Ala tru Kresten na preikiman fu a bun nyunsu

„Singi gi Yehovah, blesi a nen fu en. Fruteri sma ibri dei fu a bun nyunsu fu a frulusu di a e gi.”​—PSALM 96:2.

1. Sortu bun nyunsu sma musu yere? Fa Yehovah Kotoigi gi wan bun eksempre fu fruteri sma a bun nyunsu dati?

FU DI rampu e pasa ibri dei na ini a grontapu disi, meki a de wan trowstu trutru taki Bijbel e fruteri wi taki dyonsro wan kaba sa kon na feti, ogridu, angribere nanga a kwinsi di sma e kwinsi trawan (Psalm 46:9; 72:3, 7, 8, 12, 16). Iya, disi na bun nyunsu di ala sma musu yere, a no so? Yehovah Kotoigi e feni taki na so a de. Na ala presi den abi a nen taki den e preiki ’bun nyunsu fu wan moro bun sani’ (Yesaya 52:7). A tru taki furu Kotoigi kisi frufolgu fu di den ben teki a fasti bosroiti fu fruteri sma a bun nyunsu. Ma den abi a bun fu sma na prakseri. Den Kotoigi kon abi wan bun nen trutru, fu di den e du a wroko fu den fayafaya èn fu di den e horidoro!

2. San na wán sani di e meki Yehovah Kotoigi de fayafaya?

² Yehovah Kotoigi e du a wroko fu den fayafaya na ini a ten disi, neleki fa den Kresten fu a fosi yarihondro ben du dati. A Lomsu koranti L’Osservatore Romano ben taki fu den: „Baka di den fosi Kresten teki dopu, dan den ben feni taki den abi a plekti fu prati na Evangelie. A wan srafu ben fruteri a tra srafu fu na Evangelie.” Fu san ede Yehovah Kotoigi de fayafaya neleki den fosi Kresten dati? Na a fosi presi, fu di a bun nyunsu di den e tyari, komoto na Yehovah Gado srefi. Dati na a moro prenspari sani di e meki den de fayafaya. Den e du a preikiwroko fu den, fu di a psalm skrifiman ben taki: „Singi gi Yehovah, blesi a nen fu en. Fruteri sma ibri dei fu a bun nyunsu fu a frulusu di a e gi.”—Psalm 96:2.

3. (a) San na wan tra sani di e meki taki Yehovah Kotoigi de fayafaya? (b) San na a „frulusu di [Gado] e gi”?

³ A psalm skrifiman e meki wi prakseri wan tra sani di e meki taki Yehovah Kotoigi de fayafaya. A boskopu fu den na wan boskopu fu frulusu. Son sma e yepi fu meki a libi fu trawan kon moro bun. Fu eksempre, den e gi sma datrayepi, den e yepi fu lusu problema na ini a libimakandra, den e gi sma nyanyan nanga moni, noso den e yepi den na tra fasi. Den sani disi di den e du de fu prèise trutru. Ma aladi libisma man du den sani disi fu yepi trawan, toku wi no kan teki dati gersi nanga a „frulusu di [Gado] e gi”. Nanga yepi fu Yesus Krestes, Yehovah sa puru sondu, siki nanga dede gi safri-ati sma. Den sma di sa kisi a frulusu dati, sa libi fu têgo! (Yohanes 3:16, 36; Openbaring 21:3, 4) A frulusu di Gado e gi, na wan fu den „wondruwroko” di Kresten e bariwroko gi na ini a ten disi. Den e gi yesi na den wortu: „Meki a glori fu [Gado] bekènti na mindri den nâsi, na mindri ala pipel den wondruwroko fu en. Bika Yehovah bigi èn a musu kisi prèise srefisrefi. Wi musu frede en moro leki ala tra gado.”—Psalm 96:3, 4.

Na eksempre fu Masra

4-6. (a) San na ete wan sani di e meki taki Yehovah Kotoigi de fayafaya? (b) Fa Yesus ben sori taki a ben de fayafaya fu preiki a bun nyunsu?

⁴ Ete wan sani e meki taki Yehovah Kotoigi de fayafaya. Den e waka baka na eksempre fu Yesus Krestes (1 Petrus 2:21). A volmaakti man dati ben de klariklari „fu fruteri den safri-ati sma bun nyunsu” (Yesaya 61:1; Lukas 4:17-21). Fu di a ben teki a wroko dati, meki a ben tron wan evangelie preikiman, wan sma di e fruteri bun nyunsu. A ben waka na a heri kontren fu Galilea te na Yudea, fu „preiki a bun nyunsu fu a kownukondre” (Mateyus 4:23). Fu di a ben sabi taki furu sma ben o arki a bun nyunsu, meki a ben taigi den disipel fu en: „A kotiwroko bigi, ma  furu wrokoman no de. Fu dati ede, begi a Masra fu a kotiwroko fu seni wrokoman go na ini a kotiwroko fu en.”—Mateyus 9:37, 38.

