Wi E Du Ala San Wi Man!

„YU MUSU du ala san yu man.” Wan leisi wan memre fu a Tiri Skin fu Yehovah Kotoigi ben gi wan zendeling a rai dati. Ma fu san ede a ben gi a rai dati na wan preikiman di abi furu ondrofeni èn di sabi taki a musu du dati? A no de so taki zendeling na sma di abi deki-ati èn di ala dei e kisi fu du nanga insekt, sneki, faya son, siki, nanga difrenti sortu problema?

Fu taki en leti, zendeling fu Yehovah Kotoigi de neleki ala tra man nanga uma. Den de Kresten di abi furu lobi gi Yehovah èn gi tra sma, èn dati meki taki den bosroiti fu dini na ini tra kondre. Den e meki furu muiti fu dini Yehovah so bun leki den man, ala di den abi a frutrow taki a sa gi den a krakti.—Efeisesma 6:10.

Fu man leri moro fu a zendelingwroko, dan meki wi prakseri taki wi e go na wan zendeling-oso na ini West-Afrika fu wán dei.

Wan Dei na ini a Zendelingwroko

Pikinmoro, dan na 7:00 yuru mamanten. Wi doro na a zendeling-oso biten gi a takimakandra fu a tekst fu a dei di teki puru fu Bijbel. Den tin zendeling e gi wi wan switikon, dan den e meki presi gi wi so taki wi kan sidon na a tafra pe den sa nyan. Di wi kon sabi makandra moro bun, dan wan fu den sisa di de wan zendeling furu yari kaba, bigin fruteri wan lafutori di a ondrofeni na ini a preikiwroko. Ma wi e bigin taki moro safri te a fesiman fu a takimakandra fu a dei dati e memre a prisiri grupu taki a ten doro fu luku a deitekst. Den sa hori a takimakandra na ini Fransitongo. Ala di wi no man taki a tongo dati, toku a fasi fa den zendeling fu tra kondre e taki, e sori krin taki den kon sabi taki a tongo heri bun.

Baka a Bijbel takimakandra, dan wan brada e begi nanga en heri ati. Now a ten doro fu nyan. Wi e furu a komki fu wi nanga wan sani di meki fu karu, dan a zendeling di ben sidon leti na wi sei ben taigi wi fu poti wan tu pisi bakba na tapu a nyanyan. Wi e fruteri en taki wi no lobi bakba, ma a e taigi wi taki wi o prakseri tra fasi efu wi tesi den bakba fu a kondre disi. So bun, wi e poti wan tu pisi tapu a nyanyan fu wi. A ben abi leti fu tru! Den bakba disi switi kefalek! Den e gi wi a dyaranti tu taki den langa brede di poti na tafra, baka di mamanten na ini wan pikin wenkri leti abrasei fu a zendeling-oso.

Baka di wi kaba nyan, dan wi sa gowe makandra nanga wan zendeling trowpaar di wi sa kari Ben nanga Karen. Wi yere taki furu sma na ini a kondre disi fu West-Afrika e teki a boskopu. Wi wani sabi efu dati de so trutru.

Te wi doro na a bushalte, dan furu sma de drape e wakti. Fosi yu denki, dan den zendeling mati fu wi e taki-go-taki-kon nanga wan uma èn a manpikin fu en fu wan Bijbel tori. Fu di wi  no man taki Fransitongo, meki wi e tanapu drape nomo e lafu pikinso! Di na uma teki wan tu Waktitoren nanga Ontwaakt! tijdschrift, dan a bus doro. Ala sma ben pruberi fu go na ini a bus na a srefi ten! Ala di wi e pusu wisrefi go na ini a bus, dan wi e firi fa den sma na wi baka e pusu wi. A de wan tyalensi fu no fadon te wi e waka go na bakasei fu a bus. Te a man e start a bus, dan wi e hori steifi bika a pasi o takru. Ten na ten a bus e stop wan presi, dan moro sma e kwinsi densrefi kon na ini a bus. Wi e luku den tra sma ini a bus, e lafu pikinso, dan den e lafu baka. Wi ben winsi taki wi ben man taki nanga den!

