Fa a Vrede fu a Krestes Kan Basi Wi Ati?

„Meki a vrede fu a Krestes basi un ati, bika fu taki en leti, unu ben kisi a kari fu kon na en na ini wán skin.”—KOLOSESMA 3:15.

1, 2. Na sortu fasi „a vrede fu a Krestes” e basi na ati fu wan Kresten?

FURU sma no lobi a wortu basi kwetikweti, bika a e meki den prakseri wan sma di e kori trawan nanga triki èn di e dwengi trawan fu du san en wani. Fu dati ede son sma ben sa kan feni taki a no wan reidelek sani taki Paulus ben frumane den Kresten brada nanga sisa fu en na ini Kolose fu ’meki a vrede fu a Krestes basi den ati’ (Kolosesma 3:15). A no de so taki wi leki libisma abi wan fri wani? Fu san ede wi musu meki iniwan sani noso iniwan sma basi wi ati?

² Paulus no ben taigi den Kolosesma taki den ben musu lasi a fri wani fu den. A Griki wortu di vertaal na ini Kolosesma 3:15 nanga „basi”, ben abi fu du nanga a wortu di den ben gebroiki gi a refri di ben teki fesi na ini den wega di den ben hori na ini a ten dati. A man disi ben bosroiti suma e kisi a prijs. Den atleet ben abi a fri fu prei fa den wani efu den ben hori densrefi na den markitiki fu a wega. Ma te fu kaba, a refri ben bosroiti suma ben hori ensrefi trutru na den markitiki fu a wega, so taki a wini a wega. Na a srefi fasi, wi de fri fu teki furu bosroiti na ini a libi. Ma te wi e du dati, dan ala ten a vrede fu a Krestes musu de leki „refri” na ini wi libi. Soleki fa a vertaler Edgar J. Goodspeed e taki, dan a musu de „a moro prenspari sani di abi krakti tapu” wi ati.

3. San na „a vrede fu Krestes”?

³ San na „a vrede fu a Krestes”? Dati na a korostu firi, a vrede di wi e kisi na ini wi ati, te wi e tron disipel fu Yesus èn te wi kon sabi taki Yehovah Gado èn so srefi en Manpikin lobi wi èn e feni wi bun. Di Yesus ben de fu libi den disipel fu en, a ben taigi den: „Mi e gi unu a vrede fu mi. . . . No meki un ati kon bruya èn no meki a krempi fu frede ede” (Yohanes 14:27). So wan 2000 yari kaba, den getrow salfu memre fu a skin fu Krestes abi a vrede dati. Na ini a ten disi, so srefi den kompe fu den, den „tra skapu”, abi a vrede dati (Yohanes 10:16). A vrede dati musu abi furu krakti tapu wi ati. Te wi e kisi hebi tesi, dan a vrede dati kan yepi wi fu no frede pasa marki, noso fu no broko wi ede tumusi. Meki wi luku fa a e yepi wi te wi e kisi fu du nanga onregtfardikifasi, te wi abi furu broko-ede, èn te wi e feni taki wi no warti.

Te Wi E Kisi fu Du Nanga Onregtfardikifasi

4. (a) Fa Yesus ben kon si taki onregtfardiki sani e pasa? (b) Fa den Kresten tyari densrefi te sma ben handri na wan onregtfardiki fasi nanga den?

⁴ Kownu Salomo ben kon si taki: „A wan libisma tiri a tra libisma nanga ogri bakapisi gi en” (Preikiman 8:9). Yesus ben sabi taki den wortu disi tru srefisrefi. Di a ben de na ini hemel, dan a ben si taki libisma ben handri nanga makandra na wan tumusi onregtfardiki fasi. Di a ben de na grontapu, dan ensrefi ben kisi fu du nanga a moro onregtfardiki sani di oiti ben miti wan sma. Ala di a no ben abi sondu, toku den ben krutu en leki wan sma di ben kosi Gado, èn den ben kiri en leki a ben de wan ogriman (Mateus 26:63-66; Markus 15:27). Na ini a ten disi, furu onregtfardiki sani e pasa doronomo èn tru Kresten pina srefisrefi fu di den de „sani di no wan nâsi no wani si na ai” (Mateus 24:9). Den ben ondrofeni kefalek takru sani na ini den strafuman-kampu pe den Nazi ben kiri furufuru sma, so srefi na ini den kampu fu a Soviet Gulag (dati ben de den strafuman-kampu fu Rosiakondre pe den ben seni sma fu go wroko). Boiti dati, grupu  sma ben bondru kon na wan fu du den ogri. Trawan ben krutu den èn ben fruteri soso lei fu den. Ma awinsi den ondrofeni den takru sani disi, toku a vrede fu a Krestes ben yepi den fu tanapu kánkan. Den handri neleki Yesus di Bijbel e taki fu en: „Te den ben skempi en, a no ben skempi den baka. Te a ben pina, a no ben pramisi den fu du den ogri, ma a ben tan saka ensrefi na ondro a wan di e krutu sma na wan regtfardiki fasi.”—1 Petrus 2:23.

