Tu brada di ben difrenti fu makandra

A NO de fu taki dati den bosroiti di papa nanga mama e teki abi krakti tapu den pikin fu den. Dati de so na ini a ten disi, èn a ben de so kaba na ini a dyari fu Eden. Adam nanga Efa ben trangayesi Gado èn dati ben abi takru bakapisi gi a heri libisma famiri (Genesis 2:15, 16; 3:1-6; Romesma 5:12). Toku, wi alamala abi na okasi fu kon kisi wan bun matifasi nanga wi Mekiman, efu wi wani dati. A sani disi e kon bun na fesi na ini a tori fu den fosi tu brada na ini a heri historia fu libisma, Kain nanga Abel.

Noti no de na ini Bijbel di e sori taki Gado taki nanga Adam nanga Efa, baka di a ben yagi den komoto fu a dyari fu Eden. Ma Yehovah no tapu fu taki nanga den manpikin fu den. A no de fu taki dati Adam nanga Efa fruteri Kain nanga Abel san ben pasa nanga den. Den ben man fu si „den kerubim èn a plata sei fu wan feti-owru di ben de ini faya èn di ben e drai lontu doronomo fu hori wakti na a pasi di e go na a bon fu libi” (Genesis 3:24). Den man disi ben ondrofeni sosrefi taki Gado no lei di a fruklari taki sweti nanga pen ben o tron wan aladei sani.—Genesis 3:16, 19.

A musu de taki Kain nanga Abel ben sabi san Yehovah ben taigi a sneki: „Mi sa poti feantifasi na mindri yu nanga na uma èn na mindri yu siri nanga en siri. A sa masi yu na a ede èn yu sa masi en na a bakafutu” (Genesis 3:15). Den sani di Kain nanga Abel ben sabi fu Yehovah ben nofo fu yepi den fu kweki wan bun matifasi nanga En.

Kain nanga Abel ben abi na okasi fu prakseri dipi fu a profeititori fu Yehovah èn fu a fasi fa Yehovah de, leki a Gado di e gi sma ala sani na wan lobi-ati fasi. Te den ben o denki dipi fu den sani disi, dan dati ben kan gi den a tranga firi fu wani kisi a bun-ati fu Gado. Ma den ben o kweki a lostu dati trutru? Den ben sa poti prakseri na a firi di ben e pusu den fu anbegi Gado? Den ben sa du muiti fu kisi moro warderi gi yeye sani, so taki den ben o sori bribi na ini Gado?—Mateyus 5:3.

Den tu brada e tyari ofrandi

Baka wan pisi ten, dan Kain nanga Abel tyari ofrandi gi Gado. Kain ben gi Gado froktu fu en gron, èn Abel ben gi wan tu fu den fosiwan fu en ipi (Genesis 4:3, 4). A kan taki den tu man disi ben abi sowan 100 yari na a ten dati, fu di Adam ben abi 130 yari di a kisi en manpikin Set.—Genesis 4:25; 5:3.

Den ofrandi fu den e sori taki Kain nanga Abel ben sabi heri bun taki den ben de sondu sma. Den ben sori tu taki den ben wani fu Gado feni den bun. Awansi fa a no fa, den ben musu sabi san Yehovah ben pramisi ini a tori fu a sneki nanga a Siri fu na uma. Bijbel no e taki omeni muiti Kain nanga Abel meki trutru fu kisi wan bun matifasi nanga Yehovah. Ma a fasi fa Gado piki tapu den ofrandi fu den e tyari kon na krin san ibriwan fu den ben e prakseri.

Son sabiman e taki dati a kan taki Efa ben e si Kain leki a „siri” di ben sa pori a sneki, bika di a ben meki Kain, dan a taki: „Mi meki wan man nanga a yepi fu Yehovah” (Genesis 4:1). Efu na so Kain ben e prakseri tu, dan dati ben de wan fowtu denki. Na a tra sei Abel tyari en ofrandi fu di a ben abi bribi. Iya, „nanga bribi Abel ben òfer wan moro warti ofrandi na Gado leki Kain”.—Hebrewsma 11:4.

