Owruman—Leri trawan fa fu tyari frantwortu

NA INI den gemeente fu Yehovah Kotoigi na heri grontapu, brada di man dini leki opziener de tranga fanowdu. Dri prenspari sani de fu san ede disi de so.

A fosi sani na taki, Yehovah e meki a pramisi fu en kon tru taki ’a pikinwan sa tron wan makti nâsi’ (Yesaya 60:22). Fu di Yehovah sori bun-ati, meki na ini den dri yari di pasa pikinmoro wán milyun nyun disipel teki dopu leki Kotoigi fu Yehovah. Mansma di man tyari frantwortu de fanowdu fu yepi den nyunwan disi fu gro kon tron lepi Kresten.—Hebrewsma 6:1.

A di fu tu sani na taki, son brada di dini leki owruman someni tenti yari langa, no man tyari so furu frantwortu moro na ini a gemeente fu di den kon owru noso fu di den kon siki.

A di fu dri sani na taki, furu Kresten owruman di e wroko fayafaya, e dini now leki memre fu na Ati-oso Kontakti Komte, fu Bowkomte, noso fu Kringhal Komte. Fu man tyari ala den frantwortu di den abi na wan yoisti fasi, dan sonwan fu den brada disi no ben man du so furu moro na ini a gemeente leki fa den ben gwenti.

Fa den gemeente kan kisi moro brada di man tyari frantwortu? Den brada musu kisi leri fa fu tyari frantwortu. Bijbel e gi Kresten opziener a deki-ati fu leri „getrow man, di fu den sei sa de koni nofo fu leri tra sma” (2 Timoteyus 2:2). Fu „leri” wan sma fa fu du wan sani, wani taki fu sori a sma fa fu du a sani dati heri bun. Meki wi luku fa owruman kan leri brada di doro den markitiki, fa fu tyari frantwortu.

Teki na eksempre fu Yehovah

A no de fu taki dati Yesus Krestes ben man du a wroko fu en heri bun. Dati no e fruwondru wi, bika Yehovah Gado srefi ben leri Yesus fa fu du sani. Fu san ede a leri di Yesus ben kisi fu Yehovah ben de so bun? Na ini Yohanes 5:20 Yesus ben kari dri sani: „A Tata [1] lobi en Manpikin èn [2] a e sori en pikin ala den sani di a e du. A sa sori en sosrefi [3] wroko di bigi moro den disi.” Wi sa go ondrosuku ala den dri sani disi, fu kon frustan moro bun fa fu leri trawan fu tyari frantwortu na wan bun fasi.

Prakseri taki a fosi sani di Yesus taki na: „A Tata lobi en Manpikin.” Fu sensi a ten di Yehovah bigin meki sani, dan a ben abi wan bun matifasi nanga en Manpikin. Odo 8:30 e yepi wi fu frustan a matifasi fu den tu sma disi moro bun: „Ne mi [Yesus] ben tron leki wan tumusi bun wrokoman na en [Yehovah Gado] sei, èn mi ben tron a sma di a ben lobi trutru ibri dei, èn mi ben breiti na en fesi ala ten.” Yesus ben sabi heri bun taki Yehovah ’ben lobi en trutru’. Yesus fu en sei sori krin taki a ben e prisiri srefisrefi fu wroko makandra nanga en Tata. Na a srefi fasi a de wan tumusi moi sani te Kresten owruman abi wan bun matifasi nanga den wan di den e leri fu tyari frantwortu!

A di fu tu sani di Yesus ben kari na taki en Tata ’e sori en ala den sani di A e du’. Den wortu disi e horibaka gi san skrifi na ini Odo 8:30. Drape skrifi taki Yesus ben kon de ’na Yehovah sei’ di A ben e meki hemel nanga grontapu (Genesis 1:26). Owruman kan waka baka a tumusi moi eksempre disi fu di den o suku fu wroko makandra skinskin nanga dinari ini a diniwroko. Den sa leri den dinari ini a diniwroko fa fu du a wroko fu den na wan bun fasi. A no nyun dinari ini a diniwroko nomo musu tan kisi leri fu man go na fesi. Tra getrow brada de tu di e suku fu kisi a grani disi furu yari kaba, ma no kisi dati ete. Fa fu den brada dati dan? (1 Timoteyus 3:1) Den owruman musu fruteri den krin na san den musu wroko ete so taki den sa sabi soifri san den musu du.

