’Na Den Regtfardikiwan Sa Kisi Blesi’

„WAN ten ben de taki mi ben de wan yonkuman, mi kon owru tu, èn toku mi no si no wan regtfardikisma libi en wawan krinkrin, noso den pikin fu en e suku brede”, na so a psalm skrifiman David ben taki di a ben owru kaba (Psalm 37:25). Yehovah Gado lobi den regtfardikisma trutru èn a e broko en ede trutru nanga den. Na ini en Wortu, Bijbel, a e frumane den tru anbegiman taki den musu suku regtfardikifasi.—Sefania 2:3.

Regtfardikifasi na a hori di wan sma e hori ensrefi na den markitiki fu Gado di e taki san bun èn san ogri. A di fu tin kapitel fu a Bijbel buku Odo e gi wi a deki-ati fu libi na a fasi fa Gado wani, fu di a buku dati e sori san na den bigi yeye blesi gi den sma di e du dati. Wan tu fu den blesi na a bogobogo yeye nyanyan di bun gi wi, wroko di abi wini èn di e gi satisfaksi, èn wan bun matifasi nanga Gado èn nanga libisma. Fu dati ede, meki wi poti prakseri na Odo 10:1-14.

A E Gi wan Moi Deki-ati

Den fosi wortu fu a kapitel e sori krinkrin suma na a skrifiman fu a tra pisi fu a buku Odo. A skrifi: „Den odo fu Salomo.” Kownu Salomo fu na owruten Israèl e gi wan moi deki-ati fu du san reti: „Wan koni manpikin na wan sma di e meki a papa e prisiri, èn wan don manpikin e meki en mama e sari.”—Odo 10:1.

Papa nanga mama e sari srefisrefi te wan fu den pikin fu den e gowe libi na anbegi fu a tru èn libilibi Gado! A koni kownu e taki spesrutu fu a sari fu a mama, kande fu sori taki a mama e sari moro leki a papa. Dati ben de so nanga Doris. * A e fruteri: „Di a manpikin fu wi di ben abi 21 yari, ben gowe libi a waarheid, mi nanga mi masra Frank ben sari srefisrefi. A pen ben moro hebi gi mi leki gi Frank. Den 12 yari di pasa kaba no ben puru a pen.”

Pikin kan puru a prisiri fu den papa èn den kan meki den mama sari. Meki wi sori taki wi koni èn meki wi gi wi papa nanga mama prisiri. Èn a moro prenspari srefi fu meki wi hemel Tata, Yehovah, prisiri.

’A Sili fu a Regtfardikiwan E Feni Satisfaksi’

„Den gudu fu a godelowsuwan no sa abi no wan wini”, na so a kownu e taki, „ma a regtfardikifasi sa puru sma na dede” (Odo 10:2). Den wortu disi prenspari srefisrefi gi tru Kresten di e libi fara kaba na ini a ten fu a kaba (Danièl 12:4). A ten te a godelowsu grontapu sa kisi pori de leti na wi fesi. No wan sani fu libisma di e gi den kibri — na materia sei, na moni sei, noso na srudati sei — sa man gi den a kibri na ini a „bigi banawtu” di sa kon heri esi (Openbaring 7:9, 10, 13, 14). Na „den opregti sma na den wan di sa libi na grontapu, èn den wan sondro fowtu na den wan di sa tan abra na tapu” (Odo 2:21). Fu dati ede, meki wi tan „suku fosi a kownukondre nanga [Gado en] regtfardikifasi”.—Mateus 6:33.

Fu feni den blesi disi, den futuboi fu Yehovah no abi fu wakti teleki a nyun grontapu di Gado pramisi doro. „Yehovah no sa meki a sili fu a regtfardikiwan tan abi angri, ma a sa puru a tranga lostu fu den godelowsuwan” (Odo 10:3). Yehovah gi bogobogo yeye nyanyan nanga yepi fu „a getrow èn koni srafu” (Mateus 24:45). Den regtfardikiwan trutru abi reide fu „bari fu prisiri bika fu a bun kondisi fu na ati” (Yesaya 65:14). Sabi na wan sani di e gi en sili prisiri. A de wan  switi sani gi en fu suku yeye gudu. Den godelowsu sma no sabi den sortu prisiri disi.

