Yu na wan fu den sma di Gado lobi?

„A sma di abi den komando fu mi èn e hori den, en na a sma di lobi mi. Èn a sma di lobi mi, a Tata fu mi sa lobi en.”​—YOHANES 14:21.

1, 2. (a) Fa Yehovah sori taki a lobi a libisma famiri? (b) San Yesus seti tapu a neti fu 14 Nisan 33 G.T.?

YEHOVAH lobi den libisma di a meki. Fu taki en leti, a lobi a libisma famiri „sote, taki a ben gi en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi” (Yohanes 3:16). A ten e doro taki tru Kresten musu hori a Memrefesa fu a dede fu Krestes. Fu dati ede, den musu sabi moro leki oiti bifo, taki Yehovah „ben lobi wi èn ben seni en Manpikin kon leki wan sun-ofrandi gi wi sondu”.—1 Yohanes 4:10.

² Tapu a neti fu 14 Nisan 33 G.T., Yesus nanga den 12 apostel fu en ben kon makandra na Yerusalem na ini wan tapusei kamra. Drape den ben hori a Paskafesa, fu memre a dei di Gado ben frulusu den Israelsma komoto na Egepte (Mateyus 26:17-20). Baka di den ben hori a Dyu fesa disi, dan Yesus seni Yudas Iskariot gowe, èn baka dati a nyan èn dringi nanga den disipel fu en. Den ben musu tan memre na okasi disi ala yari, èn now wi sabi a seti disi leki a Kresten Memrefesa fu a dede fu Krestes. * Di Yesus ben nyan makandra nanga den 11 apostel di ben tan abra, dan a ben gebroiki brede sondro srudeki èn sosrefi redi win. Den sani disi ben prenki a skin nanga a brudu fu en. Den skrifiman fu den fosi dri Evangelietori, namku Mateyus, Markus nanga Lukas, e fruteri finifini san Yesus ben du a neti dati. Na apostel Paulus e du dati tu, èn a e kari na okasi dati „na avondmaal fu Masra.—1 Korentesma 11:20; Mateyus 26:26-28; Markus 14:22-25; Lukas 22:19, 20.

3. Fa a tori fu na apostel Yohanes e difrenti nanga di fu den tra apostel te a e fruteri fu den lasti yuru di Yesus ben de nanga den disipel fu en?

³ Te yu luku en bun, dan na apostel Yohanes no taki noti fu a langa di den apostel ben langa a brede nanga a win gi makandra. Kande a no ben taki fu dati, fu di na a ten di a ben skrifi na Evangelietori fu en (wan sani fu 98 G.T.), den fosi Kresten ben gwenti kaba fu du den sani disi (1 Korentesma 11:23-26). Ma nanga yepi fu santa yeye, Yohanes wawan meki wi kon sabi wan tu tumusi prenspari sani. Den sani dati abi fu du nanga san Yesus ben taki èn ben du, syatu bifo èn syatu baka di a ben seti a Memrefesa fu a dede fu en. Sowan feifi kapitel fu na Evangelietori fu Yohanes e taki fu den tumusi moi tori disi. Den tori disi e sori krin sortu sma Gado lobi. Meki wi ondrosuku Yohanes kapitel 13 te go miti kapitel 17.

Teki leri fu a trutru lobi di Yesus abi gi sma

4. (a) Fa Yohanes ben poti krakti tapu a prenspari tori di Yesus ben taki nanga den disipel fu en di a ben seti a Memrefesa? (b) Fu san ede Yehovah lobi Yesus so?

⁴ Den feifi kapitel disi, di e sori sortu rai Yesus ben gi den bakaman fu en bifo a gowe, e taki fu wan prenspari sani. A sani dati na lobi. Fu taki en leti, a wortu „lobi” gebroiki na 31 difrenti fasi ini den kapitel disi. Den kapitel disi na den wan-enkri kapitel di e sori so krin o tranga Yesus lobi en Tata, Yehovah, nanga den disipel fu en. A lobi di Yesus abi gi Yehovah, de krin fu si na ini ala den Evangelietori di e taki fu en libi. Ma Yohanes wawan e skrifi dati Yesus ben taki krin: „Mi lobi a Tata” (Yohanes 14:31). Yesus ben taki sosrefi dati Yehovah lobi en, èn a ben tyari kon na krin fu san ede dati de so. A ben taki: „Neleki fa a  Tata lobi mi èn mi lobi unu, na so unu musu tan na ini a lobi fu mi. Efu unu e hori den komando fu mi, dan unu sa tan na ini mi lobi, neleki fa mi hori den komando fu a Tata èn e tan na ini a lobi fu en” (Yohanes 15:9, 10). Iya, Yehovah lobi en Manpikin fu di a e gi yesi dorodoro na En. Disi e leri den bakaman fu Yesus Krestes wan moi sani trutru!

