Ondrofenitori

Yehovah gi mi „krakti di bigi pasa marki”

SOLEKI FA HELEN MARKS FRUTERI

A ben de wan banawtu dei na ini a zomer fu 1986. Mi ben de na a opolanigron fu wan kondre na ini Europa pe furu opolani no e kon. Mi wawan ben e wakti na ini a presi pe den lantiman e luku sma bagasi. Mi ben de na ini Tiranë, a mamafoto fu Albania. A kondre dati ben fruklari taki a de „a fosi kondre na grontapu pe nowan sma e bribi na ini Gado”.

MI BEN tanapu e luku fa wan ofsiri di ben abi wan gon ben e luku na ini mi bagasi. Na a momenti dati mi no ben sabi soifri san fu du. Mi ben e hori mi bro fu di mi ben frede san o pasa. Efu mi ben sa taki noso du wan sani di a man no ben frutrow, dan kande den ben o yagi mi komoto fu a kondre èn den wan di ben e wakti mi, den ben o poti na ini dungru-oso noso na ini strafuman kampu. Ma fu di mi ben gi en bubbelgum nanga kuku, meki a ben sori switifasi gi mi. Fa a du kon taki sowan problema ben kon miti mi, aladi mi ben de wan uma di pasa 60 yari kaba? Fu san ede mi ben sa poti mi libi na ini problema, soso fu pruberi fu meki Kownukondre afersi go na fesi na ini wan fu den lasti fortresi fu a komunist tirimakti?

Wan meisje di e sikisiki, ma di wani sabi furu sani

Mi mama meki mi na ini a yari 1920, ini Ierápetra, wan foto fu Kreita. Tu yari baka dati mi papa dede fu di a ben e siki na en fokofoko. Mama ben pôti èn a no ben man leisi èn skrifi. Fu den fo pikin fu mi mama, mi ben de a moro yonguwan, èn fu di mi ben abi gari, meki ala ten mi ben tan so sikisiki. Fu di mi mama ben pôti, meki den birtisma ben taigi en fu sorgu den dri tra gosontu pikin èn fu a libi mi fu mi dede. Mi breiti taki a no ben teki a rai dati.

Mi mama ben e go na a beripe furu leisi, fu sorgu taki a sili fu Papa ben kan rostu bun na ini hemel. Furu tron a ben e aksi wan priester fu na Orthodox Kerki fu yepi en. Ma a priester no ben  e yepi mi mama fu soso. Mi kan memre ete fa mi mama ben e waka go na oso wan kowru Kresnetidei. Mi ben e pinapina e waka na en sei, baka di wi komoto na a beripe. Dyonsrode wi ben gi a priester a lasti moni di wi ben abi. Baka di mi mama ben bori pikinso gruntu gi wi, dan ensrefi go sidon na ini wan tra kamra nanga angribere, aladi a ben e krei langalanga watra-ai fu di a no ben sabi san fu du moro. Baka wan pisi ten, mi teki deki-ati èn mi go na a priester. Mi aksi en fu san ede mi papa ben musu dede èn fu san ede mi mama ben musu pai a priester, aladi a ben pôti. Nanga ala syen a ben piki mi nanga wan safri sten: „Gado teki en. Na so a libi de. Wan ten sa kon pe yu no sa sari moro.”

Mi no ben man frustan fa a piki di a priester gi mi ben kan kruderi nanga a Wi Tata Begi di mi ben leri na skoro. Te now ete mi e memre den moi èn prenspari wortu na a bigin fu a begi dati: „Wi Tata na hemel, meki yu nen kon santa. Meki yu kownukondre kon. Meki yu wani pasa, soleki na hemel, so tu na grontapu” (Mateyus 6:9, 10). Efu Gado ben wani taki a wani fu en musu pasa na heri grontapu, dan fu san ede wi ben musu nyan pina so?

