Den blesi di a bun nyunsu e tyari kon
Den blesi di a bun nyunsu e tyari kon
„Yehovah salfu mi fu fruteri den safri-ati sma bun nyunsu. A seni mi fu yepi den wan di brokosaka, . . . fu trowstu ala den wan di e sari.”—YESAYA 61:1, 2.
1, 2. (a) San Yesus ben taki fu ensrefi, èn fa a sori suma na en? (b) Sortu blesi a bun nyunsu di Yesus ben meki bekènti, ben tyari kon?
YESUS ben de na ini a snoga na ini Nasaret. Disi ben de tapu wan sabadei na a bigin fu en diniwroko. Soleki fa skrifi na ini Bijbel, dan „sma ben langa a bukulolo fu a profeiti Yesaya gi en. A ben opo a bukulolo èn a ben feni a pisi pe skrifi: ’A yeye fu Yehovah de na mi tapu, bika a ben salfu mi fu meki bun nyunsu bekènti.’” Yesus ben leisi moro fara san a profeititori ben taki. Baka dati a go sidon, èn a taki: „Tide a tekst disi di unu ben yere dyonsrode, kon tru.”—Lukas 4:16-21.
2 Na so fasi Yesus ben sori taki en ben de a sma ini a profeititori di ben o fruteri bun nyunsu èn di ben o trowstu sma (Mateyus 4:23). Den sani di Yesus ben o fruteri sma ben de bun nyunsu trutru! A fruteri den sma di ben e arki en: „Mi na a leti fu grontapu. A sma di e waka na mi baka, no sa waka na ini dungru kwetikweti, ma sa abi a leti fu libi” (Yohanes 8:12). A ben taki sosrefi: „Efu unu e tan na ini mi wortu, dan unu na trutru disipel fu mi, èn unu sa sabi a waarheid, èn a waarheid sa meki unu kon fri” (Yohanes 8:31, 32). Iya, Yesus ben „abi wortu fu têgo libi” (Yohanes 6:68, 69). A no de fu taki dati a de wan warti blesi trutru fu abi leti, fu kisi libi, èn fu de fri!
3. Sortu bun nyunsu den disipel fu Yesus ben e preiki?
3 Baka a Pinksterfesa fu 33 G.T., den disipel ben go doro fu du a preikiwroko fu Yesus. Den ben e preiki a ’bun nyunsu fu a kownukondre’ gi den Israelsma èn gi den sma fu den nâsi (Mateyus 24:14; Tori fu den Apostel 15:7; Romesma 1:16). Den sma di ben teki a bun nyunsu, ben kon sabi Yehovah Gado. Den ben kon fri fu falsi bribi, èn den ben tron memre fu a nyun yeye nâsi, namku „na Israel fu Gado”. Den memre fu a nâsi disi abi a howpu fu tron tiriman na ini hemel fu têgo, makandra nanga a Masra fu den, Yesus Krestes (Galasiasma 5:1; 6:16; Efeisesma 3:5-7; Kolosesma 1:4, 5; Openbaring 22:5). Dati ben de bigi blesi fu tru!
A wroko fu preiki a bun nyunsu na ini a ten disi
4. Na sortu fasi sma e du a wroko fu preiki a bun nyunsu na ini a ten disi?
4 Yesus ben de a fosi sma di ben kisi a wroko fu preiki a bun nyunsu. Na ini a ten disi, salfu Kresten e tan go doro nanga a wroko disi. Wan „bigi ipi” fu „tra skapu” di e tan gro, e yepi den fu du a wroko disi di Bijbel ben taki na fesi fu en (Openbaring 7:9; Yohanes 10:16). A bakapisi fu disi de, taki a bun nyunsu e preiki na furu presi srefisrefi. Noiti ete a bun nyunsu ben preiki na so wan fasi. Yehovah Kotoigi e go na 235 kondre nanga kontren „fu fruteri den safri-ati sma bun nyunsu . . . , fu yepi den wan di brokosaka, fu taigi den katibosma taki den fri, en fu opo srefi den ai fu den strafuman; fu meki a yari fu bun wani bekènti fu a sei fu Yehovah èn a dei fu teki refensi fu a sei fu wi Gado; fu trowstu ala den wan di e sari” (Yesaya 61:1, 2). Sobun, a Kresten wroko fu preiki a bun nyunsu e tan tyari blesi kon gi furu sma, èn a e gi trowstu trutru na „den wan di e kisi fu du nanga iniwan sortu banawtu”.—2 Korentesma 1:3, 4.