Kon meki wi taki dati wan dinari ini a diniwroko na wan sma di yu kan frutrow, ala ten a de biten, èn a e du den wroko fu en na wan seryusu fasi. Kande a brada na wan bun leriman tu. A kan taki a brada e du en wroko na ini  a gemeente heri bun. Ma kande a brada no e si taki a e handri na wan grofu fasi nanga en Kresten brada nanga sisa na ini a gemeente. Owruman musu sori „safri-ati fasi di e fiti koni” (Yakobus 3:13). A no ben sa de wan bun sani efu wan owruman e fruteri a dinari ini a diniwroko finifini san na a problema? A kan kari wan tu okasi pe a problema dati sori ensrefi èn a kan gi rai fu a fasi fa a dinari kan go na fesi. Efu na owruman sorgu na wan koni fasi taki den wortu fu en „abi sowtu leki spesrei”, dan a sma di e kisi a rai sa prisiri nanga dati (Kolosesma 4:6). A no de fu taki dati a dinari ini a diniwroko srefi musu de klariklari fu teki den rai di a e kisi. Na so fasi a sa meki na owruman du en wroko nanga prisiri.—Psalm 141:5.

Na ini son gemeente, den owruman e tan leri den dinari ini a diniwroko doronomo san den kan du fu go na fesi. Leki eksempre: Efu wan dinari ini a diniwroko doro den markitiki, dan den owruman e aksi en fu go makandra nanga den fu go luku den sikiwan noso den owruwan. Na a fasi disi den dinari ini a diniwroko e kisi ondrofeni na ini a wroko di wan brada musu du leki skapuman. A no de fu taki dati furu sani de di wan dinari ini a diniwroko kan du ensrefi efu a wani go na fesi na yeye fasi.—Luku a faki na ondrosei di nen „Sani di dinari ini a diniwroko kan du”.

A di fu dri sani di meki taki a leri di Yesus kisi ben bun srefisrefi, na taki Yehovah leri Yesus sani di a ben sa abi fanowdu na ini a ten di e kon. Yesus ben taki dati a Tata sa sori a Manpikin sani di o „bigi moro den disi”. Den sani di Yesus ondrofeni di a ben de na grontapu meki taki a ben man kweki prenspari eigifasi fu du den sani di a ben musu du bakaten (Hebrewsma 4:15; 5:8, 9). Prakseri a bigi wroko di Yesus o kisi heri esi te a abi fu gi milyardmilyard sma di dede, wan opobaka, èn te a sa abi fu krutu den!—Yohanes 5:21, 22.

Te owruman e leri dinari ini a diniwroko fa fu tyari frantwortu, dan den musu hori na prakseri fa den kan gebroiki den brada disi na ini a ten di e kon. Na a momenti disi a kan de so taki nofo owruman nanga dinari ini a diniwroko de di kan sorgu gi den sani di de fanowdu. Ma fa a sa de te wan nyun gemeente opo? Nofo brada sa de te moro nyun gemeente musu seti? Na ini den dri yari di pasa, moro leki 6000 nyun gemeente seti na heri grontapu. Bun furu owruman nanga dinari ini a diniwroko de fanowdu fu sorgu gi den nyun gemeente dati!

Owruman, unu e waka baka na eksempre fu Yehovah fu di unu e kweki wan bun matifasi nanga den brada di unu e leri fa fu tyari frantwortu? Unu e sori den fa den musu du a wroko fu den? Unu e hori na prakseri taki moro brada kan de fanowdu na ini a ten di e kon? Te unu sa waka baka na eksempre di Yehovah gi di a leri Yesus fa fu du en wroko bun, dan dati sa meki taki furu tra sma sa abi winimarki fu dati.

 No frede fu meki trawan yepi tyari frantwortu

Son owruman di abi ondrofeni, gwenti fu tyari difrenti bigi frantwortu na ini a gemeente. Fu dati ede meki a kan taki den e frede pikinso fu meki trawan yepi den fu tyari den frantwortu dati. A kan taki den meki muiti fu du dati wan leisi, ma kande sani no waka so moi na a ten dati. Sobun den kan go prakseri taki efu yu wani meki wan sani waka bun, dan na yusrefi o abi fu du a sani. Ma a denki disi e kruderi nanga a wani fu Yehovah? A e kruderi nanga san Bijbel e taki dati den wan di no abi so furu ondrofeni e kisi leri fu den wan di abi moro ondrofeni?—2 Timoteyus 2:2.