Ala di a bus e rei go doro, dan wi e luku komoto na a fensre fu si san den sma na strati e du. Tu uma di e waka makandra e tyari hebi lai na tapu na ede fu den. Wan fu den e tyari wan bigi beki nanga watra. Wan man di e pruberi fu seri sani, bradi wan krosi na sei strati. A seti wan tu bunkopu linga nanga keti na tapu di a wani seri. Na ala sei, sma de fu si di e bai noso di e seri pikinmoro ala san de fu bai noso seri.

Wantronso, dan Ben di ben tanapu na mi sei, ben firi wan sani e tyopu en na en futu. San na dati? Iya, a bus furu trutru, ma agen a e firi wan sani e tyopu en. Ben man luku san de na ondrosei. Wan saka ben de leti drape na en futu nanga wan libilibi kwakwa na ini. Wanwan leisi a e pusu en ede go na dorosei, dan a e tyopu Ben! A e fruteri wi taki a sma di abi a kwakwa e tyari en go na wowoyo kande fu seri en.

Te wi doro na a kontren pe wi o wroko, dan wi breiti fu yere taki wi e go na wan fu den birti di yu gwenti fu si na Afrika. Te wi doro na a fosi oso, dan Ben e klapu tranga ini en anu fu kari na ososma. Na so den sma na ini a pisi dati fu grontapu e „naki tapu den doro” fu sma oso. Wan yonkuman e kon na doro, a e taki dati a abi furu fu du, ma a e aksi wi efu wi kan kon moro lati.

Na a tra oso, wi e miti wan uma di e taki wan tongo di Ben no e frustan. Na uma e kari en manpikin, dan a e aksi en fu taki san Ben e fruteri. Te Ben kaba taki, dan na uma e teki wan brochure di abi fu du nanga Bijbel tori, èn a manpikin fu en e pramisi taki a sa fruklari dati gi en mama. Na a di fu dri oso, wan tu yongu sma e sidon na ini a fesi-dyari. Tu fu den esi-esi e opo fu den sturu so taki den fisitiman kan sidon. Baka dati, den abi wan moi takimakandra fu a gebroiki di sma e gebroiki a kroisi na ini na anbegi fu den. Den e meki mofo fu taki moro fara a wiki di e kon. Now a ten doro fu go baka na a yonkuman fu a fosi oso di ben abi furu fu du. Na wan noso tra fasi a yere kaba fu a takimakandra di wi ben abi nanga den yongu sma di de moro fara na ini a strati. A wani aksi furu sani fu Bijbel èn a e aksi efu a kan kisi wan bijbelstudie. Baka di Ben luku tapu a schema fu en, dan a e agri fu kon baka tapu a srefi ten a wiki di e kon. Te wi de na pasi fu go baka na a zendeling-oso fu nyan, dan Ben nanga Karen e fruteri taki den abi fu seti a bijbelstudie wroko fu den heri bun, bika a makriki fu bigin moro bijbelstudie leki san den man hori.

Wi e prèise den taki den man taki a Fransitongo heri bun. Ben e fruteri taki en nanga Karen e dini leki zendeling siksi yari kaba, èn taki now fosi den e bigin fu taki a Fransitongo bun. Den e taki dati a no makriki srefisrefi fu leri taki wan nyun tongo, ma a horidoro di den horidoro meki taki den kisi a koni dati.

Te a de 12:30 yuru bakadina, dan ala den zendeling e kon makandra fu nyan. Wi kon frustan taki ibri dei wan tra zendeling e kisi a wroko fu seti nyanyan na mamanten èn na bakadina èn fu wasi den dotisani baka dati. Tide, wan fu den zendeling meki wan kefalek switi sani di a sabi meki heri bun — baka fowru, baka patata, nanga tomati moksi nanga tra gruntu!