5. Fa Yehovah Kotoigi de tra fasi leki den kerki fu Krestenhèit, te a abi fu du nanga a preiki fu a bun nyunsu?
5 A tru taki den kerki fu Krestenhèit e horibaka gi difrenti fasi fu preiki na evangelie. Furu fu den kerki disi e seni zendeling go na tra kondre fu suku sma fu kon na ini a bribi fu den. Fu eksempre, The Orthodox Christian Mission Center Magazine e taki fu a wroko di zendeling fu na Orthodox Kerki e du na ini Madagaskar, na a zuidsei fu Afrika, na Tansania, èn na Simbabwe. Ma moro furu fu den sma na ini na Orthodox Kerki èn na ini den kerki fu Krestenhèit no abi no wan prati na a wroko dati. Ma tra fasi leki den, ala Kotoigi di gi densrefi abra na Yehovah e du muiti fu preiki a bun nyunsu. Den e frustan taki a preiki di den e preiki a bun nyunsu, e sori taki den abi bribi trutru. Paulus ben taki: „Nanga na ati wan sma e sori bribi fu regtfardikifasi, ma nanga a mofo wan sma e meki sani bekènti na publiki fu kan kisi frulusu”. Te yu luku en bun, dan wan bribi di no e gi sma deki-ati fu du sani, na wan bribi di dede.—Romesma 10:10; Yakobus 2:17.
Bun nyunsu di e tyari têgo blesi kon
6. Sortu bun nyunsu e preiki na ini a ten disi?
6 Yehovah Kotoigi e preiki a moro bun nyunsu di de fu preiki. Den e gebroiki a Bijbel fu sori sma di wani arki, taki Yesus ben gi en libi gi a libisma famiri. Na so fasi Yesus opo a pasi gi den sma disi fu kon krosibei na Gado èn fu kisi pardon fu sondu, èn sosrefi fu man kisi têgo libi (Yohanes 3:16; 2 Korentesma 5:18, 19). Den e meki bekènti taki Gado en Kownukondre seti na ini hemel èn taki Yesus Krestes na a salfu Kownu fu en. Den e meki bekènti sosrefi taki a Kownukondre disi sa puru ala ogridu na grontapu èn taki a sa tiri a wroko fu seti Paradijs baka (Openbaring 11:15; 21:3, 4). Soleki fa a profeititori fu Yesaya ben taki na fesi, dan den e fruteri trawan taki now na ’a yari fu bun wani fu a sei fu Yehovah’ èn taki a libisma famiri abi na okasi ete fu teki a bun nyunsu. Den e warskow sma tu taki dyonsro „a dei fu teki refensi fu a sei fu wi Gado” sa kon. Na a ten dati, Yehovah o tyari wan kaba kon na den ogriman di no e sori berow.—Psalm 37:9-11.
7. Sortu ondrofenitori e sori a wánfasi di Yehovah Kotoigi abi, èn fa a du kon taki den abi a wánfasi disi?
7 Na ini a grontapu disi pe furu sari sani nanga rampu e pasa, disi na a wan-enkri bun nyunsu di e tyari winimarki kon fu têgo. Den sma di e piki bun tapu a bun nyunsu e kon na ini wan bradafasi fu Kresten di abi wánfasi awinsi pe den de na grontapu. Den Kresten disi no e meki noti prati den, awinsi na problema na ini a kondre, na ini lo, noso na ekonomia sei. Den ’weri lobi leki wan krosi gi densrefi, bika a de wan volmaakti banti fu wánfasi’ (Kolosesma 3:14; Yohanes 15:12). Disi ben de fu si na ini a yari di pasa na ini wan kondre fu Afrika. Wan mamanten, den sma na ini a mamafoto ben dyompo opo, fu di den ben yere sma sutu nanga gon. Den sma disi ben pruberi fu puru den tiriman di abi a makti na ini a kondre dati èn den bigin sori bita-ati sosrefi gi sma fu tra lo. Sma ben krutu wan osofamiri di de Kotoigi, fu di den ben kibri tra Kotoigi di de fu wan tra lo. Na osofamiri piki den taki: „Yehovah Kotoigi nomo e tan na ini wi oso.” Den Kotoigi disi no ben e prakseri sortu sma de fu sortu lo, bika ala sma de a srefi gi den. Den feni taki a moro prenspari fu sori Kresten lobi gi trawan èn fu trowstu den wan di abi yepi fanowdu. Wan famiriman di no de wan Kotoigi, ben taki: „Kerkisma fu ala bribi ben tori den sma fu a srefi kerki leki den. Yehovah Kotoigi wawan no ben du dati.” Den srefi sortu sani disi pasa furu leisi na ini kondre pe sma ben e feti nanga makandra. A ben de krin fu si taki Yehovah Kotoigi „abi lobi gi a heri brada libimakandra” trutru.—1 Petrus 2:17.