Abel ben abi a koni fu man si sani krin èn Kain no ben abi dati. Toku dati no ben de a wan-enkri difrenti na mindri den tu brada disi. Den ben e  difrenti tu na ini a fasi fa den ben e tyari densrefi. Fu dati ede a de so taki „aladi Yehovah ben e luku nanga bun-ati na Abel nanga na ofrandi fu en, a no ben luku nanga nowan bun-ati na Kain èn na den ofrandi fu en”. Soleki fa a sori dan Kain no ben e poti prakseri finifini na a ofrandi fu en. A ben e tyari ofrandi nomo fu di a ben tron leki wan gwenti gi en. Gado no ben wani fu sma anbegi en nomo fu di den musu du dati. Kain ben kon kisi wan ati di e pusu en fu du san ogri, èn Yehovah ben kan si taki Kain ben abi takru prakseri. A fasi fa Kain tyari ensrefi di Gado no teki na ofrandi fu en e sori krin fa a ben e denki trutru. Na presi fu kenki a fasi fa a ben e denki, dan „Kain bigin kisi bigi atibron, èn a fesi fu en ben kon swa” (Genesis 4:5). A fasi fa a tyari ensrefi ben sori krin taki a ben abi na prakseri fu go du ogri nomo.

A warskow di a kisi èn a fasi fa a piki na tapu

Fu di Gado ben sabi a fasi fa Kain ben e denki meki a taigi en: „Fu san ede yu kisi bigi atibron èn fu san ede yu fesi kon swa? Efu yu go du baka san bun, mi no sa teki yu baka dan? Ma efu yu no go du baka san bun, dan sondu e wakti yu na a dromofo èn en tranga lostu e suku yu; èn yu, fu yu sei, sa man basi en?”—Genesis 4:6, 7.

A tori disi e leri wi wan prenspari sani. Te yu luku en bun, dan sondu e wakti na a dromofo èn a e suku fu swari wi. Toku a de so taki Gado gi wi wan fri wani, èn wi kan du san bun, efu wi wani. Yehovah ben gi Kain a kari fu „du baka san bun”, ma a no dwengi en fu kenki. Kain ben du san ensrefi wani.

A Bijbel tori disi e taki go moro fara: „Baka dati Kain ben taigi en brada Abel: ’Meki wi go na gron.’ Na so a ben pasa taki di den ben de na gron, dan Kain ben bigin feti nanga en brada Abel èn ben kiri en” (Genesis 4:8). Na a fasi disi Kain ben tron wan trangayesi, èn ogri-ati kiriman. A no ben sori kwetikweti taki a ben e sari, di Yehovah aksi en: „Pe yu brada Abel de?” Na presi fu dati Kain ben piki na wan mi-no-ke fasi èn sondro lespeki: „Mi no sabi. Na mi musu luku mi brada?” (Genesis 4:9) A bigi lei dati èn a du di a du neleki a no sabi noti, ben tyari kon na krin taki Kain ben de wan tumusi ogri-ati sma.

Yehovah fluku Kain èn a yagi en komoto fu a kontren di de krosibei fu Eden. Gado ben poti wan fluku tapu a gron kaba. Ma neleki fa a sori, dan Kain ben sa firi a fluku dati moro hebi èn a no ben sa man koti furu froktu noso tra nyanyan sani te a ben sa wroko a gron. A ben o tron wan sma sondro wan fasti tanpe èn a ben o tron  wan loweman na grontapu. Di Kain kragi fu a hebi strafu di a ben o kisi, dan a no kragi fu di a ben sari taki a kiri en brada. Na presi fu dati a ben frede taki sma ben sa puru atibron na en tapu èn taki den ben sa suku fu kiri en. Yehovah ben gi Kain „wan marki”. Kande a ben de wan seryusu komando di sma ben e hori densrefi na dati. A komando dati ben meki taki tra sma no puru atibron tapu Kain èn taki den no kiri en.—Genesis 4:10-15.

Dan Kain „komoto na fesi Yehovah èn ben go libi na a kondre fu Loweman, na a owstusei fu Eden” (Genesis 4:16). Kain teki wan wefi. Kande a ben de en eigi sisa noso wan pikin fu wan brada noso sisa fu en. Dan a go bow wan foto di a ben kari Heinok, a nen fu en fosi manpikin. Lamèk, di ben de wan bakapikin fu Kain, ben kon abi den srefi ogri-ati fasi leki en fositen tata di ben trangayesi Gado. Ma na ini a Frudu na a ten fu Noa, dan a famirilin fu Kain ben lasi gowe krinkrin.—Genesis 4:17-24.

