Frede Yehovah èn Hori den Komando fu En
Frede Yehovah èn Hori den Komando fu En
„Frede a tru Gado èn hori den komando fu en. Bika disi na a heri plekti fu libisma.”—PREIKIMAN 12:13.
1, 2. (a) Fa frede kan kibri wi? (b) Fu san ede meki papa nanga mama di koni e meki den pikin fu den kisi wan yoisti sortu frede?
„NELEKI fa deki-ati e poti a libi fu wan sma na ini kefar, na so frede e kibri a libi fu wan sma”, na so Leonardo da Vinci ben taki. Te wan sma lobi meki bigi, dan dati kan meki taki a no e poti prakseri na sani di kan du en ogri. Na a tra sei, frede e memre wan sma taki a musu luku bun fa a e du sani. Leki eksempre, efu wi e kon krosibei fu a lanki fu wan dipi olo èn wi e si o dipi wi kan fadon go na ondro, dan moro furu fu wi e hari go nanga baka sondro fu prakseri srefi. Soleki fa wi ben leri na ini na artikel bifo, dan na a srefi fasi wan yoisti sortu frede no wawan e meki wi kisi wan bun matifasi nanga Gado, ma a e kibri wi tu fu ogri no miti wi.
2 Toku a de so taki wi musu leri fu abi frede gi wan tu fu den kefar fu a ten disi. Fu di yongu pikin no man si fu san ede den musu luku bun nanga sani leki faya noso den wagi di e pasa na strati na mindri foto, meki a de so taki makriki den kan kisi bun bigi mankeri. * Papa nanga mama di koni, e meki muiti fu meki den pikin fu den kisi wan yoisti sortu frede, fu di den e tan warskow den gi den ogri di e lontu den. Papa nanga mama sabi heri bun taki a frede disi kan kibri a libi fu den pikin fu den.
3. Fu san ede Yehovah e warskow wi fu sani di kan du wi ogri na yeye fasi, èn fa a e du dati?
3 Na a srefi fasi Yehovah e sori taki a e broko en ede nanga a tanbun fu wi. Leki wan lobi-ati Tata, a e leri wi nanga yepi fu en Wortu èn nanga yepi fu en organisâsi fa fu kisi wini gi wisrefi (Yesaya 48:17). Wan pisi fu a programa di Gado seti fu gi wi leri, abi fu du nanga a warskow di a e warskow wi „ibri tron baka”, gi fowtu di wi kan meki na yeye fasi. A e du disi so taki wi kan kweki a yoisti sortu frede gi den sani dati di kan poti wi yeye fasi na ini kefar (2 Kroniki 36:15; 2 Petrus 3:1). ’Efu sma ben leri na ati fu den nomo fu frede Gado, èn fu hori ala den komando fu en’, dan dati ben o yepi den fu koti pasi gi furu rampu na yeye fasi èn gi a pina di furu sma pina na ini a historia (Deuteronomium 5:29). Fa wi kan leri wi ati fu frede Gado èn fu tan farawe fu sani di kan du wi ogri na yeye fasi, spesrutu na ini ’den lasti dei disi di tranga fu pasa’?—2 Timoteus 3:1.
No Du Ogri
4. (a) San Kresten no musu lobi kwetikweti? (b) Fa Yehovah e firi te wi e sondu? (Luku a futuwortu.)
4 Bijbel e fruteri wi taki „a frede gi Yehovah wani taki fu no lobi ogri kwetikweti” (Odo 8:13). Wan Bijbel wortubuku e taki fu a lobi di sma no lobi san ogri. A e taki, dati a de „wan fasi fa wan sma e firi fu tra sma èn fu sani di a no man frudrage. A e tegu fu den èn a no wani abi noti fu du nanga den. A sma no wani abi no wan matifasi nanga den sma disi tu”. So bun, frede gi Gado abi fu du so srefi nanga a tegu firi di wi abi gi ala sani di Yehovah no feni bun. A firi disi musu de dipi na ini wi ati * (Psalm 97:10). A e meki taki wi no e du ogri, neleki fa wi ben sa hari go nanga baka komoto fu a lanki fu wan dipi olo te wi e bigin frede. Bijbel e taki: „Wan sma di abi frede gi Yehovah no e du ogri.”—Odo 16:6.
