Meki Ala Sma Si Taki Yu E Go na Fesi
Meki Ala Sma Si Taki Yu E Go na Fesi
„Denki dipi fu den sani disi, teki den krinkrin na ini yu, so taki ala sma kan si taki yu e go na fesi.”—1 TIMOTEUS 4:15.
1. Fa yu e si te wan froktu lepi kaba so taki yu kan nyan en?
PRAKSERI fu wan froktu di yu lobi srefisrefi — wan manya, wan watramun, wan papaya, noso wan tra sani. Yu man si te wan froktu lepi kaba so taki yu kan nyan en? Iya. Te yu e smeri a froktu, e luku a kloru, noso e firi en, dan yu sabi taki yu sa prisiri srefisrefi fu nyan en. A momenti di yu teki wan pisi fu a froktu poti na ini yu mofo, dan yu e breiti fu di a switi sote. San, a abi furu sap yèrè! A switi baya! Yu e prisiri srefisrefi fu nyan a froktu.
2. Fa wi kan si taki wan sma lepi, èn fa disi abi krakti na wi tapu te wi de nanga den?
2 Wi kan agersi tra afersi fu a libi nanga a pikin ondrofenitori disi di e gi sma prisiri. Fu eksempre, soleki fa wi kan si na difrenti fasi taki wan froktu lepi, na so difrenti sani e sori krin taki wan sma lepi na yeye fasi. Wi kan si taki wan sma lepi, te a abi a koni fu man si sani krin, te a man frustan sani bun, èn te a e sori taki a abi koni èn so moro fara (Yob 32:7-9). Te sma e sori den eigifasi disi ini a fasi fa den e tyari densrefi èn ini den sani di den e du, dan a de wan prisiri trutru fu abi demakandra nanga den èn fu wroko makandra nanga den.—Odo 13:20.
3. San na lepifasi te wi e prakseri san Yesus ben taki fu den sma fu a ten fu en?
3 Na a tra sei, wan sma kan de lepi na skin sei, ma a fasi fa a e taki èn a fasi fa a e tyari ensrefi kan sori taki a no lepi na frustan sei èn na yeye fasi. Fu eksempre, di Yesus Krestes ben taki fu den tranga-ede sma fu a ten fu en, a ben taki: „Yohanes ben kon. A no ben nyan, a no ben dringi, ma toku sma e taki, ’A abi wan ogri yeye’; a Manpikin fu libisma ben kon, ma en ben e nyan èn ben dringi, èn toku sma e taki, ’Luku! Wan man di de wan tapu-ala èn di de wan srafu fu win’.” Ala di den sma disi ben lepi na skin sei, toku Yesus ben taki dati den ben du neleki „yongu pikin”. Den no ben de lepisma kwetikweti. Fu dati ede a ben taki moro fara: „Ma toku koni e regtfardiki ensrefi nanga yepi fu den wroko fu en.”—Mateus 11:16-19.
4. Fa wi kan si taki wan sma e go na fesi èn taki a lepi?
4 A sani dati di Yesus ben taki, e sori wi fa wi kan si efu wan sma abi trutru koni — wan prenspari marki fu lepi sma. Dati wi kan si krin na den wroko fu en èn na den bakapisi fu den sani di a sma e du. Meki wi luku san na apostel Paulus ben gi Timoteus leki rai ini a tori disi. Baka di a ben kari ala den sani di Timoteus ben musu suku fu doro, Paulus ben taki: „Denki dipi fu den sani disi, teki den krinkrin na ini yu, so taki ala sma kan si taki yu e go na fesi” (1 Timoteus 4:15). Iya, te wan Kresten e go na fesi fu tron wan lepisma, dan sma kan „si” dati, noso a de wan sani di de krin fu si. Kresten lepifasi, di de leki wan leti di e skèin krin, no de wan eigifasi di tra sma no man si. A no wan sani di kibri gi sma ai (Mateus 5:14-16). Fu dati ede wi sa luku tu prenspari fasi fa wi kan si taki wan sma e go na fesi èn taki a lepi: (1) a sma e kon abi moro nanga moro sabi, frustan, nanga koni; (2) a sma e sori a froktu fu a yeye.