5. Fa Yesus ben sori taki a ben lobi den disipel fu en?

⁵ A trutru lobi di Yesus ben abi gi den bakaman fu en, de krin fu si kaba na a bigin fu a tori fu Yohanes. Drape a e taki fu a lasti konmakandra di Yesus ben abi nanga den apostel fu en. Yohanes ben fruteri: „Now, fu di a ben sabi bifo a paskafesa, taki en yuru ben doro fu gowe libi a grontapu disi fu go na en Tata, meki Yesus, di ben lobi den wan fu en di ben de na grontapu, ben lobi den te na a kaba” (Yohanes 13:1). Tapu na spesrutu neti dati, Yesus sori den na wan heri moi fasi, fa den ben musu dini trawan na wan lobi-ati fasi. A wasi den futu fu den. Aladi ibriwan fu den ben musu de klariklari fu du disi gi Yesus èn gi den brada fu den, toku den no ben du dati. Yesus ben saka ensrefi fu di a ben wasi den futu fu den, èn baka dati a taigi den disipel fu en: „Efu mi, aladi mi na Masra nanga Leriman, wasi un futu, dan unu musu wasi den futu fu makandra tu. Bika mi gi unu na eksempre, so taki unu ben sa du tu neleki fa mi ben du gi unu” (Yohanes 13:14, 15). Tru Kresten musu de klariklari fu dini den brada nanga sisa fu den èn den musu du dati nanga prisiri.—Mateyus 20:26, 27, futuwortu; Yohanes 13:17.

Wi musu gi yesi na a nyun komando

6, 7. (a) Sortu prenspari sani Yohanes e fruteri wi fu a seti fu a Memrefesa? (b) Sortu nyun komando Yesus ben gi den disipel fu en, èn fu san ede a ben de wan nyun komando?

⁶ Na Evangelietori fu Yohanes di e taki fu san ben pasa na ini a tapusei kamra na a neti fu 14 Nisan, na a wan-enkri tori di e sori krin taki Yudas Iskariot gowe libi a kamra dati (Yohanes 13:21-30). Te wi leisi ala den Evangelietori, dan wi e kon si taki Yesus ben seti a Memrefesa fu a dede fu En, baka di a toriman disi gowe. Baka dati a taigi den getrow apostel fu en ala sani di den ben musu sabi, èn a gi den rai nanga tirilin bifo a gowe libi den. Te wi e sreka wisrefi fu go na a Memrefesa, dan wi musu poti ala wi prakseri na den sani di Yesus ben taki na a okasi dati, spesrutu fu di wi trutru wani de wan fu den sma di Gado lobi.

⁷ A fosi komando di Yesus ben gi den disipel fu en, baka di a ben seti a Memrefesa fu a dede fu en, ben de wan nyun komando. Yesus ben taki: „Mi e gi unu wan nyun komando, taki unu lobi makandra; neleki fa mi lobi unu, taki unu lobi makandra tu. Nanga disi ala sma sa sabi taki unu na mi disipel, efu unu abi lobi na un mindri” (Yohanes 13:34, 35). Fu san ede disi ben de wan nyun komando gi den? Yesus ben tyari disi kon na krin moro lati a neti dati. A ben taki: „Disi na mi komando, taki unu lobi makandra neleki fa mi lobi unu. Nowan sma abi moro lobi leki a disi, taki wan sma musu gi en sili abra gi a bun fu den mati fu en” (Yohanes 15:12, 13). A Wet fu Moses ben komanderi den Israelsma fu ’lobi a sma na den sei leki densrefi’ (Lefitikus 19:18). Ma a komando fu Yesus ben wani taki moro. Kresten ben musu lobi makandra leki fa Krestes lobi den. Dati wani taki dati den musu de klariklari fu dede gi den brada nanga sisa fu den.

8. (a) San wan sma di e gi ensrefi fu dini trawan na wan lobi-ati fasi, kande ben sa musu du leki bakapisi fu dati? (b) Fa Yehovah Kotoigi e gi densrefi na wan lobi-ati fasi na ini a ten disi?