5. (a) Fa wi kan meki a frede di wi abi gi Gado èn a lobi di wi no lobi ogri kwetikweti, kon moro tranga? (b) San a historia fu a nâsi Israèl e leri wi ini a tori disi?
5 Wi musu hori na prakseri taki sondu e tyari soso takru bakapisi kon. Disi sa yepi wi fu meki a yoisti sortu frede di wi abi kon moro tranga. A sa yepi tu fu no lobi ogri kwetikweti. Bijbel e gi wi a dyaranti taki wi sa koti san wi ben sai — efu wi ben sai nanga a skin na prakseri noso nanga a yeye na prakseri (Galasiasma 6:7, 8). Fu dati ede meki Yehovah sori wi krinkrin san wi kan fruwakti te wi e poti den komando fu en na wan sei èn te wi e gowe libi a tru anbegi. Efu Gado no ben e kibri a pikin swaki nâsi fu Israèl, dan den ogri-ati tranga folku di ben e lontu den, ben o du san den wani nanga den Israèlsma (Deuteronomium 28:15, 45-48). A sari fasi fa sani waka nanga a trangayesi Israèl, ben skrifi poti finifini na ini Bijbel „leki wan warskow”, so taki wi ben kan leri wan sani èn kon kisi frede gi Gado.—1 Korentesma 10:11.
6. Sortu eksempre fu Bijbel kan leri wi fa fu kisi frede gi Gado? (Luku a futuwortu.)
6 Boiti san ben pasa nanga a nâsi Israèl leki grupu, Bijbel e fruteri wi so srefi fu sani di difrenti sma ben ondrofeni trutru. Den sma disi gi pasi taki dyarusu, hurudu, bigi-ai, noso heimemre teki den abra. * Son wan fu den man disi ben dini Yehovah furu yari langa. Ma na wan prenspari momenti na ini a libi fu den, a frede di den ben abi gi Gado no ben tranga nofo, èn disi ben abi tumusi takru bakapisi gi den. Te wi e denki dipi fu den Bijbel eksempre disi, dan dati kan tranga a fasti bosroiti di wi teki fu no meki den srefi sortu fowtu dati. Fu tru, a ben sa de wan sari sani efu wi sa teki den rai di Gado e gi wi, baka di rampu miti wi! Tra fasi leki fa furu sma e denki, dan ondrofeni a no a moro bun kapten, spesrutu te wi ben handri akruderi wi eigi lostu.—Psalm 19:7.
7. Suma na den sma di Yehovah e gi wan kari fu kon na ini na agersi tenti fu en?
7 Wan tra bigi reide fu san ede wi musu kisi frede gi Gado, na taki wi wani tan hori a matifasi di wi abi nanga en. Wi e frede fu du sani di no e plisi Yehovah, fu di wi e si a matifasi di wi abi nanga en leki wan tumusi warti sani. Suma na a sma di Gado e si leki mati, di a ben sa kari kon na ini na agersi tenti fu en? Soso a sma „di e waka sondro fowtu èn e du retidu” (Psalm 15:1, 2). Efu wi e si a matifasi di wi abi nanga wi Mekiman leki wan warti sani, dan wi sa meki tranga muiti fu tyari wisrefi na wan fasi di a e feni bun.