Na apostel Paulus ben lasi-ati di Yohanes Markus, di ben teki waka makandra nanga en, gowe libi en èn drai go baka na oso aladi den ben musu go na Pamfilia (Tori fu den Apostel 15:38, 39). Ma Paulus no meki a wan sani disi di no ben waka bun, tapu en fu leri trawan fa fu teki frantwortu. A ben teki Timoteyus, wan tra yongu brada, èn a leri en fa fu du a zendelingwroko * (Tori fu den Apostel 16:1-3). Te fu kaba den zendeling ben kisi so furu gens na ini Berea taki a no ben de wan koni sani gi Paulus fu tan drape. Fu dati ede a ben gi Silas, wan lepi owru brada, a frantwortu fu sorgu gi a gemeente makandra nanga Timoteyus (Tori fu den Apostel 17:13-15). A no de fu taki dati Timoteyus leri furu fu Silas. Bakaten, di Timoteyus ben de srekasreka fu teki moro frantwortu, dan Paulus seni en go na Tesalonika fu gi deki-ati na den gemeente drape.—1 Tesalonikasma 3:1-3.

A matifasi fu Paulus nanga Timoteyus ben de wan switi wan. Den tu man disi ben lobi makandra. Paulus ben skrifi wan brifi go na a gemeente na ini Korente fu di a ben abi na prakseri fu seni Timoteyus go drape. Ini a brifi dati Paulus e kari Timoteyus ’en pikin di a lobi èn di de getrow na Masra’. Baka dati a ben taki moro fara: „[Timoteyus] sa memre unu fa mi e du sani na ini a diniwroko fu Yesus Krestes” (1 Korentesma 4:17). Fu di Timoteyus handri akruderi den leri di a ben kisi fu Paulus, meki a tron wan sma di ben man du den wroko di a ben kisi fu du na wan soifri fasi. Furu yongu brada tron bun dinari ini a diniwroko, owruman, noso opziener di e reis srefi. Disi kon pasa fu di den nyan bun fu a leri fu brada di abi moro ondrofeni; brada di sori taki den wani yepi den trutru, neleki fa Paulus ben yepi Timoteyus.

Owruman, leri trawan fa fu du sani bun!

A de krin taki a profeititori fu Yesaya 60:22 e kon tru na ini a ten disi. Yehovah e meki ’a pikinwan tron wan makti nâsi’. Fu meki a nâsi dati tan de wan „makti nâsi”, dan a musu orga bun. Owruman, meki muiti fu tan leri brada di doro den markitiki, fa fu tyari frantwortu. Suku fasi fa un kan du dati moro nanga moro. Sorgu taki ibriwan fu den dinari ini a diniwroko frustan bun sortu kenki a sa musu tyari kon efu a wani go na fesi. Èn un dopu brada, teki ala yepi di den owruman wani gi unu fu man go na fesi. Teki den okasi di yu e kisi fu leri fa fu du sani moro bun fu kisi moro sabi nanga ondrofeni. A no de fu taki dati Yehovah sa blesi den seti disi fu yepi trawan na so wan lobi-ati fasi.—Yesaya 61:5.

[Futuwortu]

[Faki na tapu bladzijde 30]

Sani di dinari ini a diniwroko kan du

Aladi owruman musu leri den dinari ini a diniwroko fa fu du difrenti sani, toku furu sani de di dinari ini a diniwroko kan du densrefi fu go na fesi na yeye fasi.

—Dinari ini a diniwroko musu wroko fayafaya èn sma musu man frutrow na den tapu taki den sa tyari den frantwortu na wan seryusu fasi. Den musu kweki a bun gwenti tu fu studeri Bijbel. Furu tron, a go di wan brada e go na fesi abi fu du nanga a fasi fa a brada dati e studeri èn a fasi fa a e du den sani di a leri.

—Te wan dinari ini a diniwroko e sreka ensrefi fu hori wan lezing na wan Kresten konmakandra, dan a no musu frede fu aksi wan owruman di abi ondrofeni fu sori en fa a musu hori a lezing.

—A dinari ini a diniwroko kan aksi wan owruman sosrefi fu luku fa a hori a lezing di teki komoto fu Bijbel. A kan aksi a brada dati tu fu gi en rai fu san a kan du fu go na fesi ini a fasi fa a e gi leri.

Dinari ini a diniwroko musu aksi den owruman rai, èn de klariklari fu teki den rai dati tu, aladi den e fiti den na ini den libi. Na a fasi disi, ’ala sma sa si taki den e go na fesi’.—1 Timoteyus 4:15.