⁸ A ten fu a Memrefesa na a yoisti ten fu ondrosuku wisrefi. Ibriwan fu wi, sosrefi a heri gemeente, musu ondrosuku ensrefi, fu si efu wi lobi trawan trutru soleki fa Krestes lobi wi, bika  disi na wan prenspari fasi fa sma kan si taki wi na tru Kresten. Kande wan Kresten di e gi ensrefi fu dini trawan na wan lobi-ati fasi, ben sa musu dede gi den brada nanga sisa fu en, na presi taki a tori den. Son leisi dati pasa trutru. Ma nofotron a de so, taki wi musu de klariklari fu poti wi eigi afersi na wan sei, fu man yepi èn dini den brada nanga sisa fu wi èn sosrefi tra sma. Na apostel Paulus ben gi wan tumusi moi eksempre fa fu sori a lobi disi (2 Korentesma 12:15; Filipisma 2:17). Na heri grontapu, sma sabi Yehovah Kotoigi leki sma di e gi densrefi fu yepi den brada nanga sisa fu den èn sosrefi tra sma. Boiti dati, den e fruteri trawan a waarheid fu Bijbel tu. *—Galasiasma 6:10.

Matifasi di wi musu warderi srefisrefi

9. San wi e prisiri fu du, fu di wi no wani lasi a warti matifasi di wi abi nanga Gado èn nanga en Manpikin?

⁹ Nowan tra sani warti moro leki a lobi di Yehovah nanga en Manpikin, Krestes Yesus lobi wi. Ma fu man abi èn firi a lobi disi, dan wi musu du wan sani. Di Yesus ben de nanga den disipel fu en a lasti neti dati, dan a taki: „A sma di abi den komando fu mi èn e hori den, en na a sma di lobi mi. Èn a sma di lobi mi, a Tata fu mi sa lobi en, èn mi sa lobi en èn na wan krin fasi mi sa sori misrefi na en” (Yohanes 14:21). Fu di wi e si a matifasi nanga Gado èn nanga en Manpikin leki wan warti sani, meki wi e prisiri fu gi yesi na den komando fu den. Dati wani taki dati wi e prisiri tu fu gi yesi na a nyun komando di wi kisi fu gi wisrefi fu dini trawan na wan lobi-ati fasi. Na so a de tu nanga a komando di Krestes ben gi baka di a ben kisi wan opobaka. Yesus ben taigi wi fu „preiki gi a pipel èn fu gi kotoigi dorodoro”, aladi wi e du muiti fu „meki disipel” fu den sma di e teki a bun nyunsu.—Tori fu den Apostel 10:42; Mateyus 28:19, 20.

10. Sortu warti matifasi den salfuwan nanga den „tra skapu” kan abi?

¹⁰ Moro lati a neti dati, Yesus ben piki wan aksi di a getrow apostel Yudas (Tadeyus) ben poti gi en. Yesus ben piki en taki: „Efu wan sma lobi mi, dan a sa hori a wortu fu mi, èn mi Tata sa lobi en, èn wi sa kon na en èn sa go tan nanga en” (Yohanes 14:22, 23). Salfu Kresten di kisi a kari fu tiri nanga Krestes na hemel, abi wan heri bun matifasi nanga Yehovah èn nanga en Manpikin, aladi den de na grontapu ete (Yohanes 15:15; 16:27; 17:22; Hebrewsma 3:1; 1 Yohanes 3:2, 24). Ma den „tra skapu” di e wroko makandra nanga den èn di abi a howpu fu libi fu têgo na grontapu, kan abi wan warti matifasi tu nanga a „wán skapuman” fu den, Yesus Krestes, èn nanga a Gado fu den, Yehovah, efu den e gi yesi na den.—Yohanes 10:16; Psalm 15:1-5; 25:14.

„Unu no de wan pisi fu grontapu”

11. Sortu seryusu warskow Yesus ben gi den disipel fu en?

¹¹ Na a lasti konmakandra disi di Yesus ben abi nanga den getrow disipel fu en bifo a dede, dan a gi den wan seryusu warskow: Efu Gado lobi wan sma, dan grontapu no sa wani si a sma dati na ai. Yesus ben taki: „Efu grontapu no wani si unu na ai, dan unu sabi taki a no ben wani si  mi na ai fosi, bifo a no ben wani si unu na ai. Efu unu ben de wan pisi fu grontapu, dan grontapu ben sa lobi srefisrefi san na fu en. Now fu di unu no de wan pisi fu grontapu, ma mi teki unu na grontapu, meki grontapu no wani si unu na ai. Hori a wortu na prakseri di mi taigi unu: Wan srafu no bigi moro en masra. Efu den frufolgu mi, dan den sa frufolgu unu tu; efu den hori densrefi na mi wortu, dan den sa hori densrefi na di fu unu tu” (Yohanes 15:18-20).

