Kerki nanga lanti na ini Bisantium

A SMA di seti Krestendom ben sori soifri taki wan krinkrin difrenti musu de na mindri den bakaman fu en nanga a libisma famiri di no sabi Gado. Yesus ben taigi den bakaman fu en: „Efu unu ben de wan pisi fu grontapu, dan grontapu ben sa lobi srefisrefi san na fu en. Now fu di unu no de wan pisi fu grontapu, ma mi teki unu puru na grontapu, meki grontapu no wani si unu na ai” (Yohanes 15:19). Di Yesus ben de na grontapu, dan a ben taigi Pilatus di ben de wan tiriman di ben teki presi gi a tirimakti fu a ten dati: „Mi kownukondre no de wan pisi fu a grontapu disi.”—Yohanes 18:36.

Kresten no ben musu meki grontapu afersi puru a prakseri fu den fu a wroko di den ben kisi, fu preiki „te na a moro farawe presi fu grontapu”(Tori fu den Apostel 1:8). Neleki Yesus, den fosi Kresten no ben teki prati na politiek (Yohanes 6:15). A ben de  fu si taki den getrow Kresten no ben e tron tiriman èn den no ben teki frantwortu di ben sori taki den ben e horibaka gi tirimakti. Te fu kaba, wan kenki kon na a sani disi.

„Wan pisi fu grontapu”

Wan pisi ten baka di den lasti apostel dede, dan kerki tiriman bigin kenki a denki di den ben abi fosi taki kerki musu de aparti fu grontapu. Den kerki tiriman disi bigin bribi na ini wan „kownukondre” di no ben de na grontapu wawan, ma di ben de wan pisi fu grontapu sosrefi. Te wi e luku fa kerki nanga politiek ben moksi nanga makandra na ini a Gran Kownukondre Bisantium, dan wi sa man frustan sani moro bun. A Kownukondre Bisantium ben de a Gran Kownukondre Rome na owstusei, èn a mamafoto fu en ben de na Bisantium (now a nen Istanbul).

Na ini a Gran Kownukondre Bisantium, kerki bribi ben abi furu krakti tapu a libi fu sma, èn fu dati ede, a Bisantium Kerki ben abi bigi makti na ini a libimakandra disi. A mamakerki ben de na Bisantium. Panayotis Christou, wan kerki historia skrifiman, ben taki wan leisi: „Den Bisantiumsma ben e bribi taki a gran kownukondre fu den na grontapu ben de wan prenki fu a Kownukondre fu Gado.” Ma den tiriman fu a gran kownukondre disi no ben agri nanga a denki dati ala ten. Leki bakapisi fu dati, dyugudyugu ben de son leisi na mindri Kerki nanga Lanti. The Oxford Dictionary of Byzantium (wan wortubuku) e taki: „Den beskopu fu Konstantinopel [noso Bisantium] ben e tyari densrefi na furu difrenti fasi, den ben du iniwan sani di wan makti tiriman ben wani den fu du . . . , den ben e horibaka gi a kèiser soso fu kisi wini . . . , èn den no ben e frede srefisrefi fu gens a kèiser.”

A beskopu fu Konstantinopel, na edeman fu a Kerki fu Owstusei, ben tron wan makti man. Na en ben e poti sma leki  kèiser, èn fu dati ede a ben e fruwakti taki a kèiser ben o du ala muiti fu horibaka gi den kerkileri di den sma fu a ten dati ben gwenti kaba fu bribi. Boiti dati, a beskopu disi ben gudu srefisrefi, fu di a ben abi a frantwortu fu tiri ala den gudu di a kerki ben abi. Na fu di a beskopu disi ben e tiri den ipi-ipi moniki èn fu di a ben abi krakti tapu den kerkiman, meki a ben abi so furu makti.

A beskopu furu tron ben man du sani tra fasi soleki fa a kèiser ben wani. Efu a ben wani, a ben kan puru a kèiser leki wan memre fu a kerki, èn a ben e du dati na ini a nen fu Gado. Boiti dati, a ben kan gebroiki tra fasi tu fu puru a beskopu.