8. Fa son Israèlsma na ini a ten fu Maleaki ben e teki a matifasi di den ben abi nanga Gado leki wan lawlaw sani?
8 A sari taki son wan fu den Israèlsma na ini den dei fu Maleaki ben si a matifasi di den ben abi nanga Gado leki wan lawlaw sani. Na presi fu sori taki den ben abi frede gi Yehovah èn taki den ben e lespeki en, dan den ben tyari siki malengri meti leki ofrandi na tapu na altari fu en. Na abi di den no ben abi frede gi Gado ben kon na krin tu na ini a fasi fa den ben e denki fu a trowlibi. Fu di son wan fu den ben wani trow nanga moro yongu uma, meki den ben e suku pikinpikin sani fu brokotrow nanga a wefi fu den yongu yari. Maleaki ben taigi den taki Yehovah no lobi kwetikweti te sma e „brokotrow” èn taki a bedrigi fasi fa den ben e denki, ben meki den drifi gowe fu a Gado fu den. Na wan agersi fasi na altari fu Gado ben lai nanga watra-ai fu den uma di ben krei fu pen nanga pina ede. Fa Gado ben kan prisiri nanga den srakti-ofrandi fu den dan? Na abi di den no ben abi lespeki gi den markitiki fu en, ben meki Yehovah aksi: „Pe a frede gi mi de?”—Maleaki 1:6-8; 2:13-16.
9, 10. Fa wi kan sori taki wi e si a matifasi di wi abi nanga Yehovah, leki wan warti sani?
9 Na ini a ten disi, Yehovah e si a pen tu di trowpatna nanga pikin di no fowtu, e ondrofeni. Den e ondrofeni a pen disi fu di masra nanga papa noso kande srefi wefi nanga mama prakseri densrefi nomo èn go libi wan libi fu hurudu. A no de fu taki dati a e hati Gado. Wan sma di de wan mati fu Gado sa si sani leki fa Gado e si den èn a sa du muiti fu tranga a trowlibi fu en. A no sa teki a grontapu fasi fu denki, pe sma e wisiwasi a trowlibi, èn a sa „lowe gi hurudu”.—1 Korentesma 6:18.
10 Na ini a trowlibi èn na ini tra afersi fu wi libi, wi no musu lobi kwetikweti san Yehovah no lobi. Wi musu abi furu warderi so srefi gi a matifasi di wi abi nanga en. Te wi e du den sani disi, dan dati sa meki taki Yehovah feni wi bun. Na apostel Petrus ben taki na wan krakti fasi: „Now mi sabi seiker taki Gado no e teki sma partèi, ma na ini ibri nâsi a sma di e frede en èn di e wroko regtfardikifasi, de bun na en” (Tori fu den Apostel 10:34, 35). Furu eksempre de na ini Bijbel di e sori wi fa frede gi Gado meki sma du san bun na ini den difrenti tesi di den ben kisi.
Dri Sma Di Ben E Frede Gado
11. Fa a situwâsi ben de di Gado taki dati Abraham ben e ’frede En’?
11 Na ini Bijbel wi e leisi fu wan man di Yehovah srefi e kari en mati. A man dati na a famiri-edeman Abraham (Yesaya 41:8). A frede di Abraham ben abi gi Gado ben kisi tesi, di Gado aksi en fu òfer en wan-enkri manpikin Isak leki wan srakti-ofrandi. Gado aksi en disi, ala di A ben pramisi en taki nanga yepi fu Isak, A ben sa meki den bakapikin fu Abraham tron wan bigi nâsi (Genesis 12:2, 3; 17:19). „A mati fu Yehovah” ben sa man pasa a hebi tesi disi? (Yakobus 2:23) Na a momenti di Abraham opo a nefi go na loktu fu kiri Isak, na engel fu Yehovah taki: „No opo yu anu teige a boi èn no du noti nanga en srefisrefi, bika now mi sabi taki yu e frede Gado fu di yu no kibri yu manpikin, a wan-enkri wan fu yu, gi mi.”—Genesis 22:10-12.