A bun nyunsu e kenki sma
8, 9. (a) Sortu kenki den sma di teki a bun nyunsu tyari kon? (b) Sortu ondrofenitori e sori taki a bun nyunsu abi krakti tapu sma?
8 A bun nyunsu abi fu du nanga a sani di Paulus ben kari „a libi fu now èn a libi di musu kon ete” (1 Timoteyus 4:8). A bun nyunsu no e gi sma wan moi howpu gi a tamara nomo, ma a e meki „a libi fu now” kon moro bun gi sma. Ibri Kotoigi fu Yehovah e kisi rai fu Gado Wortu, Bijbel, so taki den kan tyari den libi akruderi a wani fu Gado (Psalm 119:101). Den e kenki kon de leki nyun sma, te den e kweki regtfardikifasi nanga loyaalfasi.—Efeisesma 4:24.
9 Luku na eksempre fu Franco. A man disi ben atibron esi-esi. Ala leisi te sani no ben waka leki fa a wani, dan en ati faya èn a ben e naki sani broko te dati ben pasa. A wefi fu en ben studeri Bijbel nanga Yehovah Kotoigi, èn fu di den Kotoigi ben tyari densrefi na wan bun fasi leki Kresten, meki Franco kon frustan safrisafri taki a ben musu kenki. A ben studeri Bijbel nanga den, èn te fu kaba a ben man sori den froktu fu a yeye di e yepi en fu abi vrede nanga sma èn fu dwengi ensrefi (Galasiasma 5:22, 23). A ben de wan fu den 492 sma di teki dopu na Belgia na ini a dienstyari 2001. Luku na eksempre now fu Alejandro. A yonkuman dati ben gebroiki someni drugs, taki te fu kaba a ben go na den presi pe sma e trowe doti. Drape a ben e suku ala san a ben man feni fu seri, so taki a ben kan bai drugs. Di a ben abi 22 yari, dan Yehovah Kotoigi ben aksi Alejandro efu a wani studeri Bijbel nanga den. A taigi den taki a wani du dati. A ben leisi Bijbel ibri dei èn a ben go na den Kresten konmakandra. Heri esi a tapu nanga den fowtu sani di a ben e du, èn baka siksi mun so a ben man teki prati na a wroko fu preiki a bun nyunsu. A yonkuman disi ben de wan fu den 10.115 sma di preiki a bun nyunsu na Panama na ini a yari di pasa.
A bun nyunsu na wan blesi gi den safri-ati sma
10. Suma e teki a bun nyunsu, èn fa disi e kenki a denki fu den?
10 Yesaya ben taki na fesi taki a bun nyunsu ben o preiki gi den safri-ati sma. Suma na den safri-ati sma disi? Disi na sma di a buku Tori fu den Apostel e kari „den sma di ben abi a yoisti denki fu a têgo libi” (Tori fu den Apostel 13:48). Den sma disi, di komoto na ala sortu sei fu a libimakandra, abi sakafasi èn den de klariklari fu teki a boskopu fu waarheid. Den e kon frustan taki te den e du Gado wani, dan dati sa tyari winimarki kon di e pasa ala den winimarki di a grontapu disi kan gi den (1 Yohanes 2:15-17). Ma fa Yehovah Kotoigi e doro na ati fu den sma di den e miti na ini a preikiwroko fu den?