5. San wi musu prakseri na a fosi presi, te wi yere taki wan sani pasa na ini a gemeente di gersi wan onregtfardiki sani?

⁵ Meki wi prakseri wi eigi situwâsi. Kande wi e feni taki sma no handri na wan regtfardiki fasi nanga wan sma na ini a Kresten gemeente. A kan de so, taki a sani dati e meki wi firi leki Paulus, di ben taki: „Suma naki futu fadon, èn mi no e kisi hebi atibron?” (2 Korentesma 11:29) San wi kan du? Wi musu aksi wisrefi: ’Den ben handri trutru na wan onregtfardiki fasi nanga a sma?’ Nofotron wi no sabi finifini san pasa. Te wi e arki wan sma di e taki dati a sabi trutru san pasa, dan dati ben sa kan meki wi kisi atibron. Nanga reti, Bijbel e taki: „Ibriwan sma di no abi ondrofeni, e bribi ibri wortu” (Odo 14:15). Fu dati ede wi musu luku bun san wi e bribi.

6. San wi kan du te a gersi leki wan onregtfardiki sani pasa na ini a gemeente?

⁶ Ma kon wi taki dati wi e feni taki sma handri na wan onregtfardiki fasi nanga wi. Fa wan sma ben o handri efu a abi a vrede fu a Krestes na ini en ati? Kande a de fanowdu fu taki nanga a sma te wi e feni taki a du wi ogri. Baka dati, na presi taki wi e fruteri na afersi disi na iniwan sma di wani arki, dan fu san ede wi no e fruteri Yehovah na ini begi san pasa? Fu san ede wi no e frutrow na en tapu dati a sa sorgu taki sani e poti kon reti baka? (Psalm 9:10; Odo 3:5). Baka di wi du dati, dan wi ben sa kan bosroiti na ini wi ati fu no prakseri a tori moro èn fu „tan tiri” (Psalm 4:4). Na ini moro furu kefal, wi kan fiti a frumane fu Paulus: „Tan frudrage makandra èn gi makandra pardon na wan fri fasi efu a wan abi wan sani fu kragi fu a trawan. Soleki fa Yehovah gi unu pardon na wan fri fasi, na so unu musu du tu.”—Kolosesma 3:13.

7. San wi musu hori na prakseri ala ten te wi e handri nanga den brada nanga sisa fu wi?

⁷ Ma awinsi san wi e du, wi musu hori na prakseri taki ala di wi no man kenki san pasa, toku wi kan luku bun san wi e du na ini wan situwâsi pe a gersi taki sma handri na wan onregtfardiki fasi. Efu wi no e handri na wan yoisti fasi, dan dati kan de wan moro bigi kefar gi a vrede fu wi leki a sani di pasa srefi (Odo 18:14). A ben sa kan meki srefi taki wi e naki futu èn no e go na a gemeente moro te leki wi e feni taki a tori poti kon reti baka. A psalm skrifiman ben skrifi taki „no wan sani no de di e meki” den wan di lobi den wet fu Yehovah „naki futu fadon” (Psalm 119:165). Fu taki en leti, ten na ten ibri sma e kisi fu du nanga onregtfardikifasi. Noiti yu musu meki den sani disi tapu yu fu dini Yehovah. Na presi fu dati, meki a vrede fu a Krestes basi yu ati.