12. San meki taki Abraham ben abi frede gi Gado, èn fa wi kan sori taki wi abi a srefi frede dati?
12 Ala di Abraham ben sori na fesi kaba taki en na wan sma di e frede Yehovah, toku na a momenti dati a sori a frede di a ben abi gi Gado, na wan aparti fasi. A de di a ben de klariklari fu òfer Isak no de wan fasi nomo fu sori taki a gi yesi na Gado èn taki a ben lespeki en. Abraham du dati fu di a ben abi a tranga frutrow taki en hemel Tata ben o du san A ben pramisi. A ben o gi Isak wan opobaka srefi, efu dati ben de fanowdu. Soleki fa Paulus skrifi, dan Abraham ’ben abi na overtoigi dorodoro taki san [Gado] pramisi a sa man du tu’ (Romesma 4:16-21). Wi de klariklari fu du a wani fu Gado, srefi te a de fanowdu fu tyari bigi òfer fu man du dati? A de so taki wi abi a tranga frutrow taki a fasi dati fu gi yesi sa tyari winimarki kon di sa tan fu wan langa pisi ten, fu di wi sabi taki Yehovah e „pai den wan di e suku en seryusu”? (Hebrewsma 11:6) Dati na trutru frede gi Gado.—Psalm 115:11.
13. Fu san ede Yosef ben kan taki nanga reti taki a de wan sma di „e frede a tru Gado”?
13 Meki wi go ondrosuku wan tra eksempre fu wan sma di ben sori taki a ben abi trutru frede gi Gado. A sma dati na Yosef. Leki wan srafu na ini na oso fu Potifar, dan ibri dei Yosef ben kisi kwinsi fu du sutadu. Soleki fa a sori, dan no wan fasi no ben de fu kan koti pasi gi a wefi fu en basi, di ben e du sani doronomo fu kisi Yosef fu abi seks-demakandra nanga en. Di na uma „grabu en hori” te fu kaba, dan Yosef „ben lon gowe èn a ben go na dorosei”. San ben meki taki a lowe gowe wantewante gi san no bun? A no de fu taki dati a moro prenspari sani ben de frede gi Gado, a tranga firi di a ben abi fu no du a „bigi ogri disi èn trutru sondu na Gado” (Genesis 39:7-12). Nanga reti Yosef ben kan taki fu ensrefi taki a de wan man di „ben e frede a tru Gado”.—Genesis 42:18.
14. Fa a sari-ati fu Yosef e sori taki a ben abi trutru frede gi Gado?
14 Furu yari baka dati Yosef miti nanga den brada fu en, di ben seri en na wan ogri-ati fasi leki srafu. Na wan makriki fasi a ben kan gebroiki na okasi disi di den ben abi nyanyan tranga fanowdu, fu pai den baka gi na ogri di den ben du nanga en. Ma te wan sma e kwinsi noso e basi trawan, dan dati no e sori taki a abi frede gi Gado (Lefitikus 25:43). So bun, di Yosef ben abi nofo buweisi taki den brada fu en kenki, dan a gi den pardon na wan sari-ati fasi. Neleki fa Yosef ben du, dan a frede di wi abi gi Gado sa yepi wi fu wini ogri nanga bun, ala di a sa kibri wi so srefi fu wi no fadon na ini tesi.—Genesis 45:1-11; Psalm 30:3, 4; Romesma 12:17-21.
