Yehovah Na wan Gado Di Abi Langa Pasensi

„Yehovah, wan Gado di abi sari-ati nanga bunfasi, di no e kisi atibron esi-esi èn di abi lobi bun-ati . . . pasa marki.”—EXODUS 34:6.

1, 2. (a) Suma ben kisi wini fu a langa pasensi fu Yehovah na ini a ten di pasa? (b) San a wortu „langa pasensi” wani taki?

DEN sma na ini a ten fu Noa, den Israèlsma di ben e teki waka na ini a gran sabana makandra nanga Moses, èn den Dyu di ben de na libi na ini a ten di Yesus ben de na grontapu — den alamala ben e libi na ini difrenti sortu situwâsi. Ma den alamala ben kisi wini fu a srefi lobi-ati eigifasi fu Yehovah, namku a langa pasensi fu en. Fu di a sori na eigifasi disi, meki wan tu fu den ben man tan na libi. A langa pasensi fu Yehovah kan meki wi tan na libi tu.

² San na langa pasensi? O ten Yehovah e sori dati, èn fu san ede? Wortubuku taki dati te wan sma abi „langa pasensi”, dan a e „sori pasensi, fu di a e tan frudrage a fowtu fasi fa wan sma e handri noso a tanteri di wan sma e tanteri en. Na a srefi ten a e tan howpu taki a matifasi di broko, sa kon bun baka.” So bun, wan sma di abi na eigifasi disi, wani doro wan spesrutu marki. A e poti spesrutu prakseri na a tanbun fu a tra sma di meki a problema opo kon. Ma na abi di wan sma abi langa pasensi, no wani taki dati a e feni ogridu bun. Te a sma doro en marki, noso te a no de fanowdu moro fu suku wan lusu gi a problema, dan a sma no e sori langa pasensi moro.

3. Fu san ede Yehovah abi langa pasensi, èn o langa a sa sori dati?

³ Ala di libisma kan abi langa pasensi, toku Yehovah e gi a moro bun eksempre fu na eigifasi disi. Na ini den yari baka di sondu pori a matifasi na mindri Yehovah nanga a libisma famiri di a meki, dan a Mekiman fu wi tan sori pasensi èn a tyari wan lusu kon so taki libisma di abi berow kan kon bun baka nanga en (2 Petrus 3:9; 1 Yohanes 4:10). Ma te Gado doro a marki fu en kaba nanga a langa pasensi fu en, dan a sa krutu den sma di e du ogri fu espresi. Na so fasi a sa tyari wan kaba kon na a disiten godelowsu seti fu sani.—2 Petrus 3:7.

A E Kruderi Nanga den Prenspari Eigifasi fu Gado

4. (a) Fa den Hebrew Buku fu Bijbel e sori san langa pasensi wani taki? (Luku a futuwortu tu.) (b) San a profeiti Nahum e taki fu Yehovah, èn san disi e sori fu a langa pasensi di Yehovah abi?

⁴ Na ini den Hebrew Buku fu Bijbel, tu Hebrew wortu e sori san a wani taki fu abi langa pasensi. Den tu wortu dati trutru wani taki „a langa fu den nosobuba”, èn a Nieuwe-Wereldvertaling vertaal den nanga „no e kisi atibron esi-esi”. * Di a profeiti Nahum ben taki fu a langa pasensi fu Gado, dan a ben taki: „Yehovah no e kisi atibron esi-esi èn a tranga na ini makti, èn Yehovah no sa tapu ensrefi fu gi strafu kwetikweti” (Nahum 1:3). So bun, na abi di Yehovah abi langa pasensi no wani taki dati a no abi makti fu handri, èn a no sa sori langa pasensi fu ala ten. Ala di na almakti Gado abi furu makti, toku a no e kisi atibron esi-esi. Dati na wan krin buweisi taki Gado e sori langa pasensi fu di a wani doro wan spesrutu marki. A abi a makti fu strafu wan sma di e du ogri, ma toku a no e du dati wantewante, bika a wani gi a sma na okasi fu drai en libi (Esekièl 18:31, 32). Fu dati ede, a langa  pasensi fu Yehovah e sori a lobi fu en, èn a e sori taki a sabi gebroiki a makti fu en na wan yoisti fasi.

