Kownukondre Preikiman E Fruteri

Gado Figi den Watra-ai fu En Puru

SMA di e kenki den libi so taki a de akruderi den wet nanga gronprakseri fu Yehovah, e kisi furu blesi. Ala di a no makriki ala ten fu tyari prenspari kenki kon, toku den sma disi kan kisi yepi nanga deki-ati wantewante (Psalm 84:11). Na eksempre disi fu zuid-oost-Asia e sori dati.

Di wan Kotoigi fu Fransikondre ben de nanga fakansi, a ben taki nanga Kim *, wan frow di abi wan wenkri, fu a prakseri di Yehovah abi nanga a grontapu. A sisa disi ben gi Kim so srefi a buku Joe kan libi foe têgo na ini wan paradijs na grontapoe. Di Kim ben luku san de ini a buku, dan a ben si den wortu „a sa figi puru ala watra na den ai” (Openbaring 21:4). Kim e memre taki: „A vers disi trutru ben naki mi ati. Sma ben e si fa mi ben e lafu èn ben e gi tori na ini a wenkri a heri dei. Ma suma ben kan sabi taki te neti, te mi doro kaba na mi oso, mi ben e krei te leki mi ben fadon na sribi?” A e fruteri san ben meki taki a ben e sari: „Mi ben e libi 18 yari langa nanga wan man; mi no ben de koloku srefisrefi bika a no ben wani trow nanga mi. Mi ben wani tapu nanga a sortu libi disi, ma mi no ben abi a deki-ati fu di mi ben libi nanga en so wan langa pisi ten.”

Syatu baka dati, Kim ben agri fu kisi bijbelstudie fu wan fu den Kotoigi fu Yehovah di nen Linh. „Mi ben de fayafaya fu du san Bijbel e leri”, na so Kim e taki. „Fu eksempre, mi no ben anbegi den afo fu mi moro, awinsi disi meki taki mi famiri ben gens mi. Boiti dati, mi ben meki muiti so taki mi nanga mi patna ben kan trow na lanti, ma mi patna ben weigri. Na ini a muilek ten dati, a Kotoigi fu Fransikondre ben tan seni Bijbel publikâsi gi mi. Linh ben gi mi furu deki-ati tu. A pasensi nanga a lobi-ati yepi fu den sisa disi ben yepi mi fu horidoro te leki mi ben kon si sortu patna mi ben abi trutru. Mi ben kon si taki a ben abi 5 ’wefi’ kaba nanga 25 pikin! A sani disi ben gi mi deki-ati fu gowe libi en.

Fu gowe libi wan bigi oso di abi ala sani na ini, go tan na ini wan pikin oso, no ben makriki. Boiti dati, dan a man disi di mi ben libi nanga en, ben dwengi mi fu mi kon libi baka nanga en. A ben taigi mi srefi taki efu mi no wani kon baka, dan a o trowe wan sani na mi tapu fu pori mi skin. Nanga yepi fu Yehovah, mi ben man du san bun.” Kim ben tan go na fesi, èn te fu kaba a ben teki dopu ini april 1998. Boiti dati, tu fu den sisa fu en nanga a tini manpikin fu en ben bigin studeri Bijbel nanga Yehovah Kotoigi.

„Mi ben e denki taki ala ten mi libi ben o de sondro howpu”, na so Kim e taki. „Ma now, mi koloku èn neti mi no e krei moro. Yehovah figi den watra-ai fu mi kaba.”

[Futuwortu]