Pikinmoro mi ben kisi a piki tapu na aksi fu mi, di Emmanuel Lionoudakis, wan furuten preikiman fu Yehovah Kotoigi, ben kon na wi oso na ini 1929. * Di mi mama aksi en san a ben wani, dan a no piki en. Na presi fu dati a langa wan kotoigikarta gi mi mama. Mi mama langa a karta gi mi fu mi leisi en. Ma fu di mi ben abi neigi yari nomo, meki mi no ben man frustan ala sani so bun di skrifi na tapu. Fu di mi mama ben e denki taki a preikiman disi ben babaw, meki mi mama taki: „Ke pôti! Yu no man taki èn mi no man leisi.” Dan na wan switi fasi mi mama sori en taki a kan gwe.

Baka wan tu yari mi kisi a piki di mi ben wani. A srefi furuten dinari di mi kari didyonsro, ben gi mi bigi brada Emmanuel Paterakis wan pikin buku di nen Where Are the Dead? (Pe den dedewan de?), di Yehovah Kotoigi tyari kon na doro. * Mi ben breiti srefisrefi di mi leisi taki a no Gado ben teki mi papa. Mi ben kon frustan taki a dede di sma e dede, na a bakapisi fu a sondu fu libisma èn taki mi papa e wakti fu kisi wan opobaka fu libi baka na ini wan paradijs grontapu.

„A buku disi pori yu libi!”

Den tru tori fu Bijbel opo wi ai. Wi ben feni wan owru Bijbel di ben de fu mi papa èn wi ben bigin studeri na ini. Furu tron wi ben e sidon fu studeri nanga wan kandra, krosibei fu a presi na ini na oso pe wi e meki faya fu waran wi skin. Mi no ben e teki prati na den sani di a pikin grupu fu Kotoigi ben e du, fu di mi ben de a wan-enkri yongu uma na ini a birti, di ben wani sabi moro fu Bijbel. Wan heri pisi ten mi ben abi a fowtu denki taki a kerki disi ben de soso gi mansma.

A faya di mi brada ben abi gi a preikiwroko ben gi mi furu deki-ati. Heri esi den skowtu ben bigin luku ala san wi famiri ben e du. Den ben e tan kon na wi oso, dei nanga neti, fu kon suku Emmanuel èn den buku fu wi. Mi kan memre heri bun fa wan priester kon na wi fu overtoigi wi taki wi ben musu drai go baka na a kerki. Di Emmanuel sori en nanga yepi fu Bijbel taki a nen fu Gado na Yehovah, dan a priester grabu a Bijbel, a wai a Bijbel go-kon na Emmanuel fesi leki a ben wani tapu skreki gi en, dan a bari: „A buku disi pori yu libi!”

Na ini 1940 den grabu Emmanuel èn den seni en go na a presi pe den ben e feti na ini Albania, fu di a ben weigri fu go na ini a legre. Fu di wi no ben e yere noti fu en, meki wi ben denki taki a dede. Wi no ben fruwakti fu kisi wan brifi fu en, ma toku a ben de so taki tu yari baka dati wi ben kisi wan brifi fu en di a ben skrifi komoto fu dungru-oso. A ben de na libi ete! Fu sensi a ten dati, wan fu den tekst di a ben kari na ini a brifi fu en tan fasi na ini mi frustan. A tekst dati e taki: „Fu Yehovah en sei, den ai fu en e luku a heri grontapu lontu fu sori en krakti fu a bun fu den sma di lobi en nanga den heri ati” (2 Kroniki 16:9). Wi ben abi den sortu deki-ati dati fanowdu trutru!

Aladi Emmanuel ben de na ini dungru-oso, toku a ben man aksi wan tu brada fu kon luku mi. Wantronso sani ben sreka fu hori wan tu konmakandra na wan kibri fasi na ini wan oso dorosei fu a foto. San wi no ben sabi na taki sma ben e luku wi! Tapu wan sonde, dan wan tu skowtu lontu wi. Den ben abi gon. Den ben poti wi na ini a baki fu  wan wagi, dan den tyari wi lontu na ini a wagi fu meki ala sma fu a foto si wi. Mi e memre ete fa den sma ben e spotu èn wisiwasi wi, ma Yehovah yepi wi nanga a yeye fu en, so taki wi no ben frede èn wi no ben lasi-ati tu.