11. Fa wi musu preiki a bun nyunsu, soleki fa Paulus ben taki?
11 We, luku na eksempre fu na apostel Paulus. A ben skrifi den Korentesma: „Brada, di mi ben kon na unu, mi no ben kon nanga tumusi furu wortu noso nanga tumusi dipi koni fu meki a santa kibritori fu Gado bekènti na unu. Bika mi ben bosroiti fu no sabi noti fu unu, boiti fu sabi Yesus Krestes wawan, a wan di den ben spikri na wan postu” (1 Korentesma 2:1, 2). Paulus no ben pruberi fu meki bigi nanga den sani di a ben sabi. Ala san a ben leri den sma di ben arki en, ben kon fu Gado, èn now den sani dati skrifi na ini Bijbel. Poti prakseri tu na a deki-ati di Paulus ben gi Timoteyus di ben preiki makandra nanga en: „Preiki a wortu, du en leki wan sani di musu du wantewante” (2 Timoteyus 4:2). Timoteyus ben musu preiki „a wortu”, noso a boskopu fu Gado. Paulus ben skrifi Timoteyus wan tra sani tu: „Du ala san yu man fu sori yusrefi na Gado leki wan sma di a feni bun, leki wan wrokoman di no abi fu syen fu noti, di e gebroiki a wortu fu waarheid na wan reti fasi.”—2 Timoteyus 2:15.
12. Fa Yehovah Kotoigi na ini a ten disi e poti prakseri na den wortu Paulus èn na a eksempre fu en?
12 Yehovah Kotoigi e poti prakseri na a eksempre fu Paulus, èn sosrefi na san a ben taigi Timoteyus. Den sabi taki Gado Wortu abi krakti na sma tapu èn den e gebroiki en fu gi sma howpu nanga trowstu di den abi tranga fanowdu (Psalm 119:52; 2 Timoteyus 3:16, 17; Hebrewsma 4:12). A tru taki den e gebroiki Bijbel publikâsi, so taki den sma disi kan kon sabi moro fu Bijbel te den abi fri ten. Ma alaten den e suku fu sori sma san a Bijbel srefi e taki. Den sabi taki a Wortu fu Gado di skrifi nanga yepi fu en santa yeye, sa naki na ati fu den sma di wani arki. Te den e gebroiki a Bijbel na so wan fasi, dan dati e meki den eigi bribi kon tranga tu.
„Trowstu ala den wan di e sari”
13. Sortu sani pasa na ini a yari 2001, di meki taki furu sma di sari musu kisi trowstu?
13 Na ini a yari 2001, furu rampu ben pasa, èn fu dati ede furu sma ben abi trowstu fanowdu. Disi ben de so trutru na ini Amerkankondre. Na ini september di pasa, sma pori a World Trade Center (wan prenspari presi pe sma ben du bisnis) na ini a foto New York, nanga a Pentagon (na edekantoro fu legre afersi), krosibei fu a foto Washington, D.C. Sma na ini a heri kondre skreki srefisrefi di den rampu disi pasa! Te den sortu sani disi e pasa, dan Yehovah Kotoigi e meki muiti fu du a wroko di den kisi, fu „trowstu ala den wan di e sari”. Wan tu ondrofenitori sa sori fa den e du dati.
14, 15. Na sortu tu okasi, Kotoigi ben man gebroiki bijbeltekst na wan bun fasi fu trowstu sma di ben e sari?
14 Wan Kotoigi di de wan furuten preikiman, waka go na wan uma di ben de na seipasi. A aksi na uma san a ben feni fu den rampu di pasa. Na uma bigin krei. A taki dati a ben sari srefisrefi èn a ben winsi taki a ben man du wan sani fu yepi. A Kotoigi fruteri en taki Gado wani srefisrefi taki sani e waka bun nanga wi, dan a leisi Yesaya 61:1, 2. Den wortu disi di e kon fu Gado, ben de krin gi na uma di ben taki dati ala sma ben e sari. A teki wan traktaat èn a aksi a Kotoigi fu kon na en oso.