15. Fu san ede Yehovah en ati ben prisiri nanga a fasi fa Yob ben e tyari ensrefi?
15 Yob ben de wan tra moi eksempre fu wan sma di ben abi frede gi Gado. Yehovah ben taigi Didibri: „Yu poti yu ati na tapu mi futuboi Yob, taki no wan sma no de leki en na grontapu, wan man sondro fowtu èn opregti, di e frede Gado èn di e wai pasi gi ogri?” (Yob 1:8) A fasi fa Yob ben tyari ensrefi sondro fowtu ben prisiri na ati fu en hemel Tata, furu yari langa. Yob ben e frede Gado fu di a ben sabi taki a de a yoisti sani fu du èn taki a de a moro bun fasi fu libi. Yob ben bari taki: „Luku! Wan sma di e frede Yehovah, koni èn wan sma di no e du ogri abi frustan” (Yob 28:28). Yob ben de wan man di ben trow, dati meki a no ben e poti prakseri na yongu uma na wan fowtu fasi, èn a no ben e abi fowtu denki na ini en ati fu go du sutadu. Ala di a ben de wan gudu man, toku a weigri fu poti en frutrow tapu gudu, èn a koti pasi gi ibri fasi fu afkodrei.—Yob 31:1, 9-11, 24-28.
16. (a) Na sortu fasi Yob ben sori lobi bun-ati? (b) Fa Yob sori taki a ben de klariklari fu gi sma pardon?
16 Frede gi Gado wani taki fu du san bun, ma a wani taki tu fu gowe libi san no bun. Fu dati ede, Yob ben e poti prakseri na wan switi fasi na den sani di den breniwan, den malengriwan, nanga den pôtisma ben abi fanowdu (Lefitikus 19:14; Yob 29:15, 16). Yob ben kon frustan taki ’iniwan sma di no e sori lobi bun-ati gi wan trawan, sa gowe libi a frede gi na Almaktiwan srefi’ (Yob 6:14). Fu no sori lobi bun-ati ben sa kan wani taki dati wi no e gi pardon noso taki wi abi bita-ati gi trawan. Gado ben taigi Yob fu begi gi den dri mati fu en, di ben meki a sari sote (Yob 42:7-10). Wi ben sa kan sori taki wi e gi tra bribiman pardon na a srefi fasi leki Yob, ala di den ben du wan sani kande di hati wi firi? Efu wi begi na wan opregti fasi gi a sma di hati wi, dan dati kan yepi wi trutru fu wini na atibron fu wi. Den blesi di Yob kisi fu di a ben e frede Gado, e sori wi nownow kaba o furu ’a bunfasi de di Yehovah kibri leki wan gudu gi den wan di e frede en’.—Psalm 31:19; Yakobus 5:11.
A Difrenti na Mindri Frede gi Gado Nanga Frede gi Libisma
17. San frede gi libisma kan du nanga wi, ma fu san ede a frede disi no de wan koni sani?
17 Ala di frede gi Gado kan meki taki wi e du san reti, toku na a tra sei, frede gi libisma kan swaki a bribi fu wi. Fu dati ede, di Yesus ben gi den apostel a deki-ati fu de fayafaya preikiman fu a bun nyunsu, dan a ben taigi den: „No frede den wan di e kiri a skin, ma di no kan kiri a sili; ma na presi fu dati, frede a sma di kan kiri a sili nanga a skin na ini Gehèna” (Mateus 10:28). Yesus ben fruklari taki a frede gi libisma no de wan koni sani, bika libisma no man pori a howpu di wi abi gi a ten di e kon. Moro fara, wi e frede Gado fu di wi sabi taki a abi tumusi aparti krakti. Te yu ben sa teki den nâsi gersi nanga a krakti dati, dan den no abi makti srefisrefi (Yesaya 40:15). Neleki Abraham wi no e tweifri srefisrefi na a krakti fu Yehovah fu gi En getrow futuboi wan opobaka (Openbaring 2:10). So bun, wi e taki nanga overtoigi: „Efu Gado de nanga wi, dan suma sa de teige wi?”—Romesma 8:31.
18. Fa Yehovah e pai den wan di abi frede gi en?
18 Awansi a sma di e gens wi na wan famiriman noso wan sma na skoro di e tanteri wi, toku wi sa si taki na „ini a frede gi Yehovah wan tranga frutrow de” (Odo 14:26). Wi kan begi Gado fu a gi wi krakti, fu di wi sabi taki a sa yere wi (Psalm 145:19). Yehovah noiti no e frigiti den wan di abi frede gi en. Nanga yepi fu en profeiti Maleaki, a e gi wi a dyaranti: „Na a ten dati den sma di ben frede Yehovah ben taki nanga makandra, ibriwan fu den nanga en kompe, èn Yehovah tan poti prakseri na den èn a tan arki den. Èn den bigin skrifi wan buku na en fesi fu memre den wan di ben frede Yehovah èn gi den wan di ben e prakseri en nen.”—Maleaki 3:16.