⁵ Yesus ben du soleki fa ensrefi ben begi, fu di a ben leri trawan fa den musu de preikiman fu a bun nyunsu. Baka wan pisi ten, a ben seni den apostel wawan fu go preiki. A ben taigi den: „Un preiki te unu de na pasi, èn taki: ’A kownukondre fu hemel kon krosibei.’” Den ben kan go seti wan tu sani fu lusu den problema na ini a libimakandra fu den. Den ben kan teki prati sosrefi na politiek afersi fu tyari wan kaba kon na a krukafasi di ben lai na a ten dati. A no ben o moro bun efu den ben du dati? Nôno. Na presi fu dati, Yesus ben sori krin san na a wroko di ala Kresten preikiman fu a bun nyunsu musu du. A ben taigi den bakaman fu en: „Un preiki te unu de na pasi.”—Mateyus 10:5-7.

⁶ Baka ten, Yesus ben seni wan tra grupu fu disipel go fu meki bekènti: „A kownukondre fu Gado kon krosibei.” Di den apostel drai go baka fu fruteri en taki sani ben waka bun na ini a preikiwroko fu den, dan Yesus ben prisiri srefisrefi. A ben begi: „Mi e prèise yu na fesi ala sma, Tata, Masra fu hemel nanga grontapu, bika yu kibri den sani disi heri bun gi den koniwan nanga den sabiman, èn yu tyari den kon na krin gi nyofi pikin” (Lukas 10:1, 8, 9, 21). Den disipel fu Yesus ben e du fisiwroko, gronwroko, nanga tra sani fosi. Den ben de leki nyofi pikin te wi e agersi den nanga den kerki fesiman fu a nâsi, fu di den fesiman ben kisi hei skoroleri. Ma den disipel ben kisi leri fu bariwroko gi a moro bun nyunsu di de.

7. Gi suma den bakaman fu Yesus ben preiki a bun nyunsu fosi, baka di Yesus opo go na hemel?

⁷ Baka di Yesus opo go na hemel, dan den bakaman fu en ben go doro fu panya a bun nyunsu fu frulusu (Tori fu den Apostel 2:21, 38-40). Gi suma den ben e preiki fosi? Den ben go na den nâsi di no ben sabi Gado? Nôno, den ben go na den sma fu Israel fosi. A nâsi disi ben sabi Yehovah moro leki 1500 yari kaba. Den bakaman fu Yesus ben abi a reti fu preiki na ini wan kondre pe sma ben anbegi Yehovah kaba? Iya. Yesus ben fruteri den: „Unu sa de kotoigi fu mi na Yerusalem èn na heri Yudea nanga Samaria èn te na a moro farawe presi fu grontapu” (Tori fu den Apostel 1:8). Israel ben musu yere a bun nyunsu leki fa ala tra nâsi ben musu yere dati.

8. Fa Yehovah Kotoigi de neleki den fosi yarihondro bakaman fu Yesus?

⁸ Na so Yehovah Kotoigi e preiki na ini a ten disi tu na heri grontapu. Den e wroko makandra  nanga na engel di Yohanes ben si. Na engel dati „ben abi têgo bun nyunsu fu meki bekènti leki prisiri nyunsu gi den sma di e libi na grontapu, èn gi ibri nâsi nanga lo nanga tongo nanga pipel” (Openbaring 14:6). Na ini a yari 2001, den wroko na ini 235 kondre nanga kontren. Wan tu fu den kondre dati e tyari a nen taki den abi a Kresten bribi. A de wan fowtu sani te Yehovah Kotoigi e preiki na presi pe Krestenhèit seti den kerki fu en kaba? Son sma feni taki a fowtu. Kande den e feni srefi taki na „fufuru den e fufuru den skapu (noso den kerkisma) fu den”. Ma Yehovah Kotoigi e prakseri a fasi fa Yesus ben firi gi den opregti Dyu na ini a ten fu en. Den Dyu ben abi priester kaba, ma toku Yesus no ben draidrai fu fruteri den a bun nyunsu. A „ben firi sari nanga den, bika den ben kisi kwinsi èn den ben panya leki skapu sondro skapuman” (Mateyus 9:36). San Yehovah Kotoigi musu du te den e feni opregti sma di no sabi Yehovah èn a Kownukondre fu en? Den musu kibri a bun nyunsu gi den sma disi fu di den sma e go na wan kerki kaba? Nôno, wi no sa du dati fu di wi e waka baka na eksempre fu den apostel fu Yesus. A bun nyunsu musu preiki „na ini ala den nâsi”.—Markus 13:10.