Den tyari wi go na wan tra foto pe den trowe wi go na ini wan tu strafu-oso kamra di ben dungru èn doti. A wc fu a presi pe den ben sroto mi ben de wan embre sondro tapun, di ben e krin wan leisi ibri dei. A strafu di mi ben kisi na taki mi musu tan na strafu-oso aiti mun, fu di den ben e si mi leki a „leriman” fu a grupu. Ma wan brada di ben sroto drape tu ben seti sani, so taki na afkati fu en ben kan yepi wi tu. Na afkati ben kan sorgu taki den lusu wi.

Wan nyun libi, na ini Amerkankondre

Di den ben lusu Emmanuel fu dungru-oso, dan a bigin teki waka go na den gemeente na ini Ateine leki wan opziener di e rèis. Mi froisi go na Ateine na ini 1947. Now fosi mi ben man miti wan bigi grupu Kotoigi pe a no soso mansma ben de na ini, ma sosrefi umasma nanga pikin-nengre. Te fu kaba, mi ben man teki dopu na ini yuli 1947 fu sori taki mi gi misrefi abra na Yehovah. Te neti, mi ben bigin go na wan skoro fu leri Ingrisitongo, fu di mi ben e angri srefisrefi fu tron wan zendeling. Na ini 1950, mi tron wan pionier. Mama ben kon tan nanga mi, èn ensrefi kon teki den tru tori fu Bijbel. A tan dini leki wan Kotoigi fu Yehovah teleki a dede sowan 34 yari na baka.

A srefi yari dati mi miti nanga John Marks (Markopoulos), wan man fu Amerkankondre di ben lobi yeye afersi èn di furu sma ben e lespeki. John ben gebore na a zuidsei fu Albania. A ben tron wan Kotoigi fu Yehovah baka di a ben froisi go na Amerkankondre. Na ini 1950 a ben de na ini Grikikondre, pe a ben e pruberi fu kisi primisi fu go na ini Albania. Na a ten dati na ogri-ati komunist tirimakti drape no ben e gi sma primisi fu kon na ini a kondre. Aladi John no ben miti nanga en famiri sensi 1936, toku den no ben wani gi en primisi fu go na ini Albania. John ben du a diniwroko fu Yehovah fayafaya, èn a ben lobi a bradafasi srefisrefi. Di mi ben si dati, dan a naki mi ati trutru. Te fu kaba wi ben trow tapu 3 april 1953. Dan mi nanga en froisi go na a nyun oso fu wi na ini a foto New Jersey, Amerkankondre.

Fu man sorgu wisrefi aladi wi ben e du furuten preikiwroko, dan mi nanga John ben seti wan pikin bisnis na a syoro fu New Jersey, pe  wi ben e sreka mamanten nyanyan gi fisiman. Wi ben e wroko soso na ini den zomer mun. Wi ben e bigin wroko bun fruku mamanten teleki 9.00. Fu di wi ben breiti nanga san wi ben abi èn fu di wi ben wani poti yeye afersi na a fosi presi na ini wi libi, meki wi ben man go furu na ini a preikiwroko. Na ini ala den yari di pasa, den brada ben aksi wi furu leisi fu froisi go na wan tra foto pe preikiman ben de fanowdu. Yehovah yepi wi, so taki wi ben kan yepi sma na den difrenti presi dati fu kon sabi moro. Wi ben man opo gemeente, èn wi ben yepi fu bow Kownukondre konmakandra-presi.

