Aksi fu leisiman

A Wet fu Moses ben e tapu krosibei famiriman fu trow nanga makandra. A Wet dati de gi Kresten na ini a ten disi tu?

A Wet di Yehovah ben gi den Israelsma no e taki finifini fa sma ben musu hori trow-oso èn san den ben musu du te den wani trow. Ma a e taki krin sortu sma no ben musu trow nanga makandra kwetikweti. Fu eksempre Lefitikus 18:6-20 e taki krin fu a trow di „krosibei famiriman” no ben musu trow nanga makandra. Den tekst dati e taki finifini san sma musu sabi fu a tori disi. Den e sori krin sortu krosibei famiriman no musu abi seks demakandra. A no de fu taki dati Kresten no de na ondro a Wet fu Moses èn den no abi fu hori densrefi na den komando fu a Wet dati (Efeisesma 2:15; Kolosesma 2:14). Ma disi no wani taki dati Kresten no abi fu broko den ede nanga a pisi tori disi, te den musu bosroiti nanga suma den o trow. Difrenti sani de di e meki taki den no kan denki na so wan fasi.

Na a fosi presi, lanti poti wet di e taki efu krosibei famiriman kan trow nanga makandra. Moro furu a de so taki wan Kresten musu hori ensrefi na den wet fu a kondre pe a e libi (Mateyus 22:21; Romesma 13:1). A no de fu taki dati na difrenti presi yu sa abi difrenti wet. Na ini a ten disi, furu fu den wet di abi fu du nanga a tori disi e tapu sma di de krosibei famiriman fu trow nanga makandra, fu di dati kan abi takru bakapisi gi den pikin di den sa meki. Furu sma sabi taki efu krosibei famiriman meki pikin, dan furu tron den pikin dati kan kon siki noso malengri. Fu di Kresten e frustan den sani disi èn fu di den musu „saka densrefi na ondro den hei tirimakti”, meki den wan di wani trow, e gi yesi na den wet di a kondre poti na ini trow afersi.

Wan tra sani di wi musu hori na prakseri na a fasi fa den sma fu a presi pe wi e libi e denki. San den e si leki sani di fiti noso sani di no fiti. Pikinmoro ala kulturu abi markitiki nanga gwenti di e tapu krosibei famiriman fu trow nanga makandra. Fu dati ede den sma fu den kulturu dati e krutu den sortu libi dati krinkrin, leki wan sani di no fiti kwetikweti. Na difrenti presi sma kan si den sortu libi disi na difrenti fasi. Toku The Encyclopædia Britannica e taki: „Moro furu a de so taki, efu tu sma de trutru krosibei famiriman fu makandra, dan tra sma e krutu seks demakandra fu den tu sma dati moro hebi. Sma e si a libi dati leki wan sani di no fiti kwetikweti, noso leki wan sani di den no kan gi trawan deki-ati fu go du.” Sobun, srefi te tu sma a no tumusi krosibei famiriman fu makandra, dan toku wan Kresten no wani du sani di kan meki a gersi leki a no e hori na prakseri san na den gwenti fu a presi pe a e libi noso fa sma fu a libimakandra e denki fu a tori. Na so wan fasi wi no e tyari syen kon tapu a Kresten gemeente noso tapu a nen fu Gado.—2 Korentesma 6:3.

San wi no musu frigiti na a konsensi di Gado gi wi. Ala libisma abi wan firi fu san reti èn san kruktu, san bun èn san ogri (Romesma 2:15). Efu a konsensi fu wan sma no pori fu di a e libi wan doti libi, dan a konsensi kan piki a sma te wan sani bun, èn te wan sani no fiti, noso efu a no bun kwetikweti. Yehovah ben sori go na a tru tori dati di a ben gi den Israelsma a wet fu en di ben e tapu krosibei famiriman fu trow nanga makandra. Wi e leisi drape: „Soleki fa a kondre Egepte e du, pe unu ben libi, unu no musu du; èn soleki fa a kondre Kanan e du, pe mi e tyari unu go na ini, unu no musu du; èn unu no musu waka na ini den wet fu den” (Lefitikus 18:3). Kresten e si a konsensi fu den di de akruderi Bijbel, leki wan warti sani èn den no e gi pasi dati a e kon pori nanga a kron denki di sma fu grontapu abi fu san bun èn san ogri.—Efeisesma 4:17-19.

San wi kon frustan fu a pisi tori disi? Aladi Kresten no de na ondro a Wet fu Moses, toku a konsensi fu den e piki den taki a no bun kwetikweti taki krosibei famiriman e trow nanga makandra. Ini a Kresten libimakandra a no fiti kwetikweti taki wan papa e trow nanga en umapikin, noso taki wan mama e trow nanga en eigi manpikin, noso taki wan brada e trow nanga en eigi sisa. * Efu tu sma di wani trow nanga makandra, de fara famiri fu makandra, dan toku den e hori na prakseri taki lanti poti wet di Kresten musu hori densrefi na dati te den wani trow na lanti. Den e hori na prakseri tu taki markitiki de di sma na ini a libimakandra noso na ini wan spesrutu kulturu e hori densrefi na dati. Wi musu hori den sani disi heri bun na prakseri so taki wi kan du san Bijbel e komanderi wi: „Meki a trowlibi de krin na mindri ala sma.”—Hebrewsma 13:4.

[Futuwortu]