Ala den fosi Kresten ben preiki a bun nyunsu

9. Suma na ini a Kresten gemeente ben teki prati na a preikiwroko na ini a fosi yarihondro?

⁹ Suma ben teki prati na a preikiwroko na ini a fosi yarihondro? Buweisi de taki ala Kresten ben de preikiman fu a bun nyunsu. A skrifiman W. S. Williams e taki: „A kon na krin taki ala Kresten na ini a Kerki fu fositen . . . ben preiki na evangelie.” Bijbel e taki fu den sani di pasa tapu a dei fu a Pinksterfesa fu 33 G.T.: „Den alamala [mansma nanga umasma] ben kon furu nanga santa yeye èn ben bigin taki na ini difrenti tongo, soleki fa a yeye ben meki den taki.” Mansma nanga umasma, yongusma nanga owrusma, sosrefi srafu nanga friman ben de preikiman fu a bun nyunsu (Tori fu den Apostel 1:14; 2:1, 4, 17, 18; Yoèl 2:28, 29; Galasiasma 3:28). Di furu Kresten ben musu lowe go na Yerusalem fu a frufolgu di den ben kisi, dan „den wan di ben panya, ben go na ala presi fu meki a bun nyunsu fu a wortu bekènti” (Tori fu den Apostel 8:4). A no de so taki wan tu sma nomo ben kisi a wroko fu preiki a bun nyunsu, ma ala „den wan di ben panya” ben preiki a bun nyunsu.

10. Sortu wroko di abi tu marki den fosi Kresten ben musu du bifo a Dyu seti ben kisi pori?

¹⁰ Na so a ben de tu na ini den fosi yari dati. Yesus ben taki na fesi: „A bun nyunsu disi fu a kownukondre sa preiki na heri grontapu pe sma e libi, leki wan kotoigi gi ala nâsi, èn dan a kaba sa kon” (Mateyus 24:14). Na ini a fosi yarihondro disi ben kon tru, fu di den ben preiki a bun nyunsu na furu presi trutru bifo den legre fu Rome ben pori a heri seti fu anbegi fu den Dyu èn sosrefi a politiek seti fu den (Kolosesma 1:23). Moro fara, ala den bakaman fu Yesus ben gi yesi na a komando fu en: „Go fu dati ede, èn meki disipel fu sma fu ala nâsi, èn dopu den na ini a nen fu a Tata èn fu a Manpikin èn fu a santa yeye, èn leri den fu du ala den sani di mi komanderi unu. Èn, luku! mi de nanga unu  ala den dei te leki a kaba fu a seti fu sani” (Mateyus 28:19, 20). Na ini a ten disi, son kerki leriman e gi safri-ati sma deki-ati fu bribi na ini Yesus, ma den no e yepi den go doro. Na presi fu dati, den e meki sma dini Gado soleki fa den wani. Den fosi Kresten no ben du dati. Na presi fu dati, den ben leri sma fu tron disipel fu Yesus; den ben tyari den kon makandra na ini gemeente èn den ben gi den leri, so taki den sma dati ben kan preiki a bun nyunsu gi trawan tu èn meki disipel (Tori fu den Apostel 14:21-23). Na ini a ten disi, Yehovah Kotoigi e du leki fa den fosi Kresten ben du.

11. Suma e tyari a moro bun nyunsu go na a libisma famiri na ini a ten disi?

¹¹ Wan tu Kotoigi fu Yehovah go na tra kondre leki zendeling, soleki fa Paulus, Barnabas nanga tra sma ben du dati na ini a fosi yarihondro. A wroko fu den tyari winimarki kon trutru, fu di den no ben moksi densrefi na ini politiek afersi èn den no ben meki tra sani puru den prakseri fu a preiki di den musu preiki a bun nyunsu. Den gi yesi nomo na a komando fu Yesus: „Un preiki te unu de na pasi.” Ma moro furu Kotoigi fu Yehovah no e wroko leki zendeling na ini tra kondre. Furu fu den abi wan grontapuwroko èn trawan de na skoro ete. Son wan fu den abi pikin. Ma ala Kotoigi e fruteri trawan a bun nyunsu di den kon sabi. Yongusma nanga owrusma, mansma nanga umasma, e prisiri fu du san Bijbel e frumane den fu du: „Preiki a wortu, du en leki wan sani di musu du wantewante na ini bun ten, na ini muilek ten” (2 Timoteyus 4:2). Neleki den Kresten fu a fosi yarihondro, den e tan go doro „sondro fu tapu fu gi leri èn fu meki a bun nyunsu fu a Krestes, Yesus, bekènti” (Tori fu den Apostel 5:42). Den e bariwroko gi a moro bun nyunsu di libisma man kisi.