Wi e gi yepi na den brada fu wi di de ini nowtu

Ma heri esi wan tumusi moi okasi opo gi wi. Den brada di e teki fesi ben wani kon sabi fa a ben e go nanga den Kresten brada nanga sisa di e tan na ini den Balkan kondre (wan grupu fu kondre na a zuid-owstusei fu Europa) pe a wroko fu wi ben tapu. Someni yari den Kotoigi fu Yehovah na ini den kondre dati no ben yere noti fu den brada nanga sisa na tra kondre. Efu den ben e kisi yeye nyanyan srefi, dan a ben de pikinso nomo, èn sma ben e frufolgu den na wan tumusi ogri-ati fasi. Skowtu ben e luku ala san den brada disi ben e du, aladi someni trawan ben de na ini dungru-oso noso na ini strafuman kampu. A nowtu fu den ben bigi. Den ben abi publikâsi fanowdu di abi fu du nanga Bijbel. Den ben abi sosrefi tiri nanga deki-ati fanowdu. Prakseri a boskopu disi di wi ben kisi na wan kibri fasi komoto fu Albania, a e taki: „Begi Masra gi wi. Den teki den buku di wi ben prati oso fu oso. Den no e gi wi pasi fu studeri. Den sroto dri fu wi brada.”

Sobun na ini november 1960 wi ben bigin wan waka fu siksi mun, fu go na sonwan fu den kondre dati. A no de fu taki dati wi ben sa abi „krakti” fanowdu „di bigi pasa marki”. Wi ben sa abi  deki-ati fanowdu tu di soso Gado e gi èn wi ben sa musu denki bun fa wi ben o tyari wisrefi, fu man du wi diniwroko bun (2 Korentesma 4:7). A fosi presi pe wi ben musu go ben de Albania. Baka di wi bai wan wagi na ini a foto Parijs, dan wi bigin teki waka. Di wi doro a foto Rome, dan John wawan ben kisi primisi fu go na ini Albania. Mi ben abi fu go na Ateine, na ini Grikikondre. Drape mi ben musu wakti en.

John doro na ini Albania na a kaba fu februari 1961 èn a tan drape teleki a kaba fu maart. Na ini Tiranë John ben miti nanga 30 brada. Den ben breiti srefisrefi tu fu kisi deki-ati. Den ben breiti sosrefi nanga den publikâsi di den ben abi so tranga fanowdu! Tu tenti na fo yari langa den no miti nanga brada fu tra kondre.

A soifri retifasi nanga a horidoro fu den brada dati ben naki na ati fu John. A ben kon yere taki furu fu den lasi a wroko fu den, noso taki sma ben sroto den fu di den no ben wani teki prati na den komunist afersi fu a kondre. A ben naki en ati trutru di tu brada di ben pasa 80 yari ben gi en sowan 100 Amerkan dala fu horibaka gi a preikiwroko. Someni yari kaba den ben poti pikinso moni na wan sei fu a piri skin pensyun fu den.

A lasti dei fu John na ini Albania ben de 30 maart 1961. Dati ben de a dei fu a Memrefesa fu a dede fu Yesus. John ben hori a lezing fu a Memrefesa gi sowan 37 sma. Na a kaba fu a lezing, den brada tyari John gowe esi-esi. Den pasa na a bakadoro èn den tyari en nanga wagi go na a lanpresi fu a foto Durres, pe a go na ini wan sipi fu Torkukondre. A sipi dati ben e go na a foto Piraeus na ini Grikikondre.

Mi ben breiti taki a ben kon baka sondro fu wan sani pasa nanga en. Now wi ben kan go moro fara nanga a waka fu wi di ben kan poti wi na ini bigi problema. A waka fu wi tyari wi pasa ete dri Balkan kondre pe a wroko ben tapu. Wi ben kan kisi bigi problema fu di wi ben waka nanga Bijbel buku, wan skrifimasyin nanga tra wrokosani. Wi ben abi a bigi grani fu miti nanga wan tu brada nanga sisa di ben tan getrow trutru. Den sma disi ben de klariklari fu lasi a wroko fu den, a fri fu den, nanga a libi fu den srefi, fu Yehovah ede. A faya fu den nanga a tru lobi fu den ben gi wi deki-ati fu tan go doro. A ben naki wi ati tu fu si fa Yehovah ben gi den „krakti di bigi pasa marki”.

Baka di wi ben kaba nanga a waka fu wi na wan bun fasi, dan wi drai go baka na Amerkankondre. Na ini den yari baka dati, wi tan meki muiti na difrenti fasi fu seni buku go na Albania èn fu kon sabi fa a e go nanga a diniwroko fu den brada fu wi.

