Pikin-nengre koni na den fasi

„BIGISMA abi koni, ma pikin-nengre koni na den fasi”, na so wan odo fu Nigeria e taki. Wan Kresten owruman na ini Nigeria di nen Edwin, ben kon si taki a sani disi na wan tru tori.

Wan dei Edwin ben feni wan isri boksu na ondro wan fu den tafra fu en na oso.

„Suma abi a sani disi?” Na so Edwin ben aksi den pikin fu en.

Emmanuel, di abi aiti yari ben piki: „Na mi abi en.” A ben de wan fokanti isri boksu fu 12 centimeter di ben frustu èn di abi wan olo na tapusei. Emmanuel meki esi fu taki dati a boksu dati ben de fu poti moni gi a wroko di Yehovah Kotoigi e du na heri grontapu. A ben taki moro fara: „Fu di mi no e go na a Kownukondre konmakandra-presi ibri dei, meki mi bosroiti fu meki wan boksu pe mi kan poti a moni di mi e kisi fu bai switisani, te mi no bai sani nanga a moni dati.”

A papa fu Emmanuel ben abi wan boksu na ini na oso pe a ben e poti moni na wan sei fu go na den alayari Distrikt Kongres. Ma di wan sani miti den di na osofamiri no ben fruwakti, dan den ben abi fu go na ini a moni dati. Fu di Emmanuel no ben wani taki den ben musu teki en moni fu go du tra sani nanga en, meki a ben teki wan owru blik. A ben tyari a blik dati go na wan man di e du las wroko, fu a man las a blik tapu. Di a man kon frustan san Emmanuel ben wani du nanga a blik, dan a meki wan boksu gi a boi fu wan tu pisi isri plaat di a no ben abi fanowdu moro. Michael, a pikin brada fu Emmanuel di abi soso feifi yari, ben aksi a man fu meki so wan boksu gi en tu.

Edwin ben fruwondru srefisrefi fu a sani di den pikin ben du. Fu dati ede a ben aksi den fu san ede den ben meki den boksu dati. Michael ben piki: „Mi wani gi moni fu yepi tu!”

Emmanuel nanga Michael abi wan sisa di nen Uchei di abi neigi yari. San a papa nanga mama fu den dri pikin disi no ben sabi na taki den pikin ben e poti pikinso fu a moni di den ben e kisi fu bai switisani na ini den boksu. Fa den du kisi a denki fu du dati? Fu sensi a ten di den pikin ben man hori moni na ini den anu, dan den papa nanga mama leri den fu poti moni na ini a boksu na a Kownukondre konmakandra-presi pe sma e poti friwani moni. A no de fu taki dati den pikin ben du san den ben leri.

Di den boksu ben kon furu, dan den ben koti den opo. A moni di den pikin ben kibri ben de ala nanga ala sowan 3,13 Amerkan dala. Te yu luku en bun dan a moni di den yongu pikin disi poti na wan sei furu srefisrefi, fu di furu sma na ini a kondre dati no e meki moro leki 300 Amerkan dala na ini wan heri yari. Nanga yepi fu den sortu friwani moni disi Yehovah Kotoigi man du a wroko fu den now na ini sowan 235 kondre na heri grontapu.