Fu di tiriman dorosei fu a mamafoto safrisafri ben e lasi a makti fu den, meki den beskopu furu tron ben tron den moro makti sma na ini den foto pe den ben tan. Den ben abi a srefi makti leki den tiriman fu den distrikt, èn densrefi ben yepi fu poti den tiriman disi na wroko. Beskopu ben teki prati na krutu afersi nanga bisnis afersi fu a kerki, ma son leisi den ben e teki prati tu na afersi di no ben abi fu du nanga kerki. Wan tra sani di ben meki tu taki den beskopu ben  abi furu makti, na fu di den ben e tiri tin dusundusun priester nanga moniki.

Politiek afersi nanga simonie

Soleki fa a tori di skrifi na tapusei e sori, dan kerki ben kon moksi dorodoro nanga politiek. Boiti dati, bun furu moni ben de fanowdu fu sorgu a bigi grupu fu kerki tiriman èn fu pai gi den kerki wroko di den ben e du. Furu fu den heihei kerki tiriman ben libi wan trutru gudu libi. Fu di kerki ben e kisi moro nanga moro makti nanga gudu, dan kerki tiriman bigin libi tra fasi leki den apostel. Pôtifasi nanga santafasi no ben de fu feni moro na den mindri. Wan tu sma ben e pai moni fu tron priester noso beskopu, wan sani di sma e kari simonie. Srefi den moro hei kerki tiriman ben gwenti fu du disi. Kerki tiriman ben meki gudusma horibaka gi den, so taki a kèiser ben kan gi den wan moro hei posisi na ini kerki.

Sma ben e pai hei kerki tiriman tyuku tu. A Kèiser Zoe (wan sani fu 978-1050 G.T.), ben meki sma kiri en masra Romanus III, so taki a ben kan trow nanga Micheal IV, a freiri fu en. Fu di a ben wani taki a man disi ben musu tron Kèiser, dan wantewante a seni kari Beskopu Alexius kon na a paleisi. Drape a beskopu kon yere fu a dede fu Romanus èn a kon sabi sosrefi san na uma disi ben wani en fu du. A no ben makriki gi Alexius fu du a sani dati, spesrutu fu di a kerki ben e memre a dede fu Yesus Krestes a neti dati. Toku, a teki den bun furu presenti di a kèiser ben gi en, èn a du san na uma disi ben aksi en fu du.

Den ben musu du san a kèiser ben wani

Na a ten fu a Gran Kownukondre Bisantium, a kèiser ben kan gebroiki a makti di a ben abi fu poti wan sma leki beskopu fu Konstantinopel. Te a kèiser ben gebroiki a makti dati, dan en wawan ben e bosroiti suma ben o tron beskopu èn a ben kan puru wan beskopu tu te a ben wani du dati.

Kèiser Andronicus II (1260-1332) ben puru neigi beskopu baka makandra. A ben puru furu fu den beskopu disi, soso fu poti wan trawan di ben o du soifri san en ben wani. Soleki fa a buku The Byzantines (Den Bisantiumsma) e taki, dan wan beskopu ben skrifi na tapu papira srefi, taki a ben pramisi a kèiser „fu du iniwan sani di a ben wani en fu du, srefi efu a sani dati no ben de akruderi wet, èn a no ben o du no wan enkri sani di a kèiser no ben feni bun”. Tu leisi kèiser ben pruberi fu dwengi a kerki fu du san den ben wani, fu di den meki kerki poti wan manpikin fu den leki beskopu. Kèiser Romanus I ben meki en manpikin, wan boi di ben abi 16 yari nomo, tron beskopu.

Efu a kèiser no ben feni wan beskopu bun, dan a ben kan dwengi en fu saka noso a ben kan taigi a komte fu kerki tiriman fu puru en. A buku Byzantium e skrifi; „Na a ten fu a Gran Kownukondre Bisantium, heihei tiriman nanga a Kèiser moro nanga moro ben e tron den moro prenspari sma di ben e poti trawan leki beskopu.”