19. Sortu difrenti fasi fu frede sa kon na wan kaba èn sortu wan sa tan fu têgo?
19 A ten kon krosibei taki ala sma na grontapu sa anbegi Yehovah èn taki frede gi libisma no sa de moro (Yesaya 11:9). A frede fu de nanga angri, fu kon siki, fu miti nanga ogridu, noso fu orloku, no sa de moro tu. Ma a frede gi Gado sa tan fu têgo, fu di den getrow futuboi fu en na ini hemel èn na grontapu e tan sori taki den e lespeki en, taki den e arki en, èn e gi en grani (Openbaring 15:4). Fosi a ten dati doro, dan meki wi alamala teki a rai di Salomo e gi: „No meki yu ati dyarusu tapu den sondari, ma de nanga frede gi Yehovah a heri dei langa. Bika efu yu du dati, dan wan tamara sa de, èn yu eigi howpu no sa koti puru.”—Odo 23:17, 18.
[Futuwortu]
^ paragraaf 2 Son bigisma no abi frede moro gi son sani di kan du den ogri, spesrutu te a wroko fu den e meki taki doronomo den e miti nanga situwâsi di kan tyari den libi kon na ini kefar. Di sma ben aksi fu san ede furu temreman lasi wan pisi fu den finga, dan wan man di abi ondrofeni fu meki sani nanga anu ben piki: „Na fu di den no abi frede moro gi den masyin di e sa wan sani koti esi-esi.”
^ paragraaf 4 Yehovah srefi e firi a tegu disi tu. Teki Efeisesma 4:29 leki eksempre, pe a e kari dotitaki „pori wortu”. A Griki wortu di sma gebroiki gi „pori”, abi fu du nanga froktu, fisi, noso meti di no bun moro. So wan wortu e sori wi krinkrin taki wi musu tegu fu grofu taki noso dotitaki. Na a srefi fasi, Bijbel furutron e kari kruktu gado „kunkun” (Deuteronomium 29:17; Esekièl 6:9). A fisti di wi e fisti gi kunkun, noso pupe, e yepi wi fu frustan fa Gado e tegu gi ibri sortu afkodrei.
^ paragraaf 6 Leki eksempre, luku den Bijbel tori fu Kain (Genesis 4:3-12); David (2 Samuèl 11:2–12:14); Gehasi (2 Kownu 5:20-27); nanga Usia (2 Kroniki 26:16-21).
Yu E Memre Disi Ete?
• Fa wi e leri fu no lobi ogri kwetikweti?
• Fa son Israèlsma na ini a ten fu Maleaki ben sori taki den ben e si a matifasi di den ben abi nanga Yehovah, leki wan lawlaw sani?
• San wi kan leri fu Abraham, Yosef, nanga Yob ini a tori fu frede gi Gado?
• Sortu frede sa tan fu ala ten, èn fu san ede?
[Aksi fu a tori disi]
[Prenki na tapu bladzijde 19]
Papa nanga mama di koni e leri den pikin fu abi a yoisti sortu frede
[Prenki na tapu bladzijde 20]
Neleki fa frede e kibri wi fu ogri no miti wi, na so frede gi Gado e kibri wi fu sani di no bun
[Prenki na tapu bladzijde 23]
Yob ben tan sori a frede di a ben abi gi Gado, srefi di a kisi fu du nanga dri falsi mati
[Sma di abi a reti fu a prenki]
A teki komoto fu a Bijbel vertaling di nen Vulgata Latina, 1795