’A Sma Di Lobi Wroko, E Kon Gudu’

A regtfardikiwan e kisi blesi na wan tra fasi tu. „A wan di e wroko na wan lesi fasi no sa abi furu gudu, ma na anu fu a sma di lobi fu wroko, dati e meki wan sma kon gudu. A manpikin di e handri nanga koni, e koti nyanyan na ini a zomer; a manpikin di e handri na wan syen fasi, e sribi dipi na a ten te nyan musu koti.”—Odo 10:4, 5.

Spesrutu den wortu di a kownu e taigi den wrokoman na a ten fu a kotiwroko, prenspari. A ten fu a kotiwroko no de wan ten fu sribi. Na wan ten fu wroko tranga èn fu wroko langa. Iya, na wan ten fu wroko fayafaya.

Yesus ben abi a kotiwroko na prakseri, no fu karu, ma fu libisma, di a ben taigi den disipel fu en: „A kotiwroko bigi, ma furu wrokoman no de. Fu dati ede, begi a Masra fu a kotiwroko [Yehovah Gado] fu seni wrokoman go na ini a kotiwroko fu en” (Mateus 9:35-38). Na ini a yari 2000, moro leki 14 milyun sma ben kon na a Memrefesa fu Yesus en dede — dati na moro leki tu tron a nomru fu den sma di na Yehovah Kotoigi. Iya, no wan sma kan taki dati ’den gron no weti kaba fu go koti den’! (Yohanes 4:35) Den trutru anbegiman e aksi a Masra fu a gi moro wrokoman, ala di densrefi e du furu muiti na ini a wroko fu meki disipel, èn na so wan fasi den e handri akruderi a begi fu den (Mateus 28:19, 20). Èn Yehovah blesi a muiti di den du trutru! Na ini a dienstyari 2000, moro leki 280.000 nyun sma ben teki dopu. Den disi e du muiti tu fu tron sma di e leri trawan a Wortu fu Gado. Meki wi feni prisiri nanga satisfaksi na a ten disi te a kotiwroko musu du, te wi e du furu na ini a wroko di wi e du fu meki disipel.

’Blesi E Kon na Tapu na Ede fu En’

„Blesi e kon na tapu na ede fu a regtfardikiwan”, na so Salomo e taki moro fara, „ma a mofo fu den godelowsuwan e kibri ogridu.”—Odo 10:6.

A sma di abi wan soifri èn regtfardiki ati e gi furu buweisi taki a de regtfardiki. Den sani di a e taki de switi èn den e gi deki-ati, èn den sani di a e du de bun èn a e sori taki a lobi fu gi sma sani. Tra sma e lobi fu de nanga en. So wan sma e meki taki trawan e warderi en — taki den e blesi en — fu di den e taki bun fu en.

Ma na a tra sei, wan godelowsu sma e hori sma na ati, a lobi fu si te sma e pina, èn moro furu a lobi fu du sma ogri. A kan taki a sma disi man taki switi èn kande a e ’kibri ogridu’ na ini en ati, ma toku te fu kaba a o du ogri na skin fasi noso nanga en mofo (Mateus 12:34, 35). Noso so srefi, „ogridu sa tapu [noso sroto] a mofo fu godelowsu sma” (Odo 10:6, futuwortu). Disi e sori taki moro furu a de so taki a godelowsu sma e kisi a srefi sani di a e sori, namku feantifasi fu tra sma. Disi e meki taki den e tapu noso sroto en mofo èn disi e meki taki a no e taki moro. So wan sma no kan feni no wan blesi fu trawan!

