Yu Sa Man Meki Grontapu Tron wan Moro Betre Presi fu Libi?

„Politiek no man meki a fasi fa a libimakandra seti, kon bun baka. Politiek no man meki sma tyari densrefi akruderi den bun gwenti nanga gronprakseri baka di ben de fosi. Srefi den moro bun politiek plan no man meki sma hori densrefi na den markitiki di ben de fosi gi sma di meki mofo fu trow, noso gi sma di de na ini a trowlibi. Den no man meki papa firi taki na den abi a frantwortu fu sorgu gi den pikin fu den. Den no man meki sma kisi atibron noso syen fu wan sani di pasa soleki fa dati ben de fosi . . . Moro furu fu den problema di wi abi na a sei fu bun gwenti nanga gronprakseri no sa man puru nanga yepi fu lantiwet.”

YU E agri nanga den wortu disi di wan man, di ben abi wan hei posisi fosi na lanti fu Amerkankondre, ben taki? Efu dati de so, san na a lusu dan gi den furu problema di de na ini a ten disi; problema di abi fu du nanga gridifasi, a mankeri fu trutru firi fu lobi na ini osofamiri, sma di no man hori densrefi na bun gwenti nanga gronprakseri, a mankeri fu sabi, èn tra sani di e pori a fasi fa a libimakandra seti? Son sma feni taki lusu no de gi den problema, so bun den e tan libi fa den gwenti ala di den e pruberi fu libi so bun leki den man. Trawan e howpu taki wan dei wan tumusi bun tiriman sa opo kon, kande srefi wan kerki fesiman, di sa abi bigi krakti tapu a denki èn a libi fu sma; wan tiriman di sa man sori den a yoisti pasi.

Te yu luku en bun, dan so wan tu dusun yari pasa, sma ben wani poti Yesus Krestes leki den kownu, fu di den ben kon si taki na Gado ben seni en èn taki a ben sa de wan tumusi bun tiriman. Ma di Yesus ben kon frustan san den ben wani du, dan a ben komoto drape esi-esi (Yohanes 6:14, 15). „Mi kownukondre no de wan pisi fu a grontapu disi,” a ben taigi wan tiriman fu Rome bakaten (Yohanes 18:36). Ma furu sma na ini a ten disi no e teki a srefi fasti bosroiti leki Yesus — srefi kerki fesiman di e taki dati den na bakaman fu en no e du dati. Son wan fu den kerki fesiman disi ben pruberi fu meki grontapu tron wan moro betre presi fu libi, kande fu di den ben suku fu abi krakti na tapu den grontapu tirimakti noso fu di densrefi ben teki politiek posisi. Wi e si disi krin te wi e luku fa sani waka na ini den yari baka 1960 te go miti den yari fosi 1980.

Muiti Di Kerki Du fu Meki Grontapu Kon Moro Bun

Na a kaba pisi fu den yari 1960, son sabiman fu kerkitori na ini kondre fu Latijns-Amerika ben opo feti gi den reti fu den pôtiwan nanga den sma di e kisi kwinsi. Fu doro a marki disi den kon nanga wan kerkileri di e taki fu a frulusu di sma o kisi nanga yepi fu politiek. Na ini a leri disi den no e si Krestes moro leki wan frulusuman nomo soleki fa Bijbel e taki fu dati, ma so srefi leki wan frulusuman na politiek èn ekonomia sei. Na ini Amerkankondre, wan tu kerki fesiman di bigin broko den ede nanga a lasi di bun gwenti nanga gronprakseri lasi gowe, ben seti wan organisâsi di den ben kari a Moral Majority. A marki fu den ben de fu yepi sma kisi wan posisi na ini a politiek. Den sma disi ben musu meki gronprakseri di bun gi na osofamiri, kon tron wet. Na ini furu Moslim kondre grupu fu sma de tu di e pruberi fu tapu krukafasi èn takru libi, fu di den e gi sma deki-ati fu hori densrefi finifini na a Koran.

Yu feni taki den muiti disi di sma du meki grontapu tron wan moro betre presi fu libi? Fu taki en leti, buweisi de di e sori taki den bun gwenti nanga gronprakseri e tan go na baka èn a difrenti na mindri pôtiwan nanga guduwan e kon moro bigi. Disi e pasa  srefi na ini kondre pe a kerkileri fu a frulusu di libisma sa tyari, ben de wan prenspari sani.

Fu di a Moral Majority no ben man doro den moro prenspari marki fu den na ini Amerkankondre, meki a sma di ben bigin nanga na organisâsi disi, Jerry Falwell, tapu na organisâsi na ini 1989. Tra organisâsi ben kon na en presi. Ma toku, Paul Weyrich, a fosi sma di gebroiki den wortu „moral majority”, ben skrifi na ini a tijdschrift Christianity Today: „Srefi efu wi e wini a verkiezing, dan toku wi no man du den sani di wi denki taki de trutru fanowdu.” A ben skrifi tu: „A fasi fu libi fu wi e kon moro takru ibri dei. Disi na a moro takru pisi ten ini a libisma historia; sani takru so kefalek taki srefi den politieksma no sabi san den musu du.”

Cal Thomas na wan nyunsuman èn skrifiman. A ben fruteri san en ben si leki a moro bigi fowtu di sma meki di den gebroiki politiek fu pruberi fu meki a libimakandra kon moro bun: „Trutru kenki e kon te sma e kenki, a wan baka a trawan. A no e kon nanga a wini fu politiek afersi, fu di den moro bigi problema fu wi no de na ekonomia sei noso na politiek sei, ma den abi fu du nanga bun gwenti nanga gronprakseri èn nanga yeye afersi.”

Ma fa yu e lusu problema di abi fu du nanga bun gwenti nanga gronprakseri èn nanga yeye afersi na ini wan grontapu pe krin markitiki no de èn pe iniwan sma e bosroiti gi ensrefi san bun noso fowtu? Efu sma di abi makti èn sma nanga bun idea — kande kerki sma noso tra sma — no man meki a grontapu disi tron wan moro betre presi fu libi, dan suma man du dati? Leki fa wi sa si na ini a tra artikel, wan piki de tapu na aksi disi. Te yu luku en bun, dan a piki disi na a moro prenspari reide fu san ede Yesus ben taki dati en Kownukondre no de wan pisi fu a grontapu disi.

 [Sma di abi a reti fu a prenki na tapu bladzijde 2]

KAFTI: Doti watra: WHO/UNICEF photo; globe: Mountain High Maps® Copyright © 1997 Digital Wisdom, Inc.

[Sma di abi a reti fu a prenki na tapu bladzijde 3]

Pikin-nengre: UN photo; globe: Mountain High Maps® Copyright © 1997 Digital Wisdom, Inc.