12. (a) Fu san ede Yesus ben warskow den disipel fu en taki grontapu no ben sa wani si den na ai? (b) San wi musu prakseri fu di a ten e doro fu hori a Memrefesa?

¹² Yesus ben gi a warskow disi, so taki den 11 apostel disi èn sosrefi ala tra Kresten, no ben o brokosaka èn drai baka gi Gado fu di grontapu no wani si den na ai. A ben taki moro fara: „Mi taigi unu den sani disi, so taki unu no e naki futu. Den sa trowe unu komoto na a snoga. Fu taki en leti, a yuru e doro te ibri sma di kiri unu sa denki taki a du wan santa diniwroko gi Gado. Ma den sa du den sani disi, fu di den no kon sabi a Tata èn fu di den no kon sabi mi” (Yohanes 16:1-3). Wan buku di e taki fu Bijbel wortu, e tyari kon na krin taki a wortu di vertaal dyaso leki „naki futu” wani taki dati „wan sani e meki taki wan sma e bigin lasi frutrow na ini wan trawan di a ben e frutrow èn ben e arki fosi, èn a e drai baka gi a sma dati”. A wortu disi wani taki sosrefi dati „wan sani e meki taki wan sma e fadon gowe”. Fu di a ten e doro taki wi musu hori a Memrefesa, meki wi alamala musu poti prakseri na a libi fu getrow Kresten fu owruten èn fu a ten disi, so taki wi kan du neleki den sma disi di ben tanapu kánkan ondro tesi. No gi pasi taki gens noso frufolgu e meki yu drai baka gi Yehovah nanga Yesus, ma teki a fasti bosroiti fu frutrow den èn fu arki den.

13. San Yesus ben aksi gi den bakaman fu en, di a ben begi en Tata?

¹³ Bifo Yesus ben gowe libi a tapusei kamra na ini Yerusalem, dan a begi wan lasti leisi. Na ini a begi disi a taigi en Tata: „Mi gi den a wortu fu yu, ma grontapu no ben wani si den na ai, bika den no de wan pisi fu grontapu, neleki fa mi no de wan pisi fu grontapu. Mi e begi yu, fu no teki den puru na grontapu, ma fu luku den fu na ogriwan ede. Den no de wan pisi fu grontapu, neleki fa mi no de wan pisi fu grontapu” (Yohanes 17:14-16). Wi kan de seiker taki Yehovah e sorgu den wan di a lobi, fu gi den krakti aladi den e hori densrefi aparti fu grontapu.—Yesaya 40:29-31.

Tan na ini a lobi fu a Tata èn na ini a lobi fu a Manpikin

14, 15. (a) Nanga san Yesus ben agersi ensrefi fu sori taki a de heri tra fasi leki sortu ’werdri droifibon’? (b) Suma na „den taki” fu „a tru droifibon”?

¹⁴ Di Yesus ben de en wawan nanga den getrow disipel fu en tapu a neti fu 14 Nisan, dan a agersi ensrefi nanga „a tru droifibon”. Na so fasi a sori taki a ben de heri tra fasi leki a ’werdri droifibon’ fu Israel di no ben tan getrow. A ben taki: „Mi na a tru droifibon, èn mi Tata na a sma di e kweki droifi” (Yohanes 15:1). Furu hondro yari na fesi, a profeiti Yeremia ben skrifi den wortu disi di Yehovah ben taigi a trangayesi pipel fu en: „Mi ben prani yu leki wan redi droifibon di ben bun srefisrefi . . . Fa a du kon taki unu kenki kon tron den werdri pransun fu wan  freimde droifibon gi mi?” (Yeremia 2:21) Èn a profeiti Hosea ben skrifi: „Israel na wan werdri droifibon. A e meki froktu gi ensrefi nomo. . . . Den kon abi hoigrifasi na ini den ati.”—Hosea 10:1, 2.

¹⁵ Israel no ben e meki froktu fu tru anbegi. Na presi fu dati, Israel ben fadon komoto na bribi èn a ben e meki froktu gi ensrefi nomo. Dri dei bifo a lasti konmakandra di Yesus ben abi nanga den getrow apostel fu en, a ben fruteri den Dyu fesiman di abi hoigrifasi: „Mi e taigi unu: ’Den sa teki a kownukondre fu Gado puru fu unu èn den sa gi en na wan nâsi di e meki den froktu fu en’” (Mateyus 21:43). A nyun nâsi dati na a „Israel fu Gado”. A abi 144.000 memre di de salfu Kresten, èn Bijbel e agersi den nanga „den taki” fu „a tru droifibon”, Krestes Yesus.—Galasiasma 6:16; Yohanes 15:5; Openbaring 14:1, 3.

