Papa Nanga Mama—Gi den Pikin fu Unu San Den Abi Fanowdu!

PIKIN musu kisi tiri nanga trangaleri na wan lobi-ati fasi. Den musu kisi dati spesrutu fu a papa nanga mama fu den. Tania Zagury, wan uma di e gi leri na ini Brasyonkondre, e taki fu a tori disi: „Moro furu a de so taki pikin wani meki prisiri. Ma papa nanga mama musu sorgu taki den pikin fu den no e kisi primisi ala ten fu meki prisiri. Efu papa nanga mama no e du dati, dan den no sa man basi den pikin fu den moro.”

Ma furu kondre abi wan libimakandra di e feni ala sani bun. Na ini den kondre disi, sma wani nomonomo fu du sani leki fa densrefi wani. A krakti di a libimakandra disi abi tapu yonguwan, e meki taki a muilek fu gi yesi na a rai di gi na tapusei. Ma pe papa nanga mama kan suku yepi dan? Papa nanga mama di e frede Gado sabi taki den pikin fu den na „wan gudu di e kon fu Yehovah” (Psalm 127:3). So bun, den e suku yepi na ini Gado Wortu, Bijbel, so taki den kan kon sabi fa fu kweki den pikin fu den. Fu gi wan eksempre, Odo 13:24 e taki: „A sma di e kibri en tiki no lobi en manpikin, ma a wan di lobi en, na a sma di e suku en nanga trangaleri.”

Fu di Bijbel e gebroiki a wortu „tiki” dan wi no musu denki taki a de fanowdu ala ten fu fon den pikin fu wi te wi wani strafu den. A wortu disi e sori go na a trangaleri srefi di wi e gi a pikin, awansi na sortu fasi wi e du dati. Iya, te wi e gi wan trangayesi pikin trangaleri fu di wi e taki nanga en nomo, dan furutron dati kan sari kaba. Odo 29:17 e taki: „Gi yu manpikin trangaleri èn a sa gi yu rostu èn yu sili sa kisi furu prisiri.”

Efu wi wani puru takru eigifasi na den pikin, dan wi musu gi den trangaleri na wan lobi-ati fasi. Papa nanga mama di e gi den pikin fu den piri-ai na wan krakti fasi èn nanga switifasi, e sori taki den lobi a pikin fu den (Odo 22:6). So bun, papa nanga mama, no lasi ati! Te yu e gi yesi na a bun rai di Bijbel e gi, dan Yehovah Gado sa feni yu bun èn den pikin fu unu sa abi lespeki gi unu.