5. Na sortu fasi a langa pasensi fu Yehovah e kruderi nanga a retidu fu en?

⁵ A langa pasensi fu Yehovah e kruderi so srefi nanga a retidu èn a regtfardikifasi fu en. A sori ensrefi na Moses leki „wan Gado di abi sari-ati nanga bunfasi, di no e kisi atibron esi-esi [noso, di abi langa pasensi] èn di abi lobi bun-ati nanga waarheid pasa marki” (Exodus 34:6). Furu yari baka dati, Moses prèise Yehovah nanga wan singi: „Ala den pasi fu en na retidu. Wan Gado fu getrowfasi, di na en no wan kruktudu de; regtfardiki èn opregti a de” (Deuteronomium 32:4). Iya, Yehovah e gebroiki en sari-ati makandra nanga a langa pasensi, a retidu èn na opregtifasi fu en fu man doro den marki di abi na prakseri.

Yehovah Ben Sori Langa Pasensi Bifo a Frudu

6. Fa Yehovah ben sori na wan tumusi moi fasi taki a abi langa pasensi nanga den bakapikin fu Adam nanga Efa?

⁶ Fu di Adam nanga Efa handri na wan fowtu fasi na ini Eden, meki fu ala ten den pori a warti matifasi di den ben abi nanga a lobi-ati Mekiman fu den, Yehovah (Genesis 3:8-13, 23, 24). A drifi di den drifi komoto fu Gado ben abi krakti tapu den bakapikin fu den, di kisi sondu, onvolmaaktifasi nanga dede fu den (Romesma 5:17-19). Ala di a fosi trowpaar sondu fu espresi, toku Yehovah gi den pasi fu kisi pikin. Baka ten, na wan lobi-ati fasi Gado tyari a lusu kon fu yepi den bakapikin fu Adam nanga Efa kon bun baka nanga en (Yohanes 3:16, 36). Na apostel Paulus ben fruklari: „Gado e rikomanderi en eigi lobi na wi na ini disi, taki Krestes dede gi wi, ala di wi ben de sondari ete. O moro a de so dan, taki nanga yepi fu en wi kisi frulusu fu na atibron, fu di Gado ben fruklari taki wi de regtfardiki nanga yepi fu Krestes brudu. Bika efu, di wi ben de feanti, wi ben kon bun baka nanga Gado nanga yepi fu a dede fu en Manpikin, dan, now di wi kon bun baka, o moro wi sa kisi frulusu fu en libi ede.”—Romesma 5:8-10.

7. Fa Yehovah ben sori langa pasensi bifo a Frudu, èn fu san ede a ben abi ala reti fu pori den sma di ben e libi na ini a ten bifo a Frudu?

⁷ Yehovah ben abi langa pasensi na ini a ten fu Noa. Moro leki wan hondro yari bifo a Frudu, „Gado ben si grontapu èn luku! a ben pori, fu di ala skin ben pori en pasi na grontapu” (Genesis 6:12). Toku fu wan pisi ten Yehovah ben abi langa pasensi nanga a libisma famiri. A ben taki:  „A yeye fu mi no sa handri nanga sma te ten di no skotu, bika en srefi na libisma skin. Dati meki den dei fu en sa tron wan hondro nanga twenti yari” (Genesis 6:3). Na ini a pisi ten dati fu 120 yari, Noa ben man trow èn meki pikin. A ben man bow wan ark tu soleki fa a ben kisi a komando fu Gado fu du dati, èn a ben man warskow den sma na ini a ten fu en taki a Frudu ben o kon. Na apostel Petrus ben skrifi: „A pasensi [so srefi, langa pasensi] fu Gado ben e wakti na ini den dei fu Noa, ala di na ark ben e bow, pe wan tu sma nomo, namku aiti sili, ben tyari pasa a watra sondro fu wan ogri miti den” (1 Petrus 3:20). A tru taki den sma di no ben de memre fu Noa en osofamiri, „no ben poti prakseri na” a preiki di a ben e preiki gi den (Mateus 24:38, 39). Ma fu di Yehovah meki Noa bow na ark èn a meki en dini kande wan tu tenti yari langa leki „wan preikiman fu regtfardikifasi”, meki A ben gi den sma na ini den dei fu Noa nofo ten fu kisi berow fu na ogri-ati fasi fa den ben e libi, èn fu go dini En (2 Petrus 2:5; Hebrewsma 11:7). Gado ben abi ala reti srefisrefi fu tyari wan pori kon te fu kaba na den godelowsu sma fu a ten dati.