Wi De Wán na ini Bribi èn na ini Sabi
5. San a wani taki fu de lepi?
5 Moro furu wortubuku e taki dati te wan sma lepi, dan dati wani taki dati a sma gro dorodoro kaba, taki a tron wan bigisma, taki a doro a yoisti marki. Soleki fa wi ben si kaba, dan wan froktu lepi te a bun dorodoro fu nyan, èn te a kisi a yoisti kloru, smeri nanga tesi. Fu dati ede, lepifasi na wan tra wortu gi tumusi bun, bun dorodoro, noso volmaakti srefi.—Yesaya 18:5; Mateus 5:45-48; Yakobus 1:4.
6, 7. (a) Fa wi kan si taki Yehovah trutru wani taki ala den anbegiman fu en musu tron lepisma na yeye fasi? (b) Nanga san lepifasi na yeye fasi abi furu fu du?
6 Yehovah Gado trutru wani taki ala den anbegiman fu en musu tron lepisma na yeye fasi. Fu man du dati, a seti tumusi bun sani na ini a Kresten gemeente. Na apostel Paulus ben skrifi gi den Kresten na Efeise: „A ben gi sonwan leki apostel, sonwan leki profeiti, sonwan leki evangelie preikiman, sonwan leki skapuman nanga leriman, nanga a prakseri fu meki den santawan kon bun baka gi a diniwroko, fu bow a skin fu a Krestes. Te leki wi alamala kon de wán na ini a bribi èn abi a soifri sabi fu a Manpikin fu Gado, te leki wi tron wan bigisma, te leki wi gro kon bigi èn kon lepi na ini Krestes. So taki wi no sa de leki nyofi pikin moro, di sma e slenger go-kon neleki skwala fu se. Wi no musu kon bruya nanga ala sortu leri di e kon fu a bedrigifasi fu libisma, noso a triki wroko fu sma di e sidon prakseri ogri.”—Efeisesma 4:11-14.
7 Na ini den vers disi, Paulus ben fruklari fu san ede Gado seti den bogobogo sani disi na yeye fasi. Gado ben du dati fu di a wani taki wi alamala musu ’kon de wán na ini a bribi èn na ini soifri sabi’, taki wi musu tron „wan bigisma”, èn taki wi musu ’gro kon bigi na ini Krestes’. Te wi e du dati, dan no wan falsi denki nanga falsi leri sa slenger wi go-kon neleki nyofi pikin na yeye fasi. So bun, wi e si taki a go di wan sma e go na fesi fu tron wan lepi Kresten, abi furu fu du nanga ’wánfasi na ini a bribi èn na ini a soifri sabi fu a Manpikin fu Gado’. A rai fu Paulus abi wan tu bun sani na ini di wi musu poti prakseri na den tapu.
8. San wi musu du fu kon de „wán” na ini a bribi èn na ini soifri sabi?
8 Na a fosi presi, fu di wi musu tan „wán” nanga makandra, dati meki wan lepi Kresten musu de na ini wánfasi nanga tra bribiman èn musu wroko makandra nanga den ini sani di abi fu du nanga bribi èn nanga sabi. Te a musu fruklari Bijbel tori, dan a no e hori steifi na en eigi denki nanga fasi fu si sani. A no e pruberi tu fu meki tra sma teki den denki dati abra. Na presi fu dati, a e frutrow dorodoro tapu a waarheid di Yehovah Gado tyari kon na krin nanga yepi fu en Manpikin, Yesus Krestes, èn „a getrow èn koni srafu”. Wi e kisi yeye nyanyan „na a reti ten” na ini den Kresten publikâsi, na den konmakandra, so srefi na den bigi konmakandra nanga kongres. Te wi e teki a nyanyan disi doronomo, dan wi kan de seiker taki wi sa tan de „wán” nanga tra bribiman, na ini bribi nanga sabi.—Mateus 24:45.