Sani di a tori disi e leri wi

Den tori fu Kain nanga Abel kan leri wi wan sani. Na apostel Yohanes e gi Kresten a deki-ati fu lobi makandra; „no leki Kain, di komoto na a ogriwan èn ben kiri en brada”. Den ’wroko fu Kain ben ogri, ma di fu en brada ben de regtfardiki’. Yohanes e taki tu: „Ibriwan sma di no lobi en brada kwetikweti, na wan kiriman, èn unu sabi taki nowan kiriman abi têgo libi na ini en fu ala ten.” Iya, a fasi fa wi e libi nanga wi Kresten brada sa abi krakti tapu wi matifasi nanga Gado èn tapu a fasi fa wi libi sa waka na ini a ten di e kon. A no kan taki Gado feni wi bun aladi wi abi bita-ati gi wan Kresten brada fu wi.—1 Yohanes 3:11-15; 4:20.

A no de fu taki dati Kain nanga Abel ben kweki na a srefi fasi. Ma Kain no ben abi bribi na ini Gado. Na presi fu dati a ben sori a fasi fu Didibri, a fosi ’kiriman èn a tata fu lei’ (Yohanes 8:44). A fasi fa Kain ben tyari ensrefi e sori taki ibriwan sma abi na okasi fu teki en eigi bosroiti. A e sori wi tu taki den wan di e bosroiti fu du sondu e drai den baka gi Gado, èn taki Yehovah sa krutu den wan di no e sari kwetikweti fu den ogri di den du.

Na a tra sei, Abel ben sori bribi na ini Yehovah. Fu tru, „nanga bribi Abel ben òfer wan moro warti ofrandi na Gado leki Kain, èn nanga a bribi dati kotoigi ben gi taki a ben de regtfardiki, fu di Gado [srefi] ben gi kotoigi fu den presenti di a ben gi”. Na nowan presi ini Bijbel wi kan leisi fu sani di Abel ben taki di a ben de na libi. Toku „a e taki ete” nanga yepi fu a bribi fu en di de wan bun eksempre gi wi.—Hebrewsma 11:4.

Abel ben de a fosiwan fu wan heri ipi sma di tan hori den soifri retifasi. Yehovah no frigiti a brudu fu Abel di ’e bari kari komoto na a gron’ (Genesis 4:10; Lukas 11:48-51). Efu wi e sori a srefi bribi leki di fu Abel, dan wi sa kisi wan bun matifasi nanga Yehovah tu; wan matifasi di sa tan.

[Faki na tapu bladzijde 22]

A GRONMAN NANGA A SKAPUMAN

Fu sensi a bigin Gado ben gi Adam a frantwortu fu wroko a gron èn fu sorgu gi den meti fu grontapu (Genesis 1:28; 2:15; 3:23). Kain ben tron wan gronman, èn Abel tron wan skapuman (Genesis 4:2). Den sma fu owruten ben e nyan soso froktu nanga gruntu teleki a frudu ben kon. Fu san ede den ben e kweki skapu dan?—Genesis 1:29; 9:3, 4.

Efu skapu musu kon furu èn efu den musu gro bun, dan den abi a sorgu fu libisma fanowdu. A wroko di Abel ben e du e sori krin taki libisma ben e sorgu gi den meti disi fu sensi a bigin fu a libisma historia. Den Buku fu Bijbel no e taki efu den fosi libisma ben e dringi a merki fu den meti. Ma a no de fu taki dati srefi sma di no e nyan meti kan abi a wiwiri fu den skapu fanowdu. Èn te den skapu dede dan difrenti sani de di sma kan du nanga den skapu-buba. Prakseri taki fu kan weri krosi gi Adam nanga Efa, dan Yehovah ben meki ’langa krosi fu meti buba gi den’.—Genesis 3:21.

Wi no sabi a fini fu a tori, ma awansi fa no fa, a kan taki, Kain nanga Abel ben e wroko makandra na ini a bigin. Den ben e sorgu gi sani di trawan ini a famiri ben abi fanowdu fu kan weri krosi noso fu kan nyan.

[Prenki na tapu bladzijde 23]

’Den wroko fu Kain ben ogri, ma di fu en brada ben de regtfardiki’