A Sori Langa Pasensi gi Israèl na wan Tumusi Bun Fasi

8. Fa a de fu si taki Yehovah ben abi langa pasensi nanga a nâsi Israèl?

⁸ Yehovah sori langa pasensi gi Israèl moro leki 120 yari langa. Den ben de a pipel fu Gado moro leki 1500 yari èn a moro bigi pisi fu a ten dati, den ben tan tesi a langa pasensi fu Yehovah fu espresi. Soso wan tu wiki baka di Gado frulusu den komoto na Egipti na wan wondru fasi, den bigin anbegi kruktu gado, èn na so fasi den no ben sori lespeki kwetikweti gi a Frulusuman fu den (Exodus 32:4; Psalm 106:21). Na ini den someni tenti yari baka dati, den Israèlsma ben kragi fu a nyanyan di Yehovah gi den na wan wondru fasi na ini a gran sabana, den ben krutukrutu Moses nanga Aron, den ben opo densrefi teige Yehovah, den ben du hurudu nanga den heiden, èn den ben teki prati srefi na a Bâ-al anbegi (Numeri 11:4-6; 14:2-4; 21:5; 25:1-3; 1 Korentesma 10:6-11). Yehovah ben abi reti fu pori a pipel fu en, ma na presi fu dati a sori langa pasensi.—Numeri 14:11-21.

9. Fa Yehovah sori na ini a ten fu den Krutuman èn na ini a ten di kownu ben e tiri a kondre, taki a de wan Gado di abi langa pasensi?

⁹ Na ini a ten fu den Krutuman, den Israèlsma ben e anbegi kruktu gado ibritron baka. Te den ben du dati, dan Yehovah ben gi den feanti fu den pasi fu feti nanga den. Ma te den ben abi berow èn ben e begi en fu yepi den, dan a ben sori langa pasensi èn a ben seni krutuman go fu frulusu den (Krutubakra 2:17, 18). Na ini a langa pisi ten di kownu ben tiri a kondre, dan wan tu kownu nomo ben de di ben e dini Yehovah fayafaya. Srefi na ondro a tiri fu den getrow kownu, a pipel nofotron ben e moksi a tru anbegi nanga falsi anbegi. Di Yehovah ben seni profeiti go fu warskow a pipel gi sani di kan meki taki den no tan getrow, dan moro furu den ben arki den kruka priester nanga falsi profeiti (Yeremia 5:31; 25:4-7). Iya, den Israèlsma ben frufolgu den getrow profeiti fu Yehovah èn den ben kiri wan tu fu den profeiti srefi (2 Kroniki 24:20, 21; Tori fu den Apostel 7:51, 52). Ma toku Yehovah ben tan sori langa pasensi gi den.—2 Kroniki 36:15.

 Yehovah E Go Doro fu Sori Langa Pasensi

10. O ten Yehovah no ben sori langa pasensi moro?

¹⁰ Ma soleki fa historia e sori, dan Gado no e sori langa pasensi fu ala ten. Na ini 740 b.G.T., a ben gi den Asiriasma pasi fu teki a tin-lo kownukondre Israèl abra èn fu tyari den sma fu a kondre go na ini katibo (2 Kownu 17:5, 6). A ben gi den Babilonsma pasi fu broko go na ini a tu-lo kownukondre Yuda èn fu pori Yerusalem nanga a tempel fu en na ini 607 b.G.T.—2 Kroniki 36:16-19.

11. Fa Yehovah ben sori langa pasensi ala di a ben tyari krutustrafu kon?

¹¹ Ma srefi di Yehovah tyari den krutustrafu fu en tapu Israèl nanga Yuda, toku a no frigiti fu abi langa pasensi. Nanga yepi fu en profeiti Yeremia, Yehovah ben taki na fesi taki a pipel fu en ben o drai kon baka. A ben taki: „Fu di den seibitenti yari na ini Babilon e doro en kaba, meki mi sa poti prakseri na un tapu, èn mi wani meki a bun wortu fu mi kon tru fu di mi e tyari unu kon baka na a presi disi. Èn mi sa meki unu feni mi . . . Èn mi sa tyari un katiboman kon makandra èn mi sa tyari unu komoto fu ala den nâsi èn komoto fu ala den presi pe mi ben seni unu go.”—Yeremia 29:10, 14.

12. Fa a de fu si taki na Gado ben meki a Dyu fikapisi drai go baka na Yuda, fu den sreka densrefi gi a ten di a Mesias ben o kon?

