nomru fu studenti: 48

Gemiddeld yari di den abi: 34

Gemiddeld yari di den de na ini waarheid: 18

Gemiddeld yari di den e du furuten diniwroko: 13

[Prenki na tapu bladzijde 25]

A di fu 110 Klas fu a Waktitoren Bijbelskoro Gilead Di Klari a Skoro Nanga Bun Bakapisi

Na tapu a lijst na ondrosei, den rei nomru fu fesisei go na bakasei, èn den nen skrifi fu kruktu-anusei go na reti-anusei na ini ibri rei.

(1) Vacek, E.; Madelin L.; Evans, G.; Wanatabe, K. (2) Trafford, P.; Turfa, J.; Wilson, P.; Williams,  R.; Weber,  A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollman, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.