Wi e go na sma fu dwengi den, noso fu preiki bun nyunsu gi den?

12. Fa sma e denki now fu a suku di kerki e suku sma fu kon na ini a bribi fu den?

¹² Na ini a ten disi, kerki e suku sma fu kon na ini a bribi fu den, ma son sma e feni taki a sani disi e tyari takru bakapisi kon. A Wereldraad van Kerken (wan bigi kerki organisâsi) ben kari en wan „sondu” srefi fu suku sma fu kon na ini wan tra bribi. Fu san ede? A Catholic World Report e taki: „Na Orthodox Kerki e kragi doronomo taki den kerki e dwengi sma fu kon na ini a bribi fu den.”

13. Kari wan tu eksempre di e sori taki a e tyari takru bakapisi kon te sma e dwengi trawan fu teki a bribi fu den?

¹³ A suku di son kerki e suku sma fu kon na ini a bribi fu den kan tyari takru bakapisi kon? We, a kan. Yesus ben taki dati den leriman fu Wet nanga den Fariseiman ben du furu muiti fu suku sma fu kon na ini a bribi fu den, ma dati ben abi takru bakapisi gi den sma dati (Mateyus 23:15). A no bun srefisrefi fu „dwengi” sma fu teki wan tra bribi. Luku fu eksempre san a historia skrifiman Josephus ben taki fu a Makabeiman Yohanes Hirkanus. Di a man disi ben meki den Idumeasma saka densrefi na en ondro, dan „a ben gi den pasi fu tan na ini a kondre fu den, ma den ben musu besnij èn den ben musu wani hori densrefi na den wet fu den Dyu”. Efu den Idumeasma ben wani tan ondro a tiri fu den Dyu, dan den ben musu du san a Dyu bribi e taki. Historia skrifiman e fruteri wi taki na ini a di fu aiti yarihondro G.T., Karel a Bigiwan ben wini den heiden di den ben kari den Saksen fu a  noordsei fu Europa. A ben dwengi den sma disi na wan ogri-ati fasi fu kon na ini a bribi fu en. * Disi ben abi bun bakapisi gi den Saksen nanga den Idumeasma? San wi kan taki fu Herodes, a Kownu fu Idumea? A no ben hori ensrefi trutru na a Wet di Gado gi Moses, fu di a ben pruberi fu kiri a yongu Yesus.—Mateyus 2:1-18.

14. Fa wan tu zendeling fu Krestenhèit e dwengi sma fu kon na ini a bribi fu den?

¹⁴ Sma de now di e dwengi trawan fu teki wan tra bribi? Te yu luku en bun, dan wan tu sma de di e du dati. Nyunsu taki dati wan tu zendeling fu Krestenhèit e pramisi sma di wani teki skoroleri na dorosei kondre, taki den o pai skoro gi den efu den tron bribiman. Son wan fu den e meki wan loweman di e dede fu angri, sidon arki wan preiki ini kerki fosi a man kisi pikinso nyanyan. Soleki fa den Orthodox Beskopu ben taki na ini 1992 na wan konmakandra fu den, dan „son kerki di wani taki sma musu teki a bribi fu den, e kori sma nanga sani di den abi fanowdu èn son leisi den e du ala sortu ogri nanga sma fu hari den kon na ini a bribi fu den”.

15. Yehovah Kotoigi e dwengi sma fu kon na ini a bribi fu den? Tyari disi kon na krin.

¹⁵ A no bun srefisrefi fu dwengi trawan fu teki wan tra bribi. A de krin taki Yehovah Kotoigi no e du dati. * Dati wani taki dati den no e dwengi sma fu kon na ini a bribi fu den. Na presi fu dati, den de neleki den fosi yarihondro Kresten. Den e preiki a bun nyunsu gi ibri sma. Iniwan sma di wani arki a bun nyunsu, e kisi a kari fu kon sabi moro nanga yepi fu wan bijbelstudie. Den sma disi e kisi soifri sabi fu Bijbel èn dati e yepi den fu poti bribi na ini Gado èn na ini den sani di a abi na prakseri. Disi abi leki bakapisi taki den e kari a nen fu Gado, Yehovah, fu man kisi frulusu (Romesma 10:13, 14, 17). Den sma srefi musu bosroiti efu den wani teki a bun nyunsu efu no. Nowan sma e dwengi den fu du dati. Efu wi ben o dwengi sma fu teki a bribi fu wi, dan dati ben o de fu soso, fu di Gado wani taki sma musu anbegi en nanga den heri ati.—Deuteronomium 6:4, 5; 10:12.