¹² Wan fikapisi fu den Dyu di ben de na ini katibo drai go baka na Yuda trutru, èn den ben seti na anbegi fu Yehovah baka na ini a tempel di den bow agen na ini Yerusalem. Na ini a kontru fu den prakseri fu Yehovah, a fikapisi disi ben o tron neleki „dow fu Yehovah” di e gi kowru-ati èn di e meki sani gro. Den ben o de sma tu di abi deki-ati èn di tranga neleki „wan lew na mindri den meti fu wan busi” (Mika 5:7, 8). A kan de so taki den ben kisi a nen disi trutru na ini a pisi ten fu den Makabeisma. Na ini a pisi ten dati, den Dyu di ben de ondro a tiri fu den Makabeisma, puru den feanti fu den fu a Pramisi Kondre èn den ben seti a tempel baka di kisi pori. Na so wan fasi den sorgu a kondre nanga a tempel, so taki wan tra fikapisi ben sa de srekasreka te a Manpikin fu Gado ben o kon drape leki a Mesias.—Danièl 9:25; Lukas 1:13-17, 67-79; 3:15, 21, 22.

13. Fa Yehovah ben go doro fu abi langa pasensi nanga den Dyu, awinsi den kiri a Manpikin fu en?

¹³ Srefi baka di den Dyu kiri a Manpikin fu Yehovah, toku A ben go doro fu abi langa pasensi nanga den fu dri nanga afu yari ete. Na ini a pisi ten dati, a ben gi den Dyu wawan a kari fu tron wan pisi fu a yeye siri fu Abraham (Danièl 9:27). * Bifo a yari 36 G.T. èn baka a yari dati, wan tu Dyu teki a kari disi. Fu di den du dati, dan leki fa Paulus taki, „wan fikapisi kon de fu si . . . , fu di [Gado] ben frukisi den fu no-frudini bun-ati ede”.—Romesma 11:5.

14. (a) Sortu sma ben kisi a grani tu na ini 36 G.T. fu tron wan pisi fu a yeye siri fu Abraham? (b) San Paulus ben taki fu a fasi fa Yehovah e teki sma fu tron memre fu a yeye Israèl?

¹⁴ A yari 36 G.T. ben de a fosi leisi taki Gado gi sma di no de Dyu noso proselietsma, a moi grani fu tron wan pisi fu a yeye siri fu Abraham. Ibri sma di ben teki a kari dati ben kisi wini tu fu a  bun-ati fu Yehovah di den no ben warti fu kisi, èn den ben kisi wini so srefi fu a langa pasensi fu en (Galasiasma 3:26-29; Efeisesma 2:4-7). A sori di Yehovah e sori langa pasensi fu di a abi sari-ati, e buweisi taki a e handri nanga koni èn taki a abi wan marki na prakseri. Na so fasi a e tyari ala den sma kon na wan di a gi wan kari fu kon na ini a yeye Israèl. Fu di Paulus ben warderi disi, meki a ben taki: „O, a dipi fu a gudu nanga a koni nanga a sabi fu Gado! Den krutu fu en e dangra sma fu frustan èn no wan sma kan kon sabi den pasi fu en!”—Romesma 11:25, 26, 33; Galasiasma 6:15, 16.

A Abi Langa Pasensi fu En Nen Ede

15. San na a moro prenspari reide fu san ede Gado abi langa pasensi? Sortu afersi ben abi ten fanowdu fu man tyari wan lusu kon?

¹⁵ Fu san ede Yehovah e sori langa pasensi? Na a fosi presi a e du dati fu man gi en santa nen glori èn fu sori taki a abi a reti fu tiri (1 Samuèl 12:20-22). Fu di Satan no ben agri nanga a fasi fa Yehovah e gebroiki en makti leki Soeverein, meki wan strei opo kon. Ten ben musu pasa fu man lusu na afersi disi na wan bun fasi na fesi ala mekisani (Yob 1:9-11; 42:2, 5, 6). Fu dati ede, di En pipel ben kisi kwinsi na ini Egipti, dan Yehovah taigi Farao: „Na fu a sani disi ede meki mi meki yu tan na libi, fu sori yu mi krakti èn fu meki mi nen bekènti na heri grontapu.”—Exodus 9:16.

16. (a) Fa a langa pasensi fu Yehovah meki taki a ben man sreka wan pipel fu en nen? (b) Fa Yehovah sa santa a nen fu en èn fa a sa sori taki en abi a reti fu tiri?