9. Fruklari san den wortu „a bribi” wani taki, di Paulus ben gebroiki na ini a brifi gi den Efeisesma.
9 Na a di fu tu presi, den wortu „a bribi” no e sori go na a bribi fu ibri Kresten aparti, ma a e sori go na ala san wi e bribi. Dati wani taki „a bradi nanga a langa nanga a hei nanga a dipi” fu en (Efeisesma 3:18; 4:5; Kolosesma 1:23; 2:7). Te yu luku en bun, fa wan Kresten kan de na ini wánfasi nanga tra bribiman efu a e bribi noso e erken wan pisi nomo fu „a bribi”? Disi wani taki dati wi no musu de tevrede nanga a sabi di wi sabi den fondamenti sani fu Bijbel nomo. A no musu de so taki wi sabi a waarheid frafra, noso taki wi e frustan pisi fu a waarheid nomo. Na presi fu dati, wi musu angri fu gebroiki ala den sani di Yehovah seti gi wi nanga yepi fu en organisâsi, fu man diki go dipi na ini a Wortu fu en. Wi musu meki muiti srefisrefi fu kon frustan a wani fu Gado krinkrin èn fu frustan den prakseri fu en dorodoro. Fu man du dati, dan wi musu teki a ten fu leisi èn studeri Bijbel nanga Bijbel publikâsi. Wi musu begi Gado fu yepi wi èn fu tiri wi. Wi musu go na Kresten konmakandra doronomo èn wi musu teki prati dorodoro na a wroko fu preiki fu a Kownukondre èn fu meki disipel.—Odo 2:1-5.
10. San den wortu „te leki wi alamala kon de” wani taki, soleki fa Efeisesma 4:13 e gebroiki en?
10 Na a di fu dri presi, Paulus ben gebroiki den wortu „te leki wi alamala kon de”, bifo a ben taki fu den dri marki di wi musu doro. Wan wortubuku e sori taki dyaso den wortu „wi alamala” wani taki „no alamala, wan fru wan, ibriwan sma aparti, ma alamala makandra”. Nanga tra wortu, ibriwan fu wi aparti musu du muiti fu tron wan lepi Kresten makandra nanga a heri bradafasi. The Interpreter’s Bible e taki: „Wan pisi fu a skin kan gro dorodoro, soso te a heri skin e tan gro na wan gosontu fasi. Na so ibri sma aparti no man kon lepi dorodoro na yeye fasi sondro a yepi fu tra sma.” Paulus ben memre den Kresten fu Efeise taki den ben musu du muiti srefisrefi fu kon frustan a heri bribi, makandra „nanga ala den santawan”.—Efeisesma 3:18a.
11. (a) San a go di wi e go na fesi na yeye fasi, no wani taki? (b) San wi musu du fu man go na fesi?
11 Te wi e luku den wortu fu Paulus, dan wi kan si krin taki a go di wi e go na fesi no wani taki dati wi musu furu wi prakseri nomo nanga sabi noso hei leri. Wan lepi Kresten a no wan sma di wani sori trawan nomo o koni a de. Na presi fu dati, Bijbel e taki: „A pasi fu den regtfardikiwan de leki a brenki leti di e kon krin moro nanga moro, te leki a dei poti kon steifi” (Odo 4:18). Iya, a no a sma srefi e „kon krin moro nanga moro”, ma „a pasi”. Efu wi e tan meki muiti fu tan skinskin nanga a sabi di wi e kisi fu Gado Wortu, di Yehovah e tyari kon na krin moro nanga moro gi a pipel fu en, dan wi sa go na fesi na yeye fasi. Fu tan skinskin, wani taki dyaso taki wi musu tan go doro, èn dati na wan sani di wi alamala kan du.—Psalm 97:11; 119:105.
Sori „a Froktu fu a Yeye”
12. Fu san ede a prenspari taki wi e sori a froktu fu a yeye te wi e suku fu go na fesi na yeye fasi?
12 A prenspari fu „kon de wán na ini a bribi èn abi soifri sabi”. Ma a prenspari srefisrefi tu taki wi e sori a froktu fu Gado en yeye na ini ibri afersi fu wi libi. Fu san ede? Fu di soleki fa wi si kaba, lepifasi a no wan sani di trawan no man si, noso di kibri gi sma ai. Den eigifasi disi di wan lepi sma abi, de krin fu si èn kan gi trawan winimarki nanga deki-ati. A no de fu taki, dati wi no e suku fu go na fesi na yeye fasi fu meki sma si nomo taki wi moro bun leki den noso taki wi abi bun maniri. Na presi fu dati, te wi e go na fesi na yeye fasi fu di wi e meki Gado en yeye tiri wi, dan wi sa tyari trutru kenki kon ini a denki fu wi èn ini a fasi fa wi e handri. „Tan waka nanga yeye èn unu no sa du kwetikweti san a skin e lostu”, na so na apostel Paulus ben taki.—Galasiasma 5:16.