A wroko fu preiki a bun nyunsu na ini a ten disi

16. Fa a preikiwroko fu Yehovah Kotoigi go na fesi na ini a ten disi?

¹⁶ Na ini a ten disi, Yehovah Kotoigi preiki a bun nyunsu fu a Kownukondre leki wan kontru fu Mateyus 24:14. Wan prenspari sani di den gebroiki na ini a preikiwroko fu den, na A Waktitoren. * Na ini 1879, den ben bigin tyari A Waktitoren kon na doro. Sowan 6000 tijdschrift ben tyari kon na doro na ini wán tongo. Na ini a yari 2001, sowan 122 yari na baka, dan 23.042.000 tijdschrift e tyari kon na doro na ini 141 tongo. Soleki fa moro nanga moro tijdschrift e tyari kon na doro, na so a preikiwroko fu Yehovah Kotoigi e tan go na fesi tu. Na ini a di fu 19 yarihondro, den ben preiki wan tu dusun yuru nomo ibri yari. Teki dati gersi nanga den 1.169.082.225 yuru di den preiki na ini a yari 2001. Luku den 4.921.702 oso-bijbelstudie  di ben hori ibri mun, sondro fu sma abi fu pai gi dati. Den du wan bigi wroko trutru! Ala nanga ala, 6.117.666 Kownukondre preikiman ben du a bun wroko disi.

17. (a) Sortu falsi gado sma e anbegi na ini a ten disi? (b) San ibri sma musu sabi awinsi sortu tongo a e taki, awinsi sortu kondre a komoto, èn awinsi sortu wroko a e du?

¹⁷ A psalm skrifiman e taki: „Ala den gado fu den folku na gado di no warti noti; ma Yehovah na a Gado di meki den hemel” (Psalm 96:5). Na ini a grontapu fu tide pe kerki no abi krakti tapu sma moro, sma e anbegi sani soleki a kondre fu den, a fraga fu a kondre noso tra sani di e prenki a kondre fu den. Den e anbegi barinen sma èn sma e anbegi gudu srefi (Mateyus 6:24; Efeisesma 5:5; Kolosesma 3:5). Mohandas K. Gandhi ben taki wan leisi: „Mi feni taki nownowde, den sma fu Europa e taki nomo dati den na Kresten. A trutru sani di den e anbegi na Mammon [gudu].” A de krin taki ala sma musu yere a bun nyunsu. Ibri sma musu kon sabi Yehovah nanga den prakseri fu en, awinsi sortu tongo a sma e taki, awinsi sortu kondre a komoto èn awinsi sortu wroko a e du. Wi wani taki ala sma ben o du san a psalm skrifiman ben taki: „Gi Yehovah glori nanga krakti. Gi Yehovah a glori di en nen musu kisi!” (Psalm 96:7, 8) Yehovah Kotoigi e yepi trawan fu kon sabi Yehovah, so taki den kan gi en glori na wan yoisti fasi. Den sma di e teki a yepi disi, e kisi furu wini. Sortu wini den e kisi? Wi sa taki fu disi na ini a tra artikel.

[Futuwortu]

Yu kan tyari disi kon na krin?

• Fu san ede Yehovah Kotoigi de fayafaya preikiman fu a bun nyunsu?

• Fu san ede Yehovah Kotoigi e preiki srefi na den presi pe Krestenhèit seti kerki kaba?

• Fu san ede wi kan taki dati Yehovah Kotoigi no e dwengi sma fu kon na ini a bribi fu den?

• Fa a preikiwroko fu Yehovah Kotoigi go na fesi na ini a ten disi?

[Aksi fu a tori disi]

[Prenki na tapu bladzijde 9]

Yesus ben de wan fayafaya preikiman fu a bun nyunsu èn a ben leri trawan fu du a srefi wroko

[Prenki na tapu bladzijde 10]

Ala sma na ini a fosi yarihondro gemeente ben e preiki a bun nyunsu

[Prenki na tapu bladzijde 11]

A no bun srefisrefi fu dwengi trawan fu teki wan tra bribi