Furu tron mi ben de na ini kefar te mi ben de na pasi

Den yari pasa gowe. Te fu kaba, John dede na ini 1981 di a ben abi 76 yari èn mi wawan tan na baka. Evangelia, na umapikin fu mi bigi sisa, nanga en masra George Orphanides, ben teki mi na den oso na wan tumusi switi fasi. Te nanga now den e horibaka gi mi èn den e sorgu gi den sani di mi abi fanowdu. Densrefi si fa Yehovah yepi den di den ben e dini na ini Sudan pe a wroko ben tapu. *

Te fu kaba, wi ben abi fu meki muiti ete wan leisi fu miti nanga den brada fu wi na ini Albania. Fu di den famiri fu mi masra ben de drape, meki den ben aksi mi efu mi ben wani teki waka go na a kondre dati. A no de fu taki dati mi ben wani go!

Baka di mi ben meki muiti omeni mun langa, dan te fu kaba, na ini mei 1986 mi kisi primisi fu na ambassade (lantikantoro) fu Albania di de na ini Ateine fu go na ini a kondre. Wan tu fu den lantiman fu na ambassade ben gi mi a seryusu warskow taki efu wan sani pasa nanga mi, dan mi no ben musu fruwakti taki sma fu tra kondre ben sa kon yepi mi. Di mi go na wan kantoro pe sma e bai ticket fu frei go na Albania, dan a man di ben de drape ben fruwondru srefisrefi. Ma mi no meki frede tapu mi fu go. Heri esi mi teki a wan-enkri opolani di e frei wan leisi ibri wiki fu Ateine go na Tiranë. Soso dri owrusma fu Albania ben de na ini na opolani makandra nanga mi. Den sma dati ben go na Grikikondre fu kisi datrayepi.

Di na opolani saka, dan den tyari mi go na ini wan presi pe noti no ben de. A ben de leki wan kantoro fu den lantiman di e ondrosuku sma bagasi. A brada nanga a sisa fu mi masra no ben de Kotoigi fu Yehovah. Toku den ben wani yepi mi fu miti nanga den brada nanga sisa drape.  Akruderi a wet fu lanti den ben abi fu taigi na edeman fu a libimakandra taki mi ben de na ini a kondre. Leki bakapisi fu dati den skowtu ben e luku ala san mi ben e du. Fu dati ede den famiriman fu mi taigi mi fu tan na a oso fu den. Den ben go suku tu fu den brada di ben e libi na ini Tiranë èn den tyari den kon na mi.

Soleki fa a sori, dan neigi brada ben e dini Yehovah na ini heri Albania na a ten dati. Den brada disi ben e luku bun san den e du, fu di lanti ben tapu a wroko fu den someni yari kaba, èn fu di sma ben frufolgu den èn skowtu ben e luku ala san den ben e du. A broko-ede di den brada ben abi, ben de fu si tapu den fesi. Baka di den ben si taki den kan frutrow mi, dan a fosi sani di den aksi mi na: „Pe den Waktitoren de?” Furu yari langa den ben abi soso tu owru buku. Wan Bijbel srefi den no ben abi.

Den fruteri mi furu fu den takru sani di lanti ben seti fu du den ogri. Den fruteri mi fu wan lobi brada di ben teki a fasti bosroiti taki a no ben o teki sei na ini a verkiezing di ben o kon. Fu di lanti ben e basi ala sani, meki en osofamiri no ben o kisi a nyanyan di den abi fanowdu. Lanti ben o poti den pikin fu en, nanga den osofamiri fu den na ini dungru-oso, aladi den pikin no ben abi a srefi bribi leki a papa fu den. Leki fa wi ben kon yere, dan famiriman fu a brada disi ben kiri en a neti bifo a verkiezing ben o hori, fu di den ben frede. Baka dati den trowe a dedeskin na ini wan peti. Bakaten den go taki dati a brada kiri ensrefi fu di a ben frede.