13. Sortu kenki e sori krin taki wan sma e go na fesi?
13 Baka dati, Paulus ben taki fu „den wroko fu a skin” di de furu srefisrefi èn di de „krin fu si”. Bifo wan sma e kon frustan san Gado e aksi fu libisma, dan a e tyari en libi akruderi a fasi fa den sma fu grontapu e tyari den libi. A kan de so taki a ben du wan tu fu den sani di Paulus ben kari: „hurudu, libi di no krin, lusu fasi fu libi, na anbegi fu kruktugado, afkodrei, feantifasi, trobi, dyarusu, faya atibron, kesekese, pratifasi, sekte, bigi-ai, dringi sopi te fu drungu, bradyari fesa, nanga den sortu sani disi” (Galasiasma 5:19-21). Ma o moro a sma e go na fesi na yeye fasi, o moro a man basi den takru ’wroko disi fu a skin’. Na presi fu den wroko disi fu a skin, dan a e sori „a froktu fu a yeye”. A bigi kenki disi di trawan kan si, e sori krin taki a sma e go na fesi fu tron wan lepi Kresten.—Galasiasma 5:22.
14. Fruklari den wortu „den wroko fu a skin” nanga „a froktu fu a yeye”.
14 Wi musu poti prakseri na den wortu „den wroko fu a skin” nanga „a froktu fu a yeye”. Den „wroko”, na den bakapisi fu san wan sma e du. Nanga tra wortu, den sani di Paulus ben kari kon leki den wroko fu a skin, de a bakapisi fu san wan sma e du fu en eigi friwani, noso fu a krakti di sondu abi na en tapu (Romesma 1:24, 28; 7:21-25). Na a tra sei, den wortu „a froktu fu a yeye” e sori taki den eigifasi di kari, no de a bakapisi fu san wan sma srefi e du fu tron wan moro bun sma. Ma a de bakapisi fu a wroko di a yeye fu Gado e wroko na en tapu. Soleki fa wan bon e meki bun froktu te sma e sorgu en bun, na so wan sma sa sori a froktu fu a yeye te a santa yeye e wroko dorodoro na ini en libi.—Psalm 1:1-3.
15. Fu san ede a prenspari fu poti prakseri na ala den eigifasi fu „a froktu fu a yeye”?
15 Wan tra sani di bun fu poti prakseri na dati, na a fasi fa Paulus ben gebroiki a wortu „froktu” gi ala den difrenti moi eigifasi di a ben kari. A no de so taki a yeye e meki difrenti froktu, so taki wi kan teki a froktu di wi lobi. Ibriwan fu den eigifasi di Paulus ben kari — lobi, prisiri, vrede, langa pasensi, switifasi, bun-ati, bribi, safri-atifasi, a dwengi di wan sma e dwengi ensrefi — de prenspari. Ala den eigifasi disi makandra e meki wan sma kon abi a nyun fasi fa wan sma musu de (Efeisesma 4:24; Kolosesma 3:10). Fu dati ede, a de prenspari fu poti prakseri na ala den eigifasi di Paulus ben kari. A kan de so taki wan tu fu den eigifasi disi de moro krin fu si na ini wi libi leki tra eigifasi fu di wisrefi abi den maniri dati kaba. Ma efu wi e poti prakseri na ala den eigifasi disi, dan wi sa man sori a fasi fa Krestes de, moro soifri na ini wi libi.—1 Petrus 2:12, 21.
16. Fu san ede wi e suku fu tron lepi Kresten, èn fa wi kan doro a marki dati?
16 Wi kan leri wan prenspari sani fu a tori di Paulus ben taki fu en. Te wi e suku fu tron lepi Kresten, dan wi no musu du dati fu di wi wani kisi furu sabi nanga koni, noso fu kweki bun maniri nanga bun eigifasi nomo. Wi musu du dati fu di wi wani taki a yeye fu Gado musu wroko na ini wi libi. Te wi e meki a yeye fu Gado tiri a denki fu wi èn a fasi fa wi e handri, dan dati sa meki wi kon lepi na yeye fasi. Fa wi kan doro a marki disi? Wi musu de klariklari fu meki a yeye fu Gado abi krakti tapu wi ati nanga wi frustan. Disi wani taki dati wi musu go na Kresten konmakandra èn musu teki prati na den. Boiti dati, wi musu studeri èn denki dipi fu Gado Wortu doronomo, so taki den gronprakseri fu en kan tiri wi te wi e handri nanga tra sma, èn te wi e teki bosroiti. Te wi e du dati, dan fu tru sma sa man si krin taki wi e go na fesi.