Te Wi Abi Furu Broko-ede

8. San na wan tu sani di e gi sma broko-ede, èn san kan pasa te sma abi furu broko-ede?

⁸ Broko-ede na wan pisi fu a libi na ini den „lasti dei” disi (2 Timoteus 3:1). A tru taki Yesus ben taki: „Unu no musu broko un ede nanga un sili, fu san unu sa nyan noso san unu sa weri na un  skin” (Lukas 12:22). Ma a broko-ede di sma abi, no de a bakapisi nomo fu a suku di sma e suku fu kisi materia sani. Lot ben de „ini bigi banawtu” bika den sma fu Sodom ben libi wan doti libi (2 Petrus 2:7). Paulus ben abi furu broko-ede fu di a ben abi „a sorgu gi ala den gemeente” (2 Korentesma 11:28). A neti bifo a dede, Yesus ben de na ini banawtu srefisrefi taki „a sweti fu en ben kon tron leki dropu brudu di ben fadon na gron” (Lukas 22:44). A de krin taki te wan sma e broko en ede nanga wan sani, dan a no ala leisi dati e sori taki a bribi fu en swaki. Ma awinsi san e gi wi broko-ede, efu a de wan sani di e gi wi furu broko-ede gi wan langa pisi ten, dan a kan puru a vrede na ini wi ati. Son sma ben broko den ede so furu, taki den ben firi leki den no man tyari den frantwortu moro di den abi leki sma di e dini Yehovah. Bijbel e taki: „Broko-ede na ini na ati di e bruya wan sma, na dati sa meki na ati boigi go na ondro” (Odo 12:25). San wi kan du dan efu wi e broko wi ede tumusi nanga wan sani?

9. San na wan tu sani di wi kan du fu yepi wi fu no broko wi ede tumusi furu? Sortu sani di e gi sma broko-ede, wi no kan puru?

⁹ Na ini son kefal, wi ben sa kan du sani di kan yepi wi na ini a situwâsi. Efu wi e broko wi ede tumusi fu di wi abi wan problema nanga a gosontu fu wi, dan a ben sa de wan koni sani fu poti prakseri na dati, ala di wisrefi musu teki wan bosroiti na ini den afersi disi * (Mateus 9:12). Efu wi abi tumusi furu frantwortu, dan kande wi kan meki trawan tyari wan tu fu den frantwortu disi gi wi (Exodus 18:13-23). Ma fa a de nanga papa nanga mama? Den abi hebi frantwortu di den no kan meki trawan tyari gi den. Fa a de nanga wan Kresten di e libi nanga wan trowpatna di e gens en? Fa a de nanga wan osofamiri di abi furu problema na ekonomia sei, noso di e libi na wan presi pe orloku de? A de krin taki wi no man puru ala sani di e gi broko-ede na ini a seti fu sani disi. Toku wi kan tan abi a vrede fu a Krestes na ini wi ati. Fa?

10. Na sortu tu fasi wan Kresten kan suku yepi fu no broko en ede tumusi?

¹⁰ Wan fasi fa wi kan du dati na fu suku trowstu na ini a Wortu fu Gado. Kownu David ben  skrifi: „Te den prakseri fu mi di e trubu mi, ben kon furu na inisei fu mi, dan a ben de den eigi trowstu fu yu di ben bigin boboi mi sili” (Psalm 94:19). Den „trowstu” fu Yehovah de fu feni na ini Bijbel. Te wi e gebroiki a Buku dati doronomo di Gado meki sma skrifi, dan dati sa yepi wi fu tan abi a vrede fu a Krestes na ini wi ati. Bijbel e taki: „Trowe yu hebi na Yehovah srefi tapu, èn ensrefi sa horibaka gi yu. Noiti a sa meki taki a regtfardikiwan e degedege” (Psalm 55:22). Na a srefi fasi, Paulus ben skrifi: „No broko un ede nanga no wan sani, ma na ini ibriwan sani, meki Gado kon sabi san unu wani fu di unu e begi èn e aksi en tangitangi ala di unu e taigi en grantangi tu; èn a vrede fu Gado, di pasa ala suma frustan, sa kibri un ati nanga un frustan nanga yepi fu Krestes Yesus” (Filipisma 4:6, 7). Te wi e begi fayafaya èn doronomo, dan dati sa yepi wi fu tan abi a vrede na ini wi ati.

11. (a) Fa Yesus ben de wan tumusi moi eksempre gi wi ini a tori fu begi? (b) Fa wi musu si a begi di wi e begi?