A kèiser ben e teki fesi sosrefi na ini den konmakandra fu kerki komte, èn a beskopu ben e horibaka gi en. A ben teki fesi na ini den takimakandra, a ben e taki san a ben denki fu kerkileri, èn a ben e haritaki nanga den beskopu èn sosrefi nanga sma di no ben agri kwetikweti nanga den leri fu a kerki. A ben gi den sma dati a moro hebi strafu, namku, dede na wan postu. A kèiser ben e bosroiti sosrefi sortu wet a komte ben musu teki fu gebroiki na ini kerki. Boiti taki a ben si gensman leki sma di ben wani du en ogri, a ben si den tu leki feanti fu a kerki èn fu Gado. Wan beskopu fu a siksi yarihondro ben taki: „Ibriwan sma na ini a Kerki musu du san a Kèiser wani.” Neleki a beskopu, den hei kerki tiriman di ben e horibaka gi a kèiser no ben e  du noti fu sori taki den no ben agri nanga a kèiser. Den ben abi trikifasi, èn den ben lobi fu teki tyuku.

Fu gi wan eksempre, di Beskopu Ignatius (wan sani fu 799-878 G.T.) ben weigri fu abi demakandra nanga a Fosi Minister Bardas, dan a minister disi no libi a sani disi so. Bardas fruteri a kèiser taki Ignatius ben meki mofo nanga trawan fu du a kèiser ogri èn fu tori en. Den grabu a beskopu disi èn den gi en a komando fu gowe libi a kondre. A minister sorgu taki Photius tron beskopu na presi fu Ignatius. A man disi di no ben de wan hei kerki tiriman, ben kisi a moro hei posisi di wan sma oiti ben kan kisi na ini kerki, èn dati baka siksi dei nomo. Ma Photius ben abi a yeye fasi di wan beskopu ben musu abi? Wan buku e taki dati a ben de wan man „di ben e du ala muiti fu kisi hei posisi, a ben abi bigifasi moro leki iniwan tra sma, èn a ben abi bun furu koni fu politiek”.

Politiek e basi den kerkileri

Furu tron a kèiser ben e gens a kerki na wan kibri fasi. A ben gwenti fu haritaki nanga kerki ini a tori fu kerkileri di ben de kaba èn sosrefi tra kerkileri. Furu fu den kèiser ben poti moro prakseri na politiek afersi, na presi taki den ben teki bosroiti sortu nyun leri a kerki ben musu teki. A ben de so taki a kèiser ben e bosroiti san ben musu de den leri fu a kerki, èn a kerki ala ten ben musu du san en ben wani.

Fu gi wan eksempre, Kèiser Heraclius (575-641 G.T.) ben du bun furu muiti fu seti wan prati di ben kon na ini a kerki. A prati disi ben kon fu di sma ben abi difrenti denki fu a sma di Krestes ben de. A kèiser disi ben frede taki a sani disi ben o tyari prati kon na ini a gran kownukondre fu en di ben abi furu problema kaba. Fu di a ben wani lusu a problema na wan fasi di ben o plisi ala sma, meki a kon nanga wan nyun leri di nen Monothelitisme. * Fu sorgu taki den kondre na a zuidsei fu en gran kownukondre ben e horibaka gi en, dan Heraclius meki Cyrus fu Phasis tron beskopu fu Aleksandria, èn a beskopu disi horibaka gi a nyun leri disi di a kèiser ben wani taki sma ben musu teki now. Boiti taki a kèiser meki Cyrus tron beskopu, a meki a tron hei tiriman tu fu Egepte, èn a ben musu tiri den tra tiriman drape. Cyrus ben e mesbroiki a makti fu en fu kwinsi den kerki tiriman fu Egepte, so taki a moro bigi pisi fu den ben horibaka gi en.

Wan tumusi takru bakapisi

Yesus ben taki na ini wan fu den begi fu en taki den bakaman fu en no ben o de „wan pisi fu grontapu”. Fa a demakandra disi fu kerki nanga lanti ben kan kruderi nanga san Yesus ben taki na ini a begi disi?—Yohanes 17:14-16.

Den sokari Kresten kerki tiriman fu a ten fu Bisantium èn fu a ten baka dati, kisi tumusi takru bakapisi fu di den ben teki prati na den politiek nanga srudati afersi fu grontapu. San den fositen sani disi e leri yu? Gado nanga Yesus Krestes ben feni den tiriman fu a Bisantium Kerki bun?—Yakobus 4:4.