Go na Fesi fu Meki Gado Kisi Glori
17. San a go di wi e go na fesi abi fu du nanga a gi di wi e gi wi hemel Tata glori?
17 Te fu kaba, te wi e meki sma si taki wi e go na fesi, dan a no wi e kisi glori nanga prèise, ma wi hemel Tata, Yehovah, di e meki taki wi kan gro kon lepi na yeye fasi. A neti bifo sma ben kiri Yesus, dan a ben fruteri den disipel fu en: „Mi Tata e kisi glori te unu e tan meki furu froktu èn e sori taki unu na mi disipel” (Yohanes 15:8). Den ben gi Yehovah glori fu di den ben sori a froktu fu a yeye, èn so srefi fu di den ben meki Kownukondre froktu nanga yepi fu a diniwroko fu den.—Tori fu den Apostel 11:4, 18; 13:48.
18. (a) Sortu prisiri kotiwroko e feni presi na ini a ten disi? (b) Sortu tyalensi a kotiwroko disi e tyari kon?
18 Na ini a ten disi, Yehovah e blesi a pipel fu en na ini a kotiwroko na yeye fasi di den e du na heri grontapu. Wan tu yari kaba a de so, taki ibri yari so wan 300.000 nyun sma gi densrefi abra na Yehovah. Den sma disi sori taki den ben du dati fu di den teki dopu na ini watra. Disi e gi wi prisiri srefisrefi. Sondro tweifri a e meki na ati fu Yehovah prisiri tu (Odo 27:11). Ma efu den nyun sma disi wani taki Yehovah musu prisiri èn musu kisi prèise ala ten, dan den musu „tan waka na ini wánfasi nanga [Krestes], meki rutu èn bow kon tranga na ini en èn kon stanfaste na ini a bribi” (Kolosesma 2:6, 7). Disi e tyari wan tyalensi kon gi pipel fu Gado, na tu fasi. Na a wan sei, efu yu no dopu langa ete, yu sa teki a tyalensi fu meki muiti fu go na fesi so taki „ala sma kan si” dati? Na a tra sei, efu yu de na ini a waarheid wan pisi ten kaba, dan yu sa teki a tyalensi fu sorgu gi a tanbun na yeye fasi fu den nyunwan? Awinsi sortuwan fu den sma disi wi de, a de krin taki wi musu go moro fara fu kon lepi.—Filipisma 3:16; Hebrewsma 6:1.
19. Sortu grani nanga blesi yu kan kisi te yu e meki sma si taki yu e go na fesi?
19 Ala den sma di e wroko tranga fu meki trawan si taki den e go na fesi, sa kisi tumusi moi blesi na ini a ten di e kon. Prakseri fu san Paulus ben taki, baka di a ben gi Timoteus deki-ati fu go na fesi: „Poti prakseri doronomo na yusrefi èn na den sani di yu e leri sma. Hori den sani disi, bika efu yu e du disi, dan yu sa frulusu yusrefi nanga den wan di e arki yu” (1 Timoteus 4:16). Te yu e meki sma si taki yu e du muiti fayafaya fu go na fesi, dan yu srefi sa man abi a tumusi warti grani fu gi a nen fu Gado glori. Yu sa man prisiri so srefi fu den blesi di a sa gi yu.
Yu E Memre Disi Ete?
• Na sortu fasi wi kan meki sma si taki wi lepi na yeye fasi?
• Sortu sabi nanga koni di wan sma abi, e sori taki a lepi?
• Fa a sori di wi e sori „a froktu fu a yeye”, e meki sma si krin taki wi e go na fesi?
• Sortu tyalensi wi musu teki na wi tapu ala di wi e go moro fara fu kon lepi?
[Aksi fu a tori disi]
[Prenki na tapu bladzijde 13]
Lepifasi na wan sani di trawan kan si krin
[Prenki na tapu bladzijde 15]
Wi e go na fesi na yeye fasi te wi e tan skinskin nanga a waarheid di tyari kon na krin
[Prenki na tapu bladzijde 17]
Te wi e begi, dan dati e yepi wi fu sori „a froktu fu a yeye”