¹¹ Yesus ben de wan tumusi moi eksempre gi wi ini a tori disi. Ten na ten a ben taki na ini begi nanga en hemel Tata furu yuru langa (Mateus 14:23; Lukas 6:12). Begi ben yepi en fu horidoro na ini den moro ogri tesi. A neti bifo a dede fu en, dan banawtu ben kon hebi na en tapu srefisrefi. San a ben du? A ben begi „nanga moro faya” (Lukas 22:44). Iya, a volmaakti Manpikin fu Gado ben de wan man di ben begi bun furu. Fu dati ede den bakaman fu en di no de volmaakti, musu meki moro muiti srefi fu kon abi a gwenti fu begi! Yesus ben leri den disipel fu en „fu begi ala ten èn fu no tapu” fu du dati (Lukas 18:1). A de wan tumusi prenspari sani fu begi, bika wi e taki nanga a Sma di sabi wi moro bun leki wi sabi wisrefi (Psalm 103:14). Efu wi wani tan abi a vrede fu a Krestes na ini wi ati, dan wi musu „begi doronomo”.—1 Tesalonikasma 5:17.

Dwengi a Firi Taki Wi No Man Du Ala San Wi Wani Du

12. San kan meki taki son sma e firi taki a diniwroko fu den no bun nofo?

¹² Yehovah e si ibriwan fu den futuboi fu en leki warti sma (Hagai 2:7). Ma toku furu sma e feni en wan muilek sani fu erken dati. Son sma lasi-ati fu di den kon owru, fu di den kon abi moro frantwortu na ini na osofamiri, noso fu di a gosontu fu den e go na baka. Kande tra sma e firi taki den no man du so furu, bika den ondrofeni kefalek takru sani na ini a pikin-nengreten fu den. A kan de so tu taki trawan brokosaka, fu di den e tweifri efu Yehovah trutru sa gi den pardon fu den fowtu di den ben meki fosi (Psalm 51:3). San den kan du te den abi den firi disi?

13. Sortu trowstu Bijbel e gi den wan di e firi taki den no warti?

¹³ A vrede fu a Krestes sa gi wi a dyaranti taki Yehovah lobi wi. Wi kan kisi a vrede dati baka na ini wi ati, te wi e prakseri dipi fu a fasi fa Yesus ben denki. Noiti Yesus ben taki dati Gado e teki a wroko fu wi gersi nanga a wroko fu trawan fu bosroiti efu a feni wi bun (Mateus 25:14, 15; Markus 12:41-44). Ma a ben poti furu prakseri na loyaalfasi. A ben taigi den disipel: „A sma di horidoro te na a kaba, na en sa kisi frulusu” (Mateus 24:13). Sma ben „wisiwasi” Yesus, ma toku a no ben tweifri taki en Tata ben lobi en (Yesaya 53:3; Yohanes 10:17). A ben taigi den disipel fu en taki a ben lobi den èn taki en Tata ben lobi den tu (Yohanes 14:21). Fu poti moro krakti tapu disi, dan Yesus ben taki: „A no tu pikin fowru den e seri gi wan pisi moni di no warti furu? Ma toku no wan fu den sa fadon na gron sondro taki un Tata sabi. Ma srefi ibri wiwiri na un ede teri. Fu dati ede unu no musu frede: unu warti moro leki furu pikin fowru” (Mateus 10:29-31). Dati trutru e gi wi a dyaranti taki Yehovah lobi wi!

14. Sortu dyaranti wi abi taki Yehovah e si ibriwan fu wi leki warti sma?

¹⁴ Yesus ben taki so srefi: „No wan sma kan kon na mi, boiti efu a Tata, di ben seni mi kon, e hari en kon” (Yohanes 6:44). Fu di Yehovah hari wi kon fu waka baka Yesus, meki a musu de so taki A wani dati wi e kisi frulusu. Yesus ben taigi den disipel fu en: „Mi Tata di de na ini hemel, no wani srefisrefi taki wan fu den pikinwan disi e kisi pori” (Mateus 18:14). Fu dati ede, efu yu e dini nanga yu heri ati, dan yu kan prisiri nanga den tumusi bun wroko san yu e du (Galasiasma  6:4). Efu den fowtu di yu ben meki fosi e trobi yu, dan yu kan de seiker taki Yehovah sa gi „furu” pardon na den wan di abi trutru berow (Yesaya 43:25; 55:7). Efu iniwan tra sani e meki yu lasi-ati, dan yu musu hori na prakseri taki „Yehovah de krosibei fu den wan di den ati broko; èn den wan di masi na ini yeye, a e frulusu”.—Psalm 34:18.