Kerki fesiman di e feti fu kisi posisi en di abi politiek freiri, no yepi a tru Krestendom. A fowtu disi di kerki nanga politiek meki fu moksi nanga makandra, meki taki sma kisi wan takru denki fu a tru bribi di Yesus ben leri. Meki wi teki leri fu den sani di pasa na ini owruten èn meki wi sorgu taki wi noiti e tron „wan pisi fu grontapu”.

[Futuwortu]

[Faki/Prenki na tapu bladzijde 10]

„LEKI WAN GADO DI BEN E WAKA TAPU HEMEL”

Den sani di ben pasa nanga Beskopu Michael Cerularius (wan sani fu 1000-1059) e sori krin fa na edeman fu kerki ben kan wroko makandra nanga lanti, èn nanga sortu marki a ben kan du dati. Baka di Cerularius ben tron beskopu, dan a ben wani kisi wan moro hei posisi. Wan buku e taki dati a ben abi bigifasi, a no ben abi bisi nanga trawan, èn a ben de wan muilek man. A buku e taki moro fara taki „a ben e tyari ensrefi leki wan gado di ben e waka tapu hemel”.

Fu di Cerularius ben wani kisi grani nomonomo, dati meki a tyari wan prati kon na mindri a kerki nanga a pawsu fu Rome na ini 1054, èn a dwengi a kèiser fu horibaka gi en ini a tori disi. Fu di Cerularius ben breiti nanga fa sani ben waka, meki a sorgu taki Micheal VI tron Kèiser èn a yepi en fu tranga a posisi fu en. Wan yari baka dati, Cerularius dwengi a kèiser dati fu saka, èn a poti Isaac Comnenus (wan sani fu 1005-1061) na ini en presi.

A trobi di ben de na mindri den beskopu nanga a gran tirimakti, ben doro en heimarki te fu kaba. Cerularius di ben bribi taki sma ben o horibaka gi en, handri na wan ogri-ati fasi nanga a kèiser. Wan historia skrifiman fu a ten dati ben skrifi: „Di a ben taki na fesi taki a ben o puru a Kèiser, dan a gebroiki wortu di no ben fiti wan beskopu srefisrefi. A ben taki: ’Na mi meki yu tron kèiser, yu don kaw; ma mi sa pori yu libi.’” Ma Isaac Comnenus gi komando fu grabu en, èn fu poti en na strafu-oso. Boiti dati, a beskopu disi kisi a komando fu gowe libi a kondre, èn fu go tan na a Torku èilanti Imbros.

Den eksempre disi e sori omeni problema a beskopu fu Konstantinopel ben kan tyari kon, èn fa a ben kan kakafutu gi a kèiser. Den kèiser furu tron ben kisi fu du nanga den sortu man disi di ben de koni politiekman di ben kan kakafutu gi a kèiser èn sosrefi gi a legre.

[Karta/Prenki na tapu bladzijde 9

(Efu yu wani si pe den sani disi skrifi, luku a tijdschrift)

A heri kontren fu a Gran Kownukondre Bisantium

Rafena

Rome

MASEDONIA

Konstantinopel

Blaka Se

Nisea

Efeise

Antiokia

Yerusalem

Aleksandria

Mindrikondre Se

[Sma di abi a reti fu a karta]

Karta: Mountain High Maps® Copyright © 1997 Digital Wisdom, Inc.

[Prenki na tapu bladzijde 10, 11]

Comnenus

Romanus III (na a leti-anusei)

Michael IV

Kèiser Zoe

Romanus I (na a leti-anusei)

[Sma di abi a reti fu den prenki]

Comnenus, Romanus III, nanga Michael IV: Courtesy Classical Numismatic Group, Inc.; Empress Zoe: Hagia Sophia; Romanus I: Photo courtesy Harlan J. Berk, Ltd.

[Prenki na tapu bladzijde 12]

Heraclius nanga en manpikin

[Prenki na tapu bladzijde 12]

Photius

[Sma di abi a reti fu den prenki]

Heraclius nanga en manpikin: Photo courtesy Harlan J. Berk, Ltd.; all design elements, pages 8-12: From the book L’Art Byzantin III Ravenne Et Pompose