Aksi fu Leisiman

Kolosesma 1:16 e taki fu Gado Manpikin dati „ala tra sani meki nanga yepi fu en èn gi en”. Fu san ede wi kan taki dati ala sani ben meki „gi” Gado Manpikin, Yesus?

Yehovah gebroiki a wan-enkri Manpikin di ensrefi meki, leki a meester wrokoman na a ten di a ben e meki ala tra sani, dati wani taki, ala sani boiti Yesus srefi (Odo 8:27-30; Yohanes 1:3). Fu dati ede a e fiti taki a Manpikin e kisi prisiri fu den wroko disi, èn fu a reide disi wi kan taki dati den de „gi” en.

Wi leki libisma sabi taki papa nanga mama e fruwakti fu prisiri nanga den sani di den e meki, so bun den manpikin nanga den umapikin fu den. Fu dati ede, a Bijbel odo e taki fu „wan manpikin di [en papa] e prisiri nanga en” (Odo 3:12; 29:17). Na a srefi fasi Yehovah Gado ben prisiri nanga Israèl, a pipel fu en, di den ben de getrow (Psalm 44:3; 119:108; 147:11). Yehovah e prisiri so srefi nanga a getrowfasi fu den sma di e anbegi en na ini a ten disi.—Odo 12:22; Hebrewsma 10:38.

Fu dati ede, a ben fiti taki Gado ben wani taki Yesus, a sma di ben wroko makandra nanga en, ben prisiri nanga den sani di a meki. Fu taki en leti, Odo 8:31 e taki dati a Manpikin ’ben breiti nanga a fatu gron fu a grontapu fu en, èn den sani di a ben lobi trutru, ben de den manpikin fu libisma’. Na fu disi ede meki Kolosesma 1:16 e taki: „Ala tra sani meki nanga yepi fu en èn gi en.”