15 Tu Kotoigi di ben e preiki a bun nyunsu, miti wan man di ben e du wroko na ini a maksin fu en. Fu di wan kefalek sari sani pasa no so langa ete na a World Trade Center, meki den aksi a man efu den ben kan sori en wan tu wortu na ini Bijbel di e gi trowstu. Di a man agri, dan den leisi 2 Korentesma 1:3-7. Drape skrifi: ’Wi e kisi furu trowstu srefisrefi nanga yepi fu Krestes’. A man ben breiti srefisrefi taki den Kotoigi na ini a birti kon na en èn taki den ben e go na sma fu trowstu den. A taki: „Meki Gado blesi a tumusi bun wroko di unu e du.”
16, 17. Sortu tu ondrofenitori e sori taki Bijbel trutru e yepi sma di e sari, noso sma di e bruya fu rampu ede?
16 Wan Kotoigi di ben go baka na den sma di ben arki a bun nyunsu, ben miti a manpikin fu wan uma di ben wani sabi moro. A Kotoigi fruteri a man taki a ben wani sabi fa sani ben waka nanga den birtisma, baka a bigi rampu di pasa no so langa ete. A man no ben man bribi taki a Kotoigi ben teki en ten fu go na sma èn fu luku fa den de. A man ben taki dati a presi pe a ben e du en wroko, no ben de so fara fu a World Trade Center. Di a rampu pasa, dan a si ala sani pasa leti na en fesi. Di a aksi fu san ede Gado e gi pasi taki sma e pina, dan a Kotoigi leisi wan tu tekst na ini Bijbel. Wan fu den tekst ben de Psalm 37:39 di e taki: „A frulusu fu den regtfardikiwan e kon fu Yehovah; en na a fortresi fu den na ini ten fu banawtu.” A man aksi a Kotoigi na wan switi fasi fa sani e waka nanga en èn nanga en osofamiri. Baka dati, a aksi a Kotoigi fu kon baka èn a taki dati a ben warderi en trutru taki a Kotoigi ben kon na en.
17 Dusundusun sma ben kisi trowstu fu Yehovah Kotoigi baka di den rampu pasa. Wan fu den sma disi ben de wan uma di den Kotoigi miti di den ben e go na den sma na ini a birti. Den sani di pasa ben bruya na uma srefisrefi èn a ben arki den Kotoigi di den leisi Psalm 72:12-14: „A sa frulusu a pôtiwan di e bari fu kisi yepi, sosrefi a sma di e kisi kwinsi èn ibri sma di no abi yepiman. A sa firi sari gi a mofinawan èn gi a pôtiwan, èn a sa frulusu den sili fu den pôtiwan. Fu kwinsi èn fu ogri di e du nanga tranga a sa frulusu a sili fu den, èn a brudu fu den sa de warti na ini en ai.” Den wortu dati ben moi srefisrefi! Na uma aksi den Kotoigi fu leisi den vers ete wan leisi, dan a kari den fu kon na ini en oso fu taki moro fara. Na a kaba fu a takimakandra den ben bigin wan bijbelstudie nanga en.
18. Fa wan Kotoigi ben yepi tra sma di en basi aksi en fu begi gi den?
18 Wán Kotoigi e wroko na wan restaurant na ini wan birti pe furu gudusma e libi. Fosi, den sma dati no ben wani arki a bun nyunsu fu a Kownukondre. Den rampu di pasa, skreki den sma fu a birti dati. A freida neti baka di a rampu pasa, a basi fu a restaurant aksi ala sma fu go na dorosei èn fu hori wan kandra na den anu. Den sma disi tan pî wan syatu pisi ten fu memre den sma di dede. Fu di a Kotoigi ben lespeki a fasi fa den sma ben firi, meki a go na dorosei tu èn a ben tanapu seipasi sondro fu taki wan sani. A basi ben sabi taki a ben de wan Kotoigi fu Yehovah. Sobun, na a kaba fu a pisi ten disi di den memre den sma di dede, dan a basi aksi en fu begi gi ala sma. A Kotoigi agri. Na ini a begi fu en, a ben taki dati someni sma ben e sari, ma taki den sma disi no abi fu sari moro sondro howpu. A ben taki fu a ten di den takru sani disi no o pasa moro. A ben taki sosrefi taki ala sma kan kon krosibei na a Gado di e gi trowstu, efu den e kisi soifri sabi fu Bijbel. Di a taki „Amen”, a basi go na a Kotoigi, a taigi en tangi, èn a gi en wan brasa. A basi taigi en taki a begi ben de a moro moi begi di a yere. Baka dati, den moro leki 60 sma di ben de na dorosei fu a restaurant, du a srefi leki a basi.