A ben de wan tumusi sari sani fu si fa den Kresten brada disi ben e pina. Ma di mi ben wani gi den alamala wan moni fu 20 Amerkan dala, dan den no ben wani. Den taki: „Wi wani soso yeye nyanyan.” Den lobi brada disi fu wi libi bun langa na ondro a tiri fu ogri-ati tiriman di ben e leri sma sani di meki taki furu sma na ini a kondre no ben e bribi na ini Gado moro. Ma toku den brada ben abi wan tranga bribi nanga wan fasti bosroiti fu tanapu kánkan neleki tra Kotoigi na tra presi. Tu wiki baka dati mi gowe libi Albania. Ma a ben naki mi ati trutru fu si a makti di Yehovah abi fu gi sma „krakti di bigi pasa marki”, awansi sani kon ogri srefisrefi.

Mi ben abi a grani fu go na Albania baka na ini 1989 èn ete wan leisi na ini 1991. Safrisafri den sma fu a kondre dati ben man taki fri èn sondro frede fa den e denki èn den ben man teki den eigi bosroiti fa den wani anbegi Gado. Ne a nomru fu anbegiman fu Yehovah ben bigin gro esi-esi. A pikin grupu fu dopu Kresten di ben de na ini a kondre na ini 1986, gro kon tron moro leki 2200 fayafaya preikiman. Wan fu den sma dati na Melpo, mi masra pikin sisa. A de krin taki a blesi fu Yehovah ben de na tapu a getrow grupu dati.

Nanga a krakti fu Yehovah, mi libi wan libi di gi mi furu prisiri

Te mi luku fa sani waka, dan mi e si taki a wroko di mi nanga John du no ben de fu soso. Wi gebroiki den krakti fu wi yongu yari na wan tumusi bun fasi. A teki di wi ben teki a furuten diniwroko leki wan libiwroko ben warti gi wi moro leki iniwan tra sani di wi ben sa kan du nanga wi libi. Mi e prisiri fu den someni sma di wi ben man yepi fu kon sabi den tru tori fu Bijbel. Now di mi kon owru mi kan gi yonguwan deki-ati nanga mi heri ati, fu ’memre a Gran Mekiman fu den now na ini den dei fu den yongu yari’.—Preikiman 12:1.

Aladi mi abi 81 yari now, toku mi e dini ete leki wan furuten preikiman fu a bun nyunsu. Mi e wiki fruku mamanten, dan mi e go taki nanga sma di tanapu e wakti bus, na den presi pe sma e poti wagi, na strati, na ini wenkri, noso pe sma e go koiri. Den problema di e kon te wan sma e owru, kon meki taki a libi fu mi kon moro tranga. Ma mi e kisi furu yepi fu mi bigi famiri fu lobi-ati brada nanga sisa, èn sosrefi fu na osofamiri fu na umapikin fu mi sisa. Ma a moro prenspari sani di mi kon leri, na taki „a krakti di bigi pasa marki, sa de fu Gado, no fu wisrefi”.—2 Korentesma 4:7.

[Futuwortu]

[Prenki na tapu bladzijde 25]

Loktusei: John (te na yu kruktu-anusei), mi (na mindrisei), mi brada Emmanuel tanapu na mi kruktu-anusei. Mi mama de na Emmanuel kruktu-anusei, nanga wan grupu sma fu Bethel, na ini Ateine, ini 1950

[Prenki na tapu bladzijde 25]

Na a kruktu-anusei: Mi nanga John na a bisnis di wi ben abi na a syoro fu New Jersey, ini 1956

[Prenki na tapu bladzijde 26]

Distrikt kongres na ini Tiranë, Albania, ini 1995

[Prenki na tapu bladzijde 26]

A Bethel-oso fu Tiranë, na ini Albania. A ben kaba bow na ini 1996

[Prenki na tapu bladzijde 26]

Na loktusei: wan pisi di teki komoto fu a „Watchtower” fu 1940, di den ben poti go na ini Albaneisitongo na wan kibri fasi

[Prenki na tapu bladzijde 26]

Nanga Evangelia Orphanides (na a reti-anusei), mi sisa pikin nanga en masra, George