„A memre di sma e memre wan regtfardikiwan na wan blesi”, na so a kownu fu Israèl skrifi,  „ma a nen srefi fu den godelowsuwan sa pori gowe” (Odo 10:7). Tra sma e memre den regtfardikiwan na wan bun fasi, ma a moro prenspari taki na Yehovah Gado e memre den na wan bun fasi. Fu di Yesus ben tan getrow te na dede, meki a „kisi wan nen di moro betre” leki di fu den engel (Hebrewsma 1:3, 4). Na ini a ten disi den trutru Kresten e memre den getrow man nanga uma di ben de loyaal na ini a ten bifo den Kresten, èn den e si den leki eksempre di bun fu waka na baka (Hebrewsma 12:1, 2). Disi e difrenti srefisrefi fu a nen fu den godelowsuwan, di e tron wan tegu sani èn wan sani di sma no wani srefisrefi! Iya, „wan nen de fu frukisi moro leki gudu pasa marki; bun-ati de moro bun srefi leki solfru nanga gowtu” (Odo 22:1). Meki wi abi wan bun nen na Yehovah èn na tra libisma.

’Wan Man Di Abi Soifri Retifasi Sa Waka na ini Seikerfasi’

Salomo e sori fa wan koni sma e difrenti fu wan don sma te a e taki: „A sma di koni na ini en ati sa teki den komando di a e kisi, ma a sma di don nanga en mofo, trawan sa masi en” (Odo 10:8). Wan koni sma sabi heri bun taki „a no de na a sma fu grontapu fu a bepaal en pasi” (Yeremia 10:23). A e frustan taki a de fanowdu fu suku a yepi fu Yehovah èn fu du wantewante san Gado komanderi en. Na a tra sei, a sma di don nanga en mofo no man frustan a prenspari tori disi. A taki di a e taki don sani e meki taki a e kisi pori.

Wan regtfardiki sma e ondrofeni wan seikerfasi tu di godelowsu sma no abi. „A sma di e waka na ini soifri retifasi sa waka na ini seikerfasi, ma sma di e waka wan kruktu pasi, sa meki sma sabi en. A sma di e pingi nanga en ai sa gi sari, èn a sma di don nanga en mofo, den sa masi en.”—Odo 10:9, 10.

Wan man di abi soifri retifasi na wan sma di e handri na wan eerlijk fasi. A e frudini a lespeki nanga a frutrow fu tra sma. Wan eerlijk sma na wan bun wrokoman èn moro furu a e kisi moro bigi frantwortu. A nen di a abi leki wan eerlijk man, kan meki taki a no sa lasi en wroko ala di furu wroko no de. Ma boiti dati, na eerlijkfasi fu en e yepi meki wan switi situwâsi èn vrede de na ini en oso (Psalm 34:13, 14). A e firi seikerfasi te a de nanga den memre fu en osofamiri. Fu tru, seikerfasi na wan bakapisi fu soifri retifasi.

A situwâsi de tra fasi nanga a sma di e suku fu wini sani na wan fufuru fasi noso di e prakseri ensrefi wawan. Wan bedrigiman kan pruberi fu kibri a lei di a e lei. A kan du dati nanga a taki di a e taki na wan kruktufasi noso nanga den sani di a e meki nanga en skin (Odo 6:12-14). A pingi di a e pingi nanga en ai na wan ogrifasi noso den bedrigi sani di a e pruberi, kan gi den sma di e ondrofeni dati furu sari. Ma awinsi o ten, a kruktufasi fu so wan sma e kon na doro. Na apostel Paulus ben skrifi: „Den sondu fu son sma de fu si krinkrin, èn e tyari krutu kon wantewante, ma den sondu fu tra sma e kon de fu si tu, ma baka ten. Na a srefi fasi den bun wroko de fu si na ala sei, èn den wan di no de so no man tan kibri” (1 Timoteus 5:24, 25). Awansi suma de ini a tori — wan papa noso mama, wan mati, wan trow patna, noso wan sma di wi sabi — te fu kaba a sa kon na krin efu den no ben de eerlijk. No wan sma kan frutrow wan sma di abi a nen taki a no de eerlijk!

 ’En Mofo E Gi Libi’

„A mofo fu a regtfardikiwan e gi libi”, na so Salomo taki, „ma a mofo fu den godelowsuwan e kibri ogridu” (Odo 10:11). Den wortu di e komoto na wan mofo, kan du bun noso ogri. Den kan gi wan sma krakti èn meki a firi bun baka, noso den kan broko en.