16. San Yesus ben taigi den 11 getrow apostel fu du? San wi kan taki fu a getrow fikapisi na ini a ten disi fu a kaba?

¹⁶ Yesus ben taigi den 11 apostel di ben de na ini a tapusei kamra nanga en: „Ibri taki na ini mi di no e meki froktu, a e puru, èn ibri taki di e meki froktu, a e krin, so taki a kan meki moro froktu. Tan na ini wánfasi nanga mi, èn mi sa tan na ini wánfasi nanga unu. Neleki fa a taki no man meki froktu fu ensrefi efu a no e tan na ini a droifibon, na so unu no man du dati tu, efu unu no e tan na ini wánfasi nanga mi” (Yohanes 15:2, 4). A disiten historia fu Yehovah en pipel e sori taki a getrow fikapisi fu salfu Kresten tan na ini wánfasi nanga na Edeman fu den, Krestes Yesus (Efeisesma 5:23). Den gi Gado okasi fu krin den èn fu koti den werdri taki fu den puru (Maleaki 3:2, 3). Sensi 1919, den meki bun furu Kownukondre froktu. Na a fosi presi, den tyari tra salfu Kresten kon na wan èn, sensi 1935, den tyari wan „bigi ipi” sma kon na wan sosrefi di e wroko makandra nanga den. A lasti grupu disi e kon bigi moro nanga moro.—Openbaring 7:9; Yesaya 60:4, 8-11.

17, 18. (a) Sortu wortu fu Yesus e yepi den salfuwan nanga den tra skapu fu tan na ini a lobi fu Yehovah? (b) Fa a sa de wan yepi gi wi te wi e go na a Memrefesa?

¹⁷ Den wortu di Yesus ben taki moro fara, e fiti ala den salfu Kresten èn sosrefi den sma di e wroko makandra nanga den: „Mi Tata e kisi glori te unu e tan meki furu froktu èn e sori taki unu na mi disipel. Neleki fa a Tata lobi mi èn mi lobi unu, na so unu musu tan na ini a lobi fu mi. Efu unu e hori den komando fu mi, dan unu sa tan na ini mi lobi, neleki fa mi hori den komando fu a Tata èn e tan na ini a lobi fu en.”—Yohanes 15:8-10.

¹⁸ Wi alamala wani tan na ini a lobi fu Gado, èn disi e gi wi a deki-ati fu de Kresten di e meki froktu. Wi e du disi te wi e gebroiki ibri okasi fu preiki a ’bun nyunsu fu a kownukondre’ (Mateyus 24:14). Wi e du ala muiti sosrefi fu sori „a froktu fu a yeye” na ini wi eigi libi (Galasiasma 5:22, 23). Te wi e go na a Memrefesa fu a dede fu Krestes, dan dati sa yepi wi fu tranga a bosroiti di wi teki fu tan na ini a lobi fu Yehovah, bika a fesa disi sa memre wi taki Gado nanga Krestes lobi wi trutru.—2 Korentesma 5:14, 15.

19. Fu sortu yepi wi sa taki na ini na artikel di e kon?

¹⁹ Baka di Yesus ben seti a Memrefesa, a pramisi den getrow bakaman fu en taki a Tata fu en ben o seni wan „yepiman, a santa yeye” gi den (Yohanes 14:26). Na ini na artikel di e kon wi sa ondrosuku fa a yeye disi e yepi den salfuwan nanga den tra skapu fu tan na ini a lobi fu Yehovah.

[Futuwortu]

Aksi fu luku baka san wi leri

• San Yesus ben du fu leri den disipel fu en taki den musu dini trawan na wan lobi-ati fasi?

• Fu san ede a ten fu a Memrefesa na a yoisti ten fu ondrosuku wisrefi?

• Fu san ede wi no musu naki futu fu di Yesus warskow wi, taki grontapu no sa wani si wi na ai èn taki a sa frufolgu wi?

• Suma na „a tru droifibon”? Suma na „den taki”, èn san Gado e fruwakti fu den?

[Aksi fu a tori disi]

[Prenki na tapu bladzijde 15]

Yesus ben sori den apostel fu en na wan heri moi fasi, fa den musu dini trawan na wan lobi-ati fasi

[Prenki na tapu bladzijde 16, 17]

Den disipel fu Krestes e gi yesi na a komando di a gi den, fu gi densrefi fu dini trawan na wan lobi-ati fasi