Frutrow tapu Yehovah—A tru Gado

Yu luku go na loktu wan neti di wolku no ben de na hemel, èn si hondrohondro stari? Suma yu denki meki den stari disi?

NA WAN neti pe ala sani ben kowru pî, a ben gersi leki den stari ben fruteri Kownu David fu owruten Israel, suma ben du dati. Fu dati ede a ben skrifi: „Den hemel e meki a glori fu Gado bekènti; èn a loktu e fruteri fu a wroko fu en anu” (Psalm 19:1). Iya, a Mekiman èn no den sani di a meki, warti „fu kisi a glori nanga a grani nanga a krakti”.—Openbaring 4:11; Romesma 1:25.

Bijbel e taki: „A sma di meki ala sani, na Gado (Hebrewsma 3:4). Iya, a tru Gado ’di nen Yehovah, na a Moro Heiwan na heri grontapu’ (Psalm 83:18). Èn a no de wan dren, noso wan denki di e kori sma. Yesus Krestes ben taki fu en hemel Tata, Yehovah: „En di seni mi, de trutru.”—Yohanes 7:28.

Yehovah—A Gado di e meki den prakseri fu en kon tru

A tumusi aparti nen fu Gado, Yehovah, de fu feni pikinmoro 7000 tron na ini den Hebrew Buku fu Bijbel wawan. A srefi nen dati e sori taki a de wan tru Gado. A nen fu Gado wani taki trutru „A e meki sani du kon”. Fu dati ede Yehovah Gado e taki fu ensrefi leki a Gado di e meki den prakseri fu en kon tru. Di Moses ben aksi Gado san na en nen, dan Yehovah fruteri en finifini san en nen wani taki. Yehovah ben taigi en: „Mi sa sori fu de san mi sa sori fu de” (Exodus 3:14). Wan tra Bijbel e taki en na wan krakti fasi: „Mi sa tron iniwan sani di mi wani tron.” Yehovah e sori fu de, noso e tron, iniwan sani di de fanowdu fu meki den regtfardiki prakseri nanga pramisi fu en pasa trutru. Fu dati ede, a abi bun furu nen, soleki Mekiman, Tata, Soeverein Masra, Skapuman, Yehovah fu den legre, Yereman fu begi, Krutuman, Gran Leriman, a Gado di e bai libisma baka.—Krutuman 11:27; Psalm 23:1; 65:2; 73:28; 89:26; Yesaya 8:13; 30:20; 40:28; 41:14.

A tru Gado wawan kan tyari a nen Yehovah nanga reti, bika libisma noiti kan de seiker taki sani sa waka soleki fa den ben seti na fesi (Yakobus 4:13, 14). Yehovah wawan kan taki: „Bika neleki fa na alen, nanga snew, e saka kon fu hemel èn no e drai go baka na a presi dati, boiti efu trutru a e nati grontapu èn e meki a gi froktu èn meki a sproiti, en siri e gi trutru na a saiman èn brede na a sma di e nyan, na so mi wortu di e komoto na mi mofo sa de. A no sa drai kon baka na mi sondro bakapisi, ma seiker a sa du a sani dati di mi abi prisiri na ini, èn fu tru, a sa abi bun bakapisi na ini san mi ben seni en go.”—Yesaya 55:10, 11.

Te Yehovah e du san a abi na prakseri, dan a e du dati nanga so wan fasti overtoigi, taki srefi den sani di libisma no man bribi kande, na tru sani gi en. Wan langa ten baka di Abraham, Isak, nanga Yakob dede, Yesus ben taki fu den  nanga den wortu disi: „A [Yehovah] no de wan Gado fu den dedewan, ma fu den libiwan, bika gi en, den alamala e libi” (Lukas 20:37, 38). Den dri getrow famiri-edeman no ben de na libi. Ma fu di a de so seiker taki Gado man opo den baka, dati meki gi en a ben de leki den man disi ben de na libi ete. Neleki fa a no ben muilek gi Yehovah fu meki a fosi libisma fu a doti fu a gron, na so a no muilek srefisrefi gi en fu gi den getrow futuboi disi wan opobaka.—Genesis 2:7.

Na apostel Paulus e gi wi wan tra eksempre di e sori taki Gado e meki taki den prakseri fu en e kon tru. Den Buku fu Bijbel e kari Abraham „a papa fu furu nâsi” (Romesma 4:16, 17). Aladi Abram no ben abi pikin ete, toku Yehovah kenki en nen kon tron Abraham, san wani taki „wan papa fu furu nâsi”. Yehovah meki taki Abraham tron trutru san a nen fu en ben wani taki, fu di na wan wondru fasi, a sorgu taki na owru man Abraham nanga en owru wefi Sara ben man meki pikin baka.—Hebrewsma 11:11, 12.

Fu di Yesus Krestes ben kisi furu makti fu Gado, meki a ben man taki fu sani di ben de tru, aladi libisma ben si den sani disi tra fasi. Aladi en bun mati Lasarus ben dede, toku Yesus ben taigi den disipel fu en: „Lasarus wi mati, go rostu, ma mi e go drape fu wiki en na a sribi” (Yohanes 11:11). Fu san ede Yesus ben taki dati wan man di ben dede ben e sribi nomo?