A e tyari winimarki kon gi a libimakandra
19. Sortu ondrofenitori e sori taki son sma e warderi den hei markitiki fu Yehovah Kotoigi?
19 Furu sma taki dati spesrutu na ini a ten disi, sani e waka bun na ini libimakandra pe Yehovah Kotoigi e du a diniwroko fu den. Iya, sma di e suku vrede, di eerlijk, èn di e hori densrefi na bun gwenti nanga gronprakseri, trutru e tyari winimarki kon gi a libimakandra. Na ini wan kondre fu Centraal Asia, Kotoigi ben miti wan skowtu di de nanga pensyun kaba. Wan leisi, a skowtu disi ben kisi a wroko fu ondrosuku wan tu kerki organisâsi. Di a ondrosuku na organisâsi fu Yehovah Kotoigi, dan na eerlijkfasi fu den èn a fasi fa den ben tyari densrefi, ben naki en ati. A ben warderi a tranga bribi fu den. Wan tra sani di a ben warderi tu, na taki ala sani di den e leri sma, skrifi na ini Bijbel. A man disi teki wan bijbelstudie.
20. (a) San a wroko di Yehovah Kotoigi du na ini a yari di pasa, e sori? (b) Fa wi sabi taki furu wroko de fu du ete? Fa wi e si a grani di wi abi fu preiki a bun nyunsu?
20 Wi ben kan taki fu dusundusun ondrofenitori. Ma den ondrofenitori na ini na artikel disi e sori kaba, taki Yehovah Kotoigi du furu wroko srefisrefi na ini a dienstyari 2001. * Den taki nanga milyunmilyun sma, den trowstu furu sma di ben e sari, èn a preikiwroko fu den ben abi bun bakapisi. Disi de fu si na den 263.431 sma di teki dopu fu sori taki den gi densrefi abra na Gado. A nomru fu preikiman fu a bun nyunsu gro nanga 1,7 procent. Ala nanga ala, 15.374.986 sma ben de na a Memrefesa di e hori ibri yari fu memre a dede fu Yesus. Dati e sori taki furu wroko de fu du ete (1 Korentesma 11:23-26). Meki wi go doro fu suku den safri-ati sma di e teki a bun nyunsu. Solanga a yari fu bun wani fu Yehovah no kaba, wi musu go doro fu trowstu „den wan di brokosaka”. Wi abi wan tumusi moi grani! A no de fu taki dati, neleki Yesaya, wi alamala e taki: „Sondro misi mi sa prisiri pasa marki na ini Yehovah. Mi sili sa breiti na ini mi Gado” (Yesaya 61:10). Meki a de so taki Gado sa tan gebroiki wi te a e meki den profeiti wortu kon tru di e taki: „A Soeverein Masra Yehovah sa meki regtfardikifasi nanga prèise komopo na fesi ala nâsi.”—Yesaya 61:11.
[Futuwortu]
^ paragraaf 20 A tabel na tapu bladzijde 19 te go miti bladzijde 22 e sori san Yehovah Kotoigi ben du na ini a dienstyari 2001.
Yu e memre disi ete?
• Fa den safri-ati sma kisi winimarki fu a bun nyunsu di Yesus ben preiki?
• Sortu blesi sma ben kisi te den ben teki a bun nyunsu di den fosi yarihondro disipel fu Yesus ben preiki?
• Fa sma di arki a bun nyunsu ben kisi wini na ini a ten disi?
• Fa wi e si a grani di wi abi fu de preikiman fu a bun nyunsu?
[Aksi fu a tori disi]
[Raportu na tapu bladzijde 19-22]
2001 DINIWROKO RAPORTU FU YEHOVAH KOTOIGI NA HERI GRONTAPU
(Luku a tijdschrift)
[Prenki na tapu bladzijde 15]
Yehovah Kotoigi e hori na prakseri ala ten taki den musu preiki a bun nyunsu
[Prenki na tapu bladzijde 17]
Den sma di e teki a bun nyunsu e kon na ini wan bradafasi fu Kresten di abi wánfasi awinsi pe den de na grontapu