15. (a) Fa Satan e pruberi fu puru a vrede di wi abi na ini wi ati? (b) Sortu frutrow wi kan abi na ini Yehovah?

¹⁵ Satan trutru wani puru a vrede di yu abi na ini yu ati. Na en meki taki wi kisi a sondu, èn wi alamala musu feti nanga dati (Romesma 7:21-24). Fu tru, a wani meki yu bribi taki na onvolmaaktifasi fu yu e meki taki a diniwroko di yu e du gi Gado, no bun nofo. Noiti yu musu meki Didibri broko yu saka! Yu musu kon sabi san Satan abi na prakseri. A sabi di yu sabi den triki fu en, musu gi yu a fasti bosroiti fu horidoro (2 Korentesma 2:11; Efeisesma 6:11-13). Hori na prakseri taki „Gado bigi moro wi ati èn a sabi ala sani” (1 Yohanes 3:20). Yehovah no e si den fowtu fu wi nomo. Ma a e si te na ini wi ati so srefi, so taki a kan si san e buweigi wi fu dini en èn san wi abi na prakseri. Fu dati ede, meki den wortu fu a psalm skrifiman trowstu yu: „Yehovah no sa drai en baka gi en pipel èn a no sa libi en eigi gudu.”—Psalm 94:14.

Wi De Wán na ini a Vrede fu a Krestes

16. Na sortu fasi wi no de wi wawan te wi e meki muiti fu horidoro?

¹⁶ Paulus ben skrifi taki wi musu meki a vrede fu a Krestes basi wi ati bika wi ben „kisi a kari fu kon na en na ini wán skin”. Den salfu Kresten di Paulus ben skrifi wan brifi gi den, ben kisi a kari fu tron wan pisi fu a skin fu Krestes, soleki fa a fikapisi fu den salfuwan na ini a ten disi kisi a kari dati. Den kompe fu den, den „tra skapu”, kon makandra nanga den èn den de leki „wán ipi” ondro „wán skapuman”, Yesus Krestes (Yohanes 10:16). Den alamala makandra de wan „ipi” fu milyunmilyun sma na heri grontapu di e meki a vrede fu a Krestes basi na ati fu den. A sabi di wi sabi taki wi no de wi wawan, e yepi wi fu horidoro. Petrus ben skrifi: „Kakafutu gi [Satan], hori fasti na a bribi, fu di unu sabi taki den srefi sani disi e miti a heri libimakandra fu un brada na grontapu, leki wan fasi fu kisi pina.”—1 Petrus 5:9.

17. Sortu reide wi abi fu meki a vrede fu a Krestes basi wi ati?

¹⁷ So bun, meki wi alamala tan wroko fu tyari vrede kon, a tumusi prenspari froktu fu Gado en santa yeye (Galasiasma 5:22, 23). Den wan di Yehovah e feni bun fu di den de sondro flaka èn sondro fowtu èn na ini vrede, sa kisi têgo libi te fu kaba na ini wan paradijs grontapu, pe regtfardikifasi sa de (2 Petrus 3:13, 14). So bun, wi abi furu reide fu meki a vrede fu a Krestes basi wi ati.

[Futuwortu]

Yu E Memre Disi Ete?

• San na a vrede fu a Krestes?

• Fa a vrede fu a Krestes kan basi wi ati te wi e kisi fu du nanga onregtfardikifasi?

• Fa a vrede fu a Krestes e yepi wi, te wi e broko wi ede nanga wan sani?

• Fa a vrede fu a Krestes e trowstu wi te wi e firi taki wi no warti?

[Aksi fu a tori disi]

[Prenki na tapu bladzijde 15]

Di Yesus ben tanapu na fesi den sma di ben krutu en, dan a ben sori krinkrin taki a ben tan getrow na Yehovah dorodoro

[Prenki na tapu bladzijde 16]

A trowstu fu Yehovah kan frulekti a banawtu di wi e firi. A de neleki a brasa fu wan lobi-ati papa

[Prenki na tapu bladzijde 18]

Te wi e horidoro, dan dati e meki wi warti srefisrefi na Gado ai