¹⁶ Di Paulus ben e fruklari san a langa pasensi fu Gado abi fu du nanga a glori fu En santa nen, dan a gebroiki den wortu di Yehovah ben taigi Farao. Di Paulus du dati, a skrifi: „We, efu Gado, ala di a wani sori en atibron èn a wani meki sma kon sabi en krakti, toku ben frudrage nanga furu langa-pasensi den prapi fu atibron, di fiti fu kisi pori, so taki a ben sa kan meki den gudu fu en glori bekènti na tapu den prapi fu sari-ati, di a ben sreka na fesi fu kisi glori, namku wi, di a no ben kari komoto fu den Dyu wawan, ma so srefi fu den nâsi, dan san? A de leki fa a e taki tu na ini Hosea: ’Den wan di no de mi pipel, mi sa kari „mi pipel”’” (Romesma 9:17, 22-25). Fu di Yehovah sori langa pasensi, meki a ben man teki „wan pipel fu en nen” puru fu den nâsi (Tori fu den Apostel 15:14). Den „santawan” disi abi Yesus Krestes leki na Edeman fu den, èn den de erfgenaam fu a Kownukondre di Yehovah sa gebroiki fu santa En bigi nen èn fu sori taki En abi a reti fu tiri.—Danièl 2:44; 7:13, 14, 27; Openbaring 4:9-11; 5:9, 10.

 A Langa Pasensi fu Yehovah E Tyari Frulusu Kon

17, 18. (a) San ben kan meki taki wi e krutu a langa pasensi fu Yehovah sondro taki wi sabi dati? (b) Fa wi musu si a langa pasensi fu Yehovah?

¹⁷ Sensi a fosi sondu fu libisma di tyari rampu kon, Yehovah sori taki a de wan Gado di abi langa pasensi, èn dati de so te nanga a dei fu tide. Fu di a ben abi langa pasensi bifo a Frudu, meki nofo ten ben de fu warskow sma èn fu bow a sani di ben o yepi den fu kisi frulusu. Ma te fu kaba a no sori pasensi moro, èn a Frudu kon. Na so a de tu na ini a ten disi. Yehovah e sori furu langa pasensi èn a e sori disi moro langa leki san son sma ben fruwakti. Ma a sani disi no musu meki wi lasi-ati. Efu wi ben sa du dati, dan a ben o de neleki wi e krutu Gado taki a e sori langa pasensi. Paulus ben aksi: „Yu e wisiwasi en fu di a abi bunfasi srefisrefi èn fu di a e frudrage èn no e atibron esi? Yu e du dati fu di yu no sabi taki a lobi-ati eigifasi fu Gado e pruberi fu meki yu abi berow?”—Romesma 2:4.

¹⁸ No wan fu wi sabi o furu langa pasensi fu Gado wi abi fanowdu fu man kisi frulusu. Paulus e gi wi a rai fu „tan wroko gi [wi] eigi frulusu nanga frede èn nanga beifi” (Filipisma 2:12). Na apostel Petrus ben skrifi gi tra Kresten: „Yehovah no e draidrai nanga a pramisi fu en, soleki fa son sma e denki taki a e draidrai, ma a abi pasensi nanga unu fu di a no wani taki wan sma e kisi pori, ma a wani taki ala sma musu abi berow.”—2 Petrus 3:9.

19. Na sortu fasi wi kan kisi wini fu a langa pasensi fu Yehovah?

¹⁹ So bun, no meki wi lasi pasensi fu di wi e wisiwasi a fasi fa Yehovah e handri. Na presi fu dati, meki wi du soleki fa Petrus e gi wi leki rai moro fara. A e taki dati wi musu „teki a pasensi fu wi Masra leki frulusu”. A frulusu fu suma? A frulusu fu wi èn di fu den someni tra sma di musu yere a ’bun nyunsu fu a kownukondre’ ete (2 Petrus 3:15; Mateus 24:14). Disi sa yepi wi fu warderi taki Yehovah sori so furu langa pasensi, èn a sa pusu wi fu abi langa pasensi so srefi te wi e handri nanga tra sma.

[Futuwortu]

Yu Kan Tyari Disi Kon na Krin?

• San a wortu „langa pasensi” wani taki na ini Bijbel?

• Fa Yehovah sori a langa pasensi fu en bifo a Frudu, baka a katibo na ini Babilon, èn na ini a fosi yarihondro G.T.?

• San na den prenspari reide fu san ede Yehovah sori langa pasensi?

• Fa wi musu si a langa pasensi fu Yehovah?

[Aksi fu a tori disi]

[Prenki na tapu bladzijde 9]

Fu di Yehovah sori langa pasensi bifo a Frudu, meki sma ben abi nofo ten fu sori berow

[Prenki na tapu bladzijde 10]

Baka di Babilon fadon, dan den Dyu ben kisi wini fu a langa pasensi fu Yehovah

[Prenki na tapu bladzijde 11]

Na ini a fosi yarihondro, den Dyu nanga den sma di no ben de Dyu ben kisi wini fu a langa pasensi fu Yehovah

[Prenki na tapu bladzijde 12]

Kresten na ini a ten disi e gebroiki a ten pe Yehovah e sori langa pasensi ete, na wan bun fasi