Di Yesus ben doro Betania, a foto pe Lasarus ben e tan, dan a go na a grebi èn a taigi den sma drape fu puru a ston di ben tapu en. Baka di a begi nanga wan tranga sten, dan a gi a komando disi: „Lasarus, kon na doro!” Èn aladi den sma di ben de drape ben tan luku a grebi, dan „a man di ben dede, ben kon na doro, aladi en futu nanga den anu fu en ben domru nanga krosi èn en fesi ben tai nanga wan duku”. Ne Yesus taki: „Lusu en èn meki a go” (Yohanes 11:43, 44). Yesus ben wiki Lasarus fu dede, a ben gi libi baka na wan man di ben dede fo dei langa! Krestes no ben fruteri wan lei di a ben taki dati en mati ben e sribi. Gi Yehovah nanga Yesus, a ben de neleki Lasarus di ben dede, ben e sribi nomo. Iya, Yesus nanga en hemel Tata e broko den ede nanga sani di de tru.

Yehovah kan meki a howpu fu wi kon tru

Wan difrenti de trutru na mindri a tru Gado nanga kruktu gado di e kori sma! Sma di e anbegi kruktu gado e taki dati den gado disi abi bun bigi krakti, ma dati no tru. Den gado disi no man du wondru sani, awansi fa den sma disi e anbegi den. Na a tra sei, te Yehovah Gado e taki fu den futuboi fu en di dede wan langa ten kaba, dan a kan du dati na wan fasi di e meki sma denki taki den e libi ete. Yehovah kan du disi nanga reti, fu di a man gi den libi baka. „Yehovah na wan tru Gado”, èn a no e kori a pipel fu en noiti.—Yeremia 10:10.

A e gi wi trowstu trutru fu sabi taki Yehovah sa gi wan opobaka na den dedewan di de na ini en prakseri, èn A sa du dati te a ten fu en doro. Den sma disi sa libi baka! (Tori fu den Apostel 24:15) Iya, sma di sa kisi wan opobaka sa libi baka leki fa den ben de fosi. A no muilek gi a Mekiman fu memre fa den dedewan ben tan fosi èn a no muilek gi en tu fu gi den wan opobaka, bika a abi koni nanga makti pasa marki (Yob 12:13; Yesaya 40:26). Fu di Yehovah abi lobi pasa marki, dan a sa gebroiki en volmaakti prakseri fu wiki den dedewan fu libi na tapu  wan paradijs grontapu. Èn den sa abi den srefi eigifasi di den ben abi bifo den dede.—1 Yohanes 4:8.

Now di a grontapu fu Satan e doro en kaba, den sma di e frutrow tapu a tru Gado kan fruwakti wan moi tamara trutru (Odo 2:21, 22; Danièl 2:44; 1 Yohanes 5:19). A psalm skrifiman e gi wi a dyaranti disi: „Ete wan syatu pisi ten moro èn na ogriwan no sa de moro;  . . . ma den safri-atisma srefi sa abi grontapu leki a gudu fu den, èn den trutru sa feni switi prisiri na ini vrede pasa marki” (Psalm 37:10, 11). Takrudu nanga ogri di sma e du nanga tranga no sa de moro. Retidu sa de, èn problema na ekonomia sei no sa de moro (Psalm 37:6; 72:12, 13; Yesaya 65:21-23). A no sa de so moro taki sma e desko makandra fu di den abi wan moro hei posisi, fu di den de fu wan tra lo, noso fu wan tra grupu (Tori fu den Apostel 10:34, 35). Orloku nanga fetisani no sa de moro (Psalm 46:9). Na a ten dati „nowan sma di e libi drape sa taki: ’Mi siki’” (Yesaya 33:24). Ala sma sa abi wan volmaakti èn wan krakti gosontu (Openbaring 21:3, 4). Dyonsro grontapu sa tron wan paradijs trutru. Yehovah sa du dati!

Iya, ala howpu di sma abi akruderi Bijbel, heri esi sa kisi wan kontru. Fu san ede wi musu kori wisrefi nanga den sani di sma e anbegi na ini a grontapu disi, te wi kan poti ala wi frutrow tapu Yehovah? Yehovah wani taki „ala sortu sma musu kisi frulusu èn kon kisi wan soifri sabi fu waarheid” (1 Timoteyus 2:3, 4). Na presi taki wi e lasi wi ten nanga wi moni tapu den dren fu a seti fu sani disi nanga den gado fu en, meki wi teki moro sabi fu a tru Gado èn meki wi frutrow na en tapu nanga wi heri ati.—Odo 3:1-6; Yohanes 17:3.

[Prenki na tapu bladzijde 6]

Gi Yehovah nanga Yesus, Lasarus ben e sribi nomo

[Prenki na tapu bladzijde 7]

Dyonsro grontapu sa tron wan paradijs trutru