A kownu fu Israèl e sori fu san ede sma e taki sani, te a e taki: „Bita-ati e tyari feti kon, ma lobi e tapu ala sondu” (Odo 10:12). Bita-ati e tyari feti kon na mindri libisma, a e meki strei de. Den sma di lobi Yehovah musu puru bita-ati na den libi. Fa? Den musu poti lobi na presi fu dati. „Lobi e tapu wan heri ipi sondu” (1 Petrus 4:8). Lobi „e frudrage ala sani”, dati wani taki dati „a e tapu ala sani” (1 Korentesma 13:7; Kingdom Interlinear). A lobi fu Gado no e fruwakti fu onvolmaakti sma taki den musu de volmaakti. Na presi fu panya den fowtu fu tra sma, a lobi disi e yepi wi fu libi den fowtu fu den, boiti te a de wan seryusu ogridu. Lobi e meki wi frudrage srefi a takru fasi fa sma e libi nanga wi na ini a preikiwroko, na wi wrokope, noso na skoro.

A koni kownu e taki moro fara: „Koni de na a mofo fu a sma di abi frustan, ma a tiki de gi a baka fu a sma di no abi ati” ( Odo 10:13). A koni fu wan sma di abi frustan e sori en pe a musu waka. Den bun wortu fu en mofo e yepi trawan fu waka a regtfardiki pasi. A fonfon tiki no de fanowdu fu tyari en, noso den sma di e arki en go na a retisei; den no abi fu du dati nanga tranga.

„Kibri Sabi Leki wan Gudu”

San e yepi fu meki den wortu fu wi de leki ’wan liba di e kuku koni kon na tapu’, na presi fu takitaki fu pikinpikin sani di no de prenspari? (Odo 18:4) Salomo e piki: „Den koni sma na den wan di e kibri sabi leki wan gudu, ma a mofo fu a don sma sa tyari pori kon heri esi.”—Odo 10:14.

A fosi sani di de fanowdu na taki a frustan fu wi musu furu nanga a bun sabi fu Gado. Wan presi nomo de pe a sabi disi de fu feni. Na apostel Paulus ben skrifi: „Na Gado ben meki sma skrifi ala den Buku fu Bijbel nanga yepi fu en santa yeye èn den bun fu gi leri, fu piri-ai gi sma, fu poti sani kon reti, fu gi trangaleri ini regtfardikifasi, so taki a sma di de fu Gado kan koni dorodoro, de srekasreka gi ibri bun wroko” (2 Timoteus 3:16, 17). Wi musu kibri sabi leki wan gudu èn wi musu diki na ini a Wortu fu Gado neleki te wi e suku wan gudu di kibri. A e gi furu prisiri nanga wini te wi e suku na a fasi disi!

Fu man abi koni na wi mofo, dan a sabi fu den Buku fu Bijbel musu de so srefi na ini wi ati. Yesus ben taigi den sma di ben arki en: „Wan bun sma e meki bun sani kon fu a bun gudu fu en ati, ma wan godelowsu sma e meki godelowsu sani kon fu a godelowsu gudu fu en; bika na san furu na ati pasa marki, na fu dati a mofo e taki” (Lukas 6:45). Fu dati ede wi musu abi a gwenti fu prakseri dipi fu den sani di wi e leri. A tru, wi musu du muiti fu studeri èn fu prakseri dipi, ma a e meki wi gudu na yeye fasi srefisrefi te wi e studeri na a fasi disi! No wan reide de taki wan sma musu waka a takru pasi fu wan sma di e takitaki sani nomo sondro fu prakseri fosi.

Iya, wan koni sma e du san bun na ini Gado ai èn a e du bun gi tra sma. A e abi bogobogo yeye nyanyan èn abi furu fu du na ini a bun wroko fu Masra (1 Korentesma 15:58). Fu di a de wan man di abi soifri retifasi, meki a e waka na ini seikerfasi èn Gado e feni en bun. Iya, furu blesi de gi a regtfardiki sma. Meki wi suku regtfardikifasi fu di wi e libi akruderi den markitiki di Gado poti fu bepaal san bun èn san ogri.

[Futuwortu]

[Prenki na tapu bladzijde 25]

Eerlijkfasi e yepi wi fu abi wan koloku osofamiri libi

[Prenki na tapu bladzijde 26]

’Den koniwan e kibri sabi leki wan gudu’