San Ben nanga Karen o du di bakadina? Den e fruteri taki ala sma e go kibri  gi a son fu 1:00 yuru bakadina te go miti 3:00 yuru bakadina. So bun, den zendeling e gebroiki wan pisi fu a ten dati fu studeri, noso fu rostu pikinso. Wi no e fruwondru te Karen e taigi wi taki nyun zendeling e kon gwenti a sani disi heri esi!

Baka te wi rostu, dan wi e go baka na ini a preikiwroko. Someni langa kaba, Ben pruberi fu taki nanga wan man di ben wani sabi moro, ma a no de na oso ete. Ma tu yonkuman e kon na doro te Ben e klapu ini en anu. Den e taigi wi taki na ososma fruteri den taki Ben ben kon na en. Den ben musu aksi efu den kan kisi a yepisani fu studeri Bijbel, namku a buku Sabi di e tjari joe go na têgo libi. Wi breiti fu libi a buku dati na baka gi den. Baka dati, wi e teki wan bus di o tyari wi go na wan kontren pe Karen sa hori wan bijbelstudie nanga wan uma di wani sabi moro.

Ala di wi e rei na ini strati di lai sma, dan Karen e fruteri wi taki a ben miti na uma wan dei di den ben rei na ini wan taxi makandra nanga ete wan tu tra sma. Karen ben gi na uma wan traktaat fu leisi te den ben de na pasi. Na uma ben leisi a traktaat, dan a aksi efu a ben kan abi wan trawan. A ben leisi a wan dati nanga moro faya. Di den doro, dan Karen meki mofo fu go na a oso fu na uma. A bigin wan bijbelstudie di e waka bun, èn den e gebroiki a brochure San Gado e aksi foe wi? Tide, Karen e go taki nanga en fu a di fu feifi les na ini a brochure dati.

Wi prisiri srefisrefi fu a dei na ini a preikiwroko, ma wi abi wan tu aksi ete di abi fu du nanga a zendelingwroko. Den sma di e sorgu wi, e taigi wi taki den sa meki wan pikin nyanyan gi wi te wi drai go na oso, dan den sa piki den aksi fu wi.

Fa Den E Tan Horidoro na ini a Wroko fu Den

Wi e kon sabi moro fu a libi fu wan zendeling, ala di wi e prisiri fu nyan den baka eksi, Fransi brede nanga kasi. Nofotron, munde na wan dei te den zendeling e rostu noso e du den eigi sani. Moro furu fu den zendeling e gebroiki pikinso fu a ten fu a dei dati fu skrifi brifi go na den famiriman nanga mati fu den. A de tumusi prenspari gi den fu sabi san e pasa na ini den eigi kondre, èn den zendeling lobi fu seni brifi èn fu kisi brifi.

Fu di zendeling e libi èn e wroko nanga makandra na ini wán oso, dati meki a prenspari fu den hori a matifasi fu den. Den kan du dati te den abi demakandra nanga den tra zendeling èn te den e taki fu yeye afersi nanga makandra. Fu dati ede, boiti taki den seti den eigi sani fu studeri Bijbel, dan munde neti den zendeling e studeri Bijbel nanga a Waktitoren tijdschrift. Ben e sori taki, te zendeling fu difrenti kondre nanga kulturu e libi nanga makandra, dan wanwan leisi a kan pasa taki den no sa agri fu pikin sani ede. Dati de so, fu di a fasi fa den e si sani e difrenti. Ma a famiri studie di Gado seti, e yepi den fu tan abi vrede nanga makandra èn fu abi wánfasi na den mindri. Ben e sori tu taki a de wan bigi yepi so srefi te wan sma no e denki tumusi furu fu ensrefi.

A de prenspari tu fu abi sakafasi. Zendeling no e go na tra kondre fu sma dini den, ma fu  den dini sma. Den zendeling mati fu wi kon si taki wan fu den moro muilek sani fu taki na ini iniwan sortu tongo na „Mi e aksi pardon”. A de wan muilek sani, spesrutu te wan sma e aksi pardon gi wan sani di a no ben taki noso du fu espresi. Ben e memre wi na a eksempre fu Bijbel, namku Abigail. Na uma dati ben aksi pardon gi a masra fu en di ben handri na wan grofu fasi. Na so wan fasi a ben meki a situwâsi di ben kan abi wan takru bakapisi, kon kowru (1 Samuèl 25:23-28). Wan prenspari sani di wan bun zendeling musu man du, na „fu libi na ini vrede”.—2 Korentesma 13:11.

Wan leisi na ini a mun, den zendeling e hori wan konmakandra fu taki fu sani di abi fu du nanga a famiri, èn so srefi nanga kenki di e kon na ini a schema fu sorgu a zendeling-oso. Baka dati, den alamala e kisi wan switi sani fu nyan. Wi feni taki a sani disi na wan heri bun seti, èn a nyanyan srefi ben switi tu.

Te wi kaba nyan te mofoneti, dan den e sori wi pikinso fa a zendeling-oso de. Wi kon si taki ala di na oso no de so bigi, toku den zendeling e wroko makandra fu hori en krin srefisrefi. Den abi wan ijskasi, wan wasmasyin nanga wan onfu. Karen e fruteri wi taki na ini den kondre pe a son e skèin faya, soleki a kondre disi na ini West-Afrika, dan sma kan feni apparaat tu di e blo kowru winti kon na ini wan kamra. Bun tanpresi, gosontu nyanyan nanga wan tu pikin sani di den e du fu tan gosontu, e yepi zendeling fu tan gosontu èn fu man tan du furu wroko.

Poti Prakseri na den Bun Sani

Ala den sani di wi si, naki wi ati. Wi ben man du a zendelingwroko tu? Fa wi kan kon sabi seiker efu wi man du dati? Den sma di e sorgu wi e fruteri wi wan tu sani di wi musu hori na prakseri.

Na a fosi presi den e fruteri wi taki Kresten zendeling no e go na tra kondre fu miti span sani nomo. Den e suku opregti sma di wani kon sabi den tumusi moi pramisi fu Gado. Zendeling e wroko no moro mendri leki 140 yuru na ini a preikiwroko. So bun, a prenspari taki den lobi a preikiwroko.

’Ma fa a de dan nanga sneki, lagadisa nanga insekt?’, na so wi e aksi wisrefi. Ben e fruteri wi taki, ala di den sani disi de fu feni na furu fu den presi pe den zendeling musu go, toku den zendeling e kon gwenti den. A e taki moro fara taki ibri presi pe den zendeling e go, abi aparti sani di e meki taki a kondre moi. Baka wan pisi ten den zendeling e luku den bun sani nomo di den e ondrofeni na ini a kondre pe den seni go fu wroko. Wan tu sani di den no ben sabi fosi, heri esi e tron aladei sani gi den. Na ini son kefal den e prisiri srefi fu den sani dati. Wan zendeling, fu eksempre, ben musu go baka na en kondre fu frantwortu ede di a ben abi, baka di a dini furu yari langa na ini West-Afrika. A taki dati a ben moro hebi gi en fu libi a kondre pe a ben poti na wroko, leki di a ben musu libi en eigi kondre someni yari na fesi. A kondre pe a ben go leki zendeling ben tron en oso now.

Yu De Srekasreka?

Ben nanga Karen fruteri wi furu sani di wi musu prakseri fu den. Fa a de nanga yu? Oiti yu prakseri fu dini leki wan zendeling na ini wan tra kondre? Efu yu du dati, dan a kan de so taki yu de moro krosibei na a marki dati leki san yu denki. Wan fu den prenspari sani di yu musu abi na lobi gi a furuten diniwroko èn yu musu lobi fu yepi sma. Hori na prakseri taki zendeling a no sma nanga aparti krakti, ma den de neleki ala tra man nanga uma. Den e du ala san den man fu klari wan tumusi prenspari wroko.

[Prenki na tapu bladzijde 27]

Ibri dei e bigin nanga wan takimakandra fu wan bijbeltekst

[Prenki na tapu bladzijde 28, 29]

Wan prenki fu wan tu presi na ini Afrika

[Prenki na tapu bladzijde 29]

A libi leki